Luk 23

Payler woo ŋgaà saʼ woó *Rom wùn Fòn Heror tár kinyo ke Jesus

(Matio 27.1‑2,11‑14; Maak 15.1‑5; Joon 18.28‑38)

1Mo vé dzə̀ʼə̀m vìyi suŋnin bey, e nèn nànèn adzə̀m, e lì Jesus, a dù sho fo Payler. 2Á dù, e nèn a toy vinyo e bàm wó, a suúy jii, «Wìr və̀n dzə̀ ben, a wù ghán, bvəər woŋ wór, sháʼnin fo wíri wáa màʼ mbàm, a shwi Fon woó Rom sho. A wù kfə̀n suuy ji dzə̀ wun *Mfə̀ə́r wo Nyùy‑iì kàʼàn, a wun dzə̀ fon wùmòʼ.» 3Payler dzə́r e Jesus jii, «À dzə̀ rú Fon wìr veé Juda à?» Wù bìnèr jii, «À sùúy ne.» 4Payler nèn sùúy e vitú ve atàá cù wùn à màŋgòŋ wo wù‑uù dzəə̀n fó jii, «Bó m yoʼ yèn kinyo ke wìr və̀n jayin.» 5Áwune ku nèn a tavtí tavtín jii, «Wù‑uù ghán, yéʼey wíri woŋ woo Juda e dzə̀m, bívir vifií vév, aá taʼ melaà. Wù‑uù kèʼ ghán fo mbìv wòŋ yee Galeli, a wù nə̀ə́ ne lèn e ŋkàlaʼ fèn.» 6Payler yú bey, e dzə̀r jii, «Wìr və̀n dzə̀ wír woó Galeli à?» 7Á biímé, wù nèn tsə̀nsí Jesus fo Fòn Heror, bìʼ fo yiì sáʼ wun mbìv wòŋ yee shooy, a wù‑uù dzə̀ é Jerusalem e ghan fóo fèy.

8Heror dù, e yèn Jesus, wúné bòŋ wun, bìʼ fo wù‑uù sí yú léŋ və́ fó ŋgùʼ, nèn kér shií fó yen wun e sí rəə́. A wù‑uù kwaʼtì jii, ghanmóʼ wun yén, wù yiì á kiŋgaʼnìn ke kinyò kímóʼ kí. 9Wù nèn rə̀sí, a dzətí vinyo e Jesus vinín, la wù yòʼ a ghay gheéy. 10Wù wáa dzətí, a vitú ve atàá cù wùn à wír ve á yii duŋrì nsər Nyùyi dzə́ fo ghaŋ, lór vinyo ve ghaʼtín ví e Jesus wùn vinín. 11Fòn Heror wùn à və́ vé rərí nèn lò, e kèʼ, a kèŋ Jesus kéŋen, a shoór. Á màʼ kikúm ké vifòn e wùn wó, e nèn siìr, á wáa kfən sho fo Payler. 12Kinyo kìn ki wáa koóy, a Payler wùn Heror‑iì kèmnìn ne, á nèn kfə̀n bòŋnìn e kishiíy fóo fèy.

Payler méŋ njò Jesus, e kù tìnén nsaʼ, wù gbú

(Matio 27.15‑26; Maak 15.6‑15; Joon 18.39–19.16)

