Gāluega 23

1Na kikila hako lava ia Paulo ki te Taupulega ma lea vē atu ki ei, “Te kau uho! Ko toku lotofuatia e mamā lele e tuha ai ma te ōlaga kua ola ai au i mua o te Atua, ke pa mai lava ki te aho nei.” 2Oi fakatonu ai e te Ulu Ohitāulaga ko Anania nā tino nae tutū i tafa o Paulo, ke po te gutu o Paulo. 3#Mat 23.27-28Oi lea vē atu ai ia Paulo ki a Anania, “Ka mautinoa lava te taia o koe e te Atua — ia koe tēnā e vē he puipui kua vali ke fakapaepae! E nofo mai koe i kinā ke fakamahino mai au e tuha ai ma te Tūlāfono, kae kua holi foki lava e koe te Tūlāfono i tau fakatonuga ki nā tino ke po au!”

4Kua lea vē mai nā tino nae i tafa o Paulo, “Ko koe kua fai kupu kino ki te Ulu Ohitāulaga a te Atua!”

5 # Eho 22.28 Oi tali vē atu ai ia Paulo, “Oku uho Ihalaelu, e hē kō iloa ko ia ko te Ulu Ohitāulaga. E lea mai te tuhituhiga paia, ‘Ia koe nahe fai kupu kino ki te takitaki o tagata o tō nuku.’ ”

6 # Gāl 26.5; Fil 3.5 Kua kitea atu e Paulo ko iētahi tino o ki lātou ni Falehaio ma ko iētahi ni Hatukaio, oi kalaga atu ai i loto o te fono, “Oku uho Ihalaelu! Ko au he Falehaio, te ataliki o ni Falehaio. Ko au e i mua o te fakamahinoga tēnei, ona ko toku fakamoemoe mautinoa, ko nā tino kua oti ka toe fakatutū e te Atua ki te ola!”

7Na uma lava te lea vēnei atu o Paulo, oi kāmata loa na fīnauga i te va o te kau Falehaio ma te kau Hatukaio, ma na vaelua ai te potopotoga. 8#Mat 22.23; Mlk 12.18; Luk 20.27(Auā e lea te kau Hatukaio ko nā tino e hē toe tutū mai i te oti, ma e hēai ni agelu pe ni agaga; kae ko te kau Falehaio e talitonu ki nā mea uma e tolu iēnei.) 9Kua fakalalahi te piha, oi tutū ai ki luga iētahi faiakoga o te Tūlāfono i te itū o te kau Falehaio, kua faitio lahi lele ma lea vē atu: “E hēai he mea kua ki mātou maua e hala ai te tagata tēnei! Hōvē moni he agaga pe he agelu na tautala ki ei!”

10Kua matuā fakalalahi lele na fīnauga, ma na popole lele te takitakikau nā ia Paulo e hae likilikiagia. Ko te mea ia na ia fakatonua ai ana fitafita, ke olo ki lalo oi kave kehe mai ia Paulo, ma kave ki te olo.

11I te pō tēnā, na tū ai te Aliki i tafa o Paulo ma vāgana vē atu ki ei, “Ia koe nā mataku! E vē ona molimau koe e uiga ki a te au i kinei i Ieluhalema, e tatau foki ke kē faia te mea tēnei i Loma.”

Kua Lama ia Paulo ke Tāmate

12I te taeao na hohoko ai, na fono fakatahi ai ni tino Iutaia ma na fai ai te lātou tonu. Na fai te lātou tautōga ko ki lātou e hē kakai lele pe inu, heiloga ko Paulo kua tāmate e ki lātou. 13E hili i te toka fahefulu ki lātou na taupulepule fakatahi. 14Oi olo ai ki nā ohitāulaga hili ma nā toeaina oi lea vē ki ei, “Kua fai te mātou tautōga fakatahi, e hēai he tino o ki mātou e kai heiloga kua tāmate e ki mātou ia Paulo. 15E vēnei la, kave he fekau mā koutou ma te Taupulega ki te takitakikau Loma, ke kavaifo ia Paulo ki a te koutou ma fakatagāfai ki ei ko koutou e fofou ki ei ona e fia koutou mauagia ni iētahi fakamatalaga hako e uiga ki ei. Kae ka hāuni ki mātou ke tāmate ka ko hēki pa mai ki kinei.”

