Thodŏpho 7

Stè̆phano Adèd́ò̆htôd́ò̆dèlè

1Phŭgima d́ògè gōjo, “Dè ajo tòcò ḿî gōnu hŏ ā?”

2Stè̆phano d́òscĭge, “Thè̆buthè̆we mocè̆phè̆do tòcò, sòkhĕńebò̄. Dèdòdèthe Ab́ĭcè pòhtahtîgè wa Pa Abraham b́ĕ cò òwe Mèsopotĕmiage abu nu, dukhlŭkî ze le htolaòla d́ŏ Haran hnî̆ńò nu kî Cò d́ò lōwa gōjo, 3‘Hèhtakè̆bò̄ d́ŏ htĭge abu kî ni khwĭ nè thèlè̆ tòcò aklè̆, kî lenībò̄ d́ŏ htĭge htè jè kè d́è̆lî̄ nè dege nu,’ Cò d́ògè lōwa do. 4Zè hèhtaphlòmĭ hwă Khaladĕapho tòcò agebu d́ō ze le htolaòlagè d́ŏ Haran abu nu. D́ŏnu ca pa thĭ hwă Kib́ĭcè le b́è̆lăgè cè d́ŏ htĭge htè thĭ ògè khŏnujo dege abu nu. 5Kib́ĭcè ti igè cè dèhtò̆dèla dimĭ ńò, pwe lākho deble dèhtè̆ hnò̆nu Ci ti igè lōwa ńò, barasă Ca aḿăkhai lōwa kî zo pho zi li tòcò lākho thèd́è̆htĭthèd́è̆ge d́o hlĕ zo pho tò òla dèbwè̆ hnî̆ńò nu lò. 6Kîd́ò̆ Kib́ĭcè d́ògè, ‘Zi khwĭ cè thèlè̆ gē le ò tî̆tèḿè̆b́èkò̆ d́ŏ htĭge alewe abu kî bija tòcò gè̄ mèjomèlè̄kò̆ cè tòcò ad́e lwīgèjè adābu. 7Hwă ji ki cirrakò̆ htĭge htè acŏglogî̄glo cè tòcò dege nu. Anu Hwă d́ō, cè tòcò gè̄ hèhtakè̆kò̆ d́ŏ ge anu tèb́è abu kî thub́uhtathèb́è̆htakò̆ jè b́ĕ dèlle ajo,’ Kib́ĭcè d́ògè cè do. 8Alekă Kib́ĭcè mèplogè cè dèlagla ab́èkja dèhô̆rîkî̆ aphekhĭ nu kî zo pho Izăko òla hwă ani lwīthô dini nu zô hô̆rîkî̆gè lōwa aphekhĭ, Izăko òlagè Jăkòb htè aḿî Patriăka scigībwè apa nu.

9“D́ŏ dèthakla akhoacè̆ Patriăka tòcò sè̆agè Zŏzè d́ŏ Izî̆t ahtĭage abu nu, barasă Kib́ĭcè òkô ca kă, 10Zè mèhlô̆hta lōwa d́ŏ dèbadèsè̆ aklè̆ kî Ci ilagè lōwa d́ŏ dèzadèbla d́ŏ Izî̆t Asaphra Pharaŏnè ahlò̆mò̄ nu, kî zè lè̄htagè lōwa atcaiŭi zi htĭ ze ge kî zi hi za phă. 11B́ĕnu asŏakhè̆ dèwīthô̆ òhtagè d́ŏ Izî̆tge, Kănnage abu dagwālè̄ d́o. Alei dèbadèsè̆ adoamu, kî wa pa tòcò da wāhlèzagè dèa dală ńò. 12Ḿî b́ĕ Jăkòb thîhè̆b́è b́uhŭ ò d́ŏ Izî̆t ahtĭage abu nu d́ō, zo thodŏlegè phĭ phŭ tòcò aŭsu tapla. 13Kî b́ĕ cè tòcò le gīpla tapla nu, Zŏzè ithîhè̆gè cè thè̆buthè̆we tòcò zi ḿî bò̄bwè nu kî Izî̆t asaphra Pharaŏnè thîhè̆b́ègè cè dugumupho nu. 14Zŏzè hmèlegè ca pa Jăkòb kî zi khwĭ cè thèlè̆ lŏcăcè, lŏcăcè cò ògè thăthôdiscĭ jè̄bwè. 15Kîd́ò̆ Jăkòb lagè d́ŏ Izî̆t agebu nu, alekă cè kî wa pa tòcò thĭ lōgè. 16Bija gei cè tòcò aco kî b́ŭlăgè d́ŏ Shèkhè̆m alūkho bu htè Abraham bwî htî Shèkhè̆m upho Hèmòr apho ò ci ib́è abwî pwĕdimi taklaẃa nu.

