Zowănnī 6

Jezŭ B́oa Bija Abwè Jè̄htò

(Mattĕo 14.13-21; Mărko 6.30-44; Lŭka 9.10-17)

1Alekă Jezŭ lewè̄gè d́ŏ Galilĕa Pèllè alewe dòkhòwō htè d́ŏ bija jo kô Tibĕria nu. 2Bija abodohòdo lôkôgè Ze le, manè̄ d́ō d́ŏ cè tòcò tcahtîgè Zè mèhmage bija ascwiasè̆ tòcò akhoacè̆ nu. 3Jezŭ hta d́ŏ khòlò̆kho kî sanălăò plogè Zo bōhmubicè tòcò d́ŏ nu. 4B́ĕnu akhî ḿî Jŭdapho tòcò anikhĭ Păskwa Pwè̆ b́ôhtîgè. 5Jezŭ tcakhwè̆khwè kî tcahtî bija òèòcara leb́ôhtî Cè d́ō, Cò d́ògè Philĭpo, “Cab́ô̆htè bija ajo tòcò lŏcăcè ka ab́è anikhĭ nu gî̄ bwî b́è toko d́òlè̄?” Cè d́è̆gè lōwa do. 6Zè gè̄ mèb́è danè̄ nu Zî thîhè̆ nòthò̆ hnò̆nu, Co b́otha lōwa akhò̆ nu lò.

7Philĭpo d́òscĭge Cè, “Toko denărio gīgèjè abu ma adôsô̆isèi ńò, dèbwè tîb́î hnò̆nu ma adini mè ńò,” cò d́òscĭge lōwa d́o.

8D́ŏ bōhmubicè tòcò aklè̆ htè Andrĕa, Simŏnè Petru athè̆buwe d́ò Cè, 9“Abĭsèpho b́ĕjo dèbwè atoko jè̄d́ŏ kî dāpho gīb́ò̆ ò tèpwè, barasă bija òèòò pwĕ gōjo anikhĭ zî mîbò̄ danè̄?” cò d́ò lōwa do.

10Mègōnu Jezŭ d́ò cè, “Hnabò̄ bija sanălăò d́ŏ Lākho nu,” Cò d́ò lōwa do. D́ŏnu mihnè òè d́o bija tòcò sańăla tèpwè akho. Amikhŏmĭde ògè d́ŏ abwè jè̄htò nu. 11Jezŭ phî toko, Za htăhtai Kib́ĭcè, kî be agè bija asańălăò d́ŏnu tòcò nu. Cab́ô̆ gōnu akhò̆ Ze be agè lōwa dāpho papa, pwĕ acab́ô̆ cè tòcò thaèa atherĕ nu. 12Bija lŏcăcè tòcò aphŭko htŏ d́ō, Jezŭ d́ò Zo bōhmubicè tòcò, “Htugebò̄ akòlĭkò̆lā akholakăsè tòcò nu cab́ô̆htè atè kè̆ tô ô lōbò̄ ńò nu,” Cò d́ò lōwa do. 13Mègōnu cè tòcò htuge phîge, kî apĕhta tèpwègè scigīṕahlu.

14Bija tòcò tcahtî Jezŭ mè dèbòdèba ajo d́ō, cò d́ò, “Ajo ḿî hnèhnè prò̆fèt agē lelab́è d́ŏ Lākho dèbwè nu hŏ!” cò d́ògè tòcò do. 15B́ĕ Jezŭ tcahtî bija tòcò gē le phî cè kî agè̄ lè̄hta Cè Saphra d́ŏ dènodèbè abu d́ō, Zè hèhtakè̆ kòd́ò̆ d́ŏ khò̆mukhòlò̆kho dèbwè lò.

Jezŭ Hè Htĭkho

(Mattĕo 14.22-33; Mărko 6.45-52)

16B́ĕ lumula nu Zo bōhmubicè tòcò gelagè d́ŏ pèllèwe nu. 17Cè tòcò htanī hwă khlĭbu d́ō, ze gewè̄gè d́ŏ Kapèrnaum U dòkhòwō nu. Dèkhila nòthò̆gè hnò̆nu, Jezŭ de gelahtî cè tòcò hnî̆ńò. 18B́ĕnu Gīlli dobōsô akhoacè̆ htĭ papipapò̆gè. 19Bōhmubicè tòcò wa khlĭ aphlò hwă stadia gīscĭsè, sŏscĭ d́ō, cè tòcò tcahtîgè Jezŭ hè d́ŏ pèllè htĭkho nu, kî Ze le b́ôhtîgè lōwa tòcò akhlĭ d́ō, cè tòcò thaphuthaganāgè. 20“Scisă ḿè. Ḿî jè lò!” Jezŭ d́ò cè tòcò do. 21Anu d́ō cè tòcò johta thalothalagè Cè d́ŏ khlĭbu, kî taplakhă lò khlĭ dowè̄gè d́ŏ pèllèwe htè cè tòcò thaè legè dokhlo nu.

