Luk 22

Judar kúr menàŋ wùn à vé wòŋe

(Matio 26.1‑5,14‑16; Maak 14.1‑2,24‑27; Joon 11.45‑53)

1Ghán sé *Ŋkǎʼ Yáʼayshaà si nèn wìy lòo gheén, a sì é mvə̀m vishìíy ve wír veé Israyi yii yí *kibán kee là nyaà. 2Vitú ve atàá cù wùn à wír ve vé‑eè duŋrì nsər Nyùyi nèn a shweʼ mo dzə̀ á ghàn, e bóo yuyrí Jesus, a wooné woonén, bìʼ fo vé‑eè fan wíri. 3Satan nèn nə̀ə́ e Judar shiliv, a dzə̀ wír fo wón lìm Jesus vee nshòv sibaà e ghvə̀me, aá yoŋ yír rə́ yímóʼó ji Iskariyor. 4Wù nèn dù, e yèn vitú ve atàá cù wùn à vitú ve rər ve á yii shiy lav cù, a bi sho mo wù yíi ghan, e bóo way Jesus aáwuné wo. 5Áwune yú, e shèʼrí, e kàʼ ji á yíi fo wun a mbàm. 6Wù nèn biìmé, e dù, a shweʼ kintóʼ ke bó yòʼ dzə̀ màŋgòŋ wàa dzə e Jesus ghaŋ, e fíʼ nyaʼtí, e way Jesus e wír vìyí wo.

Jesus fó ntò se vifa və́ vé yi

(Matio 26.17‑30; Maak 14.12‑26; Joon 13.21‑30; 1 Korin 11.23‑25)

7Kishiíy ke á seé wan njiì woó Yáʼayshaà e ghan sé Ŋkǎʼ Kiban kee là Nyaà kí nèn wìy ghèén, 8Jesus túm Pita wùn Joon jii, «Vèn du, e nàŋsín wan njiì wo vèsən yíi yi kiŋkàʼ kee shooy sho.» 9Áwune dzə́r shó jii, «À taʼ ji vèr du, e nàŋsín a dzə̀ feé?» 10Wù bìnèr jii, «Vèn yuúrí, vèn yíi dù, lóo nəə́ e mvə̀mlaʼ, é vèn yén wír wùmòʼ, a wù béʼ mbǐʼ mendzə̀v, é vèn wáa dù e bàm wó. Wù nəə e lav ye wù nəən shó, 11vèn dù, e sùúy e ŋgaà lav ji Ŋgaà Yèʼéy dzə́r a jii, lav kibeèy ye dzə̀ wùn à wón vəə́ yì kiŋkàʼ kìn sho sà bèé á? 12Vèn dzə́r bèy, é wù nèn dìn ven mbìv lav ye kuʼùn yìmòʼ fó yuv, a vifá veé lav vi sì shó vidzə̀m, é vèn nèn nàŋsín vifá ve yi vee shooy fo.» 13Áwune dù, e yèn vinyo vidzə̀m réŋréŋ mo Jesus kì suuyin, e nèn nàŋsín vifá ve kiŋkàʼ kee shooy fo.

14Ghán sí yiì ghèén, Jesus wùn aàŋgàa ntum vəə́ nèn wìy, a yikír. 15Wù lò, e sùúy aáwune jii, «Mò‑oò sí kér shií féyì ji vèsən yí Ŋkǎʼ Yáʼayshaà və̀n, é bo m nəə́ é ŋgeʼ. 16Vèn wáa kiíy jii, bó m yòʼ dzəə́ wìy yi kiŋkàʼ kìn, e meé e ghan se kinyo kee kùm kiŋkàʼ kìn ki wíy gheén, a Nyùy sí sáʼ vifon və́.» 17Wù nèn lì bàr, e beèrì Nyùy, e sùúy jii, «Vèn ko, e nò, e sə̀nín. 18Vèn wáa kiíy jii, kèʼ fo lèn, bó m yòʼ dzəə́ wìy no meluʼ me *vayin mèn, e meé e ghan se Nyùy wíy a saʼ vifon və́.» 19Wù kfən lì sa ntuʼ kiban,#22.19: kibán: Leéy mbìv Ji se Naarìn sí. e beèrì Nyùy, e bèʼtí, e jàv aáwune, e sùúy jii, «Kin ki dzə̀ wún wóm [wo m fó bìʼ ven. Vèn wíy siiy, vèn wàa yiì bèn, a kuumé mo.» 20Wùn áwune yíkír, e lòo màysì, wù kfən lì sa bàr, e sùúy jii, «Bàr və̀n dzə̀ *mensaŋ me fíy mè me Nyùy wíy gwàr e mensə́ mem mè, a mè leem a dzə̀ bìʼ ven.]

