Zowănnī 4

Jezŭ kî Samarĭamo

1Pharizè̆pho tòcò thîhè̆b́è Jezŭ ŭsab́ă bija htĭ kî mèni abōhmubicè òè d́olĭ kî Zowănnī nu. 2(Ahnèhnè nu, Jezŭ thè̆ne tu ŭsab́ă tèpwè bija htĭ dèbwè̆ ńò, ḿî Zo bōhmubicè tòcò lò.) 3B́ĕ Zî thîhè̆ hwă dèwîdèkè̆ gōnu d́ō, Zè hèhtagè Judĕage kî legè d́ŏ Galilĕage, 4Za hwădūb́è Samarĭage abu.

5Ze ledo d́ŏ Sĭkhar u, htè aò d́ŏ Samarĭage bu, aòb́ôhtî lè htè Jăkòb ilanigè apho Zŏzè taklaẃa nu. 6Jăkòb ahtĭbò ḿî ḿî ògè d́ŏ nu nu. Jezŭ lekô klè, lab́uladāgè d́ō Za sańălăògè d́ŏ htĭbò azawa nu. B́ĕnu ḿî lumuhtihta akhî.

7Samarĭamo dèbwè le d́agè htĭ, d́ō Jezŭ d́ò cè, “I jò ò̆ htĭ tîkî,” Cò d́ò lōwa do. 8Zo bōhmubicè tòcò le d́ŏ u bu cab́ô̆htè zî gî̄ bwî dèadèò̆ nu.

9Samarĭamo d́ògè Cè, “Nè Jŭdapho dèbwè da ò̆ jè htĭ ḿî d́ò̆ cadè̄?” cè dè̆gè lōwa do. (Manè̄ kò̄ d́òdo dō, Jŭdapho tòcò kî Samarĭapho tòcò ta a lè̄ ò̆ lè̄ lōwa dakha ńò akhoacè̆ nu.)

10Jezŭ d́òscĭge cè, “Nî gî̄ thîhè̆ ma Kib́ĭcè adèila kî bija ad́ò nè ‘I jò ò̆ htĭ tîkî,’ dèbwè nu d́ō, na gā da ò̆ debekă tèpwè Cè htĭ kî Ci ki i tèpwè ńò ò̆ htĭ htè ai dèthôḿô̆ lòmò̄,” Cò d́ò lōwa do.

11Amihmu d́òge Cè, “Sara, na d́ai htĭ anikhĭ nè è̆ htĭkŏ tò ò ńò, kî htĭbò ḿî alajò̄. Ni htĭ htè ai dèthôḿô̆ kò ò d́ò̆ d́òlè̄?” cè d́è̆ge lōwa do. 12“No do d́olĭ wa Pa Jăkòb htè akhuni wa htĭbò kî aò̆ aè̆, ab́oò̆kèhta wa aphoali tòcò kî adèphodèwe tòcò htĭ nu ā?” cè d́è̆gè Jezŭ do.

13Jezŭ d́òscĭge cè, “Gajă bija aò̆ htĭ ajo tòcò nu, za thaò̆ we tèpwè. 14Ḿî bija htè akò ò̆ htĭ Ji icè tòcò nu, da thaò̆b́è dakha be ńò. Htĭ htè Ji icè nu agî̄ ḿîkò̆ htĭbātcă htè htĭhtabū d́ŏ dèò alahtŭlablo abu nu,” Cò d́ò̆sa lōwa do.

15Amihmu d́ògè Cè, “Sara, ibò̄ jè htĭ anu cab́ô̆htè ja gā da thaò̆bò̄ dakhă ńò kî gē le d́a b́èbò̄ htĭ taplă be ńò nu,” cò d́ògè Jezŭ do.

16Jezŭ d́ò cè, “Lejo na wa kî le b́ĕjo,” Cò d́ò lōwa do.

17Amihmu d́òscĭge Jezŭ, “Ja wa tò ò ńò,” cò d́ò do.

Jezŭ d́ò cè, “Ja wa tò ò ńò, ńò d́ò do nu ab́èhŏ! 18Manè̄ na wa ògè jè̄bwè kî ńò òkô akă khŏnujo dèbwè ḿî tè b́è na wa ńò, kî ńò d́ò tèpwè dè ab́è lò,” Jezŭ d́ògè cè do.

