Gāluega 16

Kua Olo ia Timoteo ma Paulo ma Hila

1Kua fakaauau pea te malaga a Paulo ki Tepene ma Luotala; te mea nae nofo ai he tino Kelihiano e igoa ki a Timoteo. Ko tona mātua he tino Kelihiano foki, ma ko he Iutaia, ka ko tona tamana he Eleni. 2Nae taku leleia lele ia Timoteo e te kau Kelihiano uma i Luotala ma Ikononu. 3Na fofou ia Paulo ke ia kavea ia Timoteo, oi na pelitome ai e ia. Na ia faia te mea tēnei auā kua iloa e tagata Iutaia uma i nā koga iēnā, ko te tamana o Timoteo he Eleni. 4Na kui loto atu ki lātou i nā tamā kakai, ma na ki lātou fakailoa atua ki te kau uho Kelihiano nā tūlāfono kua uma te fai e te kau apohitolo ma toeaina i Ieluhalema, ma fautuagia ki lātou ke uhitaki ki ei. 5Ma na ātili fakamālohia ai te talitonu o nā Ekalehia, ma tuputupu ai pea te nūmela o tagata kua talitonu, i aho takitahi.

Ko te Fakaaliga na kitea e Paulo i Tolōata

6Na malaga kui loto atu ki lātou i nā kogāfenua o Fulugia ma Kalatia, ona na fakaali ki ei e te Agaga Paia ke nahe talakiagia te fekau i te itūmālō o Ahia. 7I te taunuku atuga o ki lātou ki Muhiana, oi taumafai ai ke olo ki te itūmālō o Pitunia, kae e hēki fakatagagia ki lātou e te Agaga o Iehu, ke olo ki ei. 8Oi na fakaauau ai lava te lātou malaga kui atu i Muhiana ke pa ki Tolōata. 9Ma i te pō tēnā, na kitea ai e Paulo i he fakaaliga, he tino Maketonia e tū kae fakatālohaga vēnei ake, “Hau ko ki Maketonia, oi fehoahoani ki a te ki mātou!” 10I te kiteaga e Paulo te fakaaliga tēnei, oi hāuni ai loa ki mātou ke olo ki Maketonia, auā kua iloa e ki mātou ko te Atua kua kalaga mai ki a te ki mātou ke folafola te Tala Lelei ki nā tino i kinā.

Kua Liliu ia Litia ma Kavea ma Kelihiano i Filipi

11Na olo hako loa ki mātou i he vaka mai Tolōata ki Hamotalake, ma i te aho alafaki oi olo ai ki Neapoli. 12Mai kinā oi olo ai ki mātou ki Filipi, he kakai o te itūmālō muamua o Maketonia; he kolone foki e o Loma. Na faitau aho ki mātou i kinā. 13I te Hāpati na olo ai ki mātou ki fafo o te kakai ki te kautafa o te vai, ki he koga na iloa e ki mātou e māhani lava oi maopoopo ki ei nā tino Iutaia ke fai talohaga ai. Na nonofo ki mātou ki lalo ma talanoa ki nā fafine kua maopoopo i kinā. 14Ko tētahi o fafine na ia lagona a mātou tala ko Litia, e hau mai Tuateilo, he tino fakatau koloa i nā kie violē taugatā. Ko he fafine nae tāpuaki ki te Atua, ma na tatala ai e te Aliki tona māfaufau ke mālamalama i te mea nae tautala ai ia Paulo. 15Ina kua uma te papatiho o Litia ma nā tino uma o tona kāiga, oi lea vē mai ai ki a te ki mātou, “Ōmai tātou nonofo i toku fale, kāfai koutou kua manatu ko au he tino kua talitonu moni ki te Aliki.” Ma na ia tauanaua ki mātou ke ōake.

Kua Falepuipui ia Paulo ma Hila i Filipi

16I tētahi aho, ka koi haeleele atu ki mātou ki te mea e māhani lava oi fai talohaga ai nā tino Iutaia, kae fetaui ki mātou ma he tautiti pologa nae ulufia e he agaga kino, ma nae ia mafaia oi vavalo nā mea ka tutupu i te lumanaki. Nae lahi nā tupe nae ia maua mo tona matai, e ala i ana gāluega vavalo nae fai mo tagata tau tokatahi. 17Nae taumulimuli ki a Paulo ma ki mātou ma taufōlua vē, “Ko nā tino iēnei ni kaukauna e a te Atua Hilihilikehe! E fakailoa atu e ki lātou te auala e mafai ai koutou ke fakaolagia.” 18E lahi lele nā aho na fai ai tana mea tēnei, ma kua fai ma mea e tīgā ai te loto o Paulo ma na māfuli atu ai oi lea vē atu ki te agaga kino, “I te igoa o Iehu Keliho e kō fakatonua atu ai koe ke hau loa ki fafo o te tautiti tēnā!” Ko te taimi lava tēnā na hau ai ki fafo o te tautiti te agaga kino.

