Zowănnī 12

Dèhtôrô Jezŭ kî Si d́ŏ Bèthăniad́ŏ nu

(Mattĕo 26.6-13; Mărko 14.3-9)

1B́ĕ Păskwa Pwè̆ tè b́è hnî̆ńò anithăthô nu, Jezŭ legè d́ŏ Bèthăniad́ŏ htè Zè mèhtaboge Lazarŭ dèthĭ aklè̆ tod́osò̆ nu. 2Kî bija tòcò mèni Zi nikhĭ Lumuhè adèa, Martha mèò̆mèa ni bija, ḿî Lazarŭ òkôgè Jezŭ akă d́ŏ d́î̆wāhtî nu. 3Marĭa phî hwă sihnŭẃi htè bija mèi thohto nard́u alīdobwîthè̆ apĕhta tokŏ d́ō, zò hlòlagè Jezŭ akhakhò alò kî htô̆b́ăigè zu khulŭ. Hi thèd́è̆wa pĕhtagè kî dèhnŭẃihnŭthòrò̆. 4B́ĕnu Zo bōhmubicè aklè̆ ami ḿî Jŭdas Iskariŏta htè athaḿò̆ hô̆lăgè Cè dèbwè d́ò, 5“Sihnŭẃi jo bija dè sè̆ ma cè hô̆hî denărio thŏgèjè abu kî i ma assègnè̆pho tòcò ńò nè?” cò d́ògè do. 6Cò d́ò dè ajo ḿî tè b́è zò khòwèhmòb́è assègnè̆pho tòcò acè̆ ńò, ḿî zî ḿî a ahudè, aphîgloi hô̆akŏ kî aphî̆hta anikhĭ dèbwè akhoacè̆ nu.

7Jezŭ d́ò cè, “Cò ò d́ò̆è cè! Cab́ô̆htè cò kò òi jè dèb́èb́ŭlă amuni anikhĭ nu. 8Manè̄ kò̄ d́òdo dō, assègnè̆pho tòcò òkô thèjô̆ thĭ kă, ḿî Jè jo, Jò tò òkô thèjô̆ thĭ kă ńò,” Cò d́ògè lōwa do.

Dèthaè Mèthĭ Lazarŭ

9Jŭdapho tòcò thîhè̆gè Jezŭ ò d́ŏnu dō, ruru ze legè do, tè b́è htĕ cè tòcò thaè tcahtî Jezŭ ńò, ḿî ca thaè tcahtî Lazarŭ htè Jezŭ mèthôḿô̆htage d́ŏ dèthĭklè̆ dèbwè akhoacè̆ nu. 10Phŭgido tòcò thaè mèthĭgè Lazarŭ papa. 11D́ŏ zo kho zè cè̆ Jŭdapho òè̆bwè hèthĭwī cè kî b́ugè Jezŭ akhoacè̆ nu.

Dèlenī Dedòdèthe Aklè̆ d́ŏ Jerŭsalèm u

(Mattĕo 21.1-11; Mărko 11.1-11; Lŭka 19.28-40)

12Alekă dini bija aboahò akhè̆nī pwè̆bu tòcò, b́ĕ zî thîhè̆b́è Jezŭ gā hta Jerŭsalèm u bu d́ō, 13cè tòcò gle hwă htăb́è aphă lescĭgè Cè klè tòcò. Cè kèwod́ò̆lēhta, “Hozăna! Ab́èhôwî ḿî bija ale d́ŏ B́ĭcè ami abu dèbwè nu. Ab́èhôwî ḿî Israè̆l Asaphra!” cò d́ò do.

14Jezŭ tcahtîgè thîrîd́ŏ tod́ŏ kî Za htad́ògè akho. 15Dè ajo ḿî acab́ô̆ Cè Tcahtĭ abu aò ahwela nu;

“Scisă ḿè, Ŏ Zion Aphohmu!

Na saphra lehtî nè,

Cò d́ò thîrîd́ŏ aphè̆pho akho.”

16Aŭsu bōhmubicè tòcò dî thîhè̆gè dè ajo tòcò ńò. Barasă b́ĕ Jezŭ bè̄dòbè̄the hwă khaĺè, cè tòcò gomohtanigekò̆ dèhwela ò ab́èkja Jezŭ kî bija tòcò mègè gōnu ḿîthè̆ cè tòcò mèni lōwa htè awîakè̆ aò hwela d́ŏ Cè abu nu.

