Thodŏpho 8

1Kî Saŭlu khagè zè dèthĭ athè̆thî.

Saŭlu Lô mèssègnè̆ Dèòplo

Hlĕnu dèlômèssègnè̆ òhtagè d́ŏ Jerŭsalèm Dèòplo akho nu d́ō, bōhmubicè tòcò akhlŏ ab́udè tòcò cwè phrulaphrî̆htagè d́ŏ Judĕage kî Samarĭage bu tòcò nu. 2Bija ab́uanè dè tòcò b́ŭlăd́ăhta hwă Stè̆phano d́ō zo jo za hai tèpwè lōwa azî̄azô̄ d́o.

3Barasă Saŭlu mè gòthò̆gòrò Dèòplo, za hta dihi ladē dihi kî cwidôhô thè̆mihmumikhŏ hwă cè tòcò d́ō, htînī lōwa tòcò d́ŏ dèkî̆dî̄ abu nu.

Philĭpo Le D́ò̆htô d́ŏ Samarĭage

4Bija ahèphrulaprî̆hta tòcò b́ĕ ze ledo alle nu, cò d́ò̆htôd́ò̆dèlègè Kib́ĭcè Alēahwè. 5Philĭpo ledo d́ŏ Samarĭage kî d́ò̆htôgè bija tòcò Krĭstu awîakè̆. 6Bija aboahò tòcò sòkhĕńe kî tcahtîbègè Philĭpo adèd́ò̆htô kî ca tcahtî lōwa mè dèbòdèba akhoacè̆ nu, zò sòkhĕńe lōwa aè̆ d́ŏ dèthacwini abu lò. 7Dèhnè acîpô tòcò haphuhasiri hwă hèhtakè̆ bija ahîklè̆, kî acuthĭkhathĭ kî akhad́e tòcò adèsè̆ hlè̆mè̄ lōgè. 8Dèthalōthalai òpè̆htagè d́ŏ u bu nu.

9B́ĕnu bija ami ḿî Simŏnè dèbwè mègè bihwĭbisè̆ adèmè d́ŏ u bu nu d́ō, zè mè htèdômô̄dahmă tèpwè Samarĭapho tòcò, cò d́òlagè ze ne bija adoamu dèbwè, 10kî bija aò d́ŏ u bu gŏ abwè, tcahta d́ŏ adojāmadi tòcò dola d́ŏ atèpwèpho tòcò lŏcăcè sòkhĕńe Simŏnè alē kî cè tòcò d́ò, “Bija ajo dèbwè ḿî ‘Kib́ĭcè Acô̆thèlè̆’ htè ami ḿî ‘Adoamu,’ dimi nu,” cè tòcò d́ò do. 11D́ŏ ad́eahlè̆ pwĕdimi abu nu zè mè htèdômô̄dahmă bija akhoacè̆, bija lŏcăcè sòkhĕńelēthèhô̆gè cè. 12Barasă bija tòcò thîhè̆b́è Philĭpo thôithò̆i Kib́ĭcè Ahtĭage kî Jezŭ Krĭstu ami nu d́ō, b́ugè cè kî thè̆mihmumikhŏ khagè dèŭsab́ăhtĭ. 13Simŏnè thè̆ne b́u kî kha dèŭsab́ăhtĭ hwă lôkôgè Philĭpo alle, b́ĕ Simŏnè tcahtî lōwa mè dèbòdèba ado d́ō zè htèdômô̄dahmă sôgè.

14B́ĕ bōhmubicè aò Jerŭsalèm u tòcò thîhè̆b́è Samarĭage nib́ègè Kib́ĭcè Alēahwè d́ō, zo thodŏlegè Petru kî Zowănnī d́ŏ lōwa ò nu. 15Zo dole lōwa ò d́ō cè thèb́è̆htanigè lōwa tòcò anikhĭ, cab́ô̆htè zi gī nib́èbò̄ Spirito Tcahtĭ nu. 16Manè̄ d́ō, Spirito Tcahtĭ da la zo kho tòcò hnî̆ńò, ḿî za khani jŭ dèŭsab́ăhtĭ d́ŏ B́ĭcè Jezŭ ami abu kòlò̆ akhoacè̆ nu. 17Mèhwă cè tòcò htèla acukhò d́ŏ lōwa akokho kî zî phînigè Spirito Tcahtĭ.

18Barasă b́ĕ Simŏnè tcahtîgè bōhmubicè tòcò ilani bija Spirito Tcahtĭ d́ō, ci i hwă lōwa hô̆, 19cò d́ò, “Ibò̄ jè dèphlŭdèthere ajo, cab́ô̆htè htè gajă bija jè htèla ju cukhò akho tòcò gī nib́èbò̄ Spirito Tcahtĭ nu,” cò d́ò lōwa tòcò do.

20Barasă Petru d́òscĭge cè, “Nò hô̆ gè̄ kè̆ kô ôkôkò̆ na kă, manè̄, no gomo d́ŏ Kib́ĭcè adèila nu nî bwî i kèhta hô̆ akhoacè̆ nu. 21Nè tè b́èkja dè ajo dimĭ ńò, manè̄, na tha da danāgè Kib́ĭcè ahlò̆mò̄ ńò. 22Mègōnu d́ō, bajalagebò̄ ne ne kî thèb́è̆htabò̄ cab́ô̆htè nè dègomo adî wî ńò ajo kèb́è b́ăplèbò̄ nè nu. 23Manè̄ ja tcahtî dèthohtĭ akhè d́ŏ nu bu nu kî dèkèḿè athòròbi d́ŏ ńò lò nu,” cò d́ò lōwa do.

