Joon 19

1Payler nèn fò Jesus, á shóʼ e ŋgwàne. 2Vé rərí kfən kaàrí kár e kicí ké njoŋ ki, e səə̀nè e kitu wo ji ntáráʼ, e màʼ kikúm ké vifòn e wùn wó, 3e nèn a wìy e si wo, a bùn, a kwa jii, «Caamfoò, Fon wìr veé Juda.» Wìr bun bèy, wù dzə̀v e kiwó ki.

4Payler nèn siì yiì fəə̀, e sùúy e wíri jii, «Vèn yuúrí, m sí fəər wír və̀y lèn, e koʼór e věn si fó dìn ji bó m yoʼ yèn njò ye wù gbuùn.» 5Á nèn a wìy e Jesus, aá sóv ne ntáraʼ njoŋ və̀y e kitu wo, e màʼ kikúm ké vifòn e wùn wó. Payler suúy e wír vìyi jii, «Vèn yén ri wír və̀y.» 6Vitú ve atàá cù wùn à vitú ve wìr ve vé‑eè shiy lav cùu yén Jesus, e nèn a waamé waamén jii, «Á ku tà taán é kintam. Á tá taán é kintam.» Payler nèn sùúy jii, «Bo kù li ven, e dù, e ta e kintam. Bó m yoʼ yèn kinyo ke wù jayin.» 7Wír veé Juda vìyi bìnèr jii, «A dzə̀ mo yéer yee nsər suuyì, bo wìr və̀n kù kér fó kpu, bìʼ fo wù yoŋ kitú kfə́ ji Wan Nyùy.»

8Payler yú kee shooy, e màysì, e fàn, 9e lì Jesus, e kfə̀n shó e mvə̀m ntoʼ, e dzə̀r shó jii, «À lò fo feé?» La Jesus yòʼ ghày. 10Payler nèn dzə̀r shó jii, «À tén fó bìnèr kinyo e mò a? À yòʼ kì ji kér mo vitaáví fó suúy, aá maʼti wò, a m kér fó suúy, aá tá wò e kintam à?» 11Jesus bìnèr jii, «Bó yòʼ dzə̀ à wàa ker vitaáví ve dzə̀ à yiì kinyo e mò, a bó Nyùy biímé gheéy. Jay wo kuʼùn ku nèn a dzə wo wìr wo wù wayin mo e wò kiwo, bó yòʼ dzə̀ wo.»

12Payler yú bey, a tàʼ ji wun maʼti á Jesus. Wír veé Judàa nèn a waamé jii, «Aà màʼtì wír və̀n, bo bó à yòʼ dzə̀ ŋkar Fòn woó *Rom. Wìr wo yoŋ wun kitú kfə́ ji fon, ŋgaàŋ táŋ a dzə̀ kóy wùn Fòn woó Rom.» 13Payler yú kee shooy, e nèn fə̀ə́r Jesus, e dzə̀ʼə̀m e kirəsí fo wù yii tínen nsaʼ, aá yoŋ fó ji nsaàlav mfiì, a dzə̀ é Lǎm Hibru ji Gabata. 14Wù wáa dzə̀ʼə̀m fo e ghan sin, a shùy sì é ntìntìn, a dzə̀ kishiíy ke wír veé Judàa kì sí báʼti fó bvəəshí, e rəsí Ŋkǎʼ Yáʼayshaà. Wù nèn sùúy e wír veé Juda vìyi jii, «Vèn yén ri fon won və̀y.» 15Áwune nèn kfə̀n a waamé jii, «Á yúyrí wír woo shooy yúyrín. Á ku yùyrí yuyrín. Á tá taán é kintam.» Payler dzə́r aáwune jii, «Bo dzə̀ ji m tá fon won é kintam à?» Vitú ve atàá cù vi bìnèr jii, «Vèr kù kér fon e mòʼón, a dzə̀ Fon woó Rom.» 16Payler nèn màʼtì, e fò Jesus aáwune ji á du, e tà é kintam.

