Zowănnī 3

Jezŭ kî Nikodĕmus

1B́ĕnu d́ŏ bija Pharizè̆pho tòcò aklè̆ ami ḿî Nikodĕmus ògè dèbwè htè Jŭdapho akhoane nu. 2Ze lehtî thă Jezŭ kî d́ò lōwa, “Rabbi, wî thîhè̆ tèpwè Nî ḿî Sara aò d́ŏ B́ĭcè ò kî legè nu, kî Kib́ĭcè kò tò òkô ma bija kă ńò d́ō, zè dè mèkèhta dèbòdèba acab́ô̆ Nè mègè nu dèbwè̆ ńò,” cò d́ò lōwa do.

3Jezŭ d́òscĭge cè, “Jò d́ò̆sa nè adî̄ahma, bija dèbwè kò tò òlathè̆ ńò d́ō, ca ta tcahtîb́è tèpwè Kib́ĭcè Ahtĭage ńò,” Cò d́òge lōwa do.

4Nikodĕmus d́òge Cè, “Bija dèbwè atha gē bwegè d́ō, cò kò òlathè̆ za wed́ò̆ cadè̄ be? Ze gē genī hwă zo mo aphŭbu bu d́ō cò kò òla za pwè ā?” cè d́è̆ lōwa do.

5Jezŭ d́òscĭge cè, “Jò d́ò̆sa nè adî̄ahma, bija dèbwè kò tò òlathè̆ d́ŏ htĭ kî Spirito Tcahtĭ ńò d́ō, ze dè lenīb́è Kib́ĭcè Ahtĭage abu ńò. 6Bija htè aòlai dèphedèhî ḿî dèphedèhî, barasă aòlai Spirito Tcahtĭ ḿî dètha. 7Jò d́ò̆sa nè dè ajo nu htèniwĭniwa nibò̄ ḿè ale ḿè. ‘Ńò kò òlab́è tapla be,’ Cò d́ò lōwa do. 8Gīlli thaè dobō arră lò dobō za tèpwè kî nî thîhè̆ tèpwè alē thè, barasă adobōle d́òlè̄ kî adobōge d́òlè̄ nu nî dî thîhè̆ mè ńò. Bija aòlakî Spirito Tcahtĭ dèbwè ḿî ḿî gōnu lò lò,” Cò d́ò̆sagè lōwa do.

9Nikodĕmus d́òscĭge Cè, “Dè ajo tòcò gî̄ phî̆hta za cadè̄?” cè d́è̆ lōwa do.

10Jezŭ d́òscĭge cè, “Nî ḿî d́ŏ Israè̆lpho aklè̆ Sarado dèbwè, ḿî nî dî thîhè̆gè dè ajo tòcò ńò ā? 11Jò d́ò̆sa nè adî̄ahma, wî jî̄b́è dè d́ŏ wî thîhè̆ tòcò lò. Kî wa kha thè̆thî dè d́ŏ wè kèhtîgè tòcò nu, ḿî wè dèkhathè̆thî nu thĭ dî phînigè ńò. 12Jò d́ò̆sadè ab́èkja Lākho tòcò nu kî nu tu b́u ńò d́ō, Jò kò d́ò̆sa nè dè ab́èkja Mò̄kho tòcò nu d́ō, nu kū b́u za d́ò̆ cadè̄? 13Kîd́ò̆ aò d́ŏ Mò̄kho ala dèbwè akhlŏ bija dahta Mò̄kho dèbwè̆ hnî̆ńò, ḿî Bija Apho aò d́ŏ Mò̄kho nu dèbwè kòlò̆,” Cò d́ògè lōwa do.

14“Acab́ô̆ Mŏzè tad́ăhta wu d́ŏ Lothĭḿizekho nu akhò̆, Bija Apho nu kè̄ b́è tad́ăhtakò̆, 15cab́ô̆htè bija ab́u Cè tòcò gī nib́è dèò lahtŭlablo nu,” Cò d́ò̆sagè lōwa do. 16Kib́ĭcè b́èlò̄ Lākhopho pwĕ Ci i lōwa Zo Pho aò dèbwè lò nu, cab́ô̆htè bija ab́u Cè tòcò gè̄ dè kè̆ dè hlè̆mè̄bò̄ ńò, ḿî gī nib́èbò̄ dèò lahtŭlablo nu. 17Manè̄ d́ō, Kib́ĭcè thodŏle Zo Pho d́ŏ Lākho jo ḿî tè b́è Zi gī cirra Lākhopho anikhĭ ńò, ḿî cab́ô̆htè d́ŏ Zo kho Zè cè̆ Lākhopho gī nib́èbò̄ dèhlô̆htage nu.

