Joon 12

Maria yóʼ Jesus e Betani

1Kishiíy kí wìy lòo ber ntuùfú, é bo Ŋkǎʼ Yáʼayshaà və̀yi wáa dzə, Jesus nèn wìy sa, e dù, a dzə e ntèʼ yee Betani fo Laasaror wo wù‑uù fəərin fó kpu və̀y‑iì dzə́. 2Mo wù wìyìn, á jàŋrì wíri, á wìy, wùn áwune wáa yikír. Laasaror wáa dzə sa fo, a yikír wùn à Jesus, a Maata jav kfə́ vifá ve yi. 3Maria yiì lò, e lì biʼ ye juŋ yímóʼó kiyóʼóy kifur, aá fér e *nard, a yí lùm e mbàm e ŋàŋ, e wìy, e bòr e Jesus wuù, e gvə̀ʼə́r kitú, a səŋrí e nə́ŋ sə́ sí. Lav nèn bìnkìr, a shàŋ shàŋèn e dzə̀m.

4Judar Iskariyor woo wan lìm Jesus wùmòʼ‑oò dzə̀ sá fo, a dzə̀ wun wo wù‑uù wíy lò, e kar menàŋ me Jesus. Wù nèn sàyín jii, 5«Káv bìʼ rə̀ne dzə̀ moo vilaʼày vé wìr veé kiya kifur,#12.5: Lám Griki kér jii: danari ghii taár. Danari mòʼón‑eè dzə̀ vilaʼày vé ŋgaà lìm veé kishiíy. bo á kì yíi fiìnè, e jàv mbàm e vé ŋgeʼe.» 6A bó Judar yòʼ suuy bèy ji wun rə́r a mendzən me vé ŋgeʼe. Wù‑uù dzə̀ shóŋ, a leey wun fo wùn à Jesus kibàm ke lèm, shóŋri, baʼ shuu və́ shó. 7Jesus suúy shó jii, «Màʼtì Maria. Wù yii kin, a wù náŋsin mo náŋsín, é bo kishiíy ke á wíy dzəə̀mè mo kí wìy a gheén. 8Vèn à vé ŋgeʼe wíy siíy, a dzə ghán sidzə̀m, a bó vèsən yòʼ wíy a dzə.»

9Wíri yú aneénín ji Jesus wìy a ne, e nèn fəə̀ a dù e Betani ji á yén wun, e kfə̀n yèn sáa Laasaror wo wù‑uù fəərin fó kpu və̀y. 10Vitú ve atàá cù vi yén bey, e nèn wày wáyín ji á ku yùyrí saa Laasaror, 11bìʼ fo wír aníne‑eè yuun kinyo ke Jesus yiìn e Laasaror, e nèn a nyeŋ áwune nyéŋén, a yu kinyo a dzə̀ ké Jesus.

Wíri ndzə́ʼ Jesus ji Fon wov

12Màŋgòŋ wo wù‑uù baʼtin é Jerusalem nyanyày fo Ŋkǎʼ Yáʼayshaà nèn bvəə̀shí, e yù ji Jesus waà sí wiyì. 13#Nsùyrì Nyùy 118.25‑26. Á nèn keèmè, a dù ji á səə́si wun, a ker viyáŋ e wo, a ndzəʼ jii, «Fon wor èy, Fon wor èy, Nyùy Tàr ku səə̀vì wír wo wù wiy e wùn yir. Dzə̀ Fon wìr veé Isray.» 14Jesus kóʼ é kitu ke wàn kimbèʼbìy, a wìy réŋréŋ mo vé‑eè yiìn ne sàŋ é Ŋwàʼ Nyùy jii:

15 # Sekariya 9.9. «Ven vee wír veé *Sion, lá vèn yòʼ a fàn.

Vèn yén mo Fòn won wiyì.

Wù kòʼ a dzə̀ wan kimbèʼbìy.»

16Wón lìm Jesuse yén kinyo kìn, e làa yòʼ a gwàrìr kinyo ke vé‑eè saŋen kiy. Wìy lòo dzə fo bàm, a Nyùy lí ne Jesus e yuv, bo kí wiy aáwuné vifii ji vé‑eè sàŋ kinyo kee shooy a dzə̀ bìʼ Jesus, kí ku kòóy a mo vé‑eè saŋen.

