Gāluega 17

Kua Fakahāuāgia ia Paulo ma ona hoa e Tagata i Tehalonika

1Na fakaauau pea te malaga a Paulo ma Hila, kua kui loto atu i Amefipoli ma Apolonia, oi taunuku ai ki Tehalonika, te mea nae i ei ai he hūnako. 2Na fano ia Paulo ki te hūnako, e vē lava ko tana māhani. I kinā, e tolu ia Hāpati nae talatalanoa ai ma tagata ma na hiki mai e ia ni kupu mai nā Tuhituhiga Paia, 3ke fai ma fakamāoniga ko te Mehia e tatau ke maua i nā puapuagā, ma toe tū mai i te oti. Kua lea vē atu ia Paulo, “Ko te Iehu tēnei e kō folafola atua, ko te Mehia ia.” 4Ko iētahi tino o ki lātou na talitonu ma na kau fakatahi ai ma Paulo ma Hila; na vēnā foki te tokalahi o nā fafine takutakua i te kakai ma nā tino Eleni, kua talitonu ma tāpuaki ki te Atua.

5Kae ko iētahi tino Iutaia kua maua i te lotokino, ma kua ki lātou fakamāopoopo maia he kaifenua o nā tino tataka holo i nā auala. Kua fakatupu e ki lātou te piha ma te vevehi i loto o te kakai kātoa ma ohofaki e ki lātou te fale o he tamāloa e igoa ki a Iahona, i he taumafaiga ke hakili ia Paulo ma Hila ke kaumai ki tagata. 6Kae e hēki maua e ki lātou te toka lua ki kinā, ma ko te mea ia na toho ai e ki lātou ia Iahona ma iētahi tino kua talitonu ma kave ki mua o te taupulega ma taufōlulua vē, “Ko nā tino iēnei kua ki lātou fakatupuagia te vevehi i ho he koga e olo ki ei! Nei, kua ōmamai ki to tātou kakai, 7ma kua talia ki lātou e Iahona ki loto o tona fale. Kua holi e ki lātou uma nā tūlāfono a te Kaihala, ma na lea e i ei tētahi tupu, ko tona igoa ko Iehu.” 8Ko a lātou fakakupuga iēnei na faitapiha ai te kaifenua ma te taupulega. 9Oi fakatonu ai ia Iahona ma iētahi tino e te taupulega, ke totogi te tupe e mafai ke tatala ai ki lātou ki tua, ma tuku ai ke olo.

Ko Paulo ma ona hoa i Peloia

10Na pa loa lava ki te pō, oi uga ai ia Paulo ma Hila e nā uho Kelihiano ke olo ki Peloia. Kua taunuku atu ki lāua ki kinā, oi olo ai ki te hūnako o tagata Iutaia. 11Na hili atu te tali aloakia o ki lāua e nā tino i kinā, i lo nā tino i Tehalonika. Na fakalogologo ki lātou ki te fekau ma te loto naunau lahi, ma nae hukehuke e ki lātou nā Tuhituhiga Paia i aho uma, ke ki lātou iloa ai pe moni te mea e lea ai ia Paulo. 12E tokalahi nā tino na talitonu; ma e tokalahi nā fafine Eleni mai nā kāiga tūtūlelei ma tokalahi nā taulelea Eleni na talitonu foki. 13Kae i te lagonaga e nā tino Iutaia i Tehalonika kua folafola foki e Paulo te kupu a te Atua i Peloia, oi olo ai foki ki ei ma kāmata oi fakaohooho ki nā tino kae ke tupu ai foki he vevehi. 14Oi na uga ai loa e te kau Kelihiano ia Paulo ma ni iētahi taulelea ke olo ki he koga tū matāfaga; kae kua nonofo ia Hila ma Timoteo i Peloia. 15Ko nā taulelea na ki lātou kavea ia Paulo, na olo ma Paulo ke pa ki Atenai, oi toe foki ifo ai ki Peloia ma te fakatonuga mai ia Paulo ki a Hila ma Timoteo, ke o ake vave ki te mea e i ei ia.

Ko Paulo i Atenai

16Ka koi fakatalitali ia Paulo ki a Hila ma Timoteo i Atenai, na lagona lava e ia te matuā hē fiafia lahi, i te ia kiteaga ko te kakai e tumu i nā tupua. 17Ko te mea ia nae talatalanoa ai ma nā tino Iutaia i te hūnako fakatahi ma nā tino nukukehe nae tāpuaki ki te Atua. Na talatalanoa foki ma nā tino i te māketi vēnā ma ki lātou na kui atu i kinā. 18Nae i kinā ni tino o te talitonuga faka-Epikuleionu#17.18 Epikuleionu: Na tino nae mulimuli ki nā akoakoga a he tino e igoa ki a Epikulei e lea vēia ko te fiafia ko te mea ia e tatau ke fakamuamua i te ōlaga. ma ni tino o te talitonuga o Hitōikō.#17.18 Hitōikō Na tino nae mulimuli ki nā akoakoga a he tino e igoa ki a Heno e lea vē ko tagata e tatau ke ki lātou iloa oi loto pūlea ma takitakia e o lātou lotofuatia. Kua fehili vē iētahi o ki lātou, “E vēhea ake ko te mea e lea ai te tagata fiapoto tēnā?”

