Gāluega 15

Ko te Fono i Ieluhalema

1 # Lev 12.3 E i ei ni taulelea na ōifo mai Iutea ki Anitioka ma kāmata akoako vē atu ki nā tino kua talitonu, “E hē mafai koutou ke fakaola e te Atua, heiloga ko koutou kua pelitome e vē oi lea mai te Tūlāfono a Mohe.” 2Na teteke lahi lele ia Paulo ma Panapa ki te akoakoga tēnei, ma na fai ai te tonu ke olo ia Paulo ma Panapa ma ni tino mai Anitioka ki Ieluhalema, ke talanoa ki te kau apohitolo ma nā toeaina o te ekalehia, e uiga ki te matākupu tēnei.

3Kua uga atu ki lātou e nā tino o te Ekalehia; ma ka koi malaga atu ki lātou i loto o Foinike ma Hāmālia, na fakailoa e ki lātou e uiga ki nā tino nukukehe kua liliu ki te Atua; ko te tala tēnei na fakafiafia lahi ai nā tino uma kua talitonu. 4Na tali fiafia mai ki lātou e te Ekalehia, te kau apohitolo ma toeaina, i te taunuku atuga o ki lātou ki Ieluhalema, ma na ki lātou fakailoa ki ei nā mea uma na fai e te Atua e ala ia te ki lātou. 5Kae e i ei iētahi tino Kelihiano, ni tino o te kau Falehaio, kua tutū ki luga ma lea vē atu, “Ko nā tino nukukehe e tatau ke pelitome ma fakatonu ke uhitaki ki te Tūlāfono a Mohe.”

6Oi maopoopo ai te kau apohitolo ma nā toeaina ke talanoa ki te mea tēnei. 7#Gāl 10.1-43Na mataloa lele nā talatalanoaga ma na tū ai ki luga ia Petelu oi lea vē atu, “Te kau uho, e iloa e koutou ko au na filifilia e te Atua mai ia te koutou i te kāmataga, ke tālakia te Tala Lelei ki tagata nukukehe, kae ke ki lātou iloa ma talitonu ai ki te Aliki. 8#Gāl 2.4; 10.44Ma ko te Atua, tē e ia iloa ia māfaufauga o tagata uma, kua ia fakailoagia ko nā tino nukukehe e mafai foki ke talitonu ki te Aliki, e ala i te tuku atu e ia ki a te ki lātou o te Agaga Paia. 9E hēki fakakehekehea e ia ki tātou ma ki lātou; na fakamāgalo e ia a lātou agahala ona kua talitonu. 10He ā la te kua tofotofo ai e koutou te Atua i te kua fakauta e koutou o he kavega ki luga o nā tino kua talitonu ki te Aliki, he kavega na hēki mafai e o tātou tupuna pe ko ki tātou oi taukave? 11Hēai! Ko ki tātou kua talitonu ma e fakaolagia e ala i te alofa tūnoa o te Aliki ko Iehu Keliho, e vē foki lava ko ki lātou.”

12Ko te maopoopoga kātoa e hēai he tino na magagū ka koi fakalogologo ki te līpoti a Panapa ma Paulo e uiga ki nā vāvega ma nā mea ofoofogia uma a te Atua na fakatino i te mea e i ei ai ia tagata nukukehe, e ala ia te ki lāua. 13Kua uma te tautatala o ki lāua, oi lea vē atu ai ia Iakopo: “Te kau uho, fakalogo mai ake! 14Na fātoā uma atu nei lava te fakamālamalama e Himona, pe na vēhea ona muamua āhiāhi te Atua ki tagata nukukehe, ma ia kave kehea mai ia te ki lātou, ni tino ke fai ma ona tagata. 15E hako lava nā kupu a te kau pelofeta, e vē oi lea mai te tuhituhiga paia,

16 # Amo 9.11-12 ‘I he taimi i mua, ka toe hau ai au, kua vāgana ai te Aliki,

ma toe fakatū te mālō o Tavita.

Ko nā mea na fakakino ka toe fakalelei e au

ma fau ke toe mākeke.

17Ma ko tagata uma lele o te lalolagi ka ōmamai ki a te au,

nā tino nukukehe uma kua kō kalagagia ke kavea ma oku tagata.

18E vēnā te vāgana a te Aliki, tē na ia fakailoa te mea tēnei ki tagata, i nā aho kua leva.’ ”

19Na fakaauau te tautalaga a Iakopo ma lea vē atu, “I toku lagona, ko ki tātou e hē tatau ke fakalavelave ki nā tino nukukehe kua liliu ki te Atua. 20#Eho 34.15-17; Lev 17.10-16; 18.6-23Kae e tatau ke fai he tātou tuhi ki ei, ma lea ki ei ko ki lātou nahe kakai ki nā meakai e hē mamā i nā itū tau tāpuakiga, ona na ofo ma tāulaga ki nā tupua; ke kalo kehe ma tuinanauga kino ki te tino; ke nahe kakai ki he manuvaefa na titina, pe ho he toto. 21Auā ko te Tūlāfono a Mohe kua leva te faitau i loto o nā hūnako i nā Hāpati takitahi, ma ko ana kupu e tālaki atu ki nā kakai uma.”

