Gāluega 22

1“Te kau uho ma oku tamana Iutaia, fakalogo mai ake ke fai atu taku fakamatalaga, ke kitea ai e koutou e hēai haku mea hehē na fai!” 2I te ki lātou lagona atuga ko Paulo e tautala ake i te gagana Epelu, oi na fakaatili ai to lātou hē piha; ma na fakaauau ai lava te tautalaga a Paulo:

3 # Gāl 5.34-39 “Ko au he Iutaia, na fānau i Taheha i Kilikia, kae ko au na ola ake i kinei i Ieluhalema, ma na akoakogia lelei au e Kamalielu e tuha ai ma te Tūlāfono na tuku mai ki o tātou tupuna, ma ko au e tautua mālohi ki te Atua, e vē ko foki ko koutou uma kua i kinei i te aho nei. 4#Gāl 8.3; 26.9-11Ko au nae fakahāuā lahi ki nā tino na mulimuli ki te Ala,#22.4: Ala Kikila ki te 9.2. ma na feoti ai lava ni tino o ki lātou. Na puke e au nā taulelea vēnā ma fafine ma togi ki te falepuipui. 5E mafai ke fakamāonia e te Ulu Ohitāulaga ma te Taupulega kātoa, te mea tēnei kua lea atu ai au. Na fōki mai e ki lātou ki a te au ni tuhi na tuhi ki nā uho Iutaia i Tamaheko, ma na fano ai au ki kinā ma toku fakamoemoe ke puke e au nā tino iēnei ma noanoa, oi kaumai ai ki Ieluhalema ke fai ai o lātou fakahalaga.

Kua Tautala ia Paulo e uiga ki tona Liliuga ma Mulimuli ki te Aliki

(Gāluega 9.1-19; 26.12-18)

6“Ka koi malaga au i luga o te auala ma kua tafapili atu ki Tamaheko, i te taimi tēnā pe ko te tūpou o te la, kae nā lava e teki ko he mālamalama lahi mai te lagi kua huhulu ifo fakatāmilo ia te au. 7Na pakū au ki te kelekele ma kō lagona he leo e lea vē mai, ‘Haulo, Haulo! He ā te kua fakahāuā mai ai koe ki a te au?’ 8Oi fehili ai au, ‘Te Aliki, ko ai koe?’ Oi vāgana vē mai ai, ‘Ko au ko Iehu te Nahaleta, tē kua fakahāuā koe ki ei.’ 9Na kitea e nā taulelea nae malaga fakatahi ki mātou te mālamalama, kae e hēki ki lātou lagona te leo o te tino na tautala mai ki a te au. 10Oi fehili ai au, ‘Te Aliki, he ā ta aku e tatau ke fai?’ oi vāgana vē mai ai te Aliki ki a te au, ‘Tū la ki luga oi fano ki Tamaheko. I kinā ka taku atu ai ki a te koe nā mea uma kua fuafua e te Atua ke kē faia.’ 11Na tāuaho oku mata ona ko te mālohi o te pupula o te mālamalama, oi na takitaki ai au i toku lima ki Tamaheko e oku hoa.

12“Nae i te kakai tēnā he tino e igoa ki a Anania, he tino lotu nae uhiuhitaki ki te tātou Tūlāfono, ma nae fakaaloalogia lahi lele e nā tino Iutaia e nonofo i kinā. 13Na hau ki a te au, oi tū mai i oku tafa kae lea vē mai, ‘Haulo toku uho, pupula loa ō mata!’ Ko te taimi lava tēnā na toe pupula ai oku mata, ma na kikila ai au ki a te ia. 14Oi lea vē mai ai, ‘Ko te Atua o nā tupuna o ki tātou, kua ia filifiliagia koe ke kē iloa te mea e fofou ia ki ei, ke kē kitea tana Kaukauna āmiotonu, ma ke kē lagona tona lava leo e tautala atu ki a te koe. 15Auā ko koe ka fai ma ana molimau ke takutaku atua ki nā tino uma o te lalolagi, nā mea kua kikila ma fakalogo koe ki ei. 16He ā la te koi fakatali ai koe? Tū loa ki luga ma papatihogia ma tatalo ki te Aliki ke fakamamā koe mai au agahala.’