Kua tali mai iētahi tino, “E vē lava e tautala fakatatau ki ni atua kehe.” Na lea vēnā ki lātou, ona ko Paulo nae folafola e ia e uiga ki a Iehu ma te toetū.#17.18 Iehu ma te toetū: I te gagana Eleni, ko te kupu “toetū” e ono ko he igoa o he atua fafine. 19Ko te mea ia na kave ai e ki lātou ia Paulo ki mua o te taupulega a te kakai e fakaigoa ko te Aleiopakono, ma kua lea vē atu ki lātou ki a Paulo, “E fia iloa e ki mātou pe vēhea te akoakoga fou tēnā e tautala ai koe. 20Ko iētahi mea e lagona e ki mātou e lea ai koe, e vēia e kehe i ta mātou fakalogo, ma e fia iloa e ki mātou te uiga o nā mea iēnā.” 21(Auā ko tagatānuku uma lele o Atenai, ma nā tino kehe e nonofo ai, e fiafia ke nonofo oi faitatala ma fakalogologo ki nā mea fou.)

22Na tū ki luga ia Paulo i mua o te Aleiopakono ma lea vē atu, “I taku kikila, ko koutou tagata Atenai, ni tino e aloā e lolotu. 23Auā i te kui atuga o oku i te koutou kakai ma kikila ki nā mea e tāpuaki ai koutou, na kō kitea ai he fata faitāulaga e tuhi ai, ‘Ki he Atua e Hē Iloa.’ Ko te Atua la tēnā e tāpuaki koutou ki ei, e ui lava e hē koutou iloa, ko te Atua ia e folafola atu nei e au ki a te koutou. 24#1 Tup 8.27; Iha 42.5; Gāl 7.48Ko te Atua, tē na faia te lalolagi ma nā mea uma e i ei, ko te Aliki ia o te lagi ma te lalolagi, ma e hē nofo i ni mālumalu e fau i nā lima o tagata. 25E hēai foki he mea e fia maua e ia mai ia te ki tātou, e ala i to tātou kaukauna ki a te ia, auā ko ia lava te fōki maia te ola ma te mānava ma iētahi mea valevale, ki tagata uma. 26Mai te tamāloa e fokotahi, na ia faia ia tagata lanu kehekehe uma ke nonofo i te lalolagi kātoa. Ko ia lava te na ia fuafuagia muamua nā taimi ma nā gataaga o nā mea e nonofo ai ki lātou. 27Na fai e ia te mea tēnei kae ke hakili ai ia e ki lātou, ma ātonu ka tau fāfā ki lātou ki a te ia ma mafai ai ke maua ia e ki lātou. Oi ka ko te Atua e hē mamao lele ma ho he tino o ki tātou; 28e vē oi lea ai hētahi tino,

‘E ala ia te ia, kua ola ma gāoioi ma tūmau ai pea ki tātou.’

E vē foki ko nā kupu a iētahi tino fatuholo o koutou,

‘Ko ki tātou uma ni fānau lava e a ia.’

29Ona ko ki tātou ni fānau e a te Atua, e hē tatau la ki tātou ke manatu ko te Atua e tāi fōliga ki he fakatuha e fai i te aulo, pe i te hiliva, pe i te fatu, i te poto ma te iloa o te tagata. 30Kua hē toe taua e te Atua nā aho nae hē iloa ai ia e tagata, kae i te taimi nei, kua fakatonu e ia ia tagata uma i ho he koga o te lalolagi, ke liliu kehe mai o lātou uiga kino. 31Auā kua uma te fakamau e ia o te aho ka ia fakamahinoa ai ma te āmiotonu te lalolagi kātoa, e ala i he tino kua ia filifiliagia. Kua ia fakamāoniagia ki tagata uma te mea tēnei, e ala i te toe fakatūga e ia o te tino tēnā mai te oti!”

32I te ki lātou lagona atuga o Paulo e tautala e uiga ki te toetū mai te oti, oi fakatauemu ai iētahi tino ki ei, kae ko iētahi tino kua lea vē, “Ko ki mātou e fia toe fakalogo ke tautala mai koe i te mea tēnā.” 33Ma na fano kehe ai loa ia Paulo mai te mea e i ei ki lātou. 34E i ei nā taulelea na talitonu ma na mulimuli ai i te kau a Paulo, ma ko tētahi o ki lātou iēnei ko Tionihio, he tino e o te taupulega; nae i ei foki he fafine e igoa ki a Tamali, ma iētahi tino.

Currently Selected:

Gāluega 17: TNT

Highlight

Copy