13Á siìr Jesus, Payler nèn kùm vitú ve atàá cù wùn aàtǎr wòŋe, e kfə̀n kùm wíri. 14Á wìykìr, wù suúy jii, «Vèn kì kòʼór wír və̀n fèn ji wù ghán, bvəər wíri, m lóo tàr kinyo kfə́ e věn si, e làa yòʼ yen njò ye vèn suuy ji wù gbù. 15A bó Fòn Heror yoʼ lò yèn sá, bìʼ fo wù siìrìn wír və̀n, là sáʼ. Vèn yén ri sa, wìr və̀n yoʼ jày kinyo ke dzə̀ á yùyrí. 16M yíi suúy, aá tám tamén, e màʼtì, é wù wáa dù.» [17Yii lóo dzə e ghan sé Ŋkǎʼ Yáʼayshaà sìn, bo Payler kù kér fó fəə́r wír wo wír veé Judàa lonen fó sháŋ.] 18Wíri nèn tàtí adzə̀m, a waamé jii, «Á laar wír və̀n láarin, e fə̀ə́r a dzə̀ Barabar fo sháŋ, e fò e vèr.» 19A vé‑eè wày Barabar və̀n e sháŋ, bìʼ fo wù‑uù kèʼèn melaà e ŋkàlaʼ foo fèy, a wù kfə̀n‑eè yúyri wíri. 20Payler yú bey, e nèn kfə̀n a suŋnín aáwune, a tàʼ ji bo wun kì màʼtì á Jesus. 21Á kú a waamé waamén jii, «Á tá taán é kintam. Á tá taán é kintam.» 22Wù kfən sùŋnín fo akàŋ vee ataár, e dzə̀r jii, «Á kum e kintam fo gha? Wù jày ka? Bó m yoʼ yèn njò ye wù gbuùn ye dzə̀ á yùyrí wun. M yíi suúy, aá tám tamén, e màʼtì, é wù wáa dù.» 23Á ku nèn màysì, a waamé waamén ji á wàá tá taán é kintam. Kí gháʼ Payler, 24wù màʼtì, e tìnén nsaʼ ji á yii ri sho a mo wír vìne taʼà. 25Wù nèn fə̀ə́r a dzə̀ wír wo áwune kì lón və̀y, wo vé‑eè wayin é sháŋ, bìʼ fo wù‑uù màʼàn melaà, a yuyrí wíri. Wù fəə́r, e nèn fò Jesus aáwune ji á yii ri sho a mo á taʼà.

Á tá Jesus e kintam

(Matio 27.32‑44; Maak 15.21‑32; Joon 19.17‑27)

26Á nèn lì Jesus, a dù sho. Á lòo dù, e tàrnín wùn à wìr wùmòʼ, a wù wiy fo kwaʼ, aá yoŋ ji Simon, a dzə̀ wír wo wù‑uù loòn fó Serina. Á bám, e neèr kicí ké kintam ke Jesus e mbèʼ wo, wù bèʼèy, a wìy sho e Jesus bàm. 27Wùn à Jesus ku nèn a dù, màŋgòŋ shém fó bàm e gháʼán. Aámóʼó dzə̀ vikìy, á wáa toŋnín, a taŋ ŋgeʼ sə́. 28Jesus lò, e bìnkìr, e sùúy aáwune jii, «Vikìy veé Jerusalem, lá vèn yòʼ a dìy mo. Vèn wáa dìy a dzə̀ vitú vén, e kfə̀n a dìy fo wón véné. 29Vèn wáa kiíy ji ghán sí sí wiyì, se á wíy a suúy jii, bòŋ ké vikìy ve dzəə̀n akár, a bó á yòʼ‑oò yiì ne dzə̀ə́ wán, a bó á yòʼ‑oo yií ne nyòór. 30#Hosea 10.8. Wíy lòo dzə e ghan see shooy, é wíri wáa jàŋ virùmèn jii, vèn ku keèsì e věr kitu, a jàŋ agwan jii, vèn sə́y, e sə̀tí ver. 31Aá wíy a jàŋ bèy, bìʼ fo á nyavrì e mò lèn, a m dzə̀ kicí kibór, bo kév kí wíy fòy fòyìn, áwune ve á koŋrin ne.»

32Á wáa dù e Jesus bèy, aá kì lì sá aŋgàa njò ámóʼó abaà ji á du, e yuyrí wùn áwune. 33Á meé é kirə̀ʼ ke á yoŋ ji ŋgéreʼ kitu ke wìr, e nèn tà Jesus fo e kintam, e kfə̀n tàm sá aŋgàa njò vee abaà viy e vintam, wùmòʼ e Jesus koy yìyí, wùmòʼ é koy ŋkoòvìi. 34Jesus lò, e yòŋ jii, «Tàr wor, ku làysìn jay wìr vìn, bìʼ fo bó á yòʼ kiìn kinyo ke áwune yii.» Wír vìyi yiì lò, e lì ndzə̀y sé Jesus, a tsəm kàŋ sho ji á fiʼ jàv. 35Wíri wáa tiy fo, a leéy mo á taan Jesus e kintam, a vé wòŋe jaʼ kév jáʼan, suuy jii, wù‑uù ghán, luŋèr wíri, a wù bèn dzə̀ rú Mfə̀ə́r wo Nyùy‑iì shoʼon, wù lùŋèr ri kitú kfə́ lèn. 36Vé rərí wáa sheʼ sa Jesus, a fo kiŋkway ke melùʼ sho, 37a suúy jii, «Aà dzə̀ rú Fon wìr veé Juda, à lùŋèr kitú ké.» 38Á sáŋ ŋwàʼ, e bàrír e kintam, e Jesus kitu jii, «Və̀n dzə̀ Fon wìr veé Juda.»

