Kèʼlo 31

Jakov wùn à kfə́ə rəə́ nyéŋ fo Laban laʼ

1Jakov nèn lò, e yù mo wón Laban vee vilume suuy ji wun yòv a ne vifá ve tàr wov vidzə̀m, a vikuʼùy və́ ví lò a dzə̀ á fo tàr wov. 2Wù kfən yèn sá ji liì Laban kùvsín a ne, a wù yòʼ dzəə́ koŋ a wun mo wù‑uù koŋ fo mbìy. 3Nyùy Tàr nèn lò, e sùúy e Jakov jii, «Kfə́n é bàm áàtàr vée wòŋ fo afə́r vée dzəə̀n, é m yiì a dzə wòsò.»

4Jakov nèn tsə̀nsí ntum e Racel wùn Lea ji á wiy, e yèn á wun e kwaʼ fo wun dzə́ wùn à nyám si. 5Á wìy, wù suúy aáwune jii, «M yén ji tàr won yòʼ dzəə́ koŋ mo mo wù‑uù koŋ fo mbìy. Yii bèy, Nyùy wo tàr wor ghvə́mé kù dzə̀ vèr wun ghán sidzə̀m, e shem lèn. 6Ven vee abaà víne kì ji m lìm ne fo tàr won vitaáví vém vidzə̀m, 7wù shwív mo, e fàr vilaʼày vém akàŋ anín. Yii bèy, Nyùy yòʼ‑oò lo biìmé ji wù wáy á mo é kilày. 8A wù‑uù lóo dzə, e sùúy ji vilaʼày vém ví dzə̀ á bvə́y se ŋwaʼkìn sí, bo sí kù dzəə wón, aá ŋwaʼkìr ŋwàʼkìn. Wù suúy ji se sí kér nshòm si dzə̀ vilaʼày vém, bo sí kù sí dzəə wón a dzə̀ ve á shomkìr shòmkìn. 9Á mo Nyùy‑iì yiìn, e bóo sə nyám se tàr won, e fo a dzə̀ e mò.

10«Wáa dzə e kishiíy kímóʼ kí, e ghan se nyám si‑iì koóninè, njèm shí mo, m yén, a vibév ve ví koó bvə́y si ví dzə̀ ve ŋwaʼkìn ví, a vímóʼ ví shomkìrì. 11Nshìylav Nyùy yòŋ mo é yir, é njèm fèy ji ‹Jakov,› m biímé jii, ‹Mo və̀ne.› 12Yì suúy jii, ‹Leéy, e yèn, vibév vidzə̀m ve ví koó bvə́y si ví ŋwaʼkìrì, a vímóʼ ví shomkìrì. M yii kin bèn, bìʼ fo m yenen ne kinyo kidzə̀m ke Laban yii e wò. 13M dzə̀ Nyùy#31.13: Leéy kirə́ʼ ké naàrì keé 22.12. wo wù‑uù bvəyin e wò si e Betel fo wò‑oò sə̀rìn meŋgvə́r é tiy ye wò‑oò tuuyin fó, e kfə̀n yiì kilìʼ wòsò. Lǒ yuv lèn fo fèn, a kfən e bàm e věn wòŋ fo vé‑eè dzəən wò.› »

14Racel wùn Lea suúy e Jakov jii, «Tàr wor yòʼ dzəə́ kér vitsə́ʼ ve a dzə̀ vèr wìy yì. 15Wù lì ne ver moo vitúm bèy. Wù‑uù fiìnè ne ver. Lèn, a wù lí ne káv wo wò‑oò nəən ver shó, e yì. 16Káv e dzə̀m wo Nyùy səən fo tàr worí dzə̀ rú wó vèr à wón vérí. Ku yiì kinyo ke Nyùy suuyin ji à yii kí.»

17Jakov nèn lò e yuv, e dzə̀ʼə̀r wón və́ wùn à vikìy vəə́ e nyám see akamer sí ndzə̀m, 18e lì dzə́ə, a tsəəné nyám sə́ sidzə̀m, à kifá kfə́ kí kidzə̀m ke wù‑uù kooyin é Paddan‑Aram, a kfən sho e wòŋ Kanan fo tàr wov Aysi‑iì dzəə̀n. 19Bo wù wáa lò bèy, a Laban ki dù ne e kwaʼ bvəy, e dù, a sheèsì wuy se njiì, Racel nèn sìíy, e kùúy *mebvə̀m me tàr wov fó lav, a dzə̀ anyùy veé laʼ. 20Jakov wáa dù bèy, a wù kì bòʼtí ne Laban woo wír woó Aram və̀n, e lò là súŋnín. 21Wù wáa nyeŋ wùn à kifá kidzə̀m ke wù‑uù kér ki, e tùm ndzə́v ye á yoŋ ji Yufret, e nèn a dù e dzəə̀ Gilead, woŋ woo agwan agwan.