Bija Wāhlè Jezŭ

22Alekă dini bija aboahò aòda d́ŏ pèllèwe alewe dòkhòwō gomohtani htè khlĭ ò tèb́è lò, kî Jezŭ da htanīkôgè Zo bōhmubicè tòcò akă d́ŏ khlĭbu ńò, ḿî cè tòcò gewè̄ dò̆ d́ŏ alewe dòkhòwō nu. 23Khlĭ aò d́ŏ Tibĕria tòcò le dòhta b́ôhtî alleaklè htè Jezŭ thîhè̆htage hwă dè Ci igè bija atoko alle nu. 24B́ĕ bija tòcò tcahtî Jezŭ kî Zo bōhmubicè tòcò tò ò be b́ĕnu ńò d́ō, cè tòcò htanī khlĭbu kî lewè̄gè d́ŏ Kapèrnaum U dòkhò̆ kî wāhlègè Jezŭ.

Jezŭ ḿî Dèòtoko

25B́ĕ cè tòcò kèhtî Jezŭ d́ŏ pèllèwe alewe dòkhòwō d́ō, cò d́ò lōwa, “Sara, ne ledo d́ò̆ b́ĕjo hlekadè̄?” cè d́è̆ lōwa do.

26Jezŭ d́ò cè tòcò, “Jò d́ò thĭ adî̄ahma, thĭ wāhlè Jè tè b́è d́ŏ thĭ thîhè̆ Jè dèmè dèbòdèba ahtabohtab́ă acè̆ ńò, ḿî thĭ ab́è toko kî thĭ phŭ pĕhtagè acè̆ nu. 27Wuthè̆dèbabò̄ ḿè dèa htè akè̆aô za tòcò anikhĭ ḿè, ḿî dèa htè aò lahtŭlablo anikhĭ dòkhò̆. Ajo ḿî dèa htè Bija Apho kî i thĭ dèdè̆ nu, manè̄ d́ō, Apa B́ĭcè thè̆ne dò dèzwî̄la d́ŏ Zò lò nu,” Cò d́ò lōwa tòcò do.

28Mègōnu cè tòcò d́ò lōwa, “Cab́ô̆htè wè gè̄ mè dèmè htè ab́è Kib́ĭcè atha nu, wè gè̄ mèb́è danè̄?” cè d́è̆ lōwa do.

29Jezŭ d́òscĭge cè tòcò, “Ajo ḿî Kib́ĭcè adèmè d́ŏ thĭ ku b́ubò̄ Co thodŏgè dèbwè nu,” Cò d́ò̆sa lōwa do.

30Cè tòcò d́è̆ kòd́ò̆ Cè, “Cab́ô̆htè wa gā tcahtî kî wu kū b́ubò̄ Nè nu, Nè gè̄ d́è̆lî̄ wa dèbòdèba danè̄? Nè gè̄ mè cadè̄?” cè d́è̆ lōwa do. 31“Wa pa hlemo tòcò a mănna toko d́ŏ lothĭḿizekho nu, acab́ô̆ Cè Tcahtĭ d́ò, ‘Ci i lōwa toko aò d́ŏ Mò̄kho ala nu,’” cò d́òscĭge lōwa do.

32Jezŭ d́ò cè tòcò, “Jò d́ò̆sa thĭ adî̄ahma, Mŏzè ti i thĭ a Mò̄kho a toko ńò, ḿî Ja Pa i thĭ a toko athĕbwe aò d́ŏ Mò̄kho ala nu. 33Manè̄ d́ō, toko htè B́ĭcè i thĭ ḿî Cè htè aò d́ŏ Mò̄kho ala kî i Lākhopho dèthôḿô̆ alahtŭlablo nu,” Cò d́ò lōwa do.

34Mègōnu d́ō, cè tòcò d́ò, “B́ĭcè, i thèjô̆bò̄ wa toko ajo nu,” cò d́ò lōwa do.

