Alukasɨ 18
18
Nɨgham nə Nanɨ mbɨ́ʼ a Nkfugɨ Mangye bo Tabyɛn
1Yeso a tíʼ ná nɨgham a mbó bɨyɛʼ ɨbyi taŋ ɨ diʼ a mbó bo ngə́ á bo ghɔŋ a mu atsaʼtɨ a Ŋwi tə́ mbɔ́rɨ́kə́ ghe. 2“A mu ntáʼmbagə tse, tabyɛn wu tse a tsí ɨwu, nkeʼ a Ŋwi a mbɔ́gɨ́tə́ nkeʼ a ŋwɔn tso azúm zə tse a ndzě ghe. 3Nkfugɨ mangye wu tse a tsí ɨwu a ntáʼmbagə məwa ngyíŋə́ a mbó tabyɛn wa ndɛ́gə́ ayi, ɨ sóŋə́ ngə́, ‹Kwatɨ nkwarɨ aghə a mbó ŋwɔn kɨban ɨghə!› 4A nye abaŋ zə sa, tabyɛn wa a tsí ayi nkeʼ a nkwə́gə́, lá ngɨ́ mbə soŋ a mbó atuəmbəm azhi ngə́, ‹Ma baʼtɨ nkaʼ a Ŋwi a mbɔ́gɨ́tə́ kə nkaʼ a ŋwɔn tso azúm zə tse a ndzě lá, 5lá mbɨ́ʼ ngɨ́ʼ za nkfugɨ mangye wen a yenə ngǎ ɨwən, ma mɨ zɛn ngə́ ma ghɨ a tsi nɨ anu za a nɨ adiʼ azhi a nchyɛ́ nɨ zɛrə ghe. Be ma tú lá ghɨ, a mɨ zhwɨ́gə́ yiŋə ɨ ghagɨnə aghan, ɨ lwɨgɨnɨ ghɔgɨsɨ aghə!›”
6Maʼmbyí a ghɛ́n nɨ mbyi ɨ soŋ ngə́, “Nɨ zuʼnə anu za tabyɛn wa a sé ngɨ̌ ɨnu tsa tsɨ tɛ́mnɨ́nɨ́ a ɨshi ɨmɨgɨ Ŋwi a sóŋnə́. 7Adzaŋ məwen, Ŋwi a mɨ keʼ sáʼ mbyigɨ a mbó ɨbɛn ɨbyi ba bɨ zhwɨ́gɨ́nə́ mbúgə́ akwatɨ a mbó zɨ nɨ njwi nɨ njwi le? A mɨ keʼ yaŋ ɨnye a nkwátɨ́ bo le? 8Ma soŋ a mbó bɨŋ ə, a mɨ waŋnɨ sáʼ ɨ byigɨ a bagɨ bɛrə ghe. Lá, a nkfu za Mɔn Ŋwɔn a ghɨnɨ yen, a ghɨ mɛrɨ zɛ́n ɨbɛn ba bɨ tsinɨ nɨ abeməntəm atuəshe wen le?”
Nɨgham nə Nanɨ mbɨ́ʼ a Ŋwɔn bə Farisao bo Nkwárɨ́ Ashɛbɨ ə
9Yeso a kwíʼ nkɨ́ ná nɨgham nen a mbó ɨbɛn ba bɨ kwáʼtɨ́nɨ́ ngə́ bo chínɨ́ a ɨshi ɨmɨgɨ Ŋwi ntiʼə ngwágɨ́nə́ a bə mɔʼɔ lá. 10“A bé nkfu tsɛrə ɨbɛn bi bɨbá bɨ kɔʼ ngɛn a ntsaʼtɨ Ŋwi a mu Ndáŋwi zɨ Ngwi ə: táʼ a bé ŋwɔn bə Farisao, wu mɔʼɔ a be nkwárɨ́ ashɛbɨ ə.
