Alukasɨ 19

Yeso bo Sakyo ghe

1Yeso a kón a Yeriko ntsǎ ayi ɨ tsanə. 2Atú a bɨnkwárɨ́ ashɛbɨ zə tse a tsí ɨwu, ɨkum ɨyi be Sakyo mbáʼ a tsínɨ́ nɨ afuʼ tsɛʼ nkə. 3A kə́ ndǒ ndze ŋwɔn wa Yeso a bénɨ́ wɛrə, lá a vwúgɨ́ tɨ́sə́n nchi keʼ a Yeso zɛn mbɨ́ʼ ɨnɔ ɨbɛn wa ɨ nɔ́ŋnɨ́ adiʼ wa. 4A tíʼ nkɨə ngɛn a mbyi ɨnɔ ɨbɛn wa, nkɔʼ atú atɨ a saikamɔ taŋ ɨ zɛn a Yeso, mbɨ́ʼ ngə́ a tsí nɨ ɨ yen tsa a ndóm məwa. 5Mbáʼ Yeso a yénɨ́ nkuʼ adiʼ məwa lá, ndyiŋ atɨ́, ɨ soŋ a mbó Sakyo ngə́, “Waŋnɨ shiʼ a ɨshe, a Sakyo, mbɨ́ʼ ngə́ ma mɨ tsi bɔgə a ndá ɨgho ɨ sɨŋə ghe.”

6Sakyo a wáŋnɨ́ shíʼ, nkwarɨ a wɛrə nɨ nɨdorɨ nə wi ə. 7Ɨbɛn bɨtsum ba bɨ zɛ́nɨ́ anu məzen, chwúʼ ntíʼə nzhwúʼnə́ ngə́, “Ŋwɔn wen a bem ngə́ zɨə mɨ be ngən a njwuʼ ngaŋ ngɨ mɨbvu ə!”

8Sakyo a ló atɨ́ ɨ soŋ a mbó Maʼmbyí ngə́, “Zuʼə, a Tə̧! Ma mɨ buʼnɨ afuʼ azan ɨ gha a mbó ɨfúm, be a be ngə́ ma dzɨ nkobɨ a nye ŋwɔn tse, ma mɨ byigɨnɨ ayi nkfu tsi nɨkwa ghe.”

9Yeso a chwɨ́gɨ́ wəmbo ngə́, “Ɨloŋ ɨ yen a ndá wen ɨ sɨŋə mbɨ́ʼ ngə́ ŋwɔn wen a kɨ mbe ŋwɔn ɨlə̌ Abraʼm ə. 10Mɔn Ŋwɔn a yén atuəshe lá a ndǒ ɨ kɨ loŋ ɨbɛn ba bɨ fanɨ ndóm ə.”

Nɨgham nə Nanɨ mbɨ́ʼ Nkáb Ŋwaʼŋwaʼ ə

(Mat 25:14-30)

11Mbáʼ ɨbɛn ba kɨ́nə́ njwíʼtɨ́ ɨnu tsen lá, Yeso a ghɛ́n nɨ mbyi ɨ ná nɨgham a mbó bo ghe. A kɨ chinə fátɨ́ a nkúŋə́ a Yerosalɛm, bo tiʼ nkwaʼtɨ ngə́ Nɨfɔ nɨ Ŋwi na mɨ byi fu a ɨshe. 12Wɛrə a tíʼ sóŋ ngə́, “A bé a nkfu tsɛrə ŋwɔn wu ngwi tse a tsi ɨwu, ngěn a nɨghan alaʼ a sagə aghagɨ á bɨ ghɨ ayi ɨwu a nye ɨfɔ, a mɛtɨ ɨwu a bən nkwɛn a njwuʼ zɨə. 13Mbɔŋə a tɨ fuə, a tɔ́ŋ ngaŋ afaʼ ɨchi tsi nɨghúm nga awa bɨtsum nɨ nchwuʼ nɨghúm nɨghúm, ɨ soŋ a mbó bo ngə́, ‹A nɨ ntáŋə́ a mɨtan nɨ nkáb zen a nye nkfu zen za ma tsinɨ a nɨghan lá.› 14Lá ɨbɛn bɨ alaʼ ɨbyi bə̂ ayi, ntiʼ ntsagɨ bɨlo bɨ ntom wə ndzum ngə́ á bɨ ghɛn ntǒtɨ a ŋwɔn wu ngwi wa a mɨ chwem ayi alaŋ tso ɨfɔ lá ngə́, ‹Ka bɨgɨ kɔŋ awɨgɨ a ŋwɔn wen ngə́ á be ɨfɔ ɨwɨgɨ ə.›

