Kèʼlo 29

Jakov meé e Laban laʼ

1Jakov ku nèn lò, a dù e mbìv vitum ve ví dzəə̀n é mbìv wòŋ yee fo shùy yii tó. 2Wù lòo meé fo, e màʼ sí, e yèn ndzə́v ye tuŋéné é kwaʼ, e yèn ŋgoo se bvəy sitaár, a sí néŋ e ghaŋ wo, bìʼ fo dzəə̀n fo vé‑eè noorì, aá sə́tí ne shúu ndzəv e màkìlan. 3Lóo dzə e ghan se á baʼtin bvə́y si fó sidzə̀m, anshìyi nèn dòm kilán, e tsə̀ʼ fo shùu ndzəv, e nòór. Á maysì, á nèn dòm, e siìr fo.

4Mo Jakov yenen anshìy bèy, e nèn dzə̀r aáwune jii, «Afə̀r vem, vèn lò a dzə̀ fó feé?»

Á bìnèr jii, «Vèr lò fo Haran.»

5Wù nèn kfə̀n dzə̀r jii, «Vèn kì Laban woo wan wàn Nahor a?»

Á bìnèr ji «Vèr kì wun.»

6Wù nèn kfə̀n dzə̀r jii, «Wù dzə̀ kitávín á?»

Á bìnèr jii, «Wù dzə̀ kitávín. Leéy, Racel woo wán və və̀ne mo wù wiy wùn à bvə́y si.»

7Wù yòŋ jii, «Vèn leéy, lèn dzə̀ə́ e shùy, a bó yòʼ sì ghán se á yii báʼti bvə́y si, wáy e kày. Vèn noór, e lì, e dù sho e kwaʼ, a yiír.»

8Áwune bìnèr jii, «Bó yòʼ dzə̀ vèr nòór bvə́y si, a bó sí báʼtí sidzə̀m, vèr tsə́ʼ kilán fo shùu ndzəv.»

9Kù mo wù súŋnin wùn áwune bey, Racel nèn wìy wùn à bvə́y se tàr wov sí, bìʼ fo yì‑iì leey wun fo fo. 10Mo Jakov yenen Racel woo wan Laban woo lúmer yè wov wùn à bvə́y se wun woo Laban si, e nèn dù, e tsə̀ʼ kilán fo shùu ndzəv, e nòór nyám se Laban. 11Kí‑iì bòŋ wun e ŋàŋ mo wù yenen Racel. Wù baámé, e dìy, 12e sùúy sho ji wun dzə̀ á wan Rebeka woo jemèr tàr wov. Racel nyéŋ, e nèn dù, e bì tàr wov shó.

13Mo Laban yuun sáʼka Jakov woo wan jèmèr rə, e nèn nyèŋ, e dù, e yèn wun, e kòytí, e baàmé, e nèn lì, e dù sho e wun laʼ. Jakov fèr kinyo kidzə̀m ke kí‑iì kooyin wun e Laban. 14Laban yuúrí, e sùúy sho jii, «Rúrú, à dzə̀ mensə́ mem, à dzə̀ kibar kém ké wùn.» Jakov nèn dzə̀ʼə̀m wùn Laban ŋwee fur.

Jakov lìm fo Laban, e kòóy vikìy

15Laban yiì lò, e sùúy sho jii, «Kí yoʼ ghèén ji à wáa lìm fo mò kisáŋ ji bìʼ fo à dzəə̀n mensə́ mem. Suúy e mò mo vilaʼày vé vi yíi a dzə.» 16Laban‑eè kér wón vee vikìy abaà, a yír woo ŋgàywìri dzə̀ ji Lea, a yé wo terií dzə̀ Racel. 17Lea‑aà tò sí,#29.17: Nsàv seé Lǎm Hibru si yòʼ dzə̀ siránén fen. yii bèy, a Racel‑iì bòŋ féyì e mbom, e kfə̀n bòŋ e nshòm.

18Jakov wáa kòŋ Racel feyì, e sùúy e Laban jii, «M yíi lìm fo wò kiyá saàmbà, é vilaʼày vém ví wáa dzə Racel woo wan wò wo terí.»

19Laban bìnèr jii, «Kí bòŋ ji m fó wun e wò, e shaà fo m fó e wìr wo sən. Kú a dzə wòsò.» 20Jakov lìm kiyá saàmbà ji wun keérí Racel ji wiíy. Viyá vìn vi shaà cércér mo dzə̀ á vishiíy vishàr bèy, bìʼ fo wù‑uù koŋ Racel e ŋàŋ.

21Jakov nèn sùúy e Laban jii, «Fó ri wiíy wom, é m wáy é lav, bìʼ fo m màysìn ne lim yém.» 22Laban nèn bàʼtí wír veé kiliŋ foo fèy adzə̀m, e kù nèn yiì ŋkǎʼ vijin. 23Yii bèy, wáa dzə vitsə́ʼə́, wù nèn lì a dzə̀ wán və woo Lea, e dù, e fò e Jakov, wùn wun shiíy. 24A Laban kì lì ne sa wánlè wiíy wùmòʼ wo wù‑uù lim fo wun, aá yoŋ ji Silpa, e fò e Lea ji və́ə woo wánlè lìm. 25Ndzə bvəə́shí, e ràn, Jakov yén, a kì dzə̀ Lea wo wùn wun kì shiiyin, e nèn dzə̀r e Laban jii, «À mùm kin e mò a dzə̀ ka? Bó m yòʼ‑oò lim fo wò ji à fó a dzə̀ Racel e mò a? À bóʼtí mo ben ji ka?»

26Laban bìnèr jii, «Yòʼ dzə̀ liì wor wòŋ ji á li wan bàm, e fò e lum, a wo mbìy dzə̀ə́ e lav. 27Ku màysì ŋgàm kiŋkàʼ ke vijin vèn Lea, é vèr fó Racel sa e wò, aà fen biìmé ji à kfə̀n‑éè lim fo mò viyá vímóʼ ví saàmbà.»

28Jakov biímé, e màysì ŋgàm kiŋkàʼ ke vijin vé wùn Lea yee shooy. Laban nèn kfə̀n fò Racel sho ji wíiy və wùmòʼ. 29A wù‑uù lì ne Bilha woo wánlè wiíy wo wù‑uù lim fo wun, e fò e Racel ji və́ə woo wánlè lìm. 30Á bèy, Jakov nèn shìíy sa e Racel, a wù‑uù koŋ Racel e shaà Lea, e nèn kfə̀n lìm fo Laban viyá vímóʼ ví saàmbà.

Kfə́ə Jakov

31 Nyùy Tàr yén ji Jakov yòʼ koŋ a Lea moo Racel, e nèn mvə̀ʼ kidzəə́y ké Lea, Racel wáa dzə kfə́ kár. 32Lea bóŋ bvəm, e fùm wán lumèn, e nèn shù yír ji Ruben#29.32: Ruben: E Lǎm Hibru, yír rə́ne koó fo kisuŋnìn moo kinyo kee jii, «Yén wán lumèn.», a wù shu bèy, suuy jii, «Nyùy Tàr yèn ne ŋgeʼ sém, a lum wom sí yiì a kòŋ mo lèn.» 33Wù kfən tìím bvəm, e dzə̀ə́ wán lumèn, e sùúy jii, «Nyùy Tàr kfə̀n fò ne mo wán lumèn, bìʼ fo wù yenen ne ji lum wom yòʼ koŋ a mo.» Wù suúy bey, e nèn shù yír ji Simeon#29.33: Simeon: E Lǎm Hibru, yír rə́ne koó fo kisuŋnìn moo jí yee «yú.». 34Wù nèn kfə̀n tìím bvəm, e dzə̀ə́ wán lumèn, e sùúy jii, «Kin ki‑íì tátí vèr lum wom lèn, bìʼ fo m dzəən ne wón və́ ataár, vilum vilum.» Wù suúy bey, e nèn shù yír ji Levi#29.34: Levi: E Lǎm Hibru, yír rə́ne koó fo kisuŋnìn moo jí yee «tátí.». 35Wù nèn kfə̀n siì tìím bvəm, e dzə̀ə́ wán lumèn, e sùúy jii, «M yíi a burí Nyùy Tàr lèn.» Bìʼ bey, wù nèn shù yír ji Juda#29.35: Juda: E Lǎm Hibru, yír rə́ne koó fo kisuŋnìn moo jí yee «búrí.», e làa yòʼ dzə́ə dzəə́ e bǎm shintàm.

Currently Selected:

Kèʼlo 29: LNB

Highlight

Copy