Thodŏpho 9

Saŭlu Adèb́ăkhlè

(Thodŏpho 22.6-16; 26.12-18)

1Saŭlu thèhtai phătha we agè̄ mèthĭascè̆ B́ĭcè Abōhmubicè tòcò nu. Zè lehtî Phŭgima 2kî za da lōwa tòcò agē hwe cè d́ŏ bija aò d́ŏ Damăskus u asinagŏgā abu ò, cab́ô̆htè ca gā pahtî amihmu mikhŏ alôkô B́ĭcè aklè jo tòcò d́ō, co gō cŏ gî̄ gî̄ hwă lōwa, gē geb́aibò̄ cè tòcò d́ŏ Jerŭsalèm u bu nu.

3B́ĕ ze lekô klè nu zo do b́ôhtî Damăskus u nu d́ō, dèhlî̆ aò d́ŏ Mò̄kho dèdè̆ hlî̆lab́è khwè̆b́agè cè. 4Za lakhugè kî thîhè̆b́ègè dè alē dèdè̆ ad́ò cè, “Saŭlu, Saŭlu, ńò lô mèssègnè̆ ma jè nè?” ad́è̆gè cè do.

5Kî cò d́òscĭge lōwa, “Nî ḿî d́ò̆ bò̄bwè? Ŏ B́ĭcè?” cò d́ògè do.

Dè alē d́òscĭge cè, “Jî ḿî Jezŭ nò lô mèssègnè̆ dèbwè nu. 6Barasă d́ō, wè̄hto kî le d́ŏ Damăskus u bu nu. Nè gè̄ mèb́è danè̄ nu dè kò d́ò̆sakò̆ nè,” ad́ò cè do.

7Bija alekô ca kă klè tòcò nu sò̆hto ò dumūtaa lōgè, manè̄ zî thîhè̆ tèpwè dèlē ḿî da tcahtîgè da dimĭ ńò. 8Saŭlu wè̄hto sò̆hto ò kî za gādŭ ò tèpwè atcahta ḿî za da tcahtî zagè da dimĭ ńò. Bija tòcò phîglo hwă cu cukhò ze leihŭgè lōwa d́ŏ Damăskus u bu nu. 9Thŏni adābu za da tcahtî dè ńò, ca ta agè ńò ńò, cò tò ò̆gè ńò ńò.

10B́ĕ Damăskus u bu nu bōhmubicè ami ḿî Ananĭa ògè dèbwè, kîd́ò̆ Dèado d́ò̆sa cè d́ŏ zè dètcahtî abu gōjo, “Ananĭa!” kî cò d́òscĭge, “Jò ò tèpwè jo, Ŏ B́ĭcè!”

11Kîd́ò̆ Dèado d́ògè cè, “Wè̄hto kî lebò̄ d́ŏ klè ‘Danāpi,’ tòb́ò̆ nu kî le d́è̆tcabò̄ d́ŏ Jŭdas ahibu Tărsus upho ami ḿî Saŭlu dèbwè awîakè̆ tîkî. Manè̄, tcabò̄ cè thèb́è̆hta. 12Za tcahtîgè bija ami ḿî Ananĭa dèbwè le htèla cu cukhò lōwa akho cab́ô̆htè za gā tcahtîgebò̄ dè nu,” Cò d́ò lōwa do.

13Barasă Ananĭa d́òscĭge, “Ŏ Dèado, jî thîhè̆b́è htŏ bija òè̆bwè d́ò̆sa ajo dèbwè awîakè̆ htè d́ŏ zè mèssègnè̆bòdò bija tcahtĭ aò d́ŏ Jerŭsalèm u bu tòcò pwedè̄ lò nu. 14Kîd́ò̆ khŏnujo zi nib́è aphlŭathere d́ŏ Phŭgido tòcò ò agē le phò lŏ bija ajohta Ni Mi Tcahtĭ tòcò nu,” cò d́ò B́ĭcè do.

15Barasă Dèado d́ò cè, “Lebò̄, manè̄ d́ō bija ajo dèbwè ḿî dèrî̄dècŭ ab́èrôhta Ji nikhĭ, agē le ilanikò̆ bwèthŭkupho tòcò kî sophrŏsaphra tòcò kî Israè̆lpho tòcò Ji mi tcahtĭ nu. 16Manè̄ Jè kè d́è̆lî̄kò̆ cè htè za gā khab́èkò̆ Ji mi tcahtĭ akholè̄kălè̄ pwedè̄ nu,” Dèado d́ògè do.