15Bɨ yén ndzɔ́ʼ a ŋwɔn wa a nye ɨfɔ a bə nkwe. A byí ngɨ bɨ tɔŋ ngaŋ afaʼ ɨchi tsa bɨ yen a ɨshi zɨ, taŋ á tsɔʼ aku ndvuŋ nkáb wa bo fúʼnə ghe. 16Wu ntsambyi a yén ɨ soŋ ngə́, ‹Tə̧, ma fuʼ aban a nkáb a ndzum nchwuʼ nɨghúm tsa o kɨ ghanɨ lá.› 17A sóŋ ngə́, ‹O ghɨ ɨ shiʼnɨ ə, o nɨ ŋwɔn afaʼ wu shiʼnɨ ə! Mbáʼ o kɨ wɛmnɨ a mɨnya mɨ azúm ɨ shiʼnɨ lá, ma mɨ lɛn agho o ndə́ŋtɨ́ ntáʼmbagə tsə wi tsi nɨghúm ə.› 18Ndzɔŋtɨ ŋwɔn afaʼ a yén ɨ soŋ ngə́, ‹Tə̧, ma fuʼ nchwuʼ mɨghúm mɨntə̧̂ a ndzum tsa nɨghúm tsa o kɨ ghanɨ ɨwən lá.› 19A mbó məwen a sóŋ ngə́, ‹O mɨ ləŋtɨnə ntáʼmbagə tsə wi tsi tə̧̂ ghe.›

20Wu mɔʼɔ ŋwɔn afaʼ a yén ɨ soŋ ngə́, ‹Tə̧, nchwuʼ nɨghúm ɨtso tsɨ tsenə; ma kɨ nyam ndwɛʼ a tsɛrə a mu abagɨ atsɛʼ ə. 21Ma kɨ chyɛ mbɔ́gə́ agho, mbɨ́ʼ ngə́ mɨkyiʼ ɨgho a bɨ́gɨ́ tɨsɨŋə. O lɔgə azúm za ka a be ayi azo, ɨ fuʼə adiʼ wa ka o bi agho ə.› 22Mboŋnjwuʼ wa a sóŋ wəmbo ngə́, ‹Ŋwɔn afaʼ tɨbɔŋ! Ma mɨ lɔgɨ mɨgham ɨmo ɨ ghɨ o vwo ɨsáʼ nɨ mɛrə ghe! O zhi ngə́ ma nɨ ŋwɔn a bɨ́gɨ́ a mɨkyiʼ, ndɔgə azúm za ka a be ayi azan, ɨ fuʼə adiʼ wa ka ma bi aghə. 23A bɔŋ tsɛʼ nkə, o kɨ chi ntiʼ nkoʼ ghɛn nde nkáb ɨzan za a ndá nɨlɛnɨ nɨ nkáb ngə́ ke le? Muŋ ma kwɛn lá nkwarɨ a zɛrə nɨ abi wə ndzum ə.›

24Mboŋnjwuʼ wa a tíʼ sóŋ a mbó ɨbɛn ba bɨ tsínɨ́ a kárɨ́kɨ́ zɨ lá ngə́, ‹Nɨ kwarɨ nkáb za wəmbo nga a mbó ŋwɔn wa a tsinɨ nɨ táʼ aban a nkáb lá.› 25Lá bɨ sóŋ wəmbo ngə́, ‹Tə̧, a kwɛnə ntsi nɨ aban a nkáb ə!› 26A chwɨ́gɨ́ ngə́, ‹Ma sóŋə́ awən ngə́ a mbó ŋwɔn wa a tsinɨ nɨ zɛrə, bɨ ghɨ kwiʼtɨ a zə ghaʼtɨnə; lá ŋwɔn wa a se nɨ azúm tsi, tsɛʼ mɨnya wa a tsinɨ nɨ wɛrə lá bɨ ghɨ kwárɨ́ wəmbo ə.#19:26 Matyo 13:12; Marɨkusɨ 4:25; Alukasɨ 8:18 27Lá, tɨtsɔŋnɨ, a mbó ngaŋ kɨban ɨtsan tsa, mbáʼ bɨ kɨ chinə nkeʼ ndǒ ngə́ á ma be ɨfɔ lá, nɨ yen nɨ bɛrə ɨghə, njwitɨ awa a ɨshi ɨmɨgɨ me ghe!›”