16Kae na lagona e te ataliki o te tuafafine o Paulo na taupulepulega iēnei; oi na fano ai ki te olo ma taku ki a Paulo. 17Oi kalaga ai ia Paulo ki hētahi o nā ofiha ma lea vē atu ki ei, “Kave te taumalo tēnei ki te takitakikau; e i ei te mea e fia lea ai ki ei.” 18Oi kave ai e te ofiha te taumalo ki te takitakikau ma lea vē atu ki ei, “Ko Paulo te pagotā, na kalaga mai ki a te au ke kaumai te taumalo tēnei ki a te koe, ona e i ei he mea e fia lea atu ai.”

19Kua puke atu te takitakikau ki te lima o te taumalo, oi tataki kehe ai e ia, ma fehili vē ki ei, “He ā te fia lea mai ai koe ki a te au?”

20Kua tali atu te taumalo, “Kua fai te tonu a nā takitaki Iutaia, ke talohaga atu ki a te koe taeao ke kavake ia Paulo ki lalo ki te Taupulega, ma fakapeku vē ko ki lātou e fofou ki ni fakamatalaga e hili atu te hako e uiga ki te ia. 21Kae ia koe nā fakalogo ki ei, auā e hili atu i te fahefulu taulelea ka mumuni ke fakatali mai ki ei. Kua fai te lātou tautōga e hēai he tino e kai pe inu, heiloga kua ki lātou tāmatea ia Paulo. Kua hāuni mai nei ke fakataunuku te mea tēnei, kae e fakatalitali pe vēhea tau tonu e fai.”

22Oi lea atu ai te takitakikau ki ei, “Nahe kē lea lele ki he tino ko koe kua lea mai ki a te au e uiga ki te mea tēnā.” Oi uga ai e ia te taumalo ke fano.

Kua Kave ia Paulo ki mua o te Kōvana ko Felika

23Oi fekau ai e te takitakikau nā tino ofiha a ia ma lea vē ai ki ei, “Hāuni ni fitafita e toka lua helau ke olo ki Kaihaleia fakatahi ai ma ni fitafita tiketike holofanua e toka fitu hefulu, ma he luahelau fitafita e fakakaukupega i nā tao, ma hāuni ke teka kehe i te iva i te pō nei. 24Hāuni ni holofanua ke tiketike ai ia Paulo, ma ke mautinoa ko Paulo e taunuku ma te haogalēmū ki te kōvana ko Felika.” 25Oi tuhi ai te tuhi a te takitakikau e vēnei:

26“Mai ia Kalautio Luhia ki te Afioga a Felika te kōvana: E fakatālofa atu ki a te koe. 27Ko te tagata tēnei na puke e nā tino Iutaia ma na mea lava ka tāmate e ki lātou. Na maua e au te fakamatalaga ko ia nei ko he tagatānuku Loma, oi olo ai loa ki mātou ma aku fitafita oi laveaki. 28Na kō fia iloagia pe he ā te holitūlāfono kua mōlia ai ia e ki lātou, oi na kave ai e au ki lalo ki te lātou Taupulega. 29E hēki maua e au e i ei hana mea na fai e tatau ai ke fakahala oti, pe falepuipui; ko te mea na mōlia ai he mea lava tau ki ta lātou tūlāfono. 30Ma i te kō iloaga kua lemati e nā tino Iutaia ke tāmate, oi tonu ai loa lava ia te au ke kavatu ki a te koe. Kua uma toku lea ki nā tino na ki lātou mōliagia, ke o atu ki a te koe ma ta lātou mōliga.”

31Na fakataunuku e nā fitafita o lātou fakatonuga. Na kave e ki lātou ia Paulo i te pō tēnā ma na pa lava te mamao o te malaga ki Anitapatelia. 32I te aho alafaki oi toe foki ai ki te olo nā fitafita havavali, kae totoe ai nā fitafita tiketike holofanua ke olo ma Paulo. 33Na kave e ki lātou ia Paulo ki Kaihaleia, kua fōki te tuhi ki te kōvana ma tukulima atu ai ki ei ia Paulo. 34Kua faitau te tuhi e te kōvana, oi fehili ai ki a Paulo pe ko te fea te itūmālō e hau ai ia. I te ia iloaga ko Paulo e hau mai Kilikia, 35oi lea vē ai ki a Paulo, “Ko au ka fakalogo ki nā mōliga o koe, kāfai nā tino na ki lātou mōlia koe e taunuku mai.” Oi fakatonu ai e ia nā fitafita ke leoleo ia Paulo, i te fale o te kōvana.

Currently Selected:

Gāluega 23: TNT

Highlight

Copy