17Mègōnu d́ō, Ananĭa legè kî ze lenī hibu kî htèlagè cu cukhò d́ŏ lōwa akho nu, mèhwă cò d́ò lōwa, “Apîkò̆ Saŭlu, Dèado Jezŭ, htè apòhtahtî nè d́ŏ klèlò b́ĕ ne le b́ĕjo dèbwè nu thodŏlegè jè cab́ô̆htè na gādŭ gî̄ hlî̆htage kî ńò kò ò pĕhtabò̄ kî Spirito Tcahtĭ nu,” cò d́ò̆sa lōwa do. 18Taplakhă lò, dè mè ane cab́ô̆ dāpho ab́e dèdè̆ ladēklò d́ŏ za gādŭ aphlo lò nu kî za gādŭ hlî̆htage d́ō zè wè̄hto khagè dèŭsab́ăhtĭ. 19Mèhwă alekă ca a cò ò̆ge kî zi nikhoniăge gè.

Saŭlu Adèthosôthasô

Alekă Saŭlu lekôgè bōhmubicè tòcò akă d́ŏ Damăskus u nu òè̆ni òè̆thè̆ d́o. 20Kî ze le d́ò̆htôla danā d́ŏ Sinagŏgā abu htè Jezŭ ḿî B́ĭcè Apho nu.

21Bija athîhè̆b́è zè dèd́ò̆htô tòcò htèdômô̄dahmă kî d́ògè, “Bija ajo dèbwè ḿî tèb́èbò̄ alô mè kòthò̆gòrò dè d́ŏ Jerŭsalèm u bu gajă ajohta Ami ajo dimi tòcò aklè̆, kî ale b́ĕjo ḿî agò̄ phò gō cŏ hwă cè tòcò agē lei lōwa d́ŏ Phŭgido ò nu tèb́è ńò ā?” cè d́è̆hlègè lōwa do.

22Barasă Saŭlu akhoaă dohta htô̆kî zè mènomèbègè Jŭdapho aò d́ŏ Damăskus u tòcò nu, cè d́è̆lî̄gè lōwa tòcò htè Jezŭ ḿî Krĭstu nu.

23Alekă òjî̄ dere dere Jŭdapho tòcò kŏhtakjala huzògè agè̄ mèthĭ cè. 24Ḿî Saŭlu thîhèb́ègè cè tòcò adèkŏhtakjala, cè tòcò tcadôigè u akhaglè̄ thè̆musè̆munè cab́ô̆htè zè gè̄ mèthĭnibò̄ lōwa nu. 25Ḿî zo bōhmubicè tòcò b́è̆nī hwă cè ṕahlu bu, zè zèlakôgè lōwa u ahtărā akhlŏ b́ĕ lumunèkhè̆ nu.

Saŭlu d́ŏ Jerŭsalèm nu

26B́ĕ zo dole Jerŭsalèm u nu, ca thaè òplogè bōhmubicè tòcò nu, ḿî cè tòcò scisăni ze le kî cu tu b́ugè lōwa ḿî bōhmubicè dèbwè ńò. 27Barasă Barnăbas jole cè d́ŏ Thodŏpho tòcò ò kî d́ò̆sagè cè tòcò d́ŏ za tcahtîgè Dèado d́ŏ klèlò cadè̄, Dèado jî̄b́èhtîgè cè cadè̄, kî zu khŭthaklagè Jezŭ Ami anikhĭ d́ŏ Damăskus u bu nu cadè̄ nu. 28Saŭlu ploplo kî bōhmubicè tòcò hèhtahèla mòmò tèpwè d́ŏ Jerŭsalèm u bu nu. 29Cò d́ò̆htôla khŭthakla tèpwè d́ŏ B́ĭcè ami abu nu. Kîd́ò̆ zî jî̄b́è kî dara tèpwè Jŭdapho ajî̄b́è Grĭspho alē tòcò papa, ḿî cè tòcò thaè mèthĭ tèpwè cè dòkhò̆. 30B́ĕ thè̆buthè̆we tòcò thîhè̆b́è dè ajo d́ō, cè tòcò lei hwă lōwa d́ŏ Caesăria u nu d́ō thè̆lephlòḿĭgè cè d́ŏ Tărsus u nu.

