Luk 16

Jesus fér mo dzə̀ wìr wàa yiì e mbàm si

1Jesus nèn kfə̀n a fèr e wón və́ lìme jii, «Ŋgaà bùʼ wùmòʼ‑oò kér ŋgaà və lìm wo wù‑uù lèmèn ji wù wáa leéy fo wùn keŋ e dzə̀m. Wìr nèn ghàn wìy, e duù shó jii, ‹Ŋgaà lìm wò və̀y sí jívir mbàm sé jívírín.› 2Wù nèn jàŋ ŋgaà lìm və̀y, e dzə̀r shó jii, ‹Ke m yú ji à yii bèy ki dzə̀ ka? Ku bàʼtí aŋwàʼ ve à sáŋ kéŋ yém shóo, e wìy, e siìr. À yòʼ dzəə́ wìy a leéy fo mǒ vifa.›

3«Ŋgaà lìm və̀y nèn dù, e rə̀m jii, ‹Mo tàr wor sí jum mo fó lìm, m wíy yèe le lèn? Mo, a bó m yòʼ kér vitaáví ve dzə̀ m lìm lím kisoo, a m kfə̀n woóme fó a lon viloòné.› 4Wù nèn lò, e sùúy jii, ‹M kìíy ne kinyo ke m yíi yiì, tàr wor yií fəər mo fó lìm, é m fíʼ a ker ŋkar sém se sí wáa sə mo aáwuné melaʼ.› 5Wù nèn jàŋrì wír ve vé‑eè kér kaá tàr wov amòʼón, amòʼón. Wo mbìy wìy, wù dzə́r shó jii, ‹À kér tàr wor ka?› 6Wù bìnèr jii, ‹Dzə̀ nsee meŋgvə̀r wií.› Wù nèn sùúy sho jii, ‹Ŋwàʼ wo wò‑oò saŋené və̀ne. Lì ri, e kùvsín, e sàŋ ji nsee mtàn.› 7Wù kfən dzə̀r e wùmòʼ jii, ‹Yé yee káa dzə̀ é le?› Wù bìnèr jii, ‹Dzə̀ kibam ke saŋ wií.› Wù fó ŋwàʼ sho jii, ‹Víne mo wò‑oò saŋen fen, kúvsín, e sàŋ ji kibam mwaamé.› 8Ŋgaà lìm və̀y shwìvrì tàr wov bey, wù wìy yèn, e kù yòʼ bìnsí jii, ‹Jwè və̀n fìír feyì.› »

Jesus nèn a màysì jii, «Dzə̀ rú, wír veé ndzə fène fìír e vinyò ve áwune yii, e shaà mo wír Nyùyi fiir e vév vee vinyo vi. 9Mbàm si dzə̀ ben, a sí lo, sí wàa lìm vinyo ve bi ví. M nén a suúy e vèn jii, vèn wáa lì kén mbàm sén, a yiì a dzə̀ vinyo ve Nyùy wáa kòŋ sho, é wíy lóo dzə e ghan se mbàm si yòʼ dzəə́ kér lim, é Nyùy li ven e wùn laʼ fo á wíy a dzə ghán sidzə̀m. 10Wìr wo wù leey fo shifarìn kijuŋ, kù dzə̀ wù lèéy sá fo ke kuʼùn kí. Wo wù leey fo shifarìn, lóʼ ŋgaà kifa, kù dzə̀ sá mo dzə̀ wù lòʼ e ke kuʼùn kí. 11A vèn dzə̀ là fó a leéy fo mbàm kijuŋ mo fə̀m dzəə̀n kifá ke kí lo, kí lìm vinyo ve bi ví, aá kfən wìy fò ven bùʼ woo rú é le? 12A vèn dzə̀ là fó a leéy fo wìr kifa kijuŋ, wìr kfə̀n lì kímóʼ kí, a fo ji kén é le? 13A bó yòʼ dzə̀ wìr wàa lìm atàr abaà. A wù lò, a lìm, bo wù yíi a bàn wùmòʼ, a kòŋ wùmòʼ, a yu kinyo ke wùmòʼ, a kay wùmòʼ. Bó yòʼ dzə̀ vèn wàa lìm fo Nyùy, e kfə̀n a lìm fo mbàm si.»

14Jesus wáa fèr bèy, a wír veé mbìv *Farasi ámóʼó yú. Á nèn a ndzəə wun, bìʼ fo áwune yii koŋ mbàm e ŋàŋ. 15Jesus nèn a suúy aáwune jii, «Kù dzə̀ ven vin ve á laarì sí wíri, din wún ji wír ve juŋe, a kù kì Nyùy melív men. Vèn wáa kiíy jii, vinyo ve wíri búri ji ví mèé e vinyò vi dzə̀ ve ví kóʼoy fo Nyùy kóʼóyín.»