24Ḿî Simŏnè d́òscĭge cè, “Thèb́è̆htabò̄ ji nikhĭ cab́ô̆htè ńò d́ò hwă htŏ dè tòcò gî̄ dî phî̆htani jè ńò nu,” cò d́ò Petru do.

25Mèhwă d́ō Petru kî Zowănnī kha hwă thè̆thî kî d́òŭd́ò̆sa hwă B́ĭcè aVanzĕlo d́ō ze geb́agè d́ŏ Jerŭsalèm u kî d́òŭd́ò̆sagè Vanzĕlō d́ŏ Samarĭapho ad́ŏaphă tòcò nu.

Philĭpo kî Ethiŏpiapho Dèbwè

26Kib́ĭcè aMò̄khobwèzo dèbwè jî̄b́èhtî Philĭpo, cò d́ò lōwa, “Wè̄hto d́ō labò̄ d́ŏ lò̄htè kî lekôbò̄ klè aò d́ŏ Jerŭsalèm u ale d́ŏ Găza u tòb́ò̆ nu,” cò d́ò lōwa do. (Klè jo ḿî lothĭḿizekho aklè.) 27Philĭpo wè̄hto kî legè. Tcabò̄, Ethiŏpiapho bwèphè̆nò̄d́i dèbwè, htè Ethiŏpia asaphramo Kadăce acomādo aphògloi hô̆ dèbwè htagè Jerŭsalèm u kî za hta thèb́è̆ hwă ze gē gela akhî nu. 28Za sańăla hwă d́ŏ thîrîgèhè̆ abu za phagè Prò̆fèt Izaĭah Acè. 29Kî Spirito Tcahtĭ d́ògè Philĭpo, “Leb́ôhtî kî òbò̄ d́ŏ thîrîgèhè̆ awōlò nu,” ad́ò cè do. 30Philĭpo cwèle kî thîhè̆b́è za pha Prò̆fèt Izaĭah Acè d́ō, cò d́ògè lōwa, “Na pha danè̄ nu nî thîhè̆ tèpwè ā?” cè d́è̆ lōwa do.

31Ḿî cò d́òscĭge lōwa, “Bija ad́ò̆sa jè kò tò ò ńò d́ō, jî gî̄ thîhè̆ za cadè̄?” cò d́ògè lōwa do. Mèhwă zo jogè Philĭpo agā hta sańă kô ca kă d́ŏ thîrîgèhè̆ abu nu. 32Cè Tcahtĭ za pha dagla ḿî ad́ò gōjo;

“Zî ḿî acab́ô̆ thŏ to d́ŏ htè ab́è leihŭgè dèthĭ ale,

acab́ô̆ thŏpho to d́ŏ bija d́î a sô̆ d́ō adèmè thè alē ńò akhò̆ nu,

Ca ta b́ăhtagè Zò lòmò ńò.

33Cè b́è dèmèthăwāthablè̄,

kî dèdî̄dèhma tò ò Zi nikhĭ ńò.

Bija akò d́ò̆sala zè dèlakhwĭlathèlè̆ tò ògè dèbwè̆ ńò,

manè̄ zè dèò d́ŏ Lākho jo b́èphîhtakè̆gè,” ad́ò do.

34Alekă mādo d́ògè Philĭpo, “Prò̆fèt d́ò dèjî̄b́è ajo ḿî ca thaè d́ò bò̄bwè? Cò d́òlage dò̆ zè ne ā? Ḿî cò d́ò bija alewe dèbwèbwè ā?” cè d́ègè lōwa do. 35Philĭpo b́ăhtagè alòmò kî tcahta d́ŏ dèhwela ò ajo dagla jo kî d́òŭd́ò̆sagè cè Jezŭ aVanzĕlo. 36B́ĕ cè tòcò hèkô klè akhè̆ nu, zo dogè d́ŏ htĭ ò ale dokhlo d́ō, mādo d́ògè cè, “Tcabò̄, htĭ ò ajo d́ō, da gè̄ mèd́îd́ă kèhta jè agā kha dèŭsab́ăhtĭ nè?” cò d́ò lōwa do. 37Philĭpo d́òscĭge cè, “Nu gū b́u lŏtholŏtha d́ō, ni gīni za tèpwè,” cò d́ò lōwa do. Kîd́ò̆ cò d́ò̆sa Philĭpo, “Ju b́u tèpwè Jezŭ Krĭstu ḿî Kib́ĭcè Apho nu,” cò d́ò̆sa lōwa do.

38Mādo hnagè thîrîgèhè̆ sò̆hto ò kî cè kî Philĭpo khè̆ladēgè htĭlè̄ gībwè lō, Hwă d́ō Philĭpo ŭsab́ăgè Mādo htĭ. 39B́ĕ zè hèhta hwă htĭlè̄ nu, Kib́ĭcè Aspirito phîkè̆ kî hèigè Philĭpo. Mādo da tcahtîb́è Philĭpo tapla U be ńò, barasă ze ge thalōthalaikôgè klè. 40Ḿî Philĭpo nu, bija tcahtî cè d́ŏ Azò̆tus u nu htè zè hè d́ò̆htôd́ò̆dèlè ni bija htô̆do d́ŏ Caesăria u nu.

Currently Selected:

Thodŏpho 8: GRNT21

Highlight

Copy