21«M suuy bèn, a wìr wo wù kár menàŋ mem yíkir vèr wun kirə́ʼ kimòʼón. 22Vèn wáa kiíy jii, ŋgaà wo yírí dzəə̀n Wanwìr və̀n sí du mo Nyùy‑iì sìysìn. Yii bèy, a lòné dzə̀ wó wìr woo shó wo wù yíi fo wun aàŋgaà və́ vibàné ji á yúyrí.» 23Áwune yú bey, e nèn a kfə̀ynìn jii, wìr fo áwuné mvəm wo dzə̀ wù yiì kinyo kìn sà bèn dzə̀ la á?

Jesus yéʼey mo wír vəə́ kér fó lì vitú vév

24Áwune nèn lò, e kèʼ, a bìʼ ji sà dzə̀ la wír wo kuʼùn aáwuné mvəm á? 25Jesus nèn a fèr aáwune jii, «Afon veé ndzə fène lo, á wàa tay wír vév é ŋàŋ. A vé wòŋe kfə̀n dzə́ ji á wáa yòŋ áwune ji kikfə́vsì ke wíri. 26Yii bèy, lá kén kí yòʼ a dzə bèy. Wìr wo dzəə̀n ji wo kuʼùn e věn mvəm ku lì kitú kfə́ ji wánlè, é ŋgaà mbìy wáa dzə moo wír wo wù lim fo wìr dzə̀m. 27Wìr wo kuʼùn yii dzə́ vəné? Dzə̀ wo wù yéʼ, yíkir yìkín, moo wo wù fer vifá ve yi a? Bó yòʼ dzə̀ wo wù yéʼ kfə́, yíkir yìkín a? A m dzə̀ kém e věn mvəm ji wír wo wù lim fo vèn.

28«Yii bèy, mo m rə́si yén ŋgeʼ sinín, kù dzə̀ ven vin ve vé‑eè rə́si tíy vèsən. 29Kí nén a dzə jii, mo Tàr wor‑iì foon vifon e mò, m nén a fo sa kilíŋ ke saʼ e vèn. 30Wíy lòo dzə e ghan se m wíy a saʼ vifon vém, é vèsən wáa yikír, a nonín kirə́ʼ kimòʼón, a vèn kfə̀n wíy koʼ aàkàvàʼ, a saʼ rám wìr veé Isray yee nshòv sibaà e ghvə̀m.»

Jesus tóʼ ji Pita yíi meŋ wun

(Matio 26.31‑35; Maak 14.27‑31; Joon 13.36‑38)

31Jesus nèn lò, e yòŋ Pita jii, «Simon, Simon, kú a kiíy ji Satan sə̀ ne vitaáví ji wun wáa mùm ven adzə̀m réŋréŋ mo wìr fètí sáŋ. 32Yii bèy, a m bùnrì ne fo wò ji lá shilív shé shi yòʼ wìy kpù kpuún fo mǒ wùn. Shí kfə́n wíy lóo tav, áà wáa tavír sa afə́r vé.» 33Pita nèn bìnèr jii, «Tàr, kìn à du a dzə̀ é sháŋ, kìn á yúyri wò yúyrín, bo kù dzə̀ wòsò.» 34Jesus bìnèr jii, «Pita, m suuy e wò jii, bo kiyuú ki yiì a toŋ lán, aà sháʼnín ne akàŋ ataár ji bó à yòʼ kì á wír woo mo.»

