Joon 20

Á táʼ dzə́n Jesus ntéŋ

(Matio 28.1‑8; Maak 16.1‑8; Luk 24.1‑12)

1Wáa dzə e kishiíy ké mbìy ki fó ŋgàm, Maria Magdalen bvə́y vitsə́ʼ vitsə́ʼ, e dù e shùu sày fèy, e yèn, aá tsə́ʼ ne kilán ke vé‑eè sətin shúu sày sho. 2Wù nèn bìnkìr, e lèʼ, e dù, e yèn Simon Pita wùn wàn lìm wo Jesus‑eè koŋ e ŋàŋ və̀y, e sùúy jii, «Á shàʼàr ne dzə́n Taàtá Jesus fo sày fèy, a bó vèr yòʼ kì fo á lèmèn.» 3Pita wùn wàn lìm Jesus və̀y nèn fəə̀ ji á du e shùu sày fèy, 4e shòʼ a dzə̀ kileʼ. Wàn lìm Jesus və̀y nyéŋ fó mbìy, e shaà Pita. 5Wù meé fó, e bìʼtí, e lèéy say, e yèn, a sí néŋ wón ndzə̀y ve vé‑eè ndzəmen dzə́n Jesus sho. Wù leéy bey, e làa yòʼ nəə́. 6Simon Pita meé fó, e nèn shaà kfə́, e nə̀ə́ nəə́n é sày, e yèn sá, a wón ndzə̀y víyi néŋé, 7e kfə̀n yèn ndzə̀y se vé‑eè ndzəmen kitú ke Jesus sho, a sí néŋ jeéy, sikaárín. 8Və̀y woo wan lìm Jesus wo wù kì meen é shùu sày fo mbìy nəə́ sá, e yèn kinyo ke kí kooyin, e nèn biìmé ji Jesus fəə̀ ne rú á fo kpu. 9Fə́m a dzə e ghan sin, a bó á yòʼ sí kiiy kinyo ke Ŋwàʼ Nyùyi‑iì din ji Jesus kù‑uù wíy fəə a fo kpu.

Jesus dín kitú kfə́ e Maria Magdalen

(Matio 28.9‑10; Maak 16.9‑11)

10Wón lìm Jesus vìyi nèn a kfən fo laʼ, 11a Maria kì kfə̀n ne fo, a tiy, a dìy e shùu sày. Wù dìy bèy, e yiì lò, e bìʼtí ji wun leey a mvəm sày, 12e yèn, a nshèelav se Nyùy si dzə́ fo vé‑eè neèrìn dzə́n Jesus sibaà, a sí máʼ ndzə̀y se fəvír sí. Wùmòʼ‑oò dzə́ fo kitú ke Jesus ki‑iì néŋé, wùmòʼ fo wuú rəə́‑əə̀ néŋé. 13Á nèn yòŋ jii, «Yaà, à diy ka?» Wù bìnèr jii, «M diy, bìʼ fo á shàʼàrìn dzə́n Taàtá wom, la m yòʼ kìíy fo á lèmèn.» 14Wù suúy bey, e lòo bìnkìr, e yèn, a Jesus tíy fo bàm, la wù yòʼ a kiíy. 15Jesus yòŋ jii, «Yaà, à diy ka? À taʼ a dzə̀ la?» Wù nèn a kwàʼtì ji dzə̀ á wír wo wù lim e kiboo fóo fèy, e nèn sùúy sho jii, «Taàtá, a shàʼàr wò dzə́n Jesus, à kù dìn fo à lèmèn, é m li, a dù sho.» 16Jesus nèn yòŋ lèn jii, «Maria.» Wù kóʼtí fó, e kù nèn yòŋ Jesus aáwuné Lǎm Hibru jii, «Raboni», a dzə̀ jii, Ŋgaà Yèʼey. 17Jesus suúy shó jii, «Lá à yòʼ a ghar mo, bìʼ fo m yóʼ ne kfə̀n fo Tàr wór wùn. Ku dù duùn, e tiìsí aàfə́r vémé ji m sí kóʼ, e yen a Tàr wor wo dzəə̀n sá Tàr wov. Dzə̀ Nyùy wom, a kfə̀n dzə̀ sá wóov.» 18Maria Magdalen ku nèn lò, e dù, e sùúy e wón lìm Jesus vìyi jii, «M yèn ne Tàr wòsən», e nèn tiìsí kinyo ke wù kì suuyin e wun.