18Bija ab́u Cè dèbwè nu tè b́è dècirra ńò, barasă bija atu b́u Cè ńò dèbwè nu b́è cirra htŏ, manè̄, cu tu b́ugè Kib́ĭcè Apho dèbwè lò Ami ńò akhoacè̆ nu. 19Dècirra ḿî ajo: Dèhlî̆ lelagè d́ŏ Lākho jo, ḿî bija nu cè b́èlò̄ dèkhi d́olĭ kî dèhlî̆ d́ŏ zè dèphîdèmè ḿî akî̆kkè akhoacè̆ nu. 20Manè̄ d́ō, bija amèdè akî̆kkè gŏ abwè nu dè wè̄ dèhlî̆ ńò kî ze de le tèpwè dèhlî̆ aklè̆ ńò, cab́ô̆htè ze dèphîdèmè tòcò dî hlî̆htaphlò̆htabò̄ ńò nu. 21Bija amèdè adî̄ahma dèbwè nu, ze le d́ŏ dèhlî̆ aklè̆ cab́ô̆htè zè dèphîdèmè gî̄ hlî̆htabò̄ nu. Manè̄, zè mè dè d́ŏ Kib́ĭcè amūkă abu akhoacè̆ nu.

Jezŭ kî Zowănnī

22Alekă Jezŭ kî Zo bōhmubicè tòcò legè d́ŏ Judĕage nu, Cò òplo lōwa d́ŏ nu kî ŭsab́ăgè bija htĭ. 23B́ĕnu Zowănnī ŭsab́ăgè bija htĭ d́ŏ Aenòn, aòb́ôhtî Salĭm nu, manè̄ d́ō, d́ŏnu htĭ òè. Bija tòcò le kî khagè Dèŭsab́ăhtĭ. 24B́ĕnu Zowănnī tè b́è b́è̆nī dèkî̆dî̄ bu hnî̆ńò.

25Dèd́òdèsa ab́èkja dèmèplî̆mètcăge òhtagè d́ŏ Zowănnī abōhmubicè kî Jŭdapho tòcò azo nu. 26Cè tòcò lehtî Zowănnī kî d́ògè lōwa, “Sara, bija htè aòplo nè d́ŏ Jòrdăno Gòllò̄ lumuhta kî na khagè anikhĭ thè̆thî dèbwè nu, tcabò̄, cu ŭsab́ă bija htĭ kî bija lehtî lŏ tèpwè cè,” cò d́ò̆sa lōwa do.

27Zowănnī d́òscĭge cè tòcò, “D́ŏ Mò̄kho nu dè ti ilani ma Cè ńò d́ō, bija dèbwè̆ di nib́è za dè dimĭ ńò. 28Thĭ tòcò ḿî ji nikhĭ thè̆thî b́ĕ jò d́ò, ‘Jî dî ḿî Krĭstu ńò, ḿî ab́è thodŏle Zò hlò̆mò̄ lò,’ nu, cò d́ògè lōwa tòcò do. 29Anib́è dèphîcu amihmu ḿî aphîcu amikhŏ lò. Barasă aphîcu amikhŏ athò asò̆hto ò zo wōhtî kî thîhè̆b́è ze lē d́ō, ca thaganāi tèpwè azî̄azô̄ d́o. Mègōnu d́ō, jè dèthaganāi ajo nu pĕhtazòhta tèpwè. 30Zo gō dohtamuhtab́è, ḿî ji gī sci gē ze lab́è lò,” Zowănnī d́ògè do.

Bija aò Mò̄kho ala Dèbwè

31Cè htè aò d́ŏ Mò̄kho ala dèbwè nu zî ḿî lŏcăcè akho. Cè htè aò d́ŏ Lākho ale dèbwè ḿî ab́èkja Lākho kî zî jî̄b́è dè ab́èkja Lākho lò. Cè aò d́ŏ Mò̄kho ala dèbwè nu Cî ḿî dèlŏcăcè akho. 32Za kha tèpwè dè ajo thè̆thî d́ŏ Za tcahtîgè kî thîhè̆b́ègè tòcò lò, kî Zè dèkhathè̆thî nu bija dèbwè̆ di nib́ègè ńò. 33Bija htè aphîni zè dèkhathè̆thî dèbwè zwî̄laglo Zò lò htè Kib́ĭcè ḿî adî̄ahma nu. 34Manè̄ d́ō, Kib́ĭcè thodŏlegè dèbwè nu jî̄b́è Kib́ĭcè alēahwè, manè̄, Kib́ĭcè ila Cè Spirito Tcahtĭ pĕhtazòhta acè̆ nu. 35Apa b́èlò̄ Apho kî Ci ila lōwa dè gŏmi d́ŏ Zu cukhò bu nu. 36Bija htè ab́u B́ĭcè Pho dèbwè nu nib́è dèò alahtŭlablo, ḿî bija htè adò sòkhĕńe kî tu b́u B́ĭcè Pho ńò dèbwè nu da tcahtîb́è dèò ńò, ḿî cò kò òkò̆ d́ŏ Kib́ĭcè adècirra alè̄ nu thèjô̆ lò.

Currently Selected:

Zowănnī 3: GRNT21

Highlight

Copy