11Ŋwɔn bə Farisao wa a ghɛ́ntɨ́ ntɛ́m ntsaʼtɨ a Ŋwi ngə́, ‹Ma gha a mɨya a mbó gho, a Ŋwi, mbɨ́ʼ ngə́ ka ma be aghan tso ɨbɛn bə mɔʼɔ ba bo benɨ bəmyiɛnɨngám, ɨ sáʼə nɨ nkobɨ, mbe ngaŋ achwurɨ ə. Ma gha a mɨya mbɨ́ʼ ngə́ ka ma be aghan tso nkwárɨ́ ashɛbɨ yirɨ a bagɨ yirɨ ə. 12Ma chigɨ nji tsə ntsaʼtɨ Ŋwi nkfu tsi bá a mu ngabɨ, nkə́ ngyɛ́btɨ́ afuʼ azan ɨdiʼ tsi nɨghúm ngǎ a táʼ adiʼ a mbó gho ghe.›
13Nkwárɨ́ ashɛbɨ wa a tɛ́m nəghagɨ nchi keʼ tsɛʼ ɨshi ɨyi biʼtɨ a fɔməbvurə, ɨ nyɔŋ abó azhi a nɨgo zɨ a mu adzə́ŋnɨ ɨ soŋ ngə́, ‹Ŋwi, ko a mɨlɨŋnɨ ɨghə, ngaŋ ngɨ mɨbvu ə!› 14Yeso a sóŋ ngə́, ma sóŋə́ awɨŋ ə, ‹A nɨ nkwárɨ́ ashɛbɨ wa, nkeʼ be ŋwɔn bə Farisao wa be, mbáʼ a tɛmnɨnɨ a ɨshi ɨmɨgɨ Ŋwi a nyom wa a kwɛ́nɨ́ a ndá zɨə. Mbɨ́ʼ ngə́ ŋwɔn tsum wa a kɔ́ʼsɨ́nə́ atuəmbəm azhi, bɨ ghɨ shiʼsɨ ayi, á ŋwɔn tsum wa a shíʼsɨ́nə́ atuəmbəm azhi, bɨ ghɨ kɔ́ʼsɨ́ ayi ɛ.›”#18:14 Matyo 23:12; Alukasɨ 14:11
Yeso a Fɔgɨ Ɨbɔ bə Bɔrɨ ə
(Mat 19:13-15; Mar 10:13-16)
15Ɨbɛn bə tse yén nɨ ɨbɔ ɨba ngə́ á Yeso a nyɔŋ mbó ɨmyi atú bo ɨ fɔgɨ awa ghe. Bɨyɛʼ bɨ Yeso zɛ́n awa ngámtɨ́ awa mbɨ́ʼ anu məza, 16lá Yeso a tɔ́ŋ ɨbɔ ba ngə́ á bo yen a mbó zɨ, ɨ soŋ ngə́, “Nɨ nyɛʼtɨ ɨbɔ bə bɔrɨ á bɨ yen a mbó me, nɨ keʼ awa tsuʼnɨ, mbɨ́ʼ ngə́ Nɨfɔ nɨ Ŋwi tsi lá a mbó ɨbɛn ba bɨ finɨ awa ghe. 17A nɨ len atú bɨŋ ɨ shiʼnɨ ə! Ŋwɔn tsum wa a se Nɨfɔ nɨ Ŋwi kwarɨ tso mɔn wu mbɔrɨ, a láʼ keʼ ɨwu kuŋə.”
Ŋwɔn Afuʼ ə
(Mat 19:16-30; Mar 10:17-31)
18Atú a bə Yuda zə tse a bítɨ́ a Yeso ngə́, “Ndiʼ aŋwaʼnɨ wu shiʼnɨ, ma mɨ zagɨ ghɨ lá ɨ nə́ taŋ ɨ kwarɨ ntsi ntən nɨnkoŋ za le?”
19Yeso a bítɨ́ ayi ngə́, “O tɔŋ aghan nɨ wu shiʼnɨ lá ngə́ ke le? Ka ŋwɔn tse a bɔŋ ayi, a nɨ tsɛʼ Ŋwi zɨzɨ ə. 20O zhi ntɨgə tsa tsɨ soŋnɨ ngə́: ‹koʼ chwurə; koʼ a ŋwɔn zhwitə; koʼ ze; koʼ anu atú ŋwɔn chwe; diʼ mbɔm zɨ shiʼnɨ a mbó ta ɨgho bo nɨmi ɨgho ghe.›”
21Ŋwɔn wa a chwɨ́gɨ́ ngə́, “Lɔgɨnɨ mbáʼ ma bénɨ́ mánkɨ́ə, ma lě ntɨgə tsiŋ ɨtsum ə.”
22Mbáʼ Yeso a zúʼnɨ́ a məzen lá, ɨ soŋ wəmbo ngə́, “Táʼ anu a bvurɨ wa o tsinɨ nɨ ngɨə ghe. Fiŋ ɨdzúm ɨtso ɨtsum nga nkáb za o fenɨ ɨwu a mbó ɨfúm ə, o mɨ tiʼ tsi nɨ afuʼ azo a fɔməbvurə; ntiʼ ngyen ndzɔŋ aghə.” 23Lá mbáʼ ŋwɔn wa a zúʼnɨ́ a məzen lá, ndanɨ ndzəŋnɨ, mbɨ́ʼ ngə́ wɛrə a bé ŋwɔn nɨ afuʼ zə wi ə.
24Yeso a zɛ́n ngə́ ŋwɔn wa a dzə́ŋnɨ́, ɨ soŋ wəmbo ngə́, “A lanɨ ntən be tɨ́sə́n mbɔŋə á ŋwɔn afuʼ zə wi a kon a mu Nɨfɔ nɨ Ŋwi ə! 25A kwiʼ ntən tsɛʼ a nkan ngə́ á ŋwɔn afuʼ zə wi a kon a mu Nɨfɔ nɨ Ŋwi ntsa adzaŋ za be aŋaŋuʼə a tosɨ ntsa a mu ngvo ɨsáʼ ə.”
26Ɨbɛn ba bɨ zúʼnɨ́ a Yeso a gham, bɨ bítɨ́ ngə́, “Ɨloŋ lá a ghɨ lánɨ́ tiʼ dzɨ ɨwa le?”