17“Acab́ô̆ Kib́ĭcè aḿăkhaigè Abraham akhîb́è b́ôhtî nu bija tòcò lakwălajāsôgè d́ŏ Izî̆tge bu nu. 18Hwă d́ō Saphra adî thîhè̆gè Zŏzè awîakè̆ dimĭ ńò dèbwè ŭib́ègè Izî̆t age. 19Ca tha degwegè wi khwĭ wè thèlè̆ akho kî mènoabègè wi phĭ wu phŭ tòcò pwĕ agē hwĕphlòḿĭ abĭsèpho aphèlathè̆ tòcò cab́ô̆htè cò kò tò òbò̄ bija ńò nu. 20B́ĕnu Mŏzè òlagè kî Kib́ĭcè b́èthagè cè, cè b́è b́oigè d́ŏ zo mo ca pa ahibu thŏhlè̆ adābu. 21Htô̆ḿî cè b́è hwĕphlòḿĭ nu, Pharaŏnè aphohmu b́oidohtagè cè acab́ô̆ zo pho ahnè nu. 22Mŏzè b́è thèhlô̆igè Izî̆tpho adèzadèbla gŏmomo, kîd́ò̆ zo dojāmadigè d́ŏ zè dèjî̄b́èdòdò abu kî zè dèphîdèmè aklè̆ nu.

23“B́ĕ ca b́a ad́e lwīscĭ nu, ze le tcahugè cè thè̆buwe Israè̆lpho tòcò nu. 24B́ĕ za tcahtî Israè̆lpho dèbwè b́è mèjomèlè̄ d́ō, zo woi lōwa htô̆ ze mèthĭnigè Izî̆tpho dèbwè nu. 25Mŏzè gomo ḿî cè thè̆buthè̆we tòcò thîhè̆ htŏ htè Kib́ĭcè thaè mèhlô̆htage cè tòcò d́ŏ cu cukhò bu nu, ḿî cè tòcò dî thîhè̆gè gōnu ńò. 26Alekă dini ze le tcahtîgè cè dèzè̄ lò la mèhtîmèbo lōwa d́ō, ca thaè mèni lōwa dèjīdèd́wă akhoacè̆ cò d́ògè lōwa, ‘Ŏ bija tòcò, thĭ ḿî thè̆buthè̆we lò. Ḿî thĭ mèkĕmèbrô ma lōwa nè?’ cò d́ò lōwa tòcò do. 27Amèdè atè b́èklè ńò dèbwè saphlòḿĭ hwă cè, cò d́ò lōwa, ‘Bò̄bwè lè̄hta nè wo kho aŭidè kî acirradè bwè?’ 28‘Na thaè mèthĭ kòd́ò̆ jè acab́ô̆ nè mèthĭ Izî̆tpho mŏhè dèbwè nu ā?’ cò d́ò lōwa do. 29B́ĕ Mŏzè thîhè̆ dèjî̄b́è ajo d́ō, cwèphlò kî le òhugè d́ŏ Mĭdiage nu tod́odasa htô̆ zo phohtagè gībwè nu.

30“Ad́e lwīscĭ hwă d́ŏ Sĭnai Khòlò̆kho nu Mò̄khobwèzo dèbwè pòhtahtîgè cè d́ŏ hmî ablî bu zòzwiklè̆ nu. 31B́ĕ Mŏzè htcahtî dè ajo d́ō, zè htèdômô̄dahmă kî le tca b́ôhtîgè, b́ĕnu Kib́ĭcè alē thèhta kî d́ògè cè, 32‘Jî ḿî na pa tòcò Ab́ĭcè, Abraham Ab́ĭcè, Izăko Ab́ĭcè, Jăkòb Ab́ĭcè,’ Cò d́ò lōwa do. Mŏzè ganā kî ca ta tcab́ugè lōwa ńò. 33Mèhwă Kib́ĭcè d́ògè cè, ‘Kòladēbò̄ na khatòkò, manè̄ ńò sò̆hto ò ale ḿî Lākho aTcahtĭ. 34Ja tcahtî lŏ htŏ ji bija tòcò khab́è dèmèjomèlè̄ d́ŏ Izî̆t agebu nu. Jî thîhè̆b́è htŏ zè dèkoŏgajā kîd́ò̆ ja la htŏ cab́ô̆htè jè gè̄ mèhlô̆htage cè tòcò nu. Khŏnujo lebò̄, jo gō thodŏle nè d́ŏ Izî̆t agebu nu,’ cò d́ò lōwa do.

