Lim Aŋgàa Ntum 1

1Teefilor, fo ŋwàʼ wo mò‑oò saŋen e wò fo mbìy, mò‑oò fèr vinyo vidzə̀m ve Jesus‑eè yii, kfə̀n yéʼey wíri shó, e kèʼ fo ghan se wù‑uù kèʼèn lim rə́, 2e meé e ghan se wù‑uù koʼon é yuv. Bo wù wáa koʼ e yuv, wù‑uù beè Kiyoy ke Ranén kí, e tìr aŋgàa ntum və́ ve wù‑uù shoʼtin. 3Wù‑uù lo yiì, áwune kiíy là méŋnín ji wun dzə̀ rú á sho e tin, bìʼ fo wù‑uù fəən fó kpu, e dzə̀ʼtì e nsay kishiíy mkweè, a dìn kitú kfə́ aáwune akàŋ anín, a fèr kinyo kee kùm sáʼ Nyùy.

4Wùn áwune wáa dzə bèy, wù nèn fò nsər aáwune jii, «Vèn wíy siiy, lá vèn yòʼ lò fo Jerusalem. Vèn wáa shìy ŋkàʼme Nyùy Tàr wo mò‑oò suuyin e vèn. 5A wù dzə̀ jii, mo Joon‑eè wáy wíri é ndzəv, bèr ne vishiíy vishàr, é Nyùy wáy ven a dzə̀ e Kiyoy ke Ranén kí kiwo.»

Jesus kóʼ é yuv

6Wùn à Jesus kfən lòo dzə, á dzə́r shó jii, «Tàr, à sí wìy siìr vifon ve wìr veé Isray e ghan fen à?» 7Wù bìnèr jii, «Tàr wor sìysì ne fo wùn vitaáví ghán se kinyo kee shooy ki wíy koóy, e kfə̀n sìysì fìʼ, a bó yòʼ dzə̀ kirə́ʼ kén fóo kiíy. 8Ke vèn wáa kiíy ki dzə̀ jii, Kiyoy ke Ranén kí wíy wìy fo vèn, é wù fó ven vitaáví, é vèn wáa fìʼtì mo m dzəə̀n. A vèn wíy a fìʼtì e Jerusalem, e kfə̀n a fìʼtì woŋ wìr veé Juda e dzə̀m, a fìʼtì sa e wòŋ *Samaria, e dù, e meé fo nsay jòʼsìn.» 9Wù suúy bey, Nyùy ku nèn lì wun e yuv, aáwune yéné. Wù kóʼ, e làynìn e mvə̀m mbàʼ. 10Áwune ku nèn a tiy, a kiy yúv fo wù kóʼó, e lòo sìn, a wíri tíy aáwuné ghaŋ abaà, aá máʼ ndzə̀y se fəvír sí. 11Á yòŋ jii, «Wír veé Galeli vìn, vèn tíy, kíy ka fó yuv? Jesus və̀n wo wù màʼtìn ven lán, e kòʼ é yuv kù wíy kfən réŋréŋ mo vèn yenen, a wù kóʼó.»

Njìlaʼ Judar

12Aŋgàa ntum Jesus vìyi nèn lò fo Gwan Vicì vé Oliv foo fèy, a kfən e Jerusalem, a ntàm dzə̀ moo kintoʼnìn ke may bèy. 13Á wìy, e nə̀ə́ e lav, e nèn tòsín, e kòʼ e yee fó yuv fo áwune‑eè bee. A vé‑eè dzə̀ jii, Pita, Joon, Jeem wùn Andru, Filiv wùn Tomar, Batolome wùn Matio, Jeem woo wan Afiyur, à Simon wo vé‑eè yoŋ ji ntom wòŋ, wùn à Judar woo wan Jeem. 14Áwune ku nèn a baʼtí fo wùn à vikìy ve vé‑eè jumrì sa Jesuse, à Maria woo yìy à Jesus, aàfə́r Jesuse, a bùnrì amòʼón.

15Wìy lòo dzə e kishiíy kímóʼ kí, wír Jesuse báʼtí kishóv mbaà é wiì. Pita nèn nànèn, a suúy jii, 16-17«Afə̀r vem, kinyo ke Ŋwàʼ Nyùyi‑iì suuyin kí kù‑uù wíy gheén. A dzə̀ kinyo ke Kiyoy ke Ranén kí‑iì yiìn, Fòn Davir tóʼ fó ghan kùm Judar wo yì‑iì dzəə̀n ŋgaà ŋgoo wòsən, a vèsən áwune yii lim e mòʼón, bo wù kfən lò, e shèm mbìy ji á koó Jesus.» 18Pita wáa suúy bèy, a Judar‑iì yiì joonè və́ vəy, e sə̀ mbàm sə́ sé menàŋ, e yùn kirə́ʼ shó, a dzə̀ fo wù‑uù gbuùn tsə̀ə́tsəŋ, bvə́me waám, vitó vi fəə́ vidzə̀m. 19Wír veé Jerusalem adzə̀me yú, e nèn a yòŋ kirə́ʼ kee shooy aáwuné làm ji Akedama, a dzə̀ ji súm mensəə. 20#Nsùyrì Nyùy 69.25. Pita kfə́n a suúy jii, «Ke Fòn Davir‑iì saŋen é Ŋwàʼ Nsùyrì Nyùy Nyùy ki dzə̀ jii:

« ‹Lav rə kú a tiy e vifə̀m,

é la wìr yòʼ a shiíy sho.›

Wù kfən sàŋ jii:

‹Wìr wùmòʼ kér fó lì kirə́ʼ kfə́ ké lìm.›

21-22Mo kí dzəə̀n ben, bo wìr wùmòʼ kù kér fó kfə̀n tatí vèsən, aá wáa fìʼtì mo Tàr wòsən Jesus fəən fó kpu. A ŋgaàŋ kù kér fó a dzə wír fo vèsən ve vé‑eè ghán wùn à Jesus, e kèʼ fo ghan se Joon‑eè wáy wíri é ndzəv, e meé e ghan se Nyùy‑iì səən wun woo Jesus fo vèsən, wù kóʼ é yuv.»

23Á nèn shù wír abaà, wùmòʼ Joosev wo vé‑eè yoŋ ji Basabar, kfə̀n yoŋ sa ji Justur, wùmòʼ Matiar. 24Á nèn a bùnrì, a suúy jii, «Tàr, kù kì wò melív me wìr dzə̀m. Ku dìn wír wo à shoʼon 25ji wáa dzə ŋgaà ntum Jesus, é wù li kirə́ʼ ké lìm ke Judar‑iì leʼen, e màʼtì, e dù fo wù duùn.» 26Á bùnrì bèy, e shwèŋ, kí koó Matiar. Á nèn wày wun aàŋgàa ntum Jesus vee nshòv mòʼón e ghvə̀mé ŋgoo.

Currently Selected:

Lim Aŋgàa Ntum 1: LNB

Highlight

Copy