17-18Kinyo ke kí‑iì yiìn, bo màŋgòŋ keeme ji á du, e səəsí Jesus ki dzə̀ bìʼ fo vé‑eè yuun kiŋgaʼnìn ke kinyò ke wù‑uù yiìn, e yòŋ Laasaror fo say, wù fəə́ fó kpu. A vé‑eè yù, bìʼ fo màŋgòŋ wo wù‑uù dzəə̀n wùn à Jesus e ghan see shooy‑iì rə́si fer kinyo kee shooy. 19Wír veé mbìv *Farasii nèn a kfə̀ynìn jii, «Kinyo kìn ki shaà ne vitaáví vesən. Vèn yén ri mo woŋe loòn ne e dzə̀m, a gbù a dzə̀ é wùn wó.»

Vitúm vi wíy, a tàʼ Jesus

20Wír ámóʼó wáa dzə sa ve vé‑eè koʼon fó kiŋkàʼ keé Jerusalem kìn ji á bunrì Nyùy, a vé‑eè wìy fó vitum veé Grik. 21Áwune wìy, e tàʼ Filiv wo dzəə̀n wír woó Besayda, a dzə̀ ntèʼ é mbìv wòŋ yeé Galeli. Á yén, e sùúy sho jii, «Taàtá, vèr taʼ ji á yén Jesus.» 22Filiv nèn dù, e bì Andru, wùn wun dù, e sùúy e Jesus. 23Jesus suúy aáwune jii, «Á lèn wo Nyùy sí yiì bùʼ ŋgaà wo yírí dzəə̀n *Wanwìr e vikuʼùy ve ghaʼán ví. 24Vèn wáa kiíy rúrú jii, a ŋgoòy kifa dzə̀ là fóo nəə́ e nsay, e kpu, bo kù dzə̀ yì jòʼsì sí e mòʼón. Yì nəə e nsay, kpú, bo kitiír kí wìy sìíy, e fò yìmòʼ yee ŋgoòy e nín. 25A wìr lò a dzə ji wun kù bávti dzəʼə̀m rə́, bo wù wíy ran ranén. Wìr maʼay dzəʼə̀m rə́, bo wù bávti bàvtín, e wìy nəə́ sho a dzə̀ é dzə̀ʼə̀m yee là may. 26A wìr taʼ ji wun wáa dzə wán wom lìm, wù kù a ghan vèr wun. M lóo dzə fo m dzə́, é kú a dzə vèr wun. Wìr wáa lìm fo mò, bo Tàr wor wíy bùʼ ŋgaàŋ.»

Jesus fiʼ mo wù wíy kpu, e màʼ sáʼ yeé ndzə fèn

27Jesus kfə́n a suúy jii, «Ghán sin si dzə̀ lèn, a shilív shí sí búʼ mo búʼún. Mo shí búʼ bèn, a dzə̀ m wàa lon fo Tàr wor ji wù ku tèér ŋgeʼ ye m sí nəə sho rə̀n a? Bó yòʼ dzə̀ m wàa lon, bìʼ fo mò‑oò wìyìn a dzə̀ bìʼ kee shoon.» 28Wù nèn yòŋ jii, «Tàr, ku yiì, é wíri wáa ghvəm a dzə̀ yír yé.» Jì Nyùy nèn sùŋnín fo yuv jii, «M yiì ne, á wáa ghvəm, a m kfə̀n wíy yiì.»

29Wír ve vé‑eè tíy fo ghaŋe yú kév, ámóʼó wáa suúy ji báykir a kishèv. Aámóʼó suuy ji kì súŋnin a nshìylav Nyùy sho. 30Jesus suúy e wír vìyi jii, «Jì yee shoon sùŋnín fo yuv ben ji wáa dzə kisəəm fo vèn, bó yòʼ dzə̀ fo mò. 31Á lèn wo wír veé ndzə fène yíi lì lòn, aá baʼ Fon wo wù sáʼ ndzə yee shoon fo kàvàʼ. 32A kém kí dzə̀ jii, á wíy koʼór mo é kici, wíri yéné, é m nèn sə̀ŋrì wir dzə̀m e mǒ wùn.» 33A wù‑uù suuy kin ji wun fiʼ dìn kfə́ə kpu ye wù‑uù wíy kpu.