Jesus dín kitú kfə́ e wón və́ lìme

(Matio 28.16‑20; Maak 16.14‑18; Luk 24.36‑49)

19Yiì lòo dzə e ŋkuùr, a kù dzə̀ə́ kishiíy ké mbìy ki fó ŋgàm foo fèy, wón lìm Jesuse báʼtí é lav yìmòʼ, e fìn shúu lav, bìʼ fo vé‑eè fan vé wòŋe. Jesus nèn bvə̀y, e tìím aáwuné mvəm, e shàʼtì jii, «Nyaáŋ kú a dzə e věn mvəm.» 20Wù shàʼtì bèy, e dìn wó rə́ aáwune, e kfə̀n dìn búu və́ nsaŋ. Áwune yén Tàr wov, a sheʼrí feyì. 21Wù nèn kfə̀n sùúy aáwune jii, «Nyaáŋ kú a dzə e věn mvəm. M sí túm ven lèn mo Tàr wor‑iì tumen sá mo.» 22Wù suúy bey, e nèn yòy aáwuné wùn, e sùúy jii, «Vèn ko Kiyoy ke Ranén kí. 23Vèn wíy làysìn vinyo ve wìr ve bi ví, bo Nyùy làysìn ne. Vèn maʼti, bo ví gòʼ ne e ŋgaàŋ kitu.»

Jesus dín kitú kfə́ e Tomar

24Wáa dzə e ghan se Jesus‑eè wìyìn, e yèn wón və́ lìm sìn, a bó Tomar wo vé‑eè yoŋ yír yímóʼó ji Wóné yòʼ kì dzə̀ fó. A dzə̀ sá wír fo vee nshòv sibaà e ghvə̀m vìyi. 25Kibér ke wón lìm Jesus ki nèn sìíy, a fèr sho jii, «Vèr kì yèn Tàr wòsən.» Wù nèn a kìnèn jii, «A dzə̀, a bó m yén shuu se mban se vé‑eè taan é wùn wó, e mùmrì e kiwó kém kí, e kfə̀n mùmrì sa búu nsaŋ, la m yòʼ biìmé gheéy.»

26Ŋgàm kúm, a wón lìm Jesuse kfə̀n kì bàʼtí, a dzə e lav, a Tomar dzə̀ sá fo, a shuu se lav si dzə̀ sifinrìn. Yii bèy, Jesus ku sàsìn, e bvə̀y é lav, e tìím aáwuné nsàn, e shàʼtì jii, «Nyaáŋ kú a dzə e věn mvəm.» 27Wù nèn sùúy e Tomar jii, «Wìy ri, e mùmrì wó yémé e kiwó ki, e kfə̀n lèéy mo yí dzəə̀n. Tsə́nsí kiwó ké ki, e mùmrì sa búu wóm nsaŋe, e bèr kiŋkìnèn, e biìmé ji dzə̀ rú á mo.» 28Tomar ku nèn sùúy suuyín jii, «Dzə̀ wò Tàr wor, aà dzə̀ Nyùy wom.» 29Jesus suúy shó jii, «À biìmé lèn bìʼ fo à yenen ne mo a? A bòŋ ké wìr ve bó á yoʼ lò yèn mo, e kù yòʼ biìmé.»

Kinyo ke ŋwàʼ və̀n

30Jesus yiì vinyo vìn, wón və́ lìme yén vitaáví vé Nyùy, a wù‑uù yii sa vímóʼ ví vinín ve bó á yoʼ sàŋ é ŋwàʼ fèn. 31Á nén a saŋ vin bèn ji vèn fiʼ biìmé a ji Jesus dzə̀ *Mfə̀ə́r, a dzə̀ Wan Nyùy. Vèn biíme, wáy shilív é wùn wó, é wù nèn yiì, é vèn wáa ker dzəʼə̀m yee là may.

Currently Selected:

Joon 20: LNB

Highlight

Copy