Zowănnī 13

Jezŭ Ŭsab́ă Bōhmubicè tòcò Akhakhò

1Dèsè̆kî Păskwa Apwè̆ b́è hnî̆ńò nu, Jezŭ thîhè̆gè htè Cè kè̄ b́è hèhta d́ŏ Lākho jo kî gehta òkôb́ègè Ca Pa akă akhîb́ègè nu, Cè b́èlò̄gè Zi bija Lākhopho htè aḿî Cè è̆ tòcò htô̆ agudŭ nu.

2B́ĕ Jezŭ kî Zo bōhmubicè tòcò a jī lōwa lumuhè adèa nu, Mod́èlî lenīgè d́ŏ Simŏnè apho Jŭdas Iskariŏta atha bu, cab́ô̆htè zô gô̄ hô̆lă lōwa nu. 3Jezŭ thîhè̆ htè Ca Pa ila lŏ dècô̆thèlè̆ Zu cukhò bu; kî Cò ò d́ŏ Kib́ĭcè ò Za lagè kî Ze gē gehtab́ègè d́ŏ Kib́ĭcè ò nu. 4B́ĕ Lumuhè Adèa Apwè̆bu nu, Jezŭ wè̄hto b́ĕ cud́èkho, Co b́oladēkè̆ Zi scid́ŏkhlŏ, Zî phî khub́ò kî cŏb́aglo Za jadē alò. 5Mèhwă d́ō, Zò hlònī hwă htĭ d́ŏ còlòdo abu kî Cu ŭsab́ăgè Zò bōhmubicè tòcò akhakhò kî htô̆b́ăige Zu khub́ò aòwè̄ Za jadēlò tè b́è nu. 6B́ĕ Zo dohtî Petru nu, Petru d́ògè Cè, “B́ĭcè, Nu ku ŭsab́ăgè ja khakhò ā?”

7Jezŭ d́òge cè, “Dè htè Jè mè khŏnujo nu nî dî thîhè̆ hnî̆ńò, ḿî alekă nî gî̄ thîhè̆kò̆.”

8Petru d́ògegè Cè, “Nu tu ŭsab́ăb́è pĭpi ja khakhò ńò.”

Jezŭ d́òge Petru, “Ju tu ŭsab́ăb́è b́eḿĕ na khakhò ńò d́ō, ńò tò òkô za be Ja kă ńò!” Cò d́ògè lōwa do.

9Simŏnè Petru d́òscĭge Cè, “B́ĭcè, ŭsab́ăbò̄ ḿè htĕ ja khakhò lò ḿè. Ŭsab́ăkôbò̄ ju cukhò, jo ko papa.”

10Jezŭ d́ò cè, “Bija ab́èwîb́ètcă hwă htŏ tòcò nu, gè lè̄dakè̆ ma za khakhò d́ō, dè amò ŭsab́ă ale tò ò be ńò. Thĭ wî thĭ tcă htŏ, barasă tè b́è gŏ abwè ńò,” Cò d́ògè lōwa do. 11Manè̄ agô̄ hô̆lă Cè ḿî bò̄bwè nu Zi thîhè̆ hwăgè acè̆ nu, Cò d́ògè dèjî̄b́è, “Thĭ wî thĭ tcă htŏ, barasă tè b́è gŏ abwè ńò.”

12B́ĕ Zu ŭsab́ă hwă lōwa tòcò akhakhò, Zô thòhtage Zi scid́ŏdo kî geb́age d́ŏ cud́èkho ò kî sańăògè. Cò d́ògè lōwa tòcò, “Jè mèni thĭ danè̄ nu thĭ thîhè̆ htŏ ā? 13Thĭ jogè Jè, Sara, kî B́ĭcè. Ḿî ab́è tèpwè, manè̄, Jî ḿî tèpwè gōnu hŏ. 14Jè jo Jî ḿî nòthò̆ thĭ B́ĭcè kî thĭ Sara hnò̆nu, Ju ŭsab́ăgè thĭ khakhò. Thĭ ḿî ḿî ŭsab́ăhlèbò̄ lōwa akhakhò. 15Acab́ô̆ jè d́è̆lî̄gè thĭ nu, thĭ ḿî ḿî mèkôbò̄ gōnu nu. 16Jò d́ò̆sa thĭ adî̄ahma, zôpho to d́olĭ ab́icè dèbwè̆ ńò. Ab́èthodŏ dèbwè ḿî to dolĭ kî athodŏ cè dèbwè ńò ńò. 17Thĭ gî̄ thîhè̆ ma dè ajo tòcò jo kî thĭ gè̄ mèkô ma d́ō, thĭ kè b́èhôwî tèpwè.

18“Jò tò d́ò thĭ gŏ abwè ńò; Jî thîhè̆ tèpwè htè jô rôhlè tòcò nu; ḿî cab́ô̆htè Cè Tcahtĭ gē pĕhtabò̄ nu, acab́ô̆ ad́ò, ‘Bija a a plo jè dèbwè ḿî bija ahtad́ĕd́ò jè’ dôhmô̆ nu. 19Jò d́ò̆sa thĭ, khŏnujo dukhlŭkî dèphî̆hta hnî̆ńò nu, cab́ô̆htè b́ĕ dèphî̆hta nu thĭ gū b́ubò̄ htè ‘Jî ḿî htè Jî ḿî,’ nu. 20Jò d́ò̆sa thĭ adî̄ahma, bija htè aphîni bija athodŏle jè dèbwè nu, zî phînigè Jè, kî bija aphîni Jè dèbwè nu ḿî bija aphîni bija athodŏle Jè dèbwè nu.”

