2 Tehalonia 2

Ko te Tino Kino

1 # 1 Teh 4.15-17 E vē la ki te haele mai o to tātou Aliki ko Iehu Keliho ma te fakamāopoopoga o ki tātou ke fakatahi ma ia: ko au e fakatagi atu ki a te koutou te kau uho, 2ke nahe faigōfie oi fakahētonu outou māfaufau pe fakatekigia foki, ona ko he fakamatalaga ko te Aho o te Aliki kua pa mai. Ātonu pe i ei he manatu ko ki mātou na lea atu i te mea tēnei e ala i nā vāloaga pe ko nā tālakiga, pe i he tuhi. 3Nahe fakatagagia lele e koutou he tino ke ia fakahehēa koutou i ho he mea. Auā ko te Aho ka hē pa mai heiloga kua taunuku te fou a tagata ki te Atua ma hula mai te Tino Kino, tē e iku lava ki heoli. 4#Tan 11.36; Ehk 28.2Ka teteke ia ki ho he itūkāigā atua pe ho he mea e ifo tāpuaki ki ei ia tagata, ma ia fakahilihilia ia i lo nā mea uma iēnei. Ka mafai foki ia ke fano ki loto o te Mālumalu o te Atua ma nofo ki lalo, ma lea ko ia ko te Atua.

5E hē koutou manatua? Na lea atu au ki a te koutou ki te mea iēnei, ka koi i ei au fakatahi ma koutou? 6Kae e i ei te mea e hē mafai ai ke tupu he mea vēnei, ma kua koutou iloa te māfuaaga. I te taimi la kua fuafuagia, ka hula mai ai te Tino Kino. 7Ko te mālohiaga fakalilolilo o te Tino Kino kua kāmata oi galue, kae ko te mea e tuku e tutupu ka hē mafai lele ke tutupu, heiloga e kave kehe muamua e te Atua te tino e ia tāofiofiagia. 8#Iha 11.4Oi ka fakailoa mai ai te Tino Kino, kae kāfai te Aliki ko Iehu e haele mai, ka ia tāmatea te Tino Kino i te mānava mai tona gutu ma fakaumatia i te pupula o tona fakatahi mai. 9#Mat 24.24Ka hau te Tino Kino ma te mālohi o Hātani ma fakatino e ia ia itūkāigā mālohiaga, fakailoga ma nā mea ofoofogia pepelo kehekehe, 10ma fakaaogā nā āmioga hehē uma lele ki nā tino e tuku e fakaumatiagia. Ka fakaumatia ki lātou auā e hēki ki lātou taliagia ma alolofa ki te fekau moni e uiga ki to tātou Aliki, ma mafai ai ke fakaolagia ki lātou. 11Ma ko te mea ia e fakahehē ai e te Atua o lātou māfaufau kae ke talitonu ai ki lātou ki nā mea e hehē. 12Ko te ikuga la, ko ki lātou uma e hē talitonu ki te fekau moni e uiga ki to tātou Aliki kae fiafia oi fai te agahala, ka fakahalagia.

Kua Filifilia Koutou e te Atua mo te Fakaolataga

13E tatau ki mātou ke fakafetai ki te Atua i taimi uma mo koutou, te kau uho, koutou iēnā e alofa ki ei te Aliki. Auā ko koutou na filifilia muamua#2.13 muamua; ko iētahi tuhituhiga e leamai mai te kāmataga. e te Atua ke fakaola e ala i te mana o te Agaga ke kavea ai koutou ma ona tagata paia, ma e ala i te koutou talitonu ki te meamoni. 14Kua kalaga atu te Atua ki a te koutou ki he fakaolataga vēnei e ala i te Tala Lelei e tālaki atu e ki mātou ki a te koutou; kua kalaga atu ki a te koutou ke i ei fakatahi koutou i te mamalu o to tātou Aliki ko Iehu Keliho. 15Ko te mea ia te kau uho, fakamālolohi ma tāofi ki te meamoni na akoako atu e ki mātou, e ala ia mātou kupu ma i ta mātou tuhi.

16Ke fōki mai ki a te ki tātou i te alofa tūnoa o to tātou Aliki ko Iehu Keliho ma te Atua to tātou Tamana, tē e alofa mai ki a te ki tātou, te fakamāfanafanaga tūmau ma te fakamoemoe mautū, 17ke fakamālohi ma fakamākeke atu ki a te koutou i taimi uma, ke tautatala ma fai ai pea lava e koutou nā mea e lelei.

Currently Selected:

2 Tehalonia 2: TNT

Highlight

Copy