Á tá Jesus e kintam

(Matio 27.32‑44; Maak 15.21‑32; Luk 23.26‑43)

Vé rərí nèn lì Jesus, 17wùn áwune fəə́, wù wáa beʼ kintam kfə́, á wáa dù e kirə̀ʼ ke á yoŋ ji ŋgéreʼ kitu ke wìr, a dzə̀ é Lǎm Hibru ji Gorgota. 18Á meé fó, e nèn tà wun e kintam. Á kfən tàm sá wír ámóʼó é vintam e wùn ghaŋ abaà, wù wáa dzə fo ntìntìn. 19Payler sáŋ kinyo kímóʼ kí, e fò, á bárír é kintam ke vé‑eè taan Jesus sho, a kí dzə̀ jii, «Jesus woó Naasarer, Fon wìr veé Juda.» 20Kirə́ʼ ke vé‑eè tamen Jesus sho kìn ki‑iì dzə̀ é ghaa ŋkàlaʼ Jerusalem. Wír veé Judàa wáa shaà fo anín, a yòŋ kinyo kee shooy, a vé‑eè sàŋ aáwuné Lǎm Hibru, e kfə̀n sàŋ e wír veé Romé làm, e sàŋ sá e wír veé Grikí làm. 21Vitú ve atàá cù vi nèn dù, e yèn Payler, e sùúy sho jii, «Bó à yòʼ kì yíi saŋ ji wìr və̀n dzə̀ Fon wìr veé Juda. Ku sàŋ jii, suuy wun woo Jesus ji wun dzə̀ á Fon wìr veé Juda.» 22Payler bìnèr jii, «Kinyo ke m saŋen kí kù sì ke m saŋen.»

23Mo vé rərí taan Jesus e kintam, e nèn lì ndzə̀y sə́, e jàv virə́ʼ vikweè mo áwune‑eè dzəə̀n. Kikúm kee fó yuv kí bér, a vé‑eè bà kee shooy kilàŋsìn, là sə́ʼ, e kèʼ fo yuv, e mèé fo ròŋ. 24#Nsùyrì Nyùy 22.18. Á nèn sùŋnín jii, «Lá vèsən yòʼ sàr. Vèsən wáa tsəm a dzə̀ kàŋ sho, a yen wír wo wù yíi yòv.» A kí‑iì kòóy bey ji kinyo ke vé‑eè saŋen é Ŋwàʼ Nyùy ki fiʼ ghèén. Vé‑eè sàŋ jii, «Vé‑eè lì ndzə̀y sém, e jàv, e lì kikúm kém, a tsəm kàŋ sho.» Ku nèn a dzə kíwun ke vé rər víyi‑iì yiìn.

25Jesus wáa ker e kintam bèy, a yè wov wùn fə̀r yè wov woo wiíy tíy fo ghaŋ, à vikìy ámóʼó sá abaà. Wùmòʼ‑oò dzə̀ Maria woo wiíy Kiliopar, wùmòʼ Maria wo yír rə́ yímóʼó dzəə̀n ji Magdalen. 26Wan lìm Jesus wo wù‑uù kòŋèn é ŋàŋ wáa tiy sa fo. Jesus yén, a wùn yè wov tíy fo ghaŋ, e yòŋ yè wov jii, «Yìy, wan wò sì və̀n», 27e kfə̀n sùúy e wan və lìm və̀y jii, «Yè won və̀ne.» Kèʼ fo ghan see shooy, wàn lìm və̀y nèn lì yìy à Jesus, wù wáa dzə e wùn laʼ.

Jesus kpú

(Matio 27.45‑56; Maak 15.33‑41; Luk 23.44‑49)

28 # Nsùyrì Nyùy 69.21; 22.15. Jesus suúy vinyo vìn, e màysì, a wù kiíy ne ji wun màysì ne vinyo və́ lèn a vidzə̀m, wù nèn lò, e sùúy jii, «Kilòŋ kí yúm mo.» A wù suuy bèy ji kinyo kee shooy ke vé‑eè saŋen é Ŋwàʼ Nyùy ki fiʼ ghèén. 29Mo kiŋkway ke melùʼ ki‑iì tíy fo ghaŋ, wìr nèn wày kùshá é melùʼ fèy, e sòv e kikàʼày, e tsə̀nsí, e neèr e shuù wo. 30Jesus nyoóŋé, e sùúy jii, «Vinyo vém vidzə̀m vi mày ne», e nèn màʼ kitú kfə́, e shèm.