19Kua hāfia atu e nā matai o te tautiti ko te avanoa ke maua ai ni a lātou tupe kua fakahēai, oi puke ai e ki lātou ia Paulo ma Hila ma toho ki te fale fakamahino i te nofoaga e tumutumu ki ei ia tagata. 20Kua kave e ki lātou ki mua o nā fakamahino Loma ma lea vē atu ai ki ei, “Ko nā tino iēnei ni Iutaia, ma kua fai e ki lāua nā mea e fakavevehi ai to tātou kakai. 21E akoako e ki lāua nā tu e fakahā i te tātou tūlāfono; ko ki mātou ni tagatānuku Loma, ma e hē tatau ke talia pe mulimuli ki mātou ki nā tū iēnei.” 22Oi kaukau fakatahi ai te kaifenua ma taumafai oi fakaogohia ia Paulo ma Hila.

Oi fakatonu ai e nā fakamahino ke tahae kehe nā kofu o Paulo ma Hila, kae kini. 23Kua uma te kini tīgāina o ki lāua, oi togi ai ki te falepuipui ma te fakatonuga ki te leoleo falepuipui, ke loka mau te toka lua. 24I te mauaga o te fakatonuga tēnei e te leoleo falepuipui, oi tuku ai te toka lua ki te potu tūloto o te falepuipui, kae tamau nā vae ki ni poloka lākau mamafa.

25I te taimi pe ko te vaeluapō, ko Paulo ma Hila e uhu a lā pehe halamo e viviki ai ki te Atua, ka ko iētahi pagotā e fakalogologo ki ei. 26Kae nā lava e teki kua to he mafuie lahi ma lūlū ai te falepuipui i ona fakavae. I te taimi lava tēnā na mātalatala ai nā faitotoka o te falepuipui ma pakukū kehe nā filifili mai nā pagotā uma lele. 27Kua teki ake ki luga te leoleo falepuipui, ma i te ia kiteaga ko nā faitotoka o te falepuipui kua mātalatala, na vē ake ai tona manatu ko nā pagotā kua hōhola kehe; oi na unu ake ai tana pelu ma tau pule ki tona ola. 28Kae kua kalaga leo lahi vē atu ki ei ia Paulo, “Nahe faia e koe te mea tēnā! Ko ki mātou uma e i kinei!”

29Na kalaga loa te leoleo falepuipui ke kaumai he mōlī, ma matele atu ai ki loto o te falepuipui ma fakapakū ki nā vae o Paulo ma Hila, ma e tatapa i te mataku. 30Oi takitaki ai e ia ki lātou ki fafo ma fehili vē atu ki ei, “Nā tamana, he ā nei te tatau ke kō faia ke fakaola ai au?”

31Kua tali mai te toka lua, “Talitonu ki te Aliki ko Iehu, oi fakaola ai koe — ko koe ma tō kāiga.” 32Oi folafola ai e ki lāua te kupu a te Aliki ki te leoleo falepuipui, vēnā ma nā tino uma i tona fale. 33I te taimi lava tēnā i te pō, na kave ai te toka lua e te leoleo falepuipui ke fufulu o la manuka; ma na papatiho ai lava i te taimi tēnā te leoleo falepuipui ma tona kau kāiga uma. 34Oi kave ai e ia ia Paulo ma Hila ki tona fale ma fai te lā katiga. Na fakatumulia i te fiafia te leoleo falepuipui ma tona kau kāiga, auā ko ki lātou kua talitonu ki te Atua.

35I te taeao alafaki, oi uga ai nā leoleo e nā fakamahino Loma ma te fakatonuga e vēnei, “Tatala loa nā taulelea iēnā ke olo.”

36Oi lea vē atu ai te leoleo falepuipui ki a Paulo, “Kua kaumai te fakatonuga a nā fakamahino ke tatala koulua ma Hila ke olo. Ōmai la keina olo i te fīlēmū.”

37Ka kua lea vē atu ia Paulo ki nā leoleo, “E hēki i ei he fakamāoniga o ha mā holitūlāfono, kae ko ki māua na kini i mua o tagata — oi ka ko ki māua ni tagatānuku Loma! Na togi ki māua e ki lātou ki te falepuipui. Kae nei kua fofou ko ki māua ke tatala munimuni mai te fale puipui? E hēai he mea vēnā! E tatau lava ke ōmamai nā fakamahino Loma ki kinei oi tatala ki māua.”

38Na fakapa lava nā kupu iēnei e nā leoleo ki nā fakamahino Loma; ma i te iloaga e ki lātou ko Paulo ma Hila ni tagatānuku Loma, oi na lagona ai e ki lātou te mātataku. 39Oi na olo ai oi fakatokehe ki te toka lua; oi takitaki ai te toka lua e ki lātou ki fafo o te falepuipui ma fakatonu ke olo kehe ma te kakai. 40Na tukua loa e Paulo ma Hila te falepuipui, kae olo ki te fale o Litia. I kinā, na feiloaki ai ki lāua ma nā tino kua talitonu ki a Iehu, ma kavatu ai e ki lāua ki ei ni kupu fakamākeke, oi olo kehe ai.

Currently Selected:

Gāluega 16: TNT

Highlight

Copy