Laban júm Jakov, e kòóy

22Vishiíy ví‑iì shaà vitaár, é bo Laban yú ji Jakov nyèŋ á ne. 23Wù lì afə́r və́ wùn à wóné, á wáa jùm Jakov. Á jùm e bǎm kishiíy saàmbà, e nèn kòóy aàgwan veé Gilead. 24Yii bèy, lòo dzə̀ vitsə́ʼə́, Nyùy suúy e Laban woo wír woó Aram və̀n e njèm jii, «Á yen fó suúy kinyo, e bemér Jakov sho.» 25Mo Laban kooyin Jakov aàgwan veé Gilead bèy, a Jakov kì tùy ne vibàn və́, Laban wùn aàfə́r vəə́ nèn tùy sá vév fó.

26Laban dù, e yèn Jakov, e dzə̀r shó jii, «À shwìv mo, e tàyrí wón vém, a leʼ sho moo wír ve á koorin a dzə̀ fó kwaʼ rər ben bìʼ ka? 27Wò‑oò bòʼtí mo, a nyeŋ là súŋnín bìʼ ka? A wò‑oò sùúy e mò, bo mò‑oò yíi tsəəné wò e kishéʼrì ki, aá wáa yòv luŋ, a kùm nshùm wùn à lúŋé. 28Wò‑oò yíi fo mo kilíŋ, é m baámé wón vém wùn à wón woné, é bo à wáa lò. Kee shooy ki dzə̀ kiyúŋ ké kinyò mo wò‑oò yiìn. 29M kér vitaáví vée yiì kinyo ke bi kí e vèn. Yii bèy, Nyùy‑ii súŋnín e mò é njèm, wun woo Nyùy wo tàr won ghvə́mé. Wù‑uu suúy e mo jii, ‹Á yen fóo suúy kinyo e Jakov, kìn dzə̀ ke juŋ ki, kìn dzə̀ ke bi kí.› 30Nyùy‑ii suuy bèy, a m kì ji wò‑oò lo, bìʼ fo wò‑oò yár jíŋ fó a kfən bàm e věn laʼ. Yii bèy, wò‑oò kùúy anyùy vee mǒ laʼ ji ka?»

31Jakov bìnèr e Laban jii, «Mò‑oò lo bèy, bìʼ fo mò‑oò fanè, e nèn a kwàʼtì ji dzə̀ à faàsì á wón vé vee vikìy fo mò. 32Kee kùm anyùy, aà yèn anyùy vé e wìr fèn, bo á kù yíi yuyrí ŋgaàŋ. Aà yèn kifá ke m kérí, ke dzəə̀n ké, à lì, áàfə́r vesən víne wáa tiy vinjen.» A Jakov suuy bèy, a bó wù yòʼ kì ji vé‑eè lóo lò bèy, Racel kuúy á anyùy tàr wov.

33Laban nèn nə̀ə́ e Jakov kibàn, a tàʼ anyùy və́ fó fo, e fəə̀ fó fo, e nə̀ə́ e Lea kibàn, e fəə̀ fó fo, e nə̀ə́ e wón vee vikìy ve vé‑eè lim fo vikǐy Jakoví kibàn, e tàʼ virə́ʼ vin vidzə̀m, e làa yòʼ yen. Mo wù tàʼàn virə́ʼ viy vidzə̀m, e nèn nə̀ə́ e Racel kibàn. 34A Racel‑iì lì mebvə̀m me anyùy vìy, e wày é kibàm ke kí yii kér e wǔn kidzə̀ʼmè ké nyàm, e nèn dzə̀ʼə̀m e kitu wo, e sə̀tí. Laban mùmrì virə́ʼ vidzə̀m e kibàn fóo fèy, e làa yòʼ yen anyùy və́. 35Racel suúy e tàr wov jii, «Lá tàr wor yòʼ a yu nyár ji m yoʼ lò e yuv ji m din á ghvə́m e wun, bìʼ fo m dzə́ bèn, a m yén ghán sém.» Laban tàʼ bèy, e làa yòʼ yen anyùy vìy.

36Jakov ku nèn shwìíy kilòŋ, e wàmrí Laban, e sùúy sho jii, «M jày ka? Kinyo ke bi ke m yiìn e wò ki dzə̀ ka, é bo à wáa jùmrì mo ji à siir. 37Mo à tàrìn vifá vém vidzə̀m, ké ke à yenen fó ki dzə̀ ka. Wìy shó, áàfə́r vé wùn à vémé yén, e bóo kiíy ji sà suuy wò rú, mo suuy mo á. 38Fo viya vee mbaà ve m lìmèn fo wò, njiì wò wùn à bvə́y se loŋ si yòʼ‑oò ló a kàr, a bó m yòʼ‑oò lo kfə̀r kiyáʼ fo wò ŋgoo se bvəy. 39Nyàm kwaʼ‑aà yúyri bvə́y, la m yòʼ lì kimkpú, e wìy sho ji à yén, m lì yéem ye tin ji ŋkùvtu, e nə̀ə́ e kilày. Wò‑oò wày ké ji á shóŋ nyám e shùy, kìn vitsə́ʼə́, bo m kù fó a ŋkùvtu. 40Ghán sinín e shùy, lume‑eè fó mo ŋgeʼ e ŋàŋ. Lóo dzə vitsə́ʼə́, kidzə́r kí wàa ketí mo kétín, la m yòʼ kèr ŋgay mbuùné. 41Dzə̀ mo kí kù‑uù dzəə̀n bey, fo kiya kee mbaà ke m dzə̀ʼə̀mèn wòsò. Mò‑oò lìm fo wò kiyá nshòv sikweè e ghvə̀m ji m keérí wón vé vee abaà ji vikìy vém, e kfə̀n lèéy fo nyám sé si viyá vímóʼ ví ntuùfú, leey bèy, aà kúvsin vilaʼày vém ghán sidzə̀m. 42Yii bèy, Nyùy‑iì ló a leéy fo mò, wun woo Nyùy Abraham, a dzə̀ wun woo shó wo tàr wor Aysi ghvə́mé. A là bey, bo wò‑oò yíi tsəəné mo e wóo e yúmér. Nyùy‑iì ló a yen ŋgeʼ sém wùn à lim ye mò‑oò túŋée, e bóo yen ji jày á wò, e nèn sìíy, a saʼ wò vitsə́ʼ vin.»

