Zowănnī 11

Lazarŭ Adèthĭ

1Bija ami ḿî Lazarŭ aò d́ŏ Bèthăniad́ŏ dèbwè scwigè. Bèthăniad́ŏ ḿî Marĭa kî zè mè̄ Martha ògè ad́ŏ nu. 2(Marĭa ajo dèbwè ḿî athôphrô B́ĭcè akhakhò kî dèhnŭẃi hwă ahtô̆b́ăigè akhulŭ dèbwè nu. Lazarŭ ascwi dèbwè ḿî cî ṕîkò̆.) 3Mègōnu d́ō, zè mè̄ tòcò thodŏlegè bija agē lejo Jezŭ, cò d́ò, “B́ĭcè, Nè b́èlò̄ dèbwè scwigè,” cò d́ò lōwa do.

4Jezŭ thîhè̆b́è dè ajo d́ō, Cò d́ò lōwa tòcò gōjo, “Dèscwidèsè̆ ajo tè b́è htô̆ thĭ htô̆ ò ńò, ḿî Kib́ĭcè adòathe anikhĭ cab́ô̆htè Kib́ĭcè Apho kè̄ b́è bè̄dòbè̄thebò̄ Zo kho Cè cè̆ nu dòkhò̆,” Cò d́ò do.

5Jezŭ b́èlò̄gè Martha, cî ṕîkò̆ Marĭa kî Lazarŭ. 6Zî thîhè̆b́è nòthò̆ Lazarŭ scwigè hnò̆nu, Cò òwe d́ŏnu gīthè̆ be. 7Mèhwă alekă Cò d́ògè Zo bōhmubicè tòcò, “Gē leb́a d́ŏ Judĕage tapla be,” Cò d́ò lōwa tòcò do.

8Bōhmubicè tòcò d́òscĭge Cè, “Sara, tò òjî̄òkja hnî̆ńò Jŭdapho tòcò thamò̆ hwĕthĭge Nè lo, ḿî Na thaè le we tèpwè ā?” cò d́è̆ lōwa do.

9Jezŭ d́òscĭge cè tòcò, “Muni dini dini ḿî aò scigīnare tè b́è ńò ā? B́eḿĕ bija dèbwèbwè gè̄ hè ma lumusèkhè̆ d́ō, zè dèhtè̆thukŭ tèpwè ńò, manè̄ d́ō, za tcahtî lākho acè̆ nu. 10Barasă zè gè̄ hè ma lumunèkhè̆ d́ō, zè gè̄ htè̆thukŭ tèpwè, manè̄ d́ō, dèhlî̆ tò ò ńò acè̆ nu,” Cò d́òge lōwa tòcò do. 11Cò d́ò̆sa hwă lōwa tòcò dè kî alekă Cò d́òwe lōwa, “Wò thò Lazarŭ sòḿĭgè. Barasă Jē le kî htowè̄kò̆ cè,” cò d́ò do.

12Mègōnu d́ō, Zo bōhmubicè tòcò d́ògè, “B́ĭcè, zò gò̄ sòḿĭ b́eḿĕ d́ō, cò kò òhmahtage tèpwè,” cè tòcò d́ò lōwa do.

13B́ĕnu Jezŭ d́ò̆sa cè tòcò dèthĭ awîakè̆, barasă cè tòcò gomo ḿî dèsòḿĭsò̆ha awîakè̆ lò. 14Mègōnu d́ō, Jezŭ d́ò hlî̆htaphlò̆htakò̆ gōjo, “Lazarŭ thĭ htŏ. 15Ḿî Ja thaganāi htè Jò tò ò d́ŏnu ńò ḿî thĭ kho thĭ cè̆, cab́ô̆htè thĭ ku b́ubò̄ Jè nu. Gē lehtî cè dakha,” cò d́ò lōwa do.

16Tomăzo htè (bija jo aòthokŏ) dèbwè d́ògè zò khò̆golō tòcò gōjo, “We gē legè cab́ô̆htè wi gī thĭplo cè nu,” cò d́ògè do.

Jezŭ ḿî Dèhtaboge kî Dèòthôḿô̆

17B́ĕ Jezŭ leb́ado nu, bija b́ŭlă cè b́agè lwīnilwīthè̆gè. 18Bèthănia ḿî aòb́ôhtî Jerŭsalèm u, aòzāzo gī mai lò, 19kî Jŭdapho òèòò lehtîgè Martha kî Marĭa cab́ô̆htè akò d́òkhŭd́òmò cè tòcò d́ŏ cè thè̆buwe adèthĭ akhoacè̆ nu.

