Gāluega 21

Kua Fano ia Paulo ki Ieluhalema

1Kua fakamāvae ki mātou ki a te ki lātou, oi folau ai loa ki mātou. Na tele hako atu to mātou vaka oi pa atu ai ki Kohi; i te aho na hohoko ai na taunuku ai ki mātou ki Lotono, oi folau atu ai ki mātou mai kinā ki Patala. 2Ko kinā na ki mātou maua ai he vaka e tuku e malaga ki Foinike, oi hohopo ai ki mātou ki luga ma folau ai. 3Kua pa atu ki mātou ki he kogāmoana e kitea atu ai ia Kupulona, oi fakatū ai to mātou vaka ki haute mai kinā agai atu ki Hulia. Na olo ki mātou ki gāuta i Tulo, ma ko kinā na tuku e laku ake ai ki gāuta te uta a te vaka. 4Na fetaui ki mātou i kinā ma ni tino Kelihiano, oi nonofo ai ki mātou ma ki lātou, i he vaiaho. E ala i te mana o te Agaga, na lea ai ki lātou ki a Paulo ke nahe fano ki Ieluhalema. 5Kae ina kua pa ki te aho na tuku e toe folau ai ki mātou, oi olo kehe ai ki mātou. Ko te kau Kelihiano uma lele, ma a lātou āvaga ma a lātou fānau, na olo fakatahi ki mātou ki fafo o te kakai ki te matāfaga, ma i kinā na tōtutuli ai ki mātou uma ki lalo ma tatalo. 6Oi fakamāvae ai loa ki mātou ma hohopo ai ki mātou ki luga o te vaka, ka kua toe foki ki lātou ki o lātou kāiga.

7Na fakaauau te mātou malaga, ma folau atu mai Tulo ki Pitolemaia. Ko kinā na feiloaki ai ki mātou ma te kau Kelihiano, ma nonofo ai ki mātou ma ki lātou i he aho e fokotahi. 8#Gāl 6.5; 8.5I te aho alafaki na olo kehe ai ki mātou, ma taunuku atu ki Kaihaleia. Na nonofo ki mātou i kinā i te fale o Filipo te tino tālaki o te Tala Lelei, ko hētahi ia o te toka fitu taulelea na filifilia ke fai ma fehoahoani i Ieluhalema. 9E toka fa ona afafine ko hēki fakaipoipo, nae folafola e ki lātou te fekau a te Atua. 10#Gāl 11.28Kua lua o mātou aho i kinā kae pa ifo he pelofeta mai Iutea e igoa ki a Akapo. 11Kua hau ki a te ki mātou ma tago ki te lītua o Paulo, ma noanoa ai lava e ia ona vae ma ona lima, oi lea vē ai, “Ko tēnei te vāgana a te Agaga Paia: Ko te tino e o ia te lītua tēnei, ka noanoa vēnei lava e tagata Iutaia i Ieluhalema, oi tukulima atu ai e ki lātou ki tagata nukukehe.”

12Kua fakalogo atu ki mātou ki te mea tēnei, oi tauanau ai e ki mātou ia Paulo ke nahe fano ki Ieluhalema. 13Kae kua vēnei mai tana tali, “He ā te faitatagi vēnā ai koutou ma fai ai ma mea e vāivai ai toku loto? Ko au kua uma te hāuni, e hē gata ke noanoa i Ieluhalema, kae ke mate foki i kinā mo te Aliki ko Iehu.”

14E hēki mafai e ki mātou oi hui te māfaufau o Paulo, oi e hēki toe taumafai ki mātou ma na vē atu ai ta mātou kupu, “Ke fai te finagalo o te Aliki.”

15Na nonofo ki mātou i kinā mo hina taimi, oi hāuni ai loa a mātou mea ma olo ki Ieluhalema. 16Ko iētahi tino o te kau hoko mai Kaihaleia na olo fakatahi ki mātou, ma na ki lātou kavea ki mātou ki te fale o te tino na tuku e olo ki mātou oi nonofo ai#21.16 na ki lātou kavea ki mātou ki te fale o te tino na tuku e olo ki mātou oi nonofo ai; pe na ōmamai ma ki lātou te tino e o ia te fale na tuku e olo ki mātou ki ei. — ko Manahoni, e hau i Kupulona, na kavea ma Kelihiano i nā pōpō fou o te gāluega.

Kua Āhiāhi ia Paulo ki a Iakopo

17I te taunuku atuga o ki mātou ki Ieluhalema, na tali fiafia mai ki mātou e te kau Kelihiano. 18I te aho alafaki na olo ai ki mātou ma Paulo oi āhi ia Iakopo; ma nae i ei fakatahi uma ai ma nā toeaina o te Ekalehia. 19Na fakafeiloaki atu ki lātou e Paulo, ma kavatu ki a te ki lātou he līpoti kātoatoa o nā mea uma na fai e te Atua ki tagata nukukehe, e ala i tana gāluega. 20Ina kua uma to lātou fakalogologo ki te līpoti, oi viviki uma lele ai ki lātou ki te Atua. Oi lea vē atu ai ki lātou, “Te uho, e kē kitea e faitau afe ia tagata Iutaia kua liliu ma kavea ma Kelihiano, ma te mālohi foki o to lātou talitonu ki te Tūlāfono a Mohe. 21Kua uma te ki lātou iloa tau gāluega e fai i te akoakoga o tagata Iutaia uma e aumau i nā nukukehe, ke nahe toe mulimuli ki te Tūlāfono a Mohe, ma ke nahe toe pelitomea a lātou fānau, pe tauhihi ki nā tū faka-Iutaia. 22E hē mafai ke hē ki lātou iloa ko koe kua pa mai. He ā nei te ka fai? 23#Nūm 6.13-21Ko tēnei la te mea e fofou ki mātou ke kē faia. E toka fa ia taulelea i kinei kua uma te fai o a lātou tautōga. 24Fano i te lātou kau ma kau fakatahi ma ki lātou i te hāuniga mo te fakamamāgia, ma totogi e koe mo ki lātou te tupe e tatau ke ki lātou totōgia mo te hāuniga, kae ke mafai ai ke tafi tula o lātou ulu.#21.24: tafi tula o lātou ulu: Kikila ki 18.18. I te faiga tēnei, ka iloa ai e tagata uma, e hēai he mea e fokotahi e hako i nā fakamatalaga uma kua ki lātou maua e uiga ki a te koe, kae ko koe e ola tauhihi lava ki te Tūlāfono a Mohe. 25#Gāl 15.29Kae e vē la ki nā tino nukukehe kua kavea ma Kelihiano, kua uma te kave ki ei te mātou tuhi ke taku ki ei kua tonu ia te ki mātou, ko ki lātou e hē kakai ki ho he meakai na ofo ma tāulaga ki nā tupua ta, pe ni toto, pe ho he manuvaefa na titina, ma ke kalo kehe i nā tuinanauga mātagā o te tino.”