Á sə́ʼə́r Jesus fo kintam

31Mo yì‑iì siìn kishiíy ke vé‑eè sí báʼti fó bvəəshí, e rəsí kishiíy ké bam, a bó kí yoʼ ghèén ji dzə́n wìri goʼ é kintam e kishiíy ké bam, bo taaka mo kishiíy ké bam ke vé‑eè báʼti kìn ki‑iì dzəə̀n ke kuʼùn kí, vé wòŋe nèn dù, e yèn Payler, e lòn ji wù ku sùúy, aá bvə́ʼtí á shwín sé wìr vìy, aá fíʼ kpùkír cér, aá shaʼar dzə́n sí. 32Wù biímé, vé rərí nèn dù, e bvə̀ʼtí shwín sé wìr vee abaà ve vé‑eè tamen e Jesus ghaŋ vìy. 33Á lò ji á bvə́ʼti sa wó Jesus, e yèn, a wù kì kpù ne, á nèn màʼtì. 34Yii bèy, wùmòʼ woo ŋgaà rə̀r tsə́nsí kòŋ, e sòv nsaŋ Jesus sho, fəə́ mensə́ wùn à mendzə́v mè. 35Vinyo vìn vi nén a dzə ve fèrìn wír wo wù‑uù yenen mo ví kooyì. Wù suuy a dzə̀ kinyo ke ru kí, kiiy rú ji dzə̀ á kinyo ke ru kí, e nèn a fèr ji vèn fiʼ wày sá shilív e Jesus wùn. 36#Fəə 12.46; Kintaŋ 9.11‑12. A vinyo vee shooy vi‑iì kooy bèy ji vinyo ve vé‑eè saŋen é Ŋwàʼ Nyùy vi fiʼ ghèén. Vé‑eè sàŋ jii, «Bó á yòʼ wíy beʼ kighvə́r kfə́ kimòʼón gheéy.» 37#Sekariya 12.10. Á kfən sàŋ jii, «Wíri wíy a leéy wír woo shó, wo á sòvìn.»

Á dzəə́mé Jesus

(Matio 27.57‑61; Maak 15.42‑47; Luk 23.50‑56)

38Mo Jesus kpuun, wìr wo á yoŋ ji Joosev wùmòʼ, a dzə̀ wír woó ntèʼ yee Arimatia, nèn dù, e yèn Payler, a lon ji wù ku màʼtì, é wun shaʼar á dzə́n Jesus. A wun woo Joosev‑iì dzə̀ ŋgaà ŋgoo Jesus wùmòʼ, lir lìrìn, bìʼ fo wù‑uù fan vé wòŋe. Payler biímé, wù nèn dù ji wun shaʼàr dzə́n Jesus. 39Nikudemon wo wù‑uù loòn é ghan símóʼ sí vitsə́ʼ, e dù, e ghàn Jesus, nèn wìy sa fo, a wù kér kifú ke rəʼtìn kímóʼ kí, ke á yoŋ ji *mer wùn à ke á yoŋ ji *alo ki moo kilu mtaár bèy. 40Wùn Joosev nèn lì dzə́n Jesus, e ndzə̀m e wón ndzə̀yí wùn à kifú kiy ki, mo wír veé Judàa yii náŋsin dzə́n wìr, e bó a way e sày. 41Kiboó kímóʼ kí wáa dzə e ghaa kirə̀ʼ fo vé‑eè taan Jesus e kintam fèy, a vé‑eè bùʼ ne say yímóʼó é kilan e mvə̀m kiboò fóo fèy, a bó á yòʼ‑oò yiì ne wày wír sho. 42Mo vé‑eè sí báʼti kishiíy kév ké bam, a ghán sí báŋrín ne, á nèn dù, e wày dzə́n Jesus e sày foo fèy, bìʼ fo yí‑iì dzəə̀n fó mentsə̀m.

Currently Selected:

Joon 19: LNB

Highlight

Copy