Jesus fiʼsìn mo dzə̀ wón vəə́ bàʼtí melív mev

35Wù nèn kfə̀n sùúy aáwune jii, «Vèn kuúmé ghán se mò‑oò tumen ven là mbàm, là kibam, là alábáʼ. Vèn‑eè ló a ghan, a buŋ kifá a?» Á bìnèr jii, «Àáy, vèr yòʼ‑oò ló a buŋ kifá.» 36Wù nèn sùúy aáwune jii, «Kee lèn ki dzə̀ jii, a wìr kér mbàm, kìn kibam, wù lì. Wìr búŋ nyùy rə̀r, wù fiìnè kikúm kfə́, e yùn nyùy. 37#Aysaya 53.12. M suuy bèn, bìʼ fo kinyo ke vé‑eè saŋen é Ŋwàʼ Nyùy jii, ‹Vé‑eè tàtí wun wùn à vé jayi,› kí kù kér fó gheén e mǒ kitu lèn. Vèn wáa kiíy jii, vinyo ve vé‑eè saŋen bìʼ mo vidzə̀m vi waà sí gheenè.» 38Áwune nèn sàyín jii, «Tàr, vèr sí kér nyùy sé rər fen sibaà.» Wù bìnèr jii, «Vèn maʼti kee shooy ki.»

Jesus lón ji Nyùy távír shilív sə́

(Matio 26.36‑46; Maak 14.32‑42)

39Jesus nèn fəə̀ fó lav fèy, wùn à wón və́ lìme wáa koʼ e Gwan Vicì vé Oliv mo á kù‑uù yii. 40Á meé fó, wù suúy aáwune jii, «Vèn wáa lon fo Nyùy ji lá vèn yòʼ nə̀ə́ e mùm, é yí gháʼ ven.» 41Wù suúy bey, e kòʼtí shintàm mo dzə̀ wìr màʼ tíy, yí dù, e mèé, e nèn tsə̀m fó nsay, a bùnrì jii, 42«Tàr, a kí ben ghèén wò, à kù tsə̀ʼ bàr ŋgeʼ və̀n fo m nó fó fo. Yii bèy, ku yiì a dzə̀ ke koŋ wò, lá à yòʼ yiì ke koŋ mo.» [43Wù bùnrì bèy, nshìylav Nyùy sə́ʼə́y fó yuv, a tavír wun. 44A wù dzə́, a shilív shí búʼ wun ŋkóŋkóŋ. Wù nèn màysì, e bùnrì e ŋàŋ, e ndzə̀ʼnìn. Ndzəʼnìn sí wáa shemshém fo nsay moo vitímtím vé mensə.] 45Wù bùnrì, e màysì, e nànèn, e kfə̀n fo wón və́ lìme kì dzəə̀n, e yèn, aá buúne, bìʼ fo vé‑eè rə̀mèn vinyo e ŋàŋ, e nèn dòr. 46Wù yòŋ jii, «Vèn buúne ji ka? Vèn nanen, a lon fo Nyùy ji lá vèn yòʼ nə̀ə́ e mùm, é yì gháʼ ven.»

Vé wòŋe koó Jesus

(Matio 26.47‑56; Maak 14.43‑50; Joon 18.3‑11)

47Wù ku lòo suúy bèy, màŋgòŋ nèn bvə̀y, a shém Judar wo dzəə̀n wír fo vee nshòv sibaà e ghvə̀me fó mbìy. Wù wìy, e shaà, e dù e Jesus ghaŋ ji wun baáme, e shàʼtì, 48Jesus yòŋ ji «Judar, à sí baáme ŋgaà wo yírí dzəə̀n *Wanwìr və̀n, e dìn ji á koó a?» 49Wón lìm Jesus ve vé‑eè tíy e wùn ghaŋe yén kinyo ke kí‑iì taʼ, e koóy, e dzə̀r jii, «Tàr, vèr gwati wír vìn e nyùy sér sí a?» 50Wùmòʼ nèn lòo gwàr wír, a dzə̀ kwǎn taà cù wo kuʼùn, e shaà, e shòʼ a dzə̀ kituʼùr ké yìy kí. 51Jesus sháʼnín jii, «Lá vèn yòʼ dzəə mùm kee shooy,» e nèn kùm kituʼùr ké wìr və̀y, kí kfə́n fó. 52A kì wìy vitú ve atàá cù wùn à vitú ve aŋgàa rər ve á shiy lav cù vi, à vé wòŋe ji á koó Jesus. Wù dzə́r aáwune jii, «Vèn kì wiy, kér nyùy sí wùn à vibur vi mo m dzə̀ shóŋ ji ka? 53Mò‑oò rə́si dzə́ vèsən é lav cù vishiíy vidzə̀m, la vèn yòʼ kùm mo. Ghán se dzə̀ vèn yiì kinyo si nen ghèén a dzə̀ lèn, a sì ghán se Satan wo wù kér ndzə vitsə̀ʼ sí sáʼá.»