Ko te Tuhi ki nā Tino Nukukehe kua Talitonu

22Oi tonu ai i te kau apohitolo ma toeaina vēnā ma te Ekalehia kātoa, ke filifili ni taulelea ke olo fakatahi ma Paulo ma Panapa ki Anitioka. Na filifili ai e ki lātou ni tino e toka lua e fakamoemoegia lele e nā tino kua talitonu, ko Iuta, ko tētahi ona igoa ko Pāhapa, ma Hila, 23oi uga ai ma te tuhi e vēnei:

“E fakafeiloaki atu outou uho i kinei, te kau apohitolo ma toeaina vēnā ma te Ekalehia kātoa, ki a te koutou o mātou uho tagata nukukehe uma e nonofo i Anitioka, i Hulia ma Kilikia.

24Kua fakalogo ki mātou e i ei ni tino na oatu ia te ki mātou, kua fai ma fakalavelave ki a te koutou ma ko koutou kua hē fiafia lahi ona ko a lātou kupu e tautatala ai. E hēki ki mātou fakatonua lele nā tino iēnā. 25Oi ko ki mātou la kua talanoa fakatahi, ma kua mālilie uma ke filifili ni kavefekau ke uga atu ki a te koutou. Ka oatu fakatahi ma a mātou uō pele ko Panapa ma Paulo, 26iē kua lamatia pea lava o lā ola, i te gāluega a to tātou Aliki ko Iehu Keliho. 27Kua ki mātou uga atua la ia Iuta ma Hila, ke taku hako atu e ki lāua ki a te koutou te mea tēnei kua tuhi atu ai ki mātou. 28E tutuha lava to mātou manatu ma te mea e fofou ki ei te Agaga Paia, e hē tatau ke toe fakauta atu ni iētahi kavega ki outou luga, vāgana ai nā mea iēnei: 29nahe koutou kakai ki ni meakai kua ofo ma tāulaga mo nā tupua; nahe koutou kakai ki ni toto; nahe koutou kakai ki ni manuvaefa na titina; kalo kehe ma tuinanauga kino ki te tino. Ka lelei lele atu mo koutou, kāfai koutou e fakaeteete ma hē koutou faia nā mea iēnei. E alolofa atu ki mātou.”

30Kua uga atu nā faifekau ma na olo ai ki Anitioka. I kinā, na ki lātou fakamāopoopoa ai nā tino uma kua talitonu ma fōki ki ei te tuhi. 31I te faitauga o nā tino ki te tuhi, na fakamālohiagia lele ki lātou ma fakatumulia o lātou loto i te fiafia, ona ko te fekau kua maua e ki lātou. 32Ko Iuta ma Hila, ni pelofeta foki lava ki lāua, na mataloa te taimi na tautatala ai ki nā tino iēnei kua talitonu, ma na maua ai e ki lātou te loto toa ma te mākekeke. 33-34Kua mataloa mālie ho lā taimi i kinā, oi toe uga ai ma te fīlēmū e te kau uho, ma na toe fōki ai ki nā tino na ki lātou ugāgia ki lāua.#15.33-34 Ko iētahi tuhituhiga e fakaopoopo ki ei te fuaikupu e 34: Kae kua fai te tonu a Hila ke nofo i kinā.

35Na tau māhina te mataloa o te taimi na nonofo ai ia Paulo ma Panapa i Anitioka, ma nae gālulue fakatahi ma iētahi tino e tokalahi i te akoakoga ma te folafolaga o te kupu a te Aliki.

Kua Olo Kehekehe ia Paulo ma Panapa

36I he taimi mulimuli ake, oi lea vē atu ai ia Paulo ki a Panapa, “Tā toe fōki oi āhiāhi ki te kau uho i nā kakai uma na folafola e ki tāua ki ei te kupu a te Aliki, pe ā mai ki lātou.” 37Na fofou ia Panapa ke kave ia Ioane Maleko i te lā kau, 38#Gāl 13.13kae ko te manatu o Paulo, e hē tatau ke kave ona e hēki mafai ke nofo ke uma te lātou gāluega tālaki, kae na toe foki kae tuku ki lāua i Pamefulia. 39Na fakavehivehi a lā fefīnauakiga, ma na iku ai kua hē toe gālulue fakatahi ki lāua. Kua kave e Panapa ia Maleko ma malaga i he vaka ki Kupulona, 40ka kua filifili e Paulo ia Hila ma olo kehe ai, kua tuku atu ki lāua e te kau Kelihiano ki te tauhiga ma te alofa tūnoa o te Aliki. 41Oi fano ai kui atu i Hulia ma Kilikia, ma fakamālohi ki tagata i nā Ekalehia.

Currently Selected:

Gāluega 15: TNT

Highlight

Copy