Kua Fakailoa e te Aliki ki a Paulo ke folafola te Tala Lelei ki Tagata Nukukehe

17“Na toe foki au ki Ieluhalema, ma ka koi tatalo au i loto o te Mālumalu, kae kō kitea he fakaaliga 18ko te Aliki e vāgana vē mai ki a te au, ‘Faivave ma fano kehe loa mai Ieluhalema, auā ko nā tino i kinei e hē ki lātou taliagia tau molimau e uiga ki a te au.’ 19Oi tali vē atu ai au, ‘Te Aliki, e iloa lelei lava e ki lātou ko au nae fano ki nā hūnako oi puke ma kini nā tino kua talitonu atu ki a te koe. 20#Gāl 7.58Ma i te tāmatega o Hetefano, tē nae molimau ki a te koe, ko au nae i ei ma na kau fakatahi au ma ki lātou ke tāmate, ma na kō kikilagia nā kofutatao o nā tino na ki lātou tāmatea ia Hetefano.’ 21Oi vāgana mai ai te Aliki ki a te au, ‘Fano loa, auā ko koe ka uga kehe e au ke fano ki he mea mamao ki nā tino nukukehe.’ ”

22Ko nā tino nae fakalogologo ki a Paulo ke pa lava ki te taimi na fai ai tana fakakupuga tēnei; kae meake kua kāmata oi taukalalaga leo lahi vē, “Kave kehe te tagata tēnā ma tāmate! E hē tatau ke toe ola!” 23Na taukekē leo lahi lele nā tino ma fetogi o lātou kofu ki luga, ma togi nā pefu ki luga o te ea. 24Oi fakatonu ai e te takitakikau Loma nā fitafita ke kave ia Paulo ki loto o te olo, ma ke kini kae ke iloa ai pe ko he ā tonu te taukekē vē ai nā tino Iutaia ki ei. 25Kae i te noanoaga o Paulo e ki lātou ke kini, kae lea vē atu ia Paulo ki te ofiha nae tū i kinā, “E fakataga i te tūlāfono ke kini e koe he tagatānuku Loma ka ko hēki faia hona fakamahinoa ke iloa ai pe hala?”

26Kua lagona atu e te ofiha te kupu tēnei, oi fano ai oi fehili vē ki te takitakikau, “He ā ta koe kua fai? Ko te tino tēia ko he tagatānuku Loma!”

27Oi na fano ai te takitakikau ki a Paulo ma fehili vē atu ki ei, “Lea mai ake, ko koe he tagatānuku Loma?”

Oi tali atu ai ia Paulo, “Io.”

28Kua lea atu te takitakikau, “Ko toku tagatānuku Loma na totogi i he tupe lahi lele.”

Kua tali atu ia Paulo, “Ka ko au na fānau mai lava he tagatānuku ona ko oku mātua ni tagatānuku foki.”

29I te taimi lava tēnā, ko nā taulelea na tuku e ki lātou fakamahinoa ia Paulo kua hōhō kehe mai ia te ia; ma ko te takitakikau kua mataku i te ia hāfiaga ko Paulo ko he tagatānuku Loma kae ko tēia kua ia noanoagia i nā filifili.

Kua Kave ia Paulo ki mua o te Taupulega

30Na fia iloa tonu e te takitakikau te mea kua mōlia ai ia Paulo e nā tino Iutaia; ma i te aho alafaki, oi fakatonu ai e ia ke tatala kehe na filifili o Paulo, ma fakatonu te kau ohitāulaga hili, ma te Taupulega kātoa ke fai ha lātou fono. Oi kave ai e ia ia Paulo oi fakatū i mua o ki lātou.

Currently Selected:

Gāluega 22: TNT

Highlight

Copy