26Kua kave e Paulo nā taulelea, ma i te aho na hohoko ai, na fai ai e ia te hāuniga mo te fakamamāgia o ia fakatahi ma ki lātou. Oi fano ai ki loto o te Mālumalu, ke fakailoa e ia pe ko toe fia ia aho oi pa ki te fakaikuga o te hāuniga mo te fakamamāgia, te taimi e ofo ai nā tāulaga mo ki lātou tau tokatahi.

Kua Puke ia Paulo i loto o te Mālumalu

27Kae i te taimi kua tau fakauma ai nā aho e fitu, kae kitea ia Paulo i te Mālumalu e ni tino Iutaia e ōmamai i te itūmālō o Ahia. Na fakaohooho e ki lātou te kaifenua kātoa, ma na puke ai ia Paulo e ki lātou. 28Kua taufōlua vē ki lātou, “Taulelea e o Ihalaelu! Ko tēnei te tino e fano ki ho he koga ma akoako ki tagata ke teteke ki nā tino Ihalaelu, teteke ki te Tūlāfono a Mohe, ma teteke ki te Mālumalu tēnei. Ma i te taimi nei, kua ia kaumaia foki ni tino nukukehe ki loto o te Mālumalu, ma faia ma mea e hē mamā ai te nofoaga paia tēnei!” 29#Gāl 20.4(Na lea vēnei ki lātou, ona na ki lātou kitea ia Tolofimo mai Efeho e feoaki ma Paulo i te kakai, ma vēake ai na kave e Paulo te tagata tēnei ki loto o te Mālumalu.)

30Kua kāmata oi vevehi ia tagata uma o te kakai, ma fetutuli fakatahi oi puke ia Paulo ma toho ki fafo o te Mālumalu, ma na tapunia ai loa nā faitotoka o te Mālumalu i te taimi tēnā. 31Ka koi taumafai ia tagata ke tāmate ia Paulo, kae pa atu te līpoti ki te takitakikau o nā fitafita Loma, ko Ieluhalema kātoa kua vevehitū. 32Na kave loa lava e te takitakikau ni fitafita ma ni ofiha i te taimi tēnā, ma fetutuli ki te mea e i ei kaifenua. I te kitea maiga e te kaifenua te takitakikau ma nā fitafita, oi na tāofi ai loa te kiniga o Paulo. 33Oi hau ai te takitakikau ki a Paulo, ma fakatonu ke puke ma noanoa i ni filifili e lua. Oi fehili vē atu ai, “Ko ai te tagata nei, ka ko he ā foki ta ia kua fai?” 34Kua taukalalaga mai iētahi o te kaifenua ma he mōliga, kae taukalalaga mai foki iētahi ma he mōliga e kehe foki. Na nunumi lele te māfaufau o te takitakikau ma hēki ia iloa tonu ai pe ko he ā te na tutupu, ma na fakatonu ai loa e ia ke kave ia Paulo ki loto o te olo. 35Na pa atu lava ki lātou ki nā fakahitepu, oi hiki loa e nā fitafita ia Paulo ona ko te vevehi lahi o te kaifenua. 36Kua taumulimuli te kaifenua uma ki a Paulo ma taukalalaga vēia, “Tātou olo oi tāmate te tagata tēnei!”

Kua Taumafai ia Paulo ke Tali atu ki nā Mōliga

37Koi tau fakaulu atu ia Paulo ki loto o te olo, kae lea vē atu ki te takitakikau, “E mafai ke fai haku kupu?”

Kua fehili mai te takitakikau ki ei, “E iloa e koe te gagana Eleni? 38E hē ko koe la te tino Aikupito tē na ia kamatagia he fou i he taimi e hēki mamao atu, ma na takitakia nā tino Fahioti Tagata e toka fa afe ma a lātou kaukupega, ki te toafa?”

39Kua tali atu ia Paulo, “Ko au he Iutaia, na fānau i Taheha i Kilikia, ma ko he tagatānuku o he kakai tāua lahi. Fakamolemole tuku mai he avanoa ke fai ai haku kupu ki nā tino.”

40Na fakataga e te takitakikau ia Paulo, oi tū atu ai i luga o nā fakahitepu ma fakatū tona lima ki nā tino ke nahe piha. Ina kua hēai he tino o ki lātou e vaivaia, oi tautala ai ki ei ia Paulo i te gagana Epelu.

Currently Selected:

Gāluega 21: TNT

Highlight

Copy