Adzaŋ za Yeso a kónɨ́ a Yerosalɛm tso Ɨfɔ ghe

(Mat 21:1-11; Mar 11:1-11; Yoa 12:12-19)

28Yeso a nanə nɨgham nen lá, ɨ nyɛʼtɨ awa ngɛn a mbyi bo a Yerosalɛm ə. 29Mbáʼ a yénɨ́ ɨ fátɨ́ a Bɛtɨfage bo Bɛtani atú Mbám Olif za lá, ntsagɨ bɨyɛʼ ɨbyi bi bɨbá a mbyi ɨ soŋ ngə́: 30“Ghɛnə a mu atom za a tsinɨ a mbyi bən lá; adzaŋ za nɨ kónə́ lá, nɨ mɨ zɛn a mɨmu jakashi wa bɨ tɨŋnɨnɨ, mbáʼ bɨ bvúrɨ́nə́ wu atú tɨ kɔʼə. Kyəgɨnə ngyen nɨ wɛrə ghe. 31Be ŋwɔn tse a bitɨ awən ngə́ nɨ kyəgə a zɛrə ngə́ ke, sóŋnə wəmbo ngə́ Maʼmbyí a lǒ a zɛrə ghe.”

32Bɛrə lɔ́gɨ́ ndóm, ngɛn ndzɛn azúm atsum tsɛʼ adzaŋ za Yeso a sóŋnɨ́ a mbó bo lá. 33Adzaŋ za bo kɨ́nə́ nkyəgə a mɨmu jakashi wa lá, bɨboŋ ɨbyi bítɨ́ awa ngə́, “Nɨ kyəgə a zɛrə lá ngə́ ke le?”

34Bo chwɨ́gɨ́ ngə́, “Maʼmbyí a lǒ a zɛrə ghe,” 35ntiʼ ndɔgɨ ngɛn nɨ zɛrə a mbó Yeso ghe. Bɨ zɔ́ŋtɨ́ ntsɔ́ʼtɨ́ ɨtsɛʼ ɨtsa njitɨ ndzum mɨmu jakashi za ɨwu, ntwɛmtɨ a Yeso a kɔʼ wu atú ə. 36Mbáʼ a kɨ́nə́ ngěn lá, ɨbɛn tsɔ́ʼtɨ́ ɨtsɛʼ ɨtsa ndɨʼ a ndómnji ɛ.

37Mbáʼ a yénɨ́ ɨ fátɨ́ a Yerosalɛm, adiʼ wa ndómnji kɨ́nə́ shiʼə ngěn atú Mbám Olif lá, ɨnɔ bɨyɛʼ ɨbyi bɨ bíʼnɨ́ ngǎ mɨya a mbó Ŋwi mbóntə́ a wɛrə nɨ nji tsɨ tən mbɨ́ʼ ɨnu tsɨ wiəwi tsa bo zɛ́nɨ́ ɨ sóŋə́ ngə́; 38“A Ŋwi a fɔgɨ a ɨfɔ wa a yenə nɨ ɨkum Maʼmbyí ɛ! Mbɔnɨ a fɔməbvurə bo nɨfáŋ a mbó Ŋwi atú atəntsánɨ́ ə!”#19:38 Salms 118:26

39Bə Farisao bə tse ba bɨ tsínɨ́ a mu ɨnɔ ɨbɛn wa tíʼ sóŋ a mbó Yeso ngə́, “Ndiʼ aŋwaʼnɨ soŋ a mbó bɨyɛʼ ɨbo ngə́ á bɨ kyɛntə!”

40Yeso a chwɨ́gɨ́ awa ngə́, “Ma sóŋə́ awɨŋ ə, be bo kyɛntɨ, muŋ mɨngɔʼ mɨ chwuʼ ɨ tɔ́nkɨ́nə ghe.”

Yeso a Bugɨ mbɨ́ʼ a Yerosalɛm ə

41Yeso a yén ɨ fátɨ́ ntáʼmbagə zɨ ngwi za, ntɛm, ndzɛn a zɛrə, nkyi