20B́ĕ Martha thîhè̆b́è Jezŭ le d́ō, ze lescĭ lōwa aklè. Marĭa ḿî cò ò hibu lò. 21Mègōnu d́ō, Martha d́ògè Jezŭ, “B́ĭcè, Ńò kò ò ma b́ĕjo d́ō, jî ṕîkò̆ di thĭ mè ńò. 22Barasă khŏnujo ḿî jî thîhè̆ tèpwè htè Na gā da Kib́ĭcè danè̄ ḿî Ci ki i tèpwè nè nu.”

23Jezŭ d́òscĭge cè, “Nî ṕîkò̆ kò ò thôḿô̆ tèpwè,” Cò d́ò lōwa do.

24Martha d́ò Cè, “Jî thîhè̆ tèpwè zè wè̄htokò̆ d́ŏ dèhtaboge amuni nu htè agudulă dini nu,” cò d́ò lōwa do.

25Jezŭ d́ò cè, “Jî ḿî dèhtaboge kî dèòthôḿô̆. Bija ab́u Jè dèbwè nu ci thĭ nòthò̆, cò thôḿô̆ tèpwè, 26kî gajă bija aòthôḿô̆ kî ab́u Jè dèbwè nu di thĭ b́è taplă ńò. Nu b́u tèpwè dè ajo ā?” Cè d́è̆ lōwa do.

27Cò d́òscĭge lōwa, “B́èhŏ B́ĭcè, ju b́u tèpwè htè Nî ḿî Mèssĭah, Kib́ĭcè Apho, agā lab́è d́ŏ Lākho jo dèbwè nu,” cò d́ò̆sagè lōwa do.

Jezŭ Agādŭhtĭ la

28Martha d́ò hwă gōjo d́ō, ze lejo huzògè cî ṕîkò̆ Marĭa, kî d́ò lōwa, “Sara ò b́ĕjo kî Zo jo nè,” cò d́ò̆sa lōwa do. 29B́ĕ Marĭa thîhè̆b́è dè ajo d́ō, zè wè̄hto plaplă kî lehtîgè lōwa. 30Jezŭ do donī d́ŏbu hnî̆ńò, ḿî Cò òwe d́ŏ alleaklè htè Martha htèglè̄ni Cè nu kòlò̆. 31B́ĕ bija ad́òkhŭd́òmò Marĭa tòcò tcahtî zè wè̄hto kî hèhtaplaplăgè hid́okhlŏ d́ō, zô lôkô lōwa ale kî d́ògè, “Ze gē le ha d́ŏ lūkho nu lòmò̄,” cò d́òhlè lōwa do.

32B́ĕ Marĭa dolehtî Jezŭ kî kèhtî lōwa nu, zò gò̄la b́îtèd́è lōwa akhahtî kî cò d́ò, “B́ĭcè, ńò kò ò ma b́ĕjo nu, tèb́è jî ṕîkò̆ gī thĭ ńò,” cò d́ò lōwa do.

33B́ĕ Jezŭ tcahtî Marĭa ha, kî Jŭdapho alekô ca kă tòcò ha ha d́ō, Ca thab́èd́ô̆sô kî koŏgajāgè. 34Kî Cè d́è̆gè bija tòcò, “Thĭ b́ŭlăgè cè d́òlè̄?” Cò dò do.

Cè tòcò d́òscĭge, “B́ĭcè, le tcabò̄,” cò d́ò lōwa do.

35B́ĕnu Jezŭ hagè. 36Mègōnu d́ō, Jŭdapho tòcò d́ògè, “Tcabò̄, Cè b́èlò̄ lōwa pwedè̄ nu,” cò d́òhlè lōwa do.

37Barasă cè tòcò cò d́ògè, “Cè htè amèhlî̆htage bija agādŭ dèbwè nu dè mèkèhtagè cab́ô̆htè ajo dèbwè di thĭ b́è ńò nu ā?” cè tòcò d́òhlègè lōwa do.

Lazarŭ B́èmèthômô̆htage

38Mègōnu d́ō, d́ŏ dèkoŏgajā abu Jezŭ legè d́ŏ lūkho, haplo htè sòbu bija satôô̆b́i i lo dèmè̆ nu. 39“B́akè̆bò̄ lo,” Jezŭ d́ò do.

Martha htè athĭ dèbwè zè mè̄ nu d́ògè Cè, “B́ĭcè, za laô̆ htŏè, manè̄ d́o, zi thĭ b́ahta htŏ lwīthè̆ htŏ,” cò d́ò lōwa do.

