Lim Aŋgàa Ntum Shúu Fù
Shúu Fù
Ŋwàʼ Lìm Aŋgàa Ntum Jesus və̀ne dzə̀ wúmóʼ woo ŋwàʼ wo Luk‑iì saŋen fo ŋkar rə Teefilor, a wú sə́ʼ a dzə̀ kimfèr kee kùm Jesus ke wun woo Luk‑iì saŋen é ŋwàʼ woo fó mbìy. Vən woo ŋwàʼa nén a fèr lèn a dzə̀ mo Kiyoy ke Ranén kí‑iì siiyin, a dànèr wír Jesus, á wáa sàmèr kinyo kfə́ virə́ʼ vidzə̀m, e kèʼ fo Jerusalem, e ghàn woŋ woo Juda e dzə̀m, e tùmsín e woó Samariàa, e bóo ghan woŋ sidzə̀m (1.8). Kí nén a dìn ji kinyo ke Kristu ke kí‑iì kèʼèn a dzə̀ fo wír veé Judàa kin ki dzə̀ á fo vitúm vi vidzə̀m. Ŋgaà saŋ kfə́n a tàʼ, e dìn ji kintatì ke Kristu ki yòʼ dzə̀ ke á wáa fàn ji dzə̀ kí màʼ sáʼ yeé wòŋ, mo vé‑eè rə́si tóy wír Kristu ji á taʼ, e màʼ sáʼ yeé *Rom. Wú kfə́n a dìn ji kinyo ke Kristu ki rúner a dzə̀ vinyo ve Nyùy‑iì sí din e wír veé Judàa e ghan sé mensàŋ me mvə mè.
A dzə̀ á jàv ŋwàʼ və̀n vilíŋ vitaár ve ví din mo kinyo kee kùm Jesus ki‑iì kèʼèn, a sàmèr e virə̀ʼ. (1) Mo kintatì ke wìr Jesus ki‑iì kèʼèn é Jerusalem e ghan se wù‑uù koʼon é yuv; (2) mo kí‑iì sàmèrìn é wòŋ símóʼ sí e mbìv Palestan; (3) mo kí‑iì ràmèn, e dù e wòŋ seé ghaa rìbà ndzə̀v yee Mediteranean, e mèé e Rom. (Leéy kirə́ʼ ke kí din woŋ si fó bǎm ŋwàʼ.)
Tím kinyò keé ŋwàʼ fène dzə̀ vinyo ve Kiyoy ke Ranén kí‑iì yii. Wù‑uù wìy, e nə̀ə́ aàŋgàa biimeé meliv é kishiíy ké *Pentikor, e fò áwune vitaáví, á wáa fìʼtì kinyo ke Jesus, wíri wáa biimé. Wù wáa dànèr wír veé kintatì adzə̀m, kintatì ki wáa kuy, a tav. Kisúŋnìn ke *aŋgàa ntum Jesus ki dzə̀ é ŋwàʼ fèn virə́ʼ virə́ʼ, a kí din mo áwune tóʼti kinyo ke Nyùy e wíri, aá kiiy wír wo dzəə̀n Jesus. A ŋwàʼ və̀ne kfə̀n din mo kinyo ke Nyùy ki‑iì lim aàŋgàa biimeé meliv, aá koŋnìn, kér liì a dzə̀ wo wìr Nyùy.
Vilíŋ ve ŋwàʼ
Mbaʼtì aŋgàa fìʼtì 1.1‑26
a. Ntir Jesus kinjòʼsìbàm wùn à ŋkàʼmé 1.1‑14
b. Njìlaʼ Judar 1.15‑26
Á fiʼtì Jesus e Jerusalem 2.1–8.3
Á fiʼtì Jesus e wòŋ woo Juda wùn á woo Samariàa 8.4–12.25
Lim Por 13.1–28.31
a. Ghán Por mbìyi 3.1–14.28
b. Dzəʼə̀m yeé Jerusalem 15.1‑35
c. Ghán Por yee baà 15.36–18.22
d. Ghán Por yee taár 18.23–21.16
e. Kinyo ke Por woo ŋgaà sháŋ 21.17–28.31
Currently Selected:
Lim Aŋgàa Ntum Shúu Fù: LNB
Highlight
Share
Copy
Want to have your highlights saved across all your devices? Sign up or sign in
© 2022 CABTAL