19Amihmu d́òscĭge Cè, “Sara, jî thîhè̆ htŏ tèpwè htè nî ḿî prò̆fèt nu. 20Wa Samarĭapho, wi phĭ wu phŭ tòcò thèb́è̆hta d́ŏ khòlò̆ ajo dèmè̆ akho nu, barasă thĭ Jŭdapho d́òwe gē le thèb́è̆htab́è d́ŏ Jerŭsalèm u bu nu,” cò d́ò̆sagè lōwa do.

21Jezŭ d́ò cè, “Amihmu, b́ubò̄ jè htè akhîagla kè b́èkò̆ thĭ tè b́è thèb́è̆hta Apa d́ŏ khòlò̆ akho ńò ńò kî Jerŭsalèm u ńò ńò. 22Thĭ Samarĭapho tòcò thĭ thèb́è̆htagè htè thĭ dî thîhè̆ ńò, ḿî wa Jŭdapho tòcò nu wè thèb́è̆htagè wî thîhè̆ nu, manè̄ d́ō, dèhlô̆htage ò d́ŏ Jŭdapho tòcò ò nu. 23Barasă akhîagla b́è htŏ b́ĕjo lò htè adèthèb́è̆ adî̄ahma tòcò nu kè thèb́è̆kò̆ Pa d́ŏ thotha kî dèdî̄dèhma abu nu. Manè̄ d́o, Pa thaèni bija htè athèb́è̆hta Cè acab́ô̆ gōnu lò. 24B́ĭcè ḿî Dètha kî bija htè athub́uthèb́è̆ Cè tòcò nu kè̄ b́è thèb́è̆ Cè d́ŏ thotha kî d́ŏ dèdî̄dèhma lò,” Cò d́ò̆sagè lōwa do.

25Amihmu d́òscĭge Cè, “Jî thîhè̆ htŏ tèpwè htè Mèssĭah nu Za la htŏ kî b́ĕ Zo dole nu, Cò kò d́ò̆sakò̆ wa dèlŏcăcè,” cò d́ò do.

26Jezŭ d́ò̆sa Cè, “Jî ḿî Cè htè ajî̄b́èhtî nè dèbwè jo,” Cò d́ò lōwa do.

27B́ĕnu Zo bōhmubicè tòcò doge kî cè tòcò htèniwĭniwagè htè “Jezŭ d́ò̆sagè amihmu dèbwè da awîakè̆ nè?” nu. Barasă bija tò d́ògè Cè, “Na thaèni danè̄?” kî “Nî jî̄b́èhtî ma cè nè?” dèbwè̆ ńò.

28Amihmu lè̄lakè̆ hwă ahtĭgobo, geb́anī u bu kî d́ò̆sagè bija, 29“Le tcabò̄ bija dèbwè htè ad́ò̆sa lŏ jè mègè danè̄ danè̄ dèbwè nu. Zî gî̄ ḿî Krĭstu lòmò̄,” cò d́ò̆sa bija do. 30Bija tòcò hèhtagè u akhlŏ kî lehtîgè Jezŭ.

31B́ĕnu Zo bōhmubicè tòcò hna a ò̆ Cè kî cò d́ò, “Sara, a mò̄kôbò̄!”

32Barasă Cò d́ò lōwa tòcò, “Ji nikhĭ dèa htè thĭ dî thîhè̆ ńò nu ò tèpwè,” Cò d́ò do.

33Mègōnu d́ō, Zo bōhmubicè tòcò d́è̆hlè lōwa, “Bija dèbwèbwè leigè Cè dèa dimimi ā?” cè d́è̆hlè lōwa do.

34Jezŭ d́ò cè tòcò, “Jè dèa ḿî agè̄ mè athodŏle jè dèbwè adèthaèni kî agè̄ mè pĕhta Zè dèmè nu,” Cò d́ò̆sagè lōwa tòcò do. 35“Thĭ tò d́òbò̄ thè̆, ‘Ahlò̆mò̄ lwīhlè̆ be, bija gè̄ kègè b́u,’ nu ńò ā? Barasă Jò d́ò̆sa thĭ, jehta thĭko kî tcabò̄ hudephaklè̆, b́u b́ă lōgè kî amò kèb́ukèhŭ htŏ! 36Bija akèb́u dèbwè nib́è htŏ zô sô zè hlè̆, kî ci dĭnī tònī tèpwè dèò alahtŭlablo abu cab́ô̆htè asob́u dèbwè kî akèb́u dèbwè gā thaganāiplobò̄ nu. 37Manè̄, dèd́ò dôhmô̆ ḿî ab́è, htè, ‘Aso ḿî dèbwè, akè ḿî alewe dèbwè,’ nu. 38Jo thodŏle thĭ agē le kèb́u htè huklè̆ d́ŏ thĭ dòhtò dè phwèb́ègè ńò nu, bija alewe tòcò htòla phwèla, kî thĭ nib́è cè tòcò adèmè aphò̆athè,” Cò d́ògè lōwa tòcò do.

