Joon 21

Jesus dín kitú kfə́ e wón və́ lìme é ghaa kibaŋ

1Wìy lòo dzə e ghan símóʼ sí, Jesus kfən dìn kitú kfə́ e wón və́ lìme, aá dzə́ e ghaa kibaŋ keé Tiberia. A kinyo ke kí‑iì kooyin kí dzə̀ jii, 2wón lìm Jesus ámóʼó‑oò dzə́ fo, aá dzə̀ jii, Simon Pita, wùn à Tomar wo vé‑eè yoŋ sa ji Wóné, à Nataniar wo dzəə̀n wír woó Kaana e wòŋ Galeli foo fèy, à wón Sebedi vee abàá, wùn à wón lìm Jesus ámóʼó sá abaà. 3Simon Pita nèn lò, e sùúy jii, «Mo‑óò du, e koò sə́.» Á bìnèr jii, «Bo vèsən du.» Á nèn nə̀ə́ e kikoŋ, e sìíy, e shìíy e ndzəv, e làa yòʼ koo kifá gheéy.

4Ndzə yiì kèʼ jav, Jesus wìy, e tìím e ghaa ndzəv, la wón və́ lìme yòʼ a kiíy ji dzə̀ á wun. 5Wù nèn jàŋ áwune jii, «Ŋkàr sem, vèn ku koò sə́ à?» Á bìnèr jii, «Vèr yoʼ koò kifá.» 6Wù jàŋ jii, «Vèn maʼ lálán e mbìv kikoŋ ye yì dzəə̀n é koy yìyí, aá koó sə́.» Á màʼ, sə́ si rún shó, á wáa sə̀ŋ, a sə̀ŋ ntéŋ. 7Wan lìm Jesus wo wù‑uù koŋ e ŋàŋ və̀y nèn sùúy e Pita jii, «Wìr və̀sə dzə̀ Tàr wòsən.» Pita yú ji dzə̀ á Taàtá Jesus, a wù kì tàm ndzə̀y támén, e kù nèn màʼ kikúm, e lìy fó kikoŋ, e tò é ndzəv, a dù fo. 8Kibér ke wón lìm Jesus ki wáa jùmrì e kikoŋ, a sə̀ŋ lálán wo sə́ si‑iì runen shó və̀y, a bó á yòʼ dzə̀ə́ kwaʼda fo ghaa kwaʼ, a ntàm bér moo kóy mtàn bèy.

9Á dù, e lòo fəəsín e ghaa kwaʼ, e yèn, a və́yí gheʼ fo e vikaysín, a sə́ si néŋ e kitu wo, a kibán ki dzə̀ sá fo. 10Jesus suúy jii, «Vèn wiy e sə́ se vèn koon símóʼ sí.» 11Simon Pita tó é kikoŋ, e ŋètí lálán və̀y, e sə̀ŋ, e wìy sho, a sə́ se faŋkìn sí rún shó, sə́ wií e sə́ si nshòv taár e mtàn. Mo sə́ si fə̀m‑eè dzəə̀n nyanyày, lálán yòʼ‑oò lo tiìné gheéy. 12-13Jesus nèn sùúy aáwune jii, «Vèn wiy, e yìkír.» Wù kóʼtí, e lì kibán, e jàv aáwune, e kfə̀n jàv sa sə́ sìy, á wáa yi. Wùn áwune wáa dzə bèy, la wìr mòʼón yòʼ fə̀m ghày shó jii, wù sà dzə́ bèn, a dzə̀ wun la á? Á kù‑uù səə̀m sə́əmen ji dzə̀ á Tàr wov.

14Jesus dìn kitú kfə́ e wón və́ lìme é ghan sin, akàŋe nèn mèé ataár mo wù dìnèn kitú kfə́ aáwune mo wù‑uù fəən fó kpu.