39Ŋgaà njò wùmòʼ fo ve vé‑eè kér foo, wáa kuùrì sa Jesus, a suúy jii, «Bó yòʼ dzə̀ wò woo Mfə̀ə́r a? Lùŋèr ri kitú ké ki, e lùŋèr sa ver.» 40Wùmòʼ woo ŋgaà njò wám woo shooy wámén, e dzə̀r shó jii, «Bó à yòʼ fan Nyùy à, wò wo á wayin é ŋgeʼ réŋréŋ moo wír və̀n. 41Wòsò kpù kesò a dzə̀ fó lǒn vinyò ve wòsò‑oò jayin, a bó wìr və̀n yoʼ jày kinyo gheéy.» 42Wù nèn yòŋ jii, «Jesus, lóo wìy dzə e ghan se à sí sáʼ vifon vé, à kù kuùmé mo.» 43Jesus suúy shó jii, «Kú a kiíy rú ji wòsò yíi a dzə e Nyùy kirə̀ʼ ké vijùŋ lán.»

Kpú Jesus

(Matio 27.45‑56; Maak 15.33‑41; Joon 19.28‑30)

44Yiì lòo dzə e ntìntìn shùy, shùy sàsìn, e ndzə̀mén, woŋe sə́n e dzə̀m, e meé shúy sitaár. 45Ndzə̀y se vé‑eè tinmen lav cù sho e mvə̀mlaʼ si ku nèn tòʼnín e ntìntìn. 46#Nsùyrì Nyùy 31.6. Jesus kú a ker e kintam, e yiì lò, e tòŋ kitávín jii, «Tàr wor, m wày kiyoy kém a dzə̀ e wò kiwo.» Wù suúy bey, e nèn shèm. 47Kitú ke vé rər ke kí‑iì tíy fo ki yén kinyo ke kí kooyin, a sùyrì Nyùy, a suúy jii, «Dzə̀ rú, wìr və̀n‑eè dzə̀ là njò.» 48Màŋgòŋ wo wù‑uù baʼtin fó, a leéy wáa kfən fo laʼ, a way a dzə̀ wóm, a shèŋ kitú bìʼ kinyo ke á yenen. 49Ŋkar se Jesus sidzə̀m si wáa tiy kév kwaʼda, a leéy vinyo vee shooy, aámóʼó dzə̀ vikìy ve vé‑eè loòn e wùn bàm fó Galeli.

Á dzəə́mé Jesus

(Matio 27.57‑61; Maak 15.42‑47; Joon 19.38‑42)

50-51Wìr wùmòʼ wáa dzə e Jerusalem e ghan see shooy, aá yoŋ ji Joosev, a dzə̀ wír woó ntèʼ yee Arimatia e wòŋ woo Juda foo fèy. Wù‑uù dzə̀ wír wo juŋ, yii mo Nyùy taʼà, kfə̀n shiy ghán se Nyùy wíy a saʼ vifon və́. Wù kfə́n a dzə sa wír fo vé wòŋ vìyí mvəm, a bó wù yòʼ‑oò ló a tiy e kinyò ke vé‑eè sìysìn, e yiì e Jesus. 52Wù dù, e yèn Payler, e lòn dzə́n Jesus fo fo. 53Payler biímé, wù nèn dù, e sə̀ʼə́r, e boò e kintsə̀m ké ndzə̀y kí, e dù, e wày é sày ye vé‑eè bùʼùn é wǔn kilan, a bó á yòʼ‑oò yiì ne wày wír e sày foo fèy. 54Wù wáa way, a kishiíy kév ké bam ki kì sí yìi kèʼ e ŋkuùr foo fèy. 55A vikìy ve vé‑eè loòn e Jesus bàm fó Galeli vìyi kì jumrì Joosev, á nèn yèn say rə̀y, e yèn mo wù wáy dzə́n Jesus sho. 56Áwune yiì kfə̀n fó laʼ, e bàʼtí biʼ ye rəʼtìné wùn à meŋgvə́r memoʼ mè, a dzə̀ vifá ve á yóʼ dzə́n wìr sho. Kishiíy kév ké bam ki gheén, áwune meèmè mo nsər yev dzəə̀n.

Currently Selected:

Luk 23: LNB

Highlight

Copy