31Mègōnu d́ō Judĕage kî Galilĕage kî Samarĭage bu nu, Dèòplo dohtagè d́ŏ dècodèkhli abu nu, hèkô Kib́ĭcè aklèthòò̆ abu d́ŏ dèscisă ni Kib́ĭcè ale abu nu kî nib́è Spirito Tcahtĭ adèmèhmemèglo kî òèhtagè.

Petru Hèpôd́ŏhtî Dèòplo tòcò

32Petru hèpôd́ŏhtî bija dagwālè̄, kî tapla nu ze lepôd́ŏhtîgè bija tcahtĭ aò d́ŏ Lĭdda u bu tòcò nu. 33D́ŏnu za tcahtîgè bija ami ḿî Aĕneas htè acuthĭkhathĭ kî aò leḿĭkho lò ab́agè ad́e lwīthôdèbwè nu. 34Petru d́ò cè, “Aĕneas, Jezŭ Krĭstu mèhmage nè, wè̄hto kî pragebò̄ ne leḿĭkho,” cò d́ò lōwa do kî hwî̆caka, zè wè̄htogè do. 35Bija aò d́ŏ Lĭdda u kî Sharòn u abu tòcò tcahtî lŏ kî geb́ahtîgè Kib́ĭcè dòkhò̆.

36Hlĕnu d́ŏ Jŏppa abu nu, bōhmubicè aklè̆ amihmu ami ḿî Tab́ĭtha ògè dèbwè; (Zi mi d́ŏ Grĭspho alē ḿî “Dò̆rkas,” ahtabohtab́ă ḿî “Jokhĭ.”) Amihmu ajo dèbwè ila lŏtholŏtha ane d́ŏ dèphîdèmè awîab́è kî dèkhòwèhmòb́è adèmè abu nu. 37Barasă b́ĕnu zi scwi hwă zi thĭgè. Bija ŭsab́ă hwă cè htĭ d́ō b́è̆lăge cè d́ŏ hi agò̄hta dòdò nu. 38Lĭdda u ḿî aòb́ôhtî Jŏppa u kîd́ò̆ bōhmubicè tòcò thîhè̆b́è Petru ò d́ŏnu d́ō, co thodŏlegè bija gībwè kî dèda dèdè̆, cò d́ò, “Lehtî plaplăbò̄ wa,” cò d́ò lōwa do. 39Petru wè̄hto kî lekôgè ca kă. Zo dole d́ō cè tòcò htaihŭ cè d́ŏ hi agò̄hta dòdò nu. Ahmugèmè tòcò sò̆hto ò khwè̆b́a cè, joha kî d́è̆lî̄ lōwa lŏ dèkô̆dèthò htè Dò̆rkas ò thôḿô̆we akhè̆ za sani lōwa tòcò nu. 40Petru hna hèhta hwă cè tòcò hiò̆bu akhlŏ d́ō, zo dōhnŏla kî thèb́è̆htagè. Hwă d́ō, ca tcab́a hwă lōwa aco d́ō, cò d́ò, “Tab́ĭtha, Wè̄hto kha!” cò d́ò lōwa do. Amihmu b́ăhta agādŭ, za tcahtî Petru d́ō, zè wè̄hto sańălagè. 41Petru phîgloi hwă cu cukhò d́ō, ci cwiwè̄htogè lōwa. Zo jo hwă bija ab́udè tòcò kî ahmugèmè tòcò d́ō, ci igegè lōwa tòcò bwè aòthôḿô̆ dèbwè nu. 42Dè awîakè̆ ajo hŏhtathèlagè d́ŏ Jŏppa u thèd́è̆ u kî bija òèòò b́ugè B́ĭcè. 43Alekă Petru òkôgè Simŏnè asadèphe dèbwè akă d́ŏ Jŏppa u bu nu amunimuthè̆ pwĕdimi be.

Currently Selected:

Thodŏpho 9: GRNT21

Highlight

Copy