Luk 17

Mo dzə̀ wír Jesuse baàmè jay

(Matio 18.6‑7,21‑22; Maak 9.42)

1Jesus wáa suúy e wón və́ lìme jii, «Vinyo ve ví lévti wíri, aá jáy dzə́ə ví yòʼ wíy a buŋ e ghan símóʼ sí gheéy. Yii bèy, lòné dzə̀ wó ŋgaàŋ wo wù lévti wír, wù jày dzə́ə. 2Kí bòŋ ji bo á kì sə̀ə́y tíy kiban e ŋgaàŋ kilòŋ, e dòm e ndzəv, e shaà fo wù wáa dzə sho, e yiì, é wìr fo vin ve á biíme Nyùy moo wón ve terií jáy dzə́ə.

3«Vèn wáa yen rì fó a jay vinyo. A fər wìr jày kinyo, wù wàa tir tirín. Wù biíme jay və, wù làysìn kinyo kee shooy. 4A wìr fə̀m jày e wò kàŋ saàmbà kishiíy kimòʼón, jáy bèy, wù kù yòʼ wìy, a tunrí jay və, à kù làysìn kinyo kee shooy.»

Mo dzə̀ wír Jesuse wàa way shilív e Nyùy wùn

5Aŋgàa ntum Taàtá Jesuse nèn lò, a suúy sho jii, «Ku sə̀ ver, é vèr wáy shilív e Nyùy wùn, e shaà mo á wayin.» 6Taàtá Jesus bìnèr jii, «Ŋgoòy shishùr#17.6: Shishúr shin shi dzə̀ é Lǎm Bàràʼ ji mustard. Leéy mbìv Ji se Naarìn sí. ŋeèrí feyì, a yensín shishàr. A vèn bèn kì wày shilív e Nyùy wùn shishàr bèy, bo dzə̀ vèn kù sùúy e kicí kin ki jii, ‹Mènèn fó fèn, e dù, e tìím a dzə̀ é rìbà ndzə̀v›, kí kù nèn meènè mo vèn suuyin.

Wír Jesuse kér lim ye dzəə̀n yév

7«Vèn ku lì jii, wìr fo vèn kì kér ŋgaà və lìm, wù rə́sí, e lìm súm, kìn wù shiy a dzə̀ njiì, wù yiì wìy fo laʼ, wò woo tàr wov kù nèn sùúy sho ji wù shaa ri, e lì vifá və́ vé yi, a yi à? 8Àáy, ke dzə̀ tàr wov kù sùúy ki dzə̀ jii, dù, e kùvsín ndzə̀y sí, e fèr vifá vém vé yi, e wìy sho, m lóo yi, áà wáa baʼtí vifá. M maysì, é bo à du, e lì vé, a yi. 9Wù yii mo tàr wov suuyin, tàr wov kfə̀n rə̀sí, a beèrì beèrìn a? 10Kù dzə̀ sá mo kén kí dzəə̀n. Vèn yii lim ye á foon e vèn, yí mayì, vèn kù a suúy cáʼ jii, vèr dzə̀ kér ji aŋgàa lìm, a vèr yiì a dzə̀ lim yér ye yí dzəə̀n ji á wáa yiì.»

Jesus fér aŋgàa shìvnsay e ghvə̀m

11Jesus kfən yiì lòo dù e dzəə̀ Jerusalem, a shaà a dzə̀ fó njàvìn wòŋ woo Samaria wùn à woo Galeli. 12Wù dù, e lòo nəə́ e ntèʼ yìmòʼ, a wír ámóʼó ghán fo e ghvə̀m, aá joy shivnsay. Á yén wun, a wù dzə̀ə́ ntàmda, e nèn tìím, 13a jàŋ jii, «Jesus, Tàr à wíri, ku shàm mendzən mer mè.» 14Jesus yén áwune, e jàŋ jii, «Vèn du, e yèn taà cù, é wù leéy ven.» Áwune ku nèn a dù, e lòo dù e dzəə, e nèn bònén. 15Á yén bey, wo mòʼón nèn a kfən fo Jesus wùn, a yòv, a taŋ, a sùyrì Nyùy kitávín. 16Wù meé fó, e tsə̀m e Jesus si, a beèrì wun. A wìr və̀n‑eè dzə̀ wír woó *Samaria. 17Jesus wáa ghay jii, «Bó m yòʼ kì fèr wír e ghvə̀m à? Vee bvə̀ʼə̀ə bèé? 18Kù wìy wir kitum və̀n cáʼcáʼ ji wun búrí Nyùy à?» 19Wù nèn sùúy e wìr və̀y jii, «Lò é yuv, a dù du yée. À bònén ne, bìʼ fo à wayin shilív e mǒ wùn.»