34Màŋgòŋ nèn a suúy sho jii, «Vèr kì kér fó Ŋwàʼ Nyùy ji *Mfə̀ə́r wo Nyùy‑iì kàʼàn wíy a dzə sho ghán sidzə̀m. À kfə́n a suúy ji á wíy koʼór ŋgaà wo yírí dzəə̀n *Wanwìr e kici moó le? À yoŋ wír və̀n a dzə̀ la?» 35Jesus bìnèr jii, «Wìr wo wù fó rán dzə̀ vèn áwune lèn, a bó wù yòʼ dzəə́ yiì dzə̀ʼtì ntàmda. Vèn wáa ghan ghán yén, aá dzəə́ yén rán yee shooy, fo ndzə yiì sàsìn, e sə̀n ven. Yì yíi sən, é la wìr yòʼ dzəə kìíy fo wù du. 36Mo ŋgaà ran və̀n dzə̀ə́ vèn áwune, vèn wáy shilív é wùn wó, e fíʼ a ker rán yee shooy.»

Wìr wo wù ŋwáy jí se Jesus li a dzə̀ lòn

Jesus fèr vinyo vìn e wíri vidzə̀m, e nèn màʼtì áwune, e dù, e lìr. 37Wíri siíy, e làa yòʼ fə̀m biimé kinyo kfə́, a wù‑uù sí ghán aáwuné mvəm, yii vinyo vinín ve ví din vitaáví vé Nyùy. 38#Aysaya 53.1 (Grik). A kí‑iì kòóy bey ji kinyo ke Aysaya woo ŋgaà ntum Nyùy‑iì saŋen kí fiʼ ghèén. Wù‑uù sàŋ jii:

«Nyùy Tàr, wìr dzə̀ shó wo wù biimen ntum ye vèr tiísi a?

Wìr dzə̀ shó wo wù yenen vitaáví vé Nyùy Tàr, e səə̀m a?»

39A bó yòʼ‑oò dzə̀ wír vìyi biìmé, bìʼ fo Aysaya kfə̀n‑eè sàŋ sá jii:

40 # Aysaya 6.10 (Grik). «Nyùy sə̀tí ne sí yév,

e yiì, melív mev mè lúr,

fo sí yéví wáa yen vinyo,

é melív mev mè səəm ke kí dzəə̀n,

aá kfə́n fo Nyùy, é wù fer áwune.»

41Aysaya wáa yòŋ kinyo kìn a dzə̀ kùm Jesus, bìʼ fo wù‑uù lo yèn Jesus e mvə̀m vikùʼùy ve dzəə̀n vé Nyùy.

42Mo wíri fə̀m‑eè méŋ Jesus, ámóʼó ku yòʼ a way shilív é wùn wó, à vé wòŋ ámóʼó anín. Yii bèy, a bó yòʼ‑oò dzə̀ wìr wàa dìn e ŋgèŋgèr, bìʼ fo vé‑eè fan wír veé mbìv *Farasi, kfə̀n fan fo á jum áwune fó kintatì keé ŋgày se bùnrì. 43A vé‑eè fan bèy, bìʼ fo á koŋ búrí a dzə̀ yé wíri, nèn laysìn búrí ye dzə̀ wàa burí Nyùy.

44Jesus kfən lò, e waàmé jii, «Wìr wo wù wáy shilív e mǒ wùn, yòʼ wáy a dzə̀ e mǒ wùn. Wù wáy a dzə̀ e ŋgaà wo wù tumen mó wùn. 45Wìr wáa yén mo, bo wù yén sa a dzə̀ wír wo wù tumen mo. 46M wìy e ndzə fèn ji m fíʼ a dzə rán, é la wìr wo wù wáy shilív e mǒ wùn yòʼ dzə́ə a ghan fo mesənér. 47Wìr wáa dzə wo wù yú kinyo kém, wáŋ waŋén, bo bó yòʼ wíy saʼ mo ŋgaàŋ. M yòʼ wìy e ndzə fèn ji m wáy wíri a dzə̀ é lòn, m wìy kém ji m luŋer wíri lúŋerin. 48Wìr wo wù méŋ mo, káy kinyo ke m fiʼtì, sí kér kinyo ke kí wíy saʼ wun e kishiíy ke á wíy a tinén nsaʼ se wìr dzə̀m, a kù dzə̀ jí see shooy se m fiʼtì. 49Bó m yòʼ fiʼtì kinyo ji fiʼtì mo. M kù fiʼtì kinyo a dzə̀ ke Tàr wor wo wù tumen mo tiisin ji m wáa fìʼtì. 50A m kì ji ntum ye wù tumen mo shó rə̀n dzə̀ ye yì fó dzəʼə̀m yee là may. M nén a fìʼtì kinyo ke m fiʼtì kidzə̀m a dzə̀ kíwun ke Tàr wor tumen mo shó.»

Currently Selected:

Joon 12: LNB

Highlight

Copy