35“Mŏzè ḿî bija dèbwè htè Israè̆lpho tòcò lè̄ sò̆dikhwĭgè cè, b́ĕ cò d́ò lōwa, ‘Bò̄bwè lè̄hta nè wo kho aŭidè kî acirradè bwè?’ akhî nu. Ḿî Kib́ĭcè thodŏlagè cè aku ŭi kî mèhlô̆htage dè d́ŏ Mò̄khobwèzo apòhtahtî cè zòzwiklè̆ dèbwè adèmèzo nu. 36Mŏzè ḿî amè dècòklîcòhjè̆ d́ŏ Izî̆t age, d́ŏ Pellèlî abu kî d́ŏ lothĭḿizekho ad́e lwīscĭ abu kî ajohèhtakè̆ Israè̆lpho tòcò d́ŏ Izî̆t agebu dèbwè nu. 37Ajo ḿî Mŏzè htè ad́ògè Israè̆lpho tòcò, ‘Kib́ĭcè gô̄ rôhtakò̆ d́ŏ thĭ klè̆ prò̆fèt dèbwè htè thĭ gō sòkhĕńekò̆ ze lē nu.’ 38Ajo ḿî Mŏzè htè aòplo Isaraè̆lapho d́ŏ lothĭḿizekho dèbwè nu, cò ò b́ĕnu ploplo kî wi phĭ wu phŭ, Mò̄khobwèzo jî̄b́èhtîgè cè d́ŏ Sĭnai khòlò̆kho, kî zî ḿîgè aphîni dèilani wa dèòthôḿô̆ adèjî̄b́è tòcò nu.

39“Barasă wi phĭ wu phŭ tòcò dò sòkhĕńe ze lē ńò, ḿî za saphlòḿĭ lōwa d́ŏ za thabu nu ze geb́agè d́ŏ Izî̆tge bu nu. 40Cè tòcò d́ògè Aaròn, ‘Mènibò̄ wa Kib́ĭcè tòcò agè̄ thè̆le wa nu. Ḿî Mŏzè htè ahèhtaihŭgè wa Izî̆tge dèbwè nu, da phî̆htagè cè nè nu wa dî thîhè̆gè ńò,’ nu. 41Alekă cò b́òhta hwă bopho tod́ŏ ajò, cu hluhtaigè lōwa htè cu cukhwa nu kî khapwè̆khalagè. 42Mègōnu d́ō, Kib́ĭcè d́a tud́ukhlŏ ane kî cè tòcò, kî ila cè akè thèb́è̆ Mò̄kho asèaphò̆ tòcò acab́ô̆ Prò̆fèt tòcò hwela dòlògè;

‘Ŏ Israè̆lpho tòcò, thĭ hluhta dèphodèwe tòcò,

b́ĕ thĭ ò d́ŏ lothĭḿizekho ad́e lwīscĭ adābu nu,

ḿî atè b́è tèpwè Ji nikhĭ ńò,

43Thĭ hè j́ai ma Mòlòh ahipho,

kî thĭ b́icè ajò Rĕphan asè;

dèjòdèja tòcò nu kî thèb́è̆htai ma nè?

Kîd́ò̆ Je gē leihŭkò̆ thĭ d́ŏ Babilŏniage akhlŏ nu,’ Kib́ĭcè d́ògè cè tòcò do.