39D́ŏ amihmu dèbwè adèkhathè̆thî akhoacè̆, Samarĭapho òèòò b́ugè Jezŭ htè b́ĕ cò d́ò, “Cò d́ò̆sa lŏgè htè jè mègè danè̄ danè̄ nu,” dôhmô̆ nu. 40B́ĕ Samarĭapho tòcò dole Jezŭ ahlò̆mò̄ nu d́ō, cè tòcò damò Cè akò òkô ca kă kî Jezŭ òkô ca kă gīthè̆.

41Cè tòcò b́u d́okhlŏ we lōwa d́ŏ Zè dèd́òŭsaŭ akhoacè̆, 42kî d́ògè amihmu, “Khŏnujo wu b́u ḿî tè b́è ńò d́ò̆sa wa akhoacè̆ ńò, ḿî wa thè̆ne thîhè̆b́è akhoacè̆ wî thîhè̆ ladîlase htŏ htè Zî ḿî amèhlô̆htage Lākhopho, Krĭstu dèbwè nu,” cè tòcò d́ògè do.

Jezŭ Mèhmage Mādo Dèbwè Apho

43Alekă gīthè̆ hwă, Jezŭ hèhta hwă d́ŏnu kî legè d́ŏ Galilĕage nu, 44manè̄, Jezŭ thè̆ne khagè thè̆thî htè, “Prò̆fèt dèbwè di nib́è ahĭahtè̆ d́ŏ co d́ŏlaphăbu ńò,” nu. 45Megōnu d́ō, b́ĕ Jezŭ lenī d́ŏ Galilĕage akhî nu, Galilĕapho tòcò lescĭgè Cè klè d́ŏ cè tòcò tcahtîgè Jezŭ adèphîdèmè d́ŏ Jerŭsalèm u bu b́ĕ Păskwa Pwè̆do akhî akhoacè̆ nu.

46Jezŭ geb́agè d́ŏ Galilĕage, Kănna u htè Zè mèphî̆htagè htĭ kî thobiscihtĭ nu. B́ĕnu Mādo dèbwè apho scwisô kî thamò̆ thĭgè d́ŏ Kapèrnaum u bu nu. 47B́ĕ zî thîhè̆b́è Jezŭ ò d́ŏ Judĕage kî legè d́ŏ Galilĕage nu d́ō, ze le damò Jezŭ agē le mèhmage lōwa, manè̄ ca thamò̆ thĭgè acè̆ nu. 48Mègōnu d́ō, Jezŭ d́ò cè, “Thĭ da tcahtî dèhô̆gèlè ńò kî dècòklîcòhjè̆ ńò nu thĭ tu b́u dè ńò,” Cò d́ò lōwa do.

49Mādo d́òge Cè, “Sara, lebò̄ b́ĕ jo pho di thĭ hnî̆ńò nu,” cò d́ò lōwa do.

50Jezŭ d́òscĭge cè, “Gebò̄ nè klè, no pho ò thôḿô̆ tèpwè,” Cò d́ò lōwa do.

Mādo b́u hwă Jezŭ adèjî̄b́è d́ō ze gegè. 51B́ĕ ze gekô klè akhî nu, zô zô zè bwè tòcò lescĭ cè klè kî cò d́ò̆sa lōwa htè zo pho òthôḿô̆ge htŏ nu.

52Mègōnu d́ō, cè d́è̆tcagè lōwa tòcò htè zo pho philage hlekadè̄ nu. Cè tòcò d́ò̆sa lōwa, “Mŏhè dini, thăthô danare akhî nu dèsè̆ b́ăplègè cè,” cò d́ò̆sa lōwa do. 53Apa dèbwè thîhè̆ danā htè anu ḿî b́ĕ Jezŭ d́ò cè, “No pho ò thôḿô̆ tèpwè,” akhî nu. Cè kî zo pho zè hmè̆ thèd́è̆gumu b́ugè Jezŭ.

54Ajo ḿî Jezŭ mègè dèbòdèba gīpla tapla b́ĕ Cò ò Judĕage kî le d́ŏ Galilĕage akhî nu.

Currently Selected:

Zowănnī 4: GRNT21

Highlight

Copy