Joon 13

Jesus sú wuú won və́ lìm

1Kishiíy ke á kì bvəə́shi, a yi *Ŋkǎʼ Yáʼayshaà ki nèn ghèén, a Jesus kiíy ne ji sì á ghán se wun sí yìi màʼtì ndzə rə̀n, e kfən fo Tàr wóv wùn. Mo wù kù‑uù sí koŋ wír ve yiì dzəə̀n və́ é ndzə fèn, wù ku nèn a kòŋ bèy, e dù, e mày. 2Yiì lòo dzə e ŋkuùr wùn áwune yiì dzə̀ʼə̀m, a yikír, a Satan kì ŋàʼár ne shilív shé Judar Iskariyor wo dzəə̀n wan Simon ji wù wáy Jesus aàŋgaà və́ vibàné wo. 3Jesus wáa dzə, a wù kì kijuŋ ji Tàr wov wày ne vinyo vidzə̀m a dzə̀ e wùn kiwo, a wun‑eè lò fo Nyùy, a wun sí kfə́n a dzə̀ fó, 4wù nèn lò fo kitu ke vifa ve yi, e shòʼ kikúm kfə́, e lì ndzə̀y se á yii sə́ʼsi wún shó, e sìŋ, 5e baà mendzə́v é kighin, e kèʼ, a sù wuú won və́ lìm sho. Wù su, wù sə̀ʼsí e ndzə̀y se wù kì siŋen siy si.

6Wù dù, e mèé fo Simon Pita wùn, wù nèn dzə̀r shó jii, «Tàr, a dzə̀ wàa sù wò wuú yém a?» 7Jesus bìnèr jii, «Bó yòʼ dzə̀ à kìíy kinyo ke m yii lèn kìn. Aà wíy kiíy a dzə̀ é ghan sé bàm sí.» 8Pita ku nèn a shaʼnín jii, «Bó yòʼ dzə̀ féyì, à sù wuú yém.» Jesus suúy jii, «Aà dzə̀ là fó biimé ji m su wò, bo bó yòʼ dzə̀ à wàa dzə wír wom.» 9Simon Pita nèn biìmé lèn jii, «A sì bey, bo à kù su sa sí yém wùn à wó yémé. Bó yòʼ dzə̀ à sù a dzə̀ wuú cáʼcáʼ.» 10Jesus bìnèr jii, «Wìr wo wù suùn ne wún, wún vəə́ sì e ránén e dzə̀m. A wù lò lèn, wù sù a dzə̀ kiwuú. Kú a kiíy jii, vèn sì aránén, yii bèy, a bó á yoʼ ràn adzə̀m.» 11A wù suuy ji bó á yoʼ ràn adzə̀m, bìʼ fo wù kiìn wír wo wù‑uù yíi way wun aàŋgaà və́ vibàné wo.

12Wù yiì sù wuú yév, e màysì, e nèn màʼ ndzə̀y sə́, e kfə̀n dzə̀ʼə̀m fo nsay, a suúy aáwune jii, «Vèn kì mo m yiìn ben, a kí dzə̀ á?» 13Vèn yoŋ mo ji Tàr, kfə̀n yoŋ ji Ŋgaà Yèʼéy, a vèn yoŋ réŋ. Dzə̀ rú mo m dzəə̀n. 14Mo m loòn, a m dzə̀ Tàr won, e kfə̀n a dzə Ŋgaà Yèʼéy won, e sù wuú yén, bo dzə̀ sá mo vèn kú a yiì, é wìr wáa sù kiwuú ké wùmòʼ. 15Kinyo ke m yiìn kin ki nén a dzə mfìʼ ye vèn wáa yiì sa mo m yiìn. 16Vèn wáa kiíy rúrú jii, bó wan lìm yòʼ dzə̀ wù shaà tàr wov lìm. A bó yòʼ dzə̀ wír wo á tumen túmén shaà sá wír wo wù tumen wun. 17Mo vèn kiiyin ne kinyo kìn lèn, a vèn lò, a yiì, é vèn wáa yu vijuŋ.

18 # Nsùyrì Nyùy 41.9. «Mo m suuy vinyo vìn bèn, bó m yòʼ suuy e wìr dzə̀m. M kì wír ve m shoʼon ji vém, a m kfə̀n kì ji kinyo ke vé‑eè saŋen é Ŋwàʼ Nyùy ki kér fó wìy gheén. Vé‑eè sàŋ jii, ‹Vèr wìr kì yíkir kighín kimòʼón, wù kfən lò, e shòʼ e mǒ bàm.› 19M nén a suúy kinyo kìn e vèn lèn bèn, é bo kí yiì a koóy. Kí yií kooyì, é vèn fiʼ biìmé ji dzə̀ rú mo wo dzəə̀n mo.#13.19: Leéy sá: 8.24. 20A m suuy e vèn rúrú jii, wìr wo wù səə́si wír wo tumen mo, ŋgaàŋ səə́si a dzə̀ mo və̀n. Wìr wáa səəsí mo, bo wù səə́si a dzə̀ ŋgaàŋ wo wù tumen mo.»