35Jezŭ d́ò cè tòcò, “Jî ḿî dèòtoko. Bija alehtî Jè tòcò nu, da thaẃib́è ńò kî ab́u Jè dèbwè nu, da thaò̆b́è ńò. 36Jò d́ò̆sa htŏ thĭ, thĭ tcahtî Jè, ḿî thĭ tu b́u Jè ńò. 37Lŏ Ja Pa ila Jè tòcò nu gē lehtîkò̆ Jè, kî gajă bija alehtî Jè tòcò nu, Ja ta d́aphlòḿĭ Je ne kî cè ńò. 38Manè̄ d́o, Jò ò d́ŏ Mò̄kho nu Ja la tè b́è Jè gè̄ mè Jè dèthaèni anikhĭ ńò, ḿî athodŏle Jè dèbwè adèthaèni lò. 39Ajo ḿî Ja Pa athodŏle Jè dèbwè adèthaèni, htè Ju gū du su da pa b́èbò̄ bija htè Ci ila Jè tòcò dèbwè̆ ńò, ḿî Ja gā b́awè̄htogebò̄ cè lŏcăcè d́ŏ muni agudulă dini nu. 40Manè̄ d́ō, ajo ḿî Ja Pa athodŏle Jè dèbwè adèthaèni htè gajă bija atcahtî Apho dèbwè kî ab́u Cè tòcò nu, gī nib́è dèò alahtŭlablo. Kî muni agudulă dini ja ka b́awè̄htoge cè,” Cò d́ò lōwa do.

41Jŭdapho tòcò mô̄mô̄îîgè d́ŏ Cò d́ò, “Jî ḿî toko aò d́ŏ Mò̄kho ala,” akhoacè̆ nu. 42Kî cè tòcò d́òwe, “Ajo ḿî tè b́è Zŏzè apho Jezŭ, htè gî̄ thîhè̆ zo mo za pa nu ńò ā? Mègōnu d́ō, cò d́ò za ma, ‘Jò ò d́ŏ Mò̄kho Ja la,’ nu cadè̄?” cè d́è̆hlègè lōwa do.

43Jezŭ d́ò cè, “Mô̄mô̄îî ḿè d́ŏ thĭ klè̆ ḿè. 44Ḿî̆dîḿî d́ŏ Ja Pa athodŏle Jè dèbwè cwi cè agē lehtî Jè ńò d́ō, bija de lehtî za Jè dèbwè̆ ńò. Alehtî Jè dèbwè nu Ja kā b́awè̄htogekò̆ cè d́ŏ muni agudulă dini nu. 45Prò̆fèt tòcò adèhmèla ò, ‘Kib́ĭcè gô̄ thôithò̆ikò̆ cè gŏ abwè.’ Gajă athîhè̆ Pa alē kî kha thôithò̆i ane tòcò nu, lehtî tèpwè Jè. 46Kî tè b́è Jò d́ò d́ŏ bija tcahtîb́è htŏ Pa dèbwè̆ ńò, ḿî htĕ aò d́ŏ Kib́ĭcè ò ala dèbwè lò. 47Jò d́ò̆sa thĭ adî̄ahma, bija ab́u Jè dèbwè nu nib́è dèòthôḿô̆ lahtŭlablo lò. 48Jî ḿî dèòtoko lò. 49Thĭ pa hlemo tòcò a mănna d́ŏ lothĭḿizekho nu, nòthò̆ hnò̆nu zi thĭlō htŏ tèpwè. 50Toko ajo ḿî aò d́ŏ Mò̄kho ala, kî bija arră a acè dèbwè gī di thĭ b́è be ńò. 51Jî ḿî dèòtoko htè aò d́ŏ Mò̄kho ala nu. Kî gajă bija a atoko ajo nu, kò ò thôḿô̆ lahtŭlablo b́èkò̆. Toko htè Ji kî i thĭ ḿî Jî hî htè Lākhopho adèò anikhĭ nu,” Cò d́ò̆sagè lōwa tòcò do.

52Jŭdapho tòcò darahlè lōwa, cò d́ò, “Bija ajo dèbwè gī i za wa a zî hî cadè̄?” cè d́è̆hlè lōwa do.