17Bija aboahò htè hlĕ aòkô Ca kă htè b́ĕ Zo johta Lazarŭ d́ŏ lūkhobu kî b́awè̄htoge lōwa d́ŏ dèthĭklè̆ akhî nu tòcò khagè Zi nikhĭ thè̆thî. 18Kîd́ò̆ bija aboahò lescĭ Cè klè awîakè̆ ḿî d́ŏ Zè mègè dèbòdèba ajo dèdè̆ akhoacè̆ nu nu. 19Mègōnu d́ō, Pharizè̆pho tòcò d́òhlèsahlègè lōwa, “Thĭ tcahtî htŏbò̄ ā? Htè wa dè mèkèhta dimĭ ńò nu ā? Tcabò̄ bija lŏcăcè lôkôgè Ze le.”

Grĭspho tòcò Wāhlè Jezŭ

20Bija hta thèb́è̆gè d́ŏ Jerŭsalèm u b́ĕ Pwè̆bu akhî nu, Grĭspho tòcò htakô bija akă. 21Cè tòcò lehtîgè Philĭpo htè aò d́ŏ Bèthsaĭda U, Galilĕage nu dèbwè kî cò d́ò, “Wa thaè tcahtî Jezŭ,” cè d́ò lōwa do.

22Philĭpo le d́ò̆sa Andrĕa, mèhwă cè gībwè le d́ò̆sagè Jezŭ. 23Jezŭ d́òscĭge cè tòcò, “Bija Apho kè̄ b́è bè̄dòbè̄the anikhĭ akhîb́è htŏ. 24Jò d́ò̆sa thĭ adî̄ahma, ḿî̆dîḿî d́ŏ b́u dophlo ladē hwă d́ŏ haphelè̄ kî ô̆thĭ ńò nu, akò ò dophlo allele lò. Barasă athĭ tapla d́ō, athèhta lakwă tèpwè pwĕdimi. 25Bija htè ab́èlò̄ adèòthôḿô̆ dèbwè nu, supab́èkò̆ aè̆, kî bija htè ati kĭwīi adèòthôḿô̆ ńò d́ŏ lākho jo dèbwè nu, òi aè̆ d́ŏ dèò alahtŭlablo nu. 26Bija dèbwèbwè gā khazô Jè nu, zô gô̄ lôkô d́ò̆è Je le, kî Jò ò ale arră nu Jô zôpho kò òkôkò̆ Ja kă. Bija dèbwèbwè gā khazô Jè nu, Ja Pa gè̄ bè̄dòbè̄thekò̆ cè.

Jezŭ D́òphlò̆hta Zè Dèthĭ Awîakè̆

27“Khŏnujo Ja thabehebòhò̆ sôgè, kî Jè kèb́è d́ògè danè̄? Ḿî Jè b́è d́ò, ‘Apa, i ḿè dè akhînare ajo gō dohtîbò̄ ḿè Jè ḿè,’ nu ā? Barasă d́ō, Je lela ḿî Je gē lekha dèssègnè̆bòdò ajo anikhĭ lò. 28Ŏ Apa, mèhĭmèhtè̆bò̄ Ni mi.”

Anu d́ō dè alē thèhta d́ŏ Mò̄kho nu ad́ò, “Jè mèhĭmèhtè̆ htŏ tèpwè, kî Jè gè̄ mèhĭmèhtè̆ we tèpwè,” ad́ò do.

29Bija aboahò aò b́ĕnu tòcò thîhè̆b́è dè alē jo d́ō, tòcò cò d́ò ḿî hlăwō, kî tòcò cò d́ò, “Mò̄khobwèzo jî̄b́èhtî Cè,” cò d́ò do.

30Jezŭ d́ò, “Dè alē jo tè b́è Ji nikhĭ ńò, ḿî thĭ nikhĭ lò. 31Khŏnujo, asŏakhè̆ b́è htŏ d́ŏ Lākho kè̄ b́è cirragè. Aŭi lākho dèbwè nu kè̄ b́è hnahèhtakè̆kò̆ d́ŏ Saphra ale. 32Barasă Jè nu, b́ĕ jè b́è zāhtajî d́ŏ lākho jo nu, Ji gī cwiplokò̆ bija lŏcăcè d́ŏ Jo ò,” Cò d́ògè do. 33(Cò d́ò gōjo ḿî Ca thaè d́è̆lî̄hta Ci gī thĭ b́è cadè̄ nu.)

34Bija aboahò tòcò d́òscĭgè, “Krĭstu ò thôḿô̆ lahtŭlablo lò, dèhwela ò do. Mègōnu d́ō, Bija Apho kè̄ b́è zāhtajî, ńò d́ò za ma do nè? Bija Apho ḿî bò̄bwè?” cè tòcò dè̆gè lōwa do.