Jesus tóʼ ŋgaà və menàŋ

(Matio 26.20‑25; Maak 14.17‑21; Luk 22.21‑23)

21Mo Jesus suuyin vinyo vìn, shilív sə́ shí lùm, wù nèn tòʼ lèn kiránén jii, «Vèn wáa kiíy rúrú jii, kù dzə̀ wír fo vèn vin wo wù yíi way mo áàŋgaà vém vibàné wo.» 22Wón və́ lìme nèn a leeynín sí, a meŋnín wír woo shó wo wù suuyì. 23Aá kì dzə́ bèy, a wùmòʼ woo wan lìm wo Jesus‑eè koŋ e ŋàŋ, kì dzə̀ʼə̀m, e yèʼém e Jesus wùn. 24Simon Pita nèn lò, e kwàr woo shooy, e sùúy jii, wù dzə́r shó a ji wù sà yoŋ a dzə̀ la á? 25Wù nèn bìnèr shuu, e dzə̀r jii, «Tàr, à suuy wír və̀n a dzə̀ la?» 26Jesus bìnèr jii, «Wír wo m yíi sə̀ʼ nshèv é kiban, e fo sho, dzə̀ ŋgaàŋ.» Wù nèn sə̀ʼ, e fò a dzə̀ e Judar wo dzəə̀n wan Simon Iskariyor. 27Mo Judar səən kibán kìy, Satan ku nèn nə̀ə́ e wùn shiliv. Jesus suúy e Judar jii, «Dù ri cér, e yiì kinyo ke à kér fó yiì ki.» 28Wón lìm Jesus ve wùn áwune kì yíkirìi yú bey, e làa yòʼ a kiíy mo wù suuy e Judar bèy, a kí dzə̀. 29Mo kù‑uù kér Judar kibam kév ké lèm, ámóʼó nèn a kwàʼtì jii, Jesus suuy bèy a dzə̀ á ji Judar du, e yùn vifá ve wùn áwune yíi yi kiŋkàʼ shó, kìn wù suuy a ji wù koóy kifá, e fò e vé ŋgeʼe. 30A Judar kì sə̀ ne kibán kìy bèy, e kù nèn fəə̀ fəə́n, a dù, a yì‑iì sì vitsə́ʼ.

Jesus tír kpú e wón vəə́

31Mo Judar fəən, Jesus nèn sìíy, a suúy jii, «Á lèn wo á yíi yen vikuʼùy vé ŋgaà wo yírí dzəə̀n *Wanwìr. Wíri lóo yen, aá wáa yen vikuʼùy a dzə̀ vé Nyùy. 32Mo vikuʼùy vé Nyùy vi yíi a yensín e Wanwìr və̀n wùn, é wun woo Nyùy nèn a dìn sa vé Wanwìr vee vikuʼùy, e làa yòʼ siʼsíʼ.» 33Jesus nèn kfə̀n yòŋ jii, «Wónen, bó m yòʼ dzəə́ yìi dzə̀ʼtì vèsən shinín. Vèn wíy siíy, a tàʼ mo, e làa yòʼ yen. A kù dzə̀ kíwun ke mò‑oò suuy e vé wòŋe ji bó yòʼ dzə̀ á wìy fo m du. 34M nén a fo ven lèn a dzə̀ nsər ye fíy jii, vèn siiy, á wàa kòŋnìn, é wìr wáa kòŋ fə́r və réŋréŋ sá mo m kòŋèn ven. 35Vèn lóo kòŋnìn bèy, é wír adzə̀me nèn yèn rú ji vèn dzə̀ wír vém.»

Jesus tóʼ ji Pita yíi meŋ wun

(Matio 26.31‑35; Maak 14.27‑31; Luk 22.31‑34)

36Simon Pita nèn sàyín jii, «Tàr, à du a dzə̀ feé?» Jesus bìnèr jii, «M du e kirə̀ʼ, a bó yòʼ dzə̀ à wìy fó lèn. À wíy siíy, e jùmrì mo a dzə̀ é ghan sé bàm sí.» 37Pita nèn kfə̀n dzə̀r jii, «Tàr, yiì ka fo wòsò wáa dù lèn? A fə̀m dzə̀ kpú, bo m dzə̀ kibáʼtín fó kpu, áà luŋ.» 38Jesus nèn dzə̀r shó jii, «A dzə̀ à kpù rú fo mò a? Kú a kiíy rúrú jii, bo kiyuú ki yiì a toŋ, aà méŋ ne akàŋ ataár ji bó à yòʼ kì á mo.»

Currently Selected:

Joon 13: LNB

Highlight

Copy