53Mègōnu, Jezŭ d́ò cè tòcò, “Jò d́ò̆sa thĭ adî̄ahma, thĭ gā ta a ma Bija Apho ahî ńò kî tò ò̆ ma zi thwi ńò d́ō, thĭ thathôḿô̆ tò òwè̄ tèpwè thĭ lò ńò. 54Bija htè a a jî hî kî aò̆ ji thwi dèbwè nu, nib́è tèpwè dèòthôḿô̆ lahtŭlablo, kî Ja kā b́awè̄htogekò̆ cè d́ŏ muni agudulă dini nu. 55Manè̄ d́o Jî hî ḿî dèa ahnèhnè, kî Ji thwi ḿî dè ò̆ ahnèhnè. 56Bija a a Jî hî kî a ò̆ Ji thwi dèbwè òkô Ja kă, kî Jò òkô ca kă. 57Apa aòthôḿô̆ dèbwè thodŏlegè Jè, kî d́ŏ Zo kho Cè cè̆ Jò òthôḿô̆kôkò̆. Cab́ô̆ gōnu akhò̆ bija a a Jî hî dèbwè nu Jo kho Jè cè cò kò òthôḿô̆kò̆. 58Ajo ḿî toko aò d́ŏ Mò̄kho ala; tè b́è acab́ô̆ thĭ pa tòcò a hwă mănna toko, kî alekă thĭ nu ńò. Bija a atoko ajo dèbwè kò ò thôḿô̆ lahtŭlablokò̆,” Cò d́ò̆sa lōwa tòcò do.

59Jezŭ d́ò̆sadè ajo tòcò b́ĕ Cò d́ò̆htôlani bija d́ŏ Kapèrnaum u, Sinagŏgā abu nu.

Dèò lahtŭlablo Adèjî̄b́è

60Zo bōhmubicè òèòò thîhè̆b́è dè ajo tòcò ki d́ògè, “Ajo ḿî dèthèhlô̆ aba dèdè̆. Bò̄bwè gò̄ sòkhĕńe kèhta bwè?” cò d́ò do.

61B́ĕ Jezŭ thîhè̆ dò̆ aè̆ htè Zo bōhmubicè tòcò mô̄mô̄îî d́o, Cò d́ò, “Ajo ḿî thĭ nikhĭ dè amò thablè̄ ā? 62B́eḿĕ thĭ gā tcahtî ma Bija Apho gehta d́ŏ Cò ò ale aŭsu nu d́ō, thĭ gè̄ mè cadè̄? 63Ai dèthôḿô̆ ḿî Spirito Tcahtĭ lò, bija adèkhodèă ḿî dè ahnahnă lò. Dèjî̄b́è Jò d́ò̆sa htŏ thĭ tòcò ḿî Spirito Tcahtĭ kî dèòthôḿô̆. 64Barasă d́ŏ thĭ klè̆ nu, atu b́u ńò ògè tòcò,” Cò d́ò lōwa do. (Manè̄ d́ō, Jezŭ thîhè̆ hlĕ mocè̆kho nu atu b́u ńò ḿî bò̄bwè tòcò bwè kî agô̄ hô̆lă Cè ḿî bò̄bwè nu.) 65Kîd́ò̆ Jezŭ d́ò, “Mègōnu akhoacè̆ Jò d́ò̆sa thĭ htè Apa gè̄ dè mèzo ma thĭ ńò nu, bija de lehtî za Jè dèbwè̆ ńò.”

66B́ĕnu phlò̆ ahlò̆mò̄ bōhmubicè òè̆bwè geb́a alekă, kî dè hèlehègekô be Ca kă ńò. 67Mègōnu Jezŭ d́è̆gè Thodŏpho scigībwè, “Thĭ ḿî ḿî thĭ thaè hègè ā?” Cè d́è̆ lōwa do.

68Simŏnè Petru d́òscĭge Cè, “B́ĭcè, we gē lehtî d́ò̆ bò̄bwè? Dèthômô̆ lahtŭlablo adèjî̄b́è ò d́ŏ ńò ò nu. 69Kî wu b́u thîhè̆gè htè nî ḿî Atcahtĭ Dèbwè aò Kib́ĭcè ò ala nu.”

70Jezŭ d́òscĭge cè tòcò, “Jô dô rôhtagè thĭ anu scigībwè ńò ā? Barasă thĭ klè̆ dèbwè ḿî dèscidèhnè,” Cò d́òge lōwa do. 71Anu ḿî Cò d́ò Jŭdas Iskariŏta, Simŏnè apho nu. Manè̄ d́ō, zî ḿî scigībwè aklè̆ dèbwè htè agô̄ hô̆lă lōwa nu.

Currently Selected:

Zowănnī 6: GRNT21

Highlight

Copy