Jezŭ D́òdòlò Dèhô̆lă Cè Awîakè̆

(Mattĕo 26.20-25; Mărko 14.17-21; Lŭka 22.21-23)

21B́ĕ Jezŭ d́ò hwă dè ajo tòcò nu, Co othoothagè kî Cò d́ò hlî̆htaphlò̆htagè, “Jò d́ò̆sa thĭ adî̄ahma, d́ŏ thĭ klè̆ nu dèbwè gô̄ hô̆lăkò̆ Jè,” Cò d́ò lōwa tòcò do.

22Bōhmubicè tòcò tcawè̄ hwă lōwa dèbwè hwă dèbwè kî htèniwĭniwagè htè Ca tha d́ò bò̄bwè nu. 23B́ĕnu bōhmubicè aklè̆ dèbwè, htè Jezŭ b́èlò̄ dèbwè nu, sańă d́ògòdò wè̄ Jezŭ athaî̆nè̄ bu lò. 24Kî Petru tcawè̄ cè, jehta ako kî dè̆gè cè, “D́è̆ca Cè, ‘Na thaè d́ò ḿîgè bò̄bwè?’”

25Ad́ògòdòwè̄ Jezŭ athaî̆nè̄ bu dèbwè d́è̆gè lōwa, “B́ĭcè, ḿîgè bò̄bwè?”

26Jezŭ d́òscĭge cè, “Ju kū trŭlă hwă toko d́ŏ dèscîhtĭ klè̆ kî ji ki i dèbwè nu,” Cò d́ò̆sa lōwa do. Kîd́ò̆ b́ĕ Cu trŭlă hwă toko Ci igè Jŭdas Iskariŏta htè Simŏnè apho nu. 27B́ĕ Jŭda Iskariŏta a hwă toko dôhmô̆ d́ō, Sătana lenīgè zî hîklè̆. Jezŭ d́ò cè, “Nè mèb́è danè̄ nu mèplăbò̄ dakha,” Cò d́ò lōwa do. 28Cò d́ò ma lōwa gōnu nè nu aò d́î̆wāhtî tòcò dî thîhè̆gè dèbwè̆ ńò. 29Jŭdas ḿî aòi hô̆akŏ akhoacè̆, Jezŭ hna lebwî cè dè aloba d́ŏ pwè̆ anikhĭ, ḿî̆dîḿî ńò akī i bija assègnè̆pho tòcò anikhĭ dimimi lòmò̄, cè tòcò gomogè do.

30Ca a hwă toko dôhmô̆ d́ō zè hèhtaplaplăgè. B́ĕnu dèkhigè.

Dèhmèla Athè̆

31B́ĕ zè hèhta hwă akhlŏ, Jezŭ d́ògè gōjo, “Khŏnujo Bija Apho b́è bè̄dòbè̄the htŏ kî Kib́ĭcè b́è bè̄dòbè̄the d́ŏ Zu bu nu. 32Kib́ĭcè kè̄ b́è bè̄dòbè̄the ma d́ŏ Bija Apho akhoacè̆ nu d́ō, Bija Apho kè̄ b́è bè̄dòbè̄thekò̆ d́ŏ Kib́ĭcè thè̆ne abu, kî gè̄ bè̄dòbè̄thekò̆ Cè taplakhă lò,” Cò d́ò do. 33“Abĭsèpho tòcò, Jò kò òkôwe thĭ kă tod́odasa be. Thĭ gā wāhlèkò̆ Jè kî acab́ô̆ Jò d́ò̆sagè Jŭdapho akhoane tòcò, ‘D́ŏ Jò ò nu thĭ de le za ńò,’ gōnu akhò̆ Jò d́ò̆sa thĭ khŏnujo. 34Ji ilani thĭ dèhmèla athè̆ dèdè̆; b́èlò̄hlèbò̄ lōwa dèbwè kî dèbwè. Acab́ô̆ Jè b́èlò̄gè thĭ nu thĭ kè b́èlò̄hlè lōwa dèbwè kî dèbwè. 35Thĭ kè b́èlò̄hlè b́eḿĕ lōwa dèbwè kî dèbwè d́ō, bija lŏcăcè gî̄ thîhè̆kò̆ htè thĭ ḿî Jo bōhmubicè tòcò nu.”

Dèd́ò̆sadòlò Petru Adèjab́i

(Mattĕo 26.31-35; Mărko 14.27-31; Lŭka 22.31-34)

36Simŏnè Petru d́ògè Cè, “Ŏ B́ĭcè, Ne gē legè d́òlè̄?” cè d́è̆gè lōwa do.

Jezŭ d́òscĭge cè, “Je gē legè d́òlè̄ nu khŏnujo ne de lekô za hnî̆ńò. Barasă alekă ne gē lekô b́è tèpwè,” Cò d́ò lōwa do.

37Petru d́òscĭge Cè, “Je de lekô za ma Ne le khŏnujo ńò nè? Jò òhnè d́ŏ aki ilaphlòḿĭ ja tha Ni nikhĭ lò,” cò d́ò lōwa do.

38Jezŭ d́òscĭge Cè, “Ni ki ilaphlòḿĭ na tha ji nikhĭ ā? Jò d́ò̆sa nè adî̄ahma, dukhlŭkî scî̆phè̆ ôhta hnî̆ńò nu, na gā jab́ikò̆ Jè thŏpla htè nî dî thîhè̆ Jè ńò nu.

Currently Selected:

Zowănnī 13: GRNT21

Highlight

Copy