Pita méŋ Jesus

(Matio 26.57‑58,69‑75; Maak 14.53‑54,66‑72; Joon 18.12‑18,25‑27)

54Wír vìyi nèn bàm Jesus, a dù sho e taà cù wo kuʼǔn laʼ. Á lòo dù, Pita wáa jùmrì fo bàm kwaʼda. 55Áwune dù, e tòn və́y é ntìntìn maàndzə, a yor, Pita nèn wìy sa, e dzə̀ʼə̀m aáwuné nsàn. 56Və́yí baárí, fo wù kì dzə́ə rán, wánlè wiíy wo wù‑uù lim e laʼ foo fèy wùmòʼ yén Pita, e tùy sí e wùn wó, e sùúy jii, «Wìr və̀n‑eè dzə̀ sá wùn à wìr wo á koon və̀y.» 57Pita nèn shàʼnín jii, «Wiíy və̀n, bó m yòʼ kì wír wo à yoŋ və̀n.» 58Shintàm shi lòo koʼtí, wìr wùmòʼ kfən yèn, e sùúy jii, «À dzə̀ sá wír fo wír vìyí ŋgoo.» Pita yòŋ ji «Wìr və̀n, bó m yòʼ dzə̀ é ŋgoo foo fèy.» 59Ntàm kfən yiì dàr moo hawa mòʼón, wùmòʼ woo wír nèn kfə̀n sàyín, a tav jii, «Wìr və̀n dzə̀ wír woó Galeli, wù‑uù dzə̀ rú wùn wìr və̀y.» 60Pita bìnèr jii, «Wìr və̀n, bó m yòʼ kì kinyo ke à táŋri kìn.» Kù mo wù suuy bèy, kiyuú ki nèn tòŋ. 61Taàtá Jesus bìnkìr fo wù kì tíyí, e lòo leéy Pita, sí yev wune tárnín, wù nèn kuùmé kinyo ke Taàtá Jesus kì suuyin jii, «Kiyuú ki yíi lòo jì ji kí tóŋ, aà méŋ ne mo akàŋ ataár.» 62Wù nèn fəə̀ fó ndzə, a gheèsì, a dìy.

63Wír ve vé‑eè kér Jesuse nèn kèʼ, a kèŋ Jesus, a dzə̀v. 64Á kúr sí rə́, a dzə̀v, a dzər sho jii, «Wò wo à yii yén virə́ʼ, suúy ri wír wo wù dzə̀vìn wò.» 65Á kfə́n a shùr wun e liy símóʼ sí sinín.

Á wáy nsaʼ Jesus

(Matio 26.59‑68; Maak 14.55‑65; Joon 18.19‑24)

66Yì rán kibvəə́shí, atǎr wòŋ wùn à vitú ve atàá cù, à wír ve á yii duŋrì nsəri tár aáwuné kirə̀ʼ ké dzə̀ʼə̀m. Á nèn kòʼór Jesus fo si, 67e dzə̀r shó jii, «Dzə̀ wò *Mfə̀ə́r wo Nyùy‑iì kàʼàn a? Fìʼtì ri lèn.» Wù bìnèr jii, «A m sùúy, la vèn yòʼ biìmé. 68A m fə̀m dzə̀r a dzə̀ kinyo, la vèn yòʼ bìnèr. 69#Nsùyrì Nyùy 110.1. Yii bèy, kèʼ fo lèn, Nyùy woo Ŋgaà Vitaàví Vidzə̀m sí yiì dzə̀ʼə̀r ŋgaà wo yírí dzəə̀n *Wanwìr və̀n e wùn koy yìyí.» 70Áwune nèn sàsìn wír adzə̀m jii, «Kí bo dzə̀ ji à dzə̀ Wan Nyùy?» Wù bìnèr jii, «Kí dzə̀ mo vèn suuyì.» 71Á nèn sùúy jii, «A dzə̀ á kfə̀n a tàʼ wír ji wù suúy ka? Vèn yù ne kinyo ke kí fəən fo wùn shuù kìn e vituʼùr vén ví.»

Currently Selected:

Luk 22: LNB

Highlight

Copy