Kèʼlo 30

1Mo Racel kiiyin ji bó yòʼ dzə̀ wun dzə̀ə́ á wán, e nèn a bàn jemèr rə, e sùúy e Jakov jii, «Fó bvə́me e mò cér fo m kpú.»

2Kinyo kìn ki shwiíy kilòŋ ké Jakov, wù suúy jii, «À kwaʼ ji m dzə̀ Nyùy à? Yiì wun ji lá à yòʼ dzə̀ə́.»

3Racel nèn bìnèr jii, «Bilha woo wánlè wiíy wo wù lim fo mò və̀ne, ku lì, é vèn wun shiíy, é wù fiʼ dzə̀ə́ wón e mǒ yir, ji m fíʼ a ker kfəə́, e shaà fo wun.» 4Wù suúy bey, e nèn fò Bilha e Jakov ji wíiy və, wùn wun shiíy. 5Bilha bóŋ bvəm wùn Jakov, e fùm wán lumèn. 6Mo wù fùmèn bey, Racel suúy jii, «Nyùy tàr ne, e yèn ji m dzə̀ á tìítiy, e kfə̀n yù tóŋ yém, e nèn fò mo wán lumèn.» Bìʼ bey, wù nèn shù yír wan ji Dan#30.6: Dan: E Lǎm Hibru, yír rə́ne koó fo kisuŋnìn moo kinyo kee jii, «tínén nsaʼ.». 7Bilha kfən bòŋ bvəm, e dzə̀ə́ wan Jakov wùmòʼ woo lumèn. 8Racel suúy jii, «M tsə̀y ne kóy vèr jèmèr yem, e ghàʼ wun.» Wù nèn shù yír wan ji Navtali#30.8: Navtali: E Lǎm Hibru, yír rə́ne koó fo kisuŋnìn moo jí yee «funèn.».

9Mo Lea yenen ji bó yòʼ dzə̀ wun dzəə dzə̀ə́, wù lí Silpa woo wánlè wiíy wo wù lim fo wun, e fò e Jakov ji wíiy və. 10Silpa bóŋ bvəm wùn Jakov, e nèn fùm wán lumèn. 11Lea suúy jii, «Á vishí ve juŋ vi a, e nèn shù yír wan ji Gad#30.11: Gad: Nsàv yìr rən dzə̀ ji «vishí ve juŋ vi.».» 12Silpa kfən bòŋ bvəm wùn Jakov, e dzə̀ə́ wán lumèn. 13Lea nèn sùúy jii, «M shéʼri feyì, vikìy wíy a yòŋ mo ji ŋgaà kisheʼrì. Wù nèn shù yír wan ji Asher#30.13: Asher: Nsàv yìr rən dzə̀ ji «kishéʼrì.».»

14Wáa dzə e ghan se vé‑eè tín sáŋ ye dzəə̀n *wit, Ruben dù, e yèn kifú ke bór ki é kwaʼ, e tìn, e wìy fò e yè wov Lea. Racel nèn sùúy e Lea jii, «Kii wò, ku fò mo kifú ke bór ki ke wan wò wìyìn shó.»

15Lea bìnèr jii, «À sə̀ lúm wom, la kí yòʼ ghèén wò à? À kfə̀n sí taʼ e sə kifú ke bór ki ke wan wom wìyìn shó à?»

Racel bìnèr jii, «Aà lòo dzə, e fò mo kifú ke bór ke wan wò wìyìn shó, áà yiì shìíy vèn Jakov vitsə́ʼ vé lán vi.»

16Jakov wáa wìy fó kwaʼ e ŋkuùr foo fèy, Lea fəə́, e dù, e yèn wun, e sùúy sho jii, «À kér fó shiíy e mò vitsə́ʼ vé lán vi, bìʼ fo m kì yunen ne wò e kifú ke bór ki ke wan wom kì wìyìn shó.» Wù suúy bey, wùn wun nèn shìíy vitsə́ʼ vee shooy. 17Nyùy yú bunrì Lea, wù bóŋ bvəm wùn Jakov, e dzə̀ə́ wán lumèn wo wù meen ji tàn. 18Lea suúy jii, «Nyùy laàmé ne mo, bìʼ fo mò‑oò foon wán wom lìm e lum wom ji wiíy.» Wù nèn shù yír wan ji Issakar#30.18: Issakar: E Lǎm Hibru, yír rə́ne koó fo kisuŋnìn moo jí yee «vilaámé.». 19Lea kfən tìím bvəm, e dzə̀ə́ wán lumèn wo wù meen ji ntuùfú. 20Á bèy, Lea suúy jii, «Nyùy bùʼ ne mo e mbùʼmé wo juŋ. Lum wom yíi a ghvəm mo lèn, bìʼ fo m dzəən ne wón və́ vee vilum ntuùfú.» Wù nèn shù yír wan ji Sebulun#30.20: Sebulun: E Lǎm Hibru, yír rə́ne koó fo kisuŋnìn moo jí yee «mbùʼmé.». 21Wáa dzə fo bàm, wù dzəə́ wán woo wiíy, e shù yír ji Dina.

22Nyùy nèn lò, e shàm mendzən me Racel, e yù bunrì rə́, e mvə̀ʼ kidzəə́y kfə́. 23Wù bóŋ bvəm, e fùm wán lumèn, e nèn sùúy jii, «Nyùy tsə̀ʼ ne liy fo mǒ wùn.» 24Wù nèn shù yír ji Joosev#30.24: Joosev: E Lǎm Hibru, yír rə́ne koó fo kisuŋnìn moo kinyo kee jii, «á dzəsi.», e sùúy jii, «Nyùy Tàr ku dzə̀sì mo wùmòʼ woo wán lumèn.»