35Jezŭ d́ò cè tòcò, “Dèhlî̆ kò òkô thĭ kă tod́odasa lò. Cab́ô̆htè dè di khidī thĭ ńò nu, b́ĕ dèhlî̆ we akhè̆ jo d́ō, le gebò̄. Bija ahè dèkhiklè̆ dèbwè nu dî thîhè̆ ze le d́òlè̄ d́òlè̄ ńò. 36Gōnu akhoacè̆ b́ĕ thĭ nib́è we dèhlî̆ ajo nu, b́ubò̄ dèhlî̆ ajo cab́ô̆htè thĭ gî̄ ḿî dèhlî̆ apho tòcò nu.” Cò d́ò lōwa do.

Jŭdapho Tu B́u Jezŭ Ńò

Jezŭ d́ò hwă gōnu d́ō, Zè hèhta kî lè̄hugè Ze ne d́ŏ lōwa tòcò ahlò̆mò̄ nu. 37Jezŭ mè nòthò̆ dècòklî pwĕdimi d́ŏ cè tòcò ahlò̆mò̄ hnò̆nu, cu tu b́u lōwa ńò. 38Dè ajo ḿî acab́ô̆ prò̆fèt Izaĭah d́òdòlògè;

“Ŏ B́ĭcè, bò̄bwè ku b́u wè dèd́ò̆htôla nu bwè?

B́ĭcè gè̄ d́è̆lî̄ acô̆thèlè̆ d́ŏ bò̄bwè ahlò̆mò̄ bwè?” nu pĕhtazòhtagè.

39Gōnu akhoacè̆ cè tòcò tu b́u za tèpwè ńò. Mèhwă d́ō, Izaĭah d́òwe;

40“Kib́ĭcè mèplò cè tòcò agādŭ,

mèkhi cè tòcò atha,

cab́ô̆htè cè tòcò gā ta tcahtîbò̄ ńò,

ca tha gî̄ dî thîhè̆bò̄ ńò,

zè gè̄ dè khwè̆b́agebò̄ d́ŏ Jò ò ńò,

kî mèhlè̆mè̄ zabò̄ lōwa tòcò adèscwidèsè̆ ńò anikhĭ nu.”

41Izaĭah d́ò dè ajo ḿî ca tcahtîb́ègè Jezŭ adòathe akhoacè̆ cò d́ò̆sagè lōwa awîakè̆ lò.

42Jŭdapho akhoane òè̆bwè b́u nòthò̆ Jezŭ hnò̆nu, Pharizè̆pho tòcò akhoacè̆ cè b́èhjŏ bija gā hna hèhta cè d́ŏ Sinagŏgā akhlŏ d́ō, tò d́òhlî̆hta b́u tèpwè dèbwè̆ ńò. 43Cè tòcò thaèni bija adèhtăi d́olĭ Kib́ĭcè adèhtăi lò.

Jezŭ Adèjî̄b́è Ḿî Dècirra

44Jezŭ d́òhta sôtèklè alē, “Bija htè ab́u Jè dèbwèbwè nu, tèb́è htĕ cu b́u Jè lò ńò, ḿî cu b́u kôkô athodŏle Jè dèbwè nu. 45Bija htè akèhtî Jè dèbwèbwè nu, tè b́è htĕ cè kèhtî Jè lò ńò, ḿî cè kèhtî kôkô athodŏle Jè dèbwè nu. 46Je lela d́ŏ lākho jo acab́ô̆ dèhlî̆ akhò̆, cab́ô̆htè gajă bija ab́u Jè dèbwèbwè nu kò tò òb́èbò̄ dèkhiklè̆ ńò anikhĭ lò. 47Bija htè athîhè̆ Jè dèd́ò̆htôla kî adî phîni ńò dèbwè nu, Ji di cirra cè ńò. Je lela ḿî Jo gō mèhlô̆htage bija lākhopho, dî ḿî Ji gī cirra bija anikhĭ ńò. 48Bija htè ahèthĭwī Jè kî atu b́u Je lē Jè hwè ńò tòcò nu, agī cirra cè ò tèpwè. Jè dèjî̄b́è tòcò gî̄ ḿîkò̆ dècirra d́ŏ munilēdū nu. 49Ajo ḿî adî̄ahma lò, manè̄ d́ō, Jî dî jî̄b́è dò̆ Jè dèphlŭdèthere abu ńò, ḿî acab́ô̆ Pa htè athodŏle Jè dèbwè hna d́ò Jè adĕ nu lò. 50Kî Jî thîhè̆ d́ŏ Ze lē Zè hwè lei dèthôḿô̆ lahtŭlablo lò. Gōnu akhoacè̆, Jò d́ò dè ajo ḿî acab́ô̆ Pa hna d́ò Jè adĕ nu lò.”

Currently Selected:

Zowănnī 12: GRNT21

Highlight

Copy