Jesus rəə́r shilív shé Pita

15Á yiì yìkír, e màysì, Jesus yòŋ Simon Pita jii, «Simon woo wan Joon, à kù yòʼ koŋ mo, e shaà mo wír vìne koŋè a?» Wù bìnèr jii, «Eènó Tàr, à kì ji m koŋ wò.» Jesus nèn sùúy sho jii, «À wàa leéy rì fo wír vémé mo wìr lèéy fo wón njìi.» 16Wù kfən dzə̀r fó akàŋ vee abaà jii, «Simon woo wan Joon, à koŋ mo á?» Pita sii bìnèr jii, «Eènó Tàr, à kì ji m koŋ wò.» Wù nèn kfə̀n sùúy sho jii, «À wàa leéy rì fo wír vémé mo wìr lèéy fo njiì.» 17Wù kfən lò, e yòŋ fo akàŋ vee ataár jii, «Simon woo wan Joon, à koŋ mo á?» Pita yú, a wù dzə́r fó akàŋ vee ataár ji wù sà koŋ wun a, kitú ki lùm wun. Wù nèn yòŋ jii, «Tàr, kì wò vinyo vidzə̀m, aà kì ji m koŋ wò.» Jesus kfən sùúy sho jii, «À wàa leéy rì fo wír vémé mo wìr lèéy fo njiì.» 18A m suuy e wò rúrú jii, «Wò‑oò dzə́ wánlè nsùm, wóvti ndzə̀y sé, à wàa dù fo à kòŋèn. Yii bèy, à wíy dzə̀n, áà wáa ràmsì kóy, é wìr wo sən wáa kur, a lì wò, a dù sho fo bó à yòʼ koŋè.» 19A Jesus‑eè suuy kinyo kìn ji wun tóʼtí á kfə́ə kpu ye Pita wíy kpu, e nàn a dzə̀ yír Nyùy. Mo wù suuyin bey, e nèn kfə̀n sùúy sho jii, «Kú a jùmrì a dzə̀ mo.»

20Pita lòo bìnkìr, e yèn wan lìm wo Jesus‑eè koŋ e ŋàŋ və̀y, a wù wiy fo bàm. A dzə̀ wun woo shó wo wù‑uù yeʼemen e Jesus wùn é ghan se wùn áwune‑eè yikin, e jòʼsì, a dzər ji «Tàr, ku sùúy wír wo wù yíi kar menàŋ e wò bàm.» 21Mo Pita yenen, a wan lìm Jesus və̀y wiyì, e dzə̀r e Jesus jii, «Tàr, ké və̀n woo wír ki dzə̀ ji ka?» 22Jesus bìnèr sho jii, «A m fə̀m kì taʼ ji wù wìy shaàrì, e mèé e ghan se m wíy kfən, bo bó yòʼ dzə̀ nsaʼ yè. Kú a jùmrì ké ki a dzə̀ mò.» 23Mo Jesus suuyin bey, léŋe nèn kèʼ, a ghanén e wír vəə́ mvəm ji bó və̀n woo wan lìm yòʼ waà dzəə́ wìy kpu. A bó yòʼ dzə̀ kinyo ke Jesus‑eè suuyin. Wù‑uù sùúy jii, a wun kì taʼ ji wìr və̀n shaari, e mèé e ghan se wun wíy kfən, bo bó yòʼ dzə̀ á nsaʼ Pita.

Vinyo ve ŋgaà saŋ

24A kù dzə̀ wan lìm Jesus woo shooy wo wù‑uù yenen vinyo vìn vidzə̀m, e sàŋ é ŋwàʼ fèn, a vèr kì ji kinyo ke wù fer kìn ki dzə̀ á ke ru kí. 25Yii bèy, vinyo vímóʼ ví dzə̀ shó vinín ve Jesus‑eè yii, a m yén jii, a dzə̀ ji á ŋeevi vinyo vee shooy vidzə̀m, e sàŋ é ŋwàʼ, la kitú ke nsay kidzə̀m ki yòʼ kòóy fó lèm aŋwàʼ vee shooy.

Currently Selected:

Joon 21: LNB

Highlight

Copy