Sáʼ Nyùy yee lèn wùn à yeé ghan sé bàm sí

(Matio 24.23‑28,37‑41)

20Wír veé mbìv *Farasi ámóʼó nèn wìy lò, e dzə̀r e Jesus jii, «Nyùy wíy kèʼ, a saʼ vifon və́ é nsay e ghàn ka?» Wù bìnèr jii, «Kisəəm ke kí din ghán se Nyùy sí wìy a saʼ vifon və́ kí yòʼ dzə̀. 21A bó yòʼ dzə̀ wìr wìy sùúy jii, ‹Nyùy və̀ne, mo wù sí sáʼá.› Kìn jii, ‹Və̀sə, mo wù sáʼá.› Vèn wáa kiíy jii, sáʼ Nyùyi sì lèn a dzə̀ e wírí meliv.»#17.21: sáʼ Nyùyi sì lèn a dzə̀ e wírí meliv; Kìn jii: sáʼ Nyùyi sì e věn mvəm.

22Wù nèn a suŋnín lèn a dzə̀ e wón və́ lìme jii, «Ghán sí wíy gheén se vèn wáa ker shií fó kfə̀n yen ŋgaà wo yírí dzəə̀n *Wanwìr, a fə̀m dzə̀ kishiíy kimòʼón, e làa yòʼ yen. 23A wíy lòo dzə e ghan see shooy, é wír ámóʼó wáa suúy e vèn jii, ‹Vèn leéy, wù və̀sə›, kìn jii, ‹Wù və̀ne.› Á lóo suúy bèy, lá vèn yòʼ a dù ji á taʼ wun. 24Ŋgaà wo yírí dzəə̀n Wanwìr wíy lòo kfən, aá wáa yen moo wuú ye yí njaʼàm, yí ŋwàŋ, yúví ràn, e kaàrí, e tàr. 25Yii bèy, é bo wù wìy dù, a kfən, wù kér fó tòmbìy yen ŋgeʼ sinín, é ŋgwàʼ yee lèn káy wun. 26A wù wíy lòo wìy, é wíri wáa dzə réŋréŋ mo vé‑eè dzə́ e Noa ghan. 27Á kù‑uù dzə́, yíkirì, nó vifá, juur wón, a vilum wáy e lav, e dù, e meé e kishiíy ke Noa‑aà nəən é kikoŋ. Ndzə́ví nèn wìy, e lèér áwune, á lày adzə̀m. 28A kí kfə̀n wíy koóy sa réŋréŋ mo kí‑iì kooyin wíri e Lot ghan. Vé‑eè dzə́, rə́si yíkirì, nó vifá, kávnin wáy, lim súm, kfə̀n baʼrì lav sév. 29Lot wìy fəə̀ fo áwuné ntèʼ yee Sodom, Nyùy nèn sə̀ʼə́r və́y fó yuv, a wú shwí, baári moo mekàŋ, e laàr wír veé Sodom sho adzə̀m. 30Á mo kinyo ki wíy koóy sa wíri é kishiíy ke ŋgaà wo yírí dzəə̀n Wanwìr wíy sàsìn, e bvəy.

31«Wíy lóo dzə e kishiíy fóo fèy, a wìr kì dzə̀ e kitu ke lav, lá wù yòʼ dzə́ə a kfən e lav ji wun li vifá və́, e bó a nyeŋ. Wìr wáa dzə é kwaʼ, lá wù yòʼ dzə́ə a kfən fo laʼ. 32Vèn wáa kuumé kinyo ke kí‑iì kooyin wiíy Lot. 33Wìr wo wù bávti kitú kfə́ ji fo wun kpú, kù wíy kpu. Wìr wo wù maʼàyì, ŋgaàŋ wíy shaàrì. 34A m suuy e vèn jii, wíy lòo dzə vitsə́ʼ vee shooy, wíri lóo neŋ, lóo buuné e kikun abaà, aá li wùmòʼ, e lèm wùmòʼ. 35Vikìy lóo jò kibán abaà, lóo sənín, aá li wùmòʼ, e lèm wùmòʼ. [36Wíri lóo dzə e kwaʼ abaà, aá li wùmòʼ, e lèm wùmòʼ.]» 37Wón lìm Jesuse nèn dzə̀r shó jii, «Tàr, kinyo kìn ki wíy a koóy a dzə̀ feé?» Wù bìnèr a dzə̀ é ŋgàn jii, «Kimkpú ke kifa ki yii lóo neŋ e kirə̀ʼ, vilùŋ vi nèn a baʼtí fo.»

Currently Selected:

Luk 17: LNB

Highlight

Copy