Jakov wùn Laban yií nsìysì

25Mo Racel dzəən Joosev bèy, Jakov nèn sùúy e Laban jii, «Màʼtì mo, é m wáa kfən e bàm fó laʼ, e věr wòŋ. 26Fó ri vikìy vémé wùn à wón vémé e mò, é m wáa dù. M lìm ne fo wò bìʼ áwune, aà kì sá mo m lìmèn kijuŋ.»

27Yii bèy, Laban suúy e wun jii, «Aà fen yèn koŋ ye m kér fo wò, à gòʼ, é wòsò wáa dzə. M shwèŋ ne, kí dín ji Nyùy Tàr səə̀vì ne mo bìʼ wò. 28Yòŋ mo vilaʼày vé vi dzəə̀n, é m fó.»

29Jakov bìnèr jii, «Wówò kitú ké, à kì mo m lìmèn ne fo wò, kfə̀n kìíy mo nyám sé si kùʼùn ne e mǒ kiwo. 30Mò‑oò wiy, aà kér nyám si shishàr, lèn, a sí sì nyanyày. Nyùy Tàr səə̀vì ne wò, e səə̀vì virə́ʼ vidzə̀m ve mò‑oò leey nyám sé fo. A m gòʼ, a lìm fo wò lèn, bo m yíi a leéy sa fo kfə́ə yémé é ghàn ka?»

31Laban dzə́r shó jii, «Vilaʼày vé vi dzə̀ é le?»

Jakov bìnèr jii, «M yòʼ taʼ vilaʼày. M yíi a yiír nyám sé, a leéy fo fo, aà ben yiì kinyo ke m suuyì. 32Màʼtì, é m nəə́ e wò mvə̀m ŋgoo bvəy, e fə̀tí bvə́y se njiì se sí kér vishom ve sənér ví sidzə̀m, à wón njiì ve sənérí wùn à bvə́y se loŋ se sí kér vishom ve fəvír ví, kìn vishom vímóʼ ví, bo sì vilaʼày vém bey. 33Wíy lóo dzə e ghan se sí wiyì, à lóo tàr vilaʼày vém, áà nèn yèn suuyrú wom. Aà wìy yèn bvəy loŋ ye yì yòʼ kér kishom ke fəvír kí, kìn keé le, à wàn njiì wo wù yòʼ sə́né, bo m shòŋ shóŋén.»

34Laban bìnèr jii, «M biìmé, kí kú a dzə mo à suuyin.» 35Yii bèy, wáa dzə e kishiíy fóo fèy, Laban tàr vibév wùn à bvə́y se sí kér vishom ve fəvír ví, à wón njiì ve sənérí adzə̀m, e nèn fò e wón vəə́ ji á wáa leéy a fo fo. 36Wùn à wóné nèn lèʼér bvə́y sìy fo Jakov, e bàr wún, e dù sho ntàmda, ye a dzə̀ wìr ghàn moo vishiíy vitaár bèy, e bóo meé fo. Jakov nèn sìíy, a leéy kibér.

37Jakov nèn lò kfə́, e tàʼ tám se vici ve á yii yuvì, ví wàa fər fərín fó mvəm, e nèn yùv e viliŋ viliŋ, sí wáa shòmkìr shòmkìn. Vicí vin vi‑iì dzə̀ vé *popar, *almon wùn à *plen. 38Wù lo, wù wàa lì tám se vici se wù yùvìn siy, a way e ndzəv ye bvə́y si‑iì nó mendzə́v fó fo, sí wiy, lóo no mendzə́v, sí wàa yen. Mo bvə́y si‑iì wiy ji sí nó mendzə́v, sí wàa koonín, 39lóo koonín, lóo yen vicí ve yuuvìn viy, bo wón ve sí dzəə adzə̀me yíi a ker vishom. 40Jakov‑iì lo, wù fə̀tí viyìy vé bvəy fo Laban mvə̀m bvəy. Vibév vi lóo koo viyìy vé bvəy vìn, wù nèn bìnèr, sí wàa leéy sé Laban se sí kér vishom wùn à se sənér sí ji sə́ sí lóo dzəə́, é wóné wáa ker a vishom. Mo wù‑uù yii bèy, bvə́y sə́ sí nèn a kùʼ, wù nèn tòʼnín fo sé Laban si.

41Kfə́n lóo dzə e ghan se vibév vi koó viyìy vé bvəy ve tavkín ví, wù nèn neèr tám se vici se yuuvìn siy e bvə́y sí si, e ndzəv ye sí yii nó mendzə́v fó fo, ji sí lóo koonín, é sí wáa yen. 42Yii bèy, lóo dzə bvə́y se sí yòʼ kér vitaáví, la wù yòʼ dzəə neèr. Á bèy, bvə́y se sí yòʼ kér vitaáví sí nèn a dzə sé Laban, se tavkín sí nèn a dzə sə́. 43Jakov ku nèn a kùʼ, a kùʼ, a ker káv e ŋàŋ. Wù‑uù kér ŋgoo se bvəy, kér nyám se á yoŋ ji akamer wùn à vimbèʼbìy ví, à wónlě vikìy wùn à vee vilum ve á lim fo wune.

Currently Selected:

Kèʼlo 30: LNB

Highlight

Copy