40Jezŭ d́ò cè, “Nu kū b́u ma d́ō, na gā tcahtîb́è tèpwè Kib́ĭcè adòathe Jò d́ò htŏ nè do tèb́è ńò ā?” Cò d́ò lōwa do. 41Mègōnu bija tòcò b́aphlòḿĭkè̆gè lo. Jezŭ jehta ako, Cò d́ò, “Ŏ Apa, Ńò sòkhĕńe htŏ Jè akhoacè̆, Jî thîhè̆htage Nè. 42Ḿî Jî thîhè̆ tèpwè htè Ńò sòkhĕńe thèjô̆ Je lē nu, barasă bija asò̆hto ò khwè̆b́a Jè tòcò acè̆, Jò d́ògè dè ajo cab́ô̆htè cè tòcò ku b́ubò̄ htè No thodŏlegè Jè nu.” 43B́ĕ Cò d́ò hwă gōnu, Zo htŏhta Ze lē, Cò d́ò, “Ŏ Lazarŭ, hèhtabò̄ dakha!” Cò d́ò do. 44B́ĕnu lò, athĭ dèbwè hèhtagè, cu cu za kha ò apîkî̆gloi tîkî̆jā, kî zu mūkă papa. Jezŭ d́ò cè tòcò, “B́ăplèkè̆ cè kî zè gè̄ hè d́ò̆è,” Cò d́ò bija do.

Dèkŏdèkja Agè̄ Mèthĭ Jezŭ

(Mattĕo 26.1-5; Mărko 14.1,2; Lŭka 22.1,2)

45Jŭdapho òè̆bwè htè alehtî Marĭa kî atcahtî hwă Jezŭ mèdè tòcò nu d́ō, cu b́ugè lōwa. 46Barasă cè tòcò cò lehtîgè Pharizè̆pho kî d́ò̆sagè cè tòcò htè Jezŭ mègè danè̄ nu. 47Mègōnu d́ō, Phŭgido tòcò kî Pharizè̆pho tòcò ladēplo lōwa kî d́ògè, “Wè gè̄ mèb́ègè danè̄? Bija ajo dèbwè mègè dècòklîcòhjè̆ pwĕdimi! 48Wè gè̄ lè̄ thèd́è̆ ma cè d́ō, bija lŏcăcè ku b́u cè kî Rŏmapho akhoane tòcò gē le mèkè̆ tèpwè wa Zarādo, kî wi bijakhwĭpho,” cò d́òhlè lōwa tòcò do.

49Barasă d́ŏ cè tòcò aklè̆ dèbwè htè Kaĭphas, htè aḿî Phŭgima b́ĕ anu ted́e nu d́ò cè tòcò, “Thĭ dî thîhè̆ dimĭ ńò! 50Thĭ do gomocagè bija dèbwè gī thĭ nikhĭb́è bija alewe tòcò cab́ô̆htè htĭgepho lŏcăcè tè kè̆ tô ôbò̄ ńò nu,” cò d́ò lōwa tòcò do. 51Barasă d́ō, dèjî̄b́è ajo tè b́è Kaĭphas d́ò dò̆ aè̆ ńò. Zî ḿîgè Phŭgima b́ĕ anu ted́e nu akhoacè̆, cò d́òdòlògè dèjî̄b́è acab́ô̆ Prò̆fèt dèbwè akhò̆, htè Jezŭ gā khab́è dèthĭ d́ŏ Jŭda akhwĭpho lŏcăcè anikhĭ nu. 52Kî tè b́è htĕ cè tòcò anikhĭ lò ńò, ḿî cab́ô̆htè Kib́ĭcè abija htè aòphrulaphrî̆hta tòcò kè̄ b́è htuploge dopho lò nu.

53B́ĕnu phlò̆ ahlò̆mò̄, cè tòcò kŏhtakjalagè agè̄ mèthĭ Jezŭ. 54Mègōnu d́ō, Jezŭ dè hèhtahèla zî̆ be Jŭdapho tòcò aklè̆ ńò, ḿî Ze geb́agè d́ŏ lothĭḿizekho dòkhò̆ d́ŏ u htè bija jo ami Ĕphrèm tu u nu kî Cò òplogè Zo bōhmubicè tòcò b́ĕ nu.

55B́ĕnu akhî Jŭdapho Apăskwa Pwè̆ b́ôhtîgè, kîd́ò̆ Jŭdapho aò d́ŏ d́ŏphă alewe tòcò ledòlògè d́ŏ Jerŭsalèm u, cab́ô̆htè zè gè̄ mèplî̆mètcăbò̄ ze ne anikhĭ nu. 56Cè tòcò wāhlègè Jezŭ. B́ĕ cè tòcò sò̆hto ò d́ŏ Zarādo abu nu, za la d́òhlè lōwa, “Thĭ gomo cadè̄? Za dahta pwè̆bu ńò lòmò̄?” cè d́è̆hlè lōwa do. 57Phŭgido tòcò kî Pharizè̆pho tòcò ila dèhmèla htè bija arră agî̄ thîhè̆ Cò ò dè ale dalālā d́ō, akò d́ò̆sab́è cab́ô̆htè zò gò̄ phòbò̄ lōwa nu.

Currently Selected:

Zowănnī 11: GRNT21

Highlight

Copy