Sáʼ Nyùyi shaà nsər see fó mbìy

(Matio 11.12‑13; 5.31‑32; Maak 10.11‑12)

16Jesus kfən sùúy jii, «Yì‑iì dzə̀ fó mbìy, a wíri yú a dzə̀ fó kinyò keé Ŋwàʼ Nsər Mooser, à fó kinyò ke aŋgàa ntum Nyùyi‑iì saŋen. Kèʼ mo Joon‑eè wìyìn, á sí fiʼtì lèn a dzə̀ sáʼka wo juŋ ji Nyùy sí yiì a saʼ vifon və́, a wìr dzə̀m sí táŋ dzə́ə fó nəə́ e Nyùy mvə̀m saʼ foo fèy. 17A bó yòʼ dzə̀ ji *Nsər Mooser lày ne. A dzə̀ yúv wùn à nsay mày cér feyì, e shaà fo shinyorìn shimòʼón shi lay fó nsər fèn.

18«A kí dzə̀ jii, a wìr fə̀ə́r wiíy və, e lì wo sən, bo wù yiì kinyo ke bi kí e wiiy və réŋréŋ mo wù jàŋ wo jaŋèn. Wìr wáy wiíy wo á fəərin é lav, bo ŋgaàŋ lì sa a dzə̀ wiiy wìr.»

Kinyo ke ŋgaà mbàm wùn Laasaror

19Jesus kfə́n a fèr jii, «Ŋgaà kav wùmòʼ‑oò dzə̀, a wù wáyri wún é ŋàŋ, rə́si vishiíy vidzə̀m, yí a dzə̀ kitú kfə́. 20Wìr wùmòʼ wáa dzə sa, aá yoŋ ji Laasaror, a dzə̀ ŋgaà kitàn, viváv ví kfən koò sá wun. Wù wáa rəsí, a neŋ e ŋgaà kav və̀y shùu lav, 21a kìʼìy ji wù sà yíi lòo yi kifá, kí bérí, wù maʼàyì, é wun bóŋrí á. Wù lóo neŋ fo, jwí si wàa wìy, a la viváv və́.

22«Wù nèn wìy lò, e kpù, nshèelav se Nyùy si bèʼèy, e dù sho e yuv, e dzə̀ʼə̀r e Abraham ghaŋ, wùn wun wáa yikír. Ŋgaà mbàm və̀y wìy sìíy sa, e kpù, á dzəə̀mè. 23Wù dù aàŋkfəə́ wòŋ, a yen a dzə̀ ŋgeʼ ye biibí fó. Wù wìy lò, e màʼ sí, e yèn Abraham kwaʼda, a Laasaror dzə́ e wùn ghaŋ. 24Wù nèn a jàŋ jii, ‹Taàtá Abraham, ku shàm mendzən mem mè, e tùm Laasaror, é wù wáy wan kiwo e mendzə̀v, e wìy, e rəə̀r kiliímé kém shó. M yén ŋgeʼ ye tavín é mvə̀m və̀y fen.›

25«Abraham bìnèr kfə́ jii, ‹Wan wom, kuúmé ghán se wò‑oò dzəə̀n e tin si. Wò‑oò sí kér vifá vé ve juŋ vi vidzə̀m, a Laasaror yén kfə́ a dzə̀ ŋgeʼ. Lèn və̀n, sí yú Laasaror vijuŋ, aà yén ŋgeʼ. 26A fə̀m là kee shooy, bo kimbàʼàn kímóʼ kí jàvsìn vèsən fo wìr lo fo à dzəə̀n fey, e lìysín fèn. A bó yòʼ dzə̀ wìr lò sá fo fèn, e tùmsín fo à dzəə̀n.› 27Wù nèn kfə̀n a lon jii, ‹Kii wò tàr wor, ku tùm ri Laasaror e tàr wór laʼ, 28é wù du, e yèn afə́r vém vee atàn, e tìr áwune jii, á wáa yen fó wìy wìy e kirə̀ʼ ké ŋgeʼ ke m dzəə̀n shó kìn.›

29«Abraham bìnèr jii, ‹Áwune kér ŋwàʼ wo Mooser wùn aàŋgàa ntum Nyùyi‑iì saŋen, a dzə̀ áwune wàa yuurí vinyo ve á suuyì.› 30Wù sháʼnín jii, ‹Àáy, tàr wor Abraham, a kì dù ŋkfəsày, e fìʼtì aáwune, bo á biner melív mev.› 31Abraham bínér shó jii, ‹Aáwune tèn fó yuurí kinyo ke Mooser wùn à ké *aŋgàa ntum Nyùy ki, bo bó yòʼ dzə̀ áwune yuùrí sá ké wìr wo wù kpuun, e bóo kfən.› »

Currently Selected:

Luk 16: LNB

Highlight

Copy