44“Wi phĭ wu phŭ tòcò òigè Thè̆thî Ahipho d́ŏ lothĭḿizekho nu. Ab́è prahta acab́ô̆ Kib́ĭcè d́ò̆sagè Mŏzè atherĕ kî acab́ô̆ cè kèhtîgè ahô̆ajò adĕ nu. 45Wi phĭ wu phŭ tòcò phîni hwă hipho ca j́a lenīgè htĭge wò òla khŏnujo dege abu d́ŏ Zò̆zwè̄ alethîkhè̆ nu. Kib́ĭcè hmòphlòḿĭ tèpwè bwèthŭkupho tòcò d́ŏ wi phĭ wu phŭ ahlò̆mò̄ nu. Kî hipho dawa òwe htô̆ dola Dăvid alethîkhè̆ nu. 46Kib́ĭcè b́èthagè cè d́ō, za dagè Kib́ĭcè cab́ô̆htè za gā wāhlènibò̄ Jăkòb Ab́ĭcè anikhĭ alleaklè dèdè̆. 47Ḿî Sòlòmòn pranigè Kib́ĭcè anikhĭ hi dawa.

48“Nòthò̆ hnò̆nu, Kib́ĭcè Ahtajîgudŭ tò ò d́ŏ hi htè bija prai acukhò nu ńò, acab́ô̆ Prò̆fèt d́ò;

49‘Mò̄kho ḿî Ja Na,

Lākho ḿî Ja Khadusŭ.

Na gā pra Ji nikhĭ hi danè̄?

Jè dèsò̆dūsòd́è̆ ale ḿîbò̄ danè̄?

50Dè ajo ḿî lŏ Ju cukhwa lò tè b́è ńò ā?’

51“Thĭ agò̄ hma kî athasa akhwĭ, Thĭ htakhokă nènògè Spirito Tcahtĭ acab́ô̆ thĭ phĭ thĭ phŭ mègè nu. 52D́ŏ Prò̆fèt tòcò aklè̆ thĭ phĭ thĭ phŭ dè mèssègnè̆ kî mèthĭgè ńò ògè dèbwèbwè ā? Ad́ò̆sadòlò Adî̄ahma dèbwè adèlela tòcò ḿî ḿî zè mèthĭgègè. Kî khŏnujo thĭ thè̆ne hô̆lă kî mèthĭgè Cè. 53Thĭ nib́è htŏ Mò̄khobwèzo adèila htè ‘Dèhmèla,’ nu, ḿî thĭ tò òigè ńò,” cò d́ò̆sagè lōwa tòcò do.

Stè̆phano B́èhwĕthĭ

54B́ĕ bija tòcò thîhè̆b́è dè ajo d́ō, mè acab́ô̆ ca tha b́èhtîb́èd́ô̆gè nu kî ce edithô̆edithè̆gè Stè̆phano d́ŏ dèthèhtègòrè abu nu. 55Barasă Stè̆phano ò pĕhtagè Spirito Tcahtĭ, ca tcahta d́ŏ Mò̄kho nu kî tcahtîgè Kib́ĭcè adòathe kî Jezŭ sò̆hto ò d́ŏ B́ĭcè acudèhtwè dòkhò̆ nu. 56Kî cò d́ògè, “Tcabò̄, Mò̄kho ògè ab́ăhta kî ja tcahtî Bija Apho sò̆hto ò d́ŏ B́ĭcè acudèhtwè dòkhò̆ nu,” cò d́ò do.

57Ḿî cè tòcò kèwohta sôtèklè, sò̆tôô̆b́i hwă anigu d́ō, hlò̆wè̄gè Zò lò tòcò. 58Zi cwihtaphlò hwă lōwa d́ŏ u akhlŏ d́ō, hwĕthĭgè cè kî lo. Bija ahwĕthĭ Stè̆phano tòcò pula ascid́ŏkhlŏ d́ŏ ab́òĺòpho ami ḿî Saŭlu dèbwè akhahtî nu. 59B́ĕ bija hwĕ cè lo nu, Stè̆phano thèb́è̆hta kî d́ògè, “Ŏ B́ĭcè Jezŭ, phîbò̄ ja tha tîkî,” cò d́ògè do. 60Alekă za lakhu dōhnŏla, zo htŏhta ze lē kî cò d́ò, “Ŏ B́ĭcè, phîbò̄ ḿè cè tòcò akho dèkèḿè ḿè,” cò d́ò hwă do ze gephlòthĭgè.

Currently Selected:

Thodŏpho 7: GRNT21

Highlight

Copy