2 Tehalonia 3
3
Tatalo mo ki Mātou
1Ko nā toe mea e lea atu ai au ki a te koutou, te kau uho, koutou ke tatalo mo ki mātou, kae ke mafai te fekau a te Aliki ke fakahalalau vave ma talia fiafia e tagata, e vē lava ona talia e koutou ma te fiafia. 2Tatalo foki ki te Atua ke fakahao ki mātou mai faiga a tagata kino, auā e i ei nā tino ko hēki talitonu ki te fekau.
3Kae ko te Aliki e fakamāoni, ma ka ia fōki atua ki a te koutou te loto mākeke, ma puipuia koutou mai te kino. 4Ma ko ki mātou e fakalagolago ki te Aliki e uiga ki a te koutou, ma e mautinoa e ki mātou e fai e koutou ma ka haga fai pea lava e koutou, nā mea e lea atu ai ki mātou.
5Ke takitaki e te Aliki outou loto ke ātili mālamalama ai koutou e uiga ki te alofa o te Atua ma e uiga ki te onohai o Keliho.
Ko Tagata uma e tatau ke Gālulue
6Te kau uho, ko koutou e fakatonu atu e ki mātou i te igoa o to tātou Aliki ko Iehu Keliho. Koutou ke tau mamao lele ma nā tino e ola i he ōlaga paiē, ma hē mulimuli ki nā akoakoga na tuku atu e ki mātou. 7Auā kua iloa lelei lava e koutou, ko koutou e tatau ke fakatakitaki mai ki a te ki mātou; ko ki mātou nae hē ola i he ōlaga paiē i te taimi nae fakatahi ai ki tātou. 8E hēki talia lele e ki mātou he fehoahoani mai he tino e aunoa ma te totogi e ki mātou ki ei i he tupe. Ko ki mātou nae gālulue ma te fītatā i te ao ma te pō, kae ke nahe fakafītatā ki mātou ki a te koutou. 9Na fai e ki mātou te mea tēnei, e hē vē ona e hē ia te ki mātou he aiātatau ke lea atu ai ki nā mea e tauhi ai ki mātou; kae na ki mātou faia ke fai ma fakatakitakiga ke mulimuli koutou ki ei. 10Ka koi fakatahi ki tātou, nae māhani oi lea vē atu ki mātou, “Ko te tino e hē fia galue e hē tatau ke kai.”
11Ko ki mātou e lea vēnei atu ona kua fakalogo ki mātou, e i ei nā tino o koutou e ola i he ōlaga paiē ma hē faigāluega, kae nā ko te aiā tauanoa lava ki nā mea a iētahi tino. 12I te igoa o te Aliki ko Iehu Keliho e fakatonu atu ai e ki mātou nā tino vēnei ma fakamālohi atu ki ei, ke fai fakalelei o lātou ōlaga ma ke gālulue ke ola ai lava ki lātou ia lātou gāluega.
13Kae ko koutou, te kau uho, koutou nahe fakavāivai oi fai nā mea e lelei. 14Ātonu e i ei ni tino i kinā ka hē fia fakalogo ki te fekau kua kavatu e ki mātou i te tuhi tēnei. Kāfai e i ei ni tino vēnā, ke koutou iloa pe ko ai ki lātou, ma nahe koutou toe fakapipiki ki ei kae ke fai tēnā ma mea e lagona ai e ki lātou te mā. 15Kae nahe koutou kikila ki ei e vē ki lātou ni fili ki a te koutou; kae fakatonu ki a te ki lātou e vē ni uho a Kelihiano.
Nā toe Kupu
16Ke fōki atu e te Aliki o te fīlēmū ki a te koutou i taimi uma ma aho uma lava, te fīlēmū. Ke fakatahi pea lava te Aliki ma koutou.
17I toku lava lima e tuhi ai e au te mea tēnei:
Alofaaga mai ia Paulo. Ko tēnei taku haini e fai ki aku tuhi takitahi uma; ko tēnei te faiga o aku tuhituhiga.
18Ke ia te koutou uma lele te alofa tūnoa o to tātou Aliki ko Iehu Keliho.
Currently Selected:
2 Tehalonia 3: TNT
Highlight
Share
Copy
Want to have your highlights saved across all your devices? Sign up or sign in
Tokelauan New Testament © Bible Society New Zealand, 2009.