Jakov wùn Laban yií kilìʼ

43Laban bìnèr e Jakov jii, «Vikìy víne dzə̀ wón vém, a wón véví dzə̀ wón vém, a fə̀m dzə̀ nyám sìn sidzə̀m, bo kù dzə̀ sém, a kifá kidzə̀m ke vèn yén fèn ki dzə̀ kém. A dzə̀ m yèe kém lèn, é bo wón vém wùn à wón woné goʼ e mò? 44Wòsò ku gwàr a dzə̀ *mensaŋ, é mè wìy a kuumé wòsò kinyo ke á biimen shó.»

45Jakov nèn lì tíy, e tùúy ji kisəəm ke á wíy a kuumé mensaŋ me wùn Laban gwàrìn shó. 46Jakov suúy áàfə́r vəə́ jii, «Vèn táyrí tíy sí.» Á nèn tàyrí, e bàʼtí e kikfər. Wìr dzə̀m nèn yìkír e ghaŋ wo, vé Jakov wùn à vé Labane. 47Laban yòŋ kikfə́r ke tiy kiy aáwuné làm jii, Jegar‑Sahadulta#31.47: Jegar‑Sahadulta: Nsàv yìr rən dzə̀ é Lǎm wìr veé Arame jii, «kikfə́r ke kí wíy a kuumé vèsən.» A kù dzə̀ nsàv yee shó e mòʼón fo yir yee Galeed e Lǎm Hibru., yii bèy, Jakov yòŋ kfə́ aáwuné làm ji Galeed. 48Laban suúy e Jakov jii, «Kikfə́r ke tiy kin ki dzə̀ fó wìy a kuumé wòsò nsàv ye á yoŋ fó ji Galeed.» 49Á kinyo ke á yoŋ fó ji Galeed bèy. Laban kfən sùúy jii, «Mo wòsò sí javsìnè, Nyùy kù yíi a sàyrì kinyo ke à yii, e kfə̀n a sàyrì sa ke m yii.» Á nen kfə̀n yòŋ sa kirə́ʼ kee shooy ji Mispa#31.49: Mispa: E Lǎm Hibru, yír rə́ne koó fo kisuŋnìn moo kinyo kee jii, «kirə́ʼ ké ŋkiy.». 50Laban dzə̀sì jii, «Aà lòo dzə, a nə̀ʼsì wón vém, kìn à kòóy a dzə̀ vikìy ámóʼó, e bàtír áwune shó, m fə́m a dzə, e làa yòʼ a kiíy, à wàa kuumé ji Nyùy tíy a vinjen vesò.»

51Laban kfən sùúy e Jakov jii, «Kikfə́r ke tiy kí kìne, e wòsò ntìntìn mo á baʼtin wùn à tíy ye á tuuyin ji á wìy a kuumé mensaŋ me wòsò gwàrìn. 52Kikfə́r ke tiy kin wùn à tíy ye á tuuyin rə́ne dzə̀ ji yí wìy a kuumé wòsò ji bó m yòʼ wíy yaʼáy, e shaà, e yiì a kinyo ke bi kí e wò, a bó à yòʼ wíy yaʼáy, e shaà, e yiì saa kinyo ke bi kí e mò. 53Nyùy wo Abraham wùn Nahor‑iì ghvə́mé, wo dzəə̀n sá wo tàr wov‑iì ghvə́mé, kù yíi tàr vinyo vesò, e tinén.» Á bèy, Jakov kàn yír Nyùy wo tàr wov Aysi ghvə́mé, e lìʼ. 54Wù nèn seè nyám, e cù Nyùy sho e gwan foo fèy, e jàŋ Laban wùn aàfə́r vev wune adzə̀m ji á wàá wiy, e yìkír. Áwune yíkír bey, e nèn shìíy e gwan foo fèy.

55Ndzə bvəə́shí, e jàv, Laban lò e yuv, e dù, e baàmé wón və́, e baàmé wón won, e shàʼtì áwune ji á bèr á ne, e nèn lò, wùn aàfə́r vəə́ wáa kfən e bàm fó laʼ.

Currently Selected:

Kèʼlo 31: LNB

Highlight

Copy