27Yeso a chwɨ́gɨ́ ngə́, “Atsanɨ anu a mbó ŋwɔn a nɨ ayaŋnɨ anu a mbó Ŋwi ə.”
28Bita a tíʼ soŋ ngə́, “Ze! Bɨgɨ nyɛʼtɨ njwuʼ ɨtsɨgɨ ndzɔŋ agho ə.”
29Yeso a chwɨ́gɨ́ a mbó bo ngə́, “Eŋə! Tsɛʼ a nkənu ə, ŋwɔn tsum wa a nyɛʼtɨnɨ njwuʼ ɨzhi kə a ngwe ɨyi kə ɨbɔmbɨma ɨbyi kə a ta ɨyi bo nɨmi ɨyi kə ɨbɔ ɨbyi, mbɨ́ʼ Nɨfɔ nɨ Ŋwi 30a mɨ kwarɨ a zə ghaʼtɨnɨ a mu ntsi mbyi zen abɔʼnɨ ntsi ntən nɨnkoŋ a nye nkfu za ɨ ghɨnɨ yen lá.”
Yeso a kwiʼ mbə Mɨ Anu a Nɨvwo azhi Nkfu tsa tsɨ kuʼnɨ tsi Tárə́ ghe
(Mat 20:17-19; Mar 10:32-34)
31Yeso a shwúŋtɨ́ bɨyɛʼ ɨbyi ba nɨghúm ntsɔb bá a ngɔbə ɨ soŋ a mbó bo ngə́, “Nɨ zuʼ le! Bɨgɨnə ghěn a Yerosalɛm adiʼ wa anu atsum za ntóm Ŋwi ŋwáʼnɨ́nɨ́ mbɨ́ʼ a Mɔn Ŋwɔn a mɨ fu a nye nkənu ə. 32Bɨ mɨ gha ayi a mbó ba a se bə Yuda be, bɨ mɨ werɨ ayi, ɨ zɔm ayi, ɨ kɨ tsərɨ mɨtwe wə ɨnye ə. 33Bɨ mɨ ləŋ ayi nɨ ngwan, ɨ kɨ zhwitɨ ayi, lá a ndzum njwi tsi tárə́ a mɨ zhwemnɨ a mbó nɨvwo ə.”
34Lá bɨyɛʼ ba sé anu zɛnə zə tse zuʼ nkɨ nji; yentəzɔʼ mɨgham ma a lyɛmtɨ a ɨmɨgɨ bo, bo keʼ zhi anu za Yeso a kɨ́nə́ ngámə́ lá.
Yeso a Tsuʼ a Ndǒ ɨdzúm wa a Fɨ́gɨ́nə́
(Mat 20:29-34; Mar 10:46-52)
35Adzaŋ za Yeso a kɨ́nə́ fátə́ a Yeriko lá, ɨfɨgɨ zɨ tse shíʼtɨ́ ntsi a ngɔbɨ ndómnji, ndǒ ɨdzúm ə. 36Mbáʼ ɨ zúʼnɨ́ ɨnɔ ɨbɛn wa ɨ tsanə lá, a bítɨ́ ngə́, “Lá nɨ anu ake le?”
37Bɨ fɨ́ʼtɨ́ wəmbo ngə́, “Yeso ŋwɔn bə Nazarɛ a tsǎ ghe.”
38A tɔ́nkɨ́, ɨ soŋ ngə́, “Yeso! Mɔn Devidɨ! Ko a mɨlɨŋnɨ a nye me ghe!”
39Ɨbɛn ba bɨ tsínɨ́ a mbyi bɨ shə́gɨ́ wə ɨnye ɨ soŋ ngə́ á kyɛntə. Lá wɛrə a kwíʼ ntɔ́nkɨ́ ngɛn be nɨ mbyi ngə́, “Mɔn Devidɨ! Ko a mɨlɨŋnɨ a nye me ghe!”
40Yeso a tíʼ njwíʼnɨ́ ɨ soŋ ngə́ á bɨ yen nɨ ɨfɨgɨ za a mbó zɨə. Ɨfɨgɨ za yenə ɨ fátɨ́ ayi, Yeso a bitɨ ngə́, 41“O lǒ ngə́ á ma ghɨ anu ake a mbó gho le?” A chwɨ́gɨ́ ngə́, “Tə̧, ma lǒ ɨ bə zɛn ɨdiʼ, wədiʼ ə.”
42Yeso a sóŋ wəmbo ngə́, “Ze ɨdiʼ lá! Abeməntəm azo a tsuʼ agho.”
43A byí ntíʼə ndzě ɨdiʼ, ntiʼə ndzɔ́ŋə́ a Yeso, ngǎ a mɨya a mbó Ŋwi ə. Mbáʼ ɨnɔ wa zɛ́nɨ́ anu məzen lá, bo bɨtsum bóntɨ́ a Ŋwi ə.
Currently Selected:
Alukasɨ 18: MNT
Highlight
Share
Copy
Want to have your highlights saved across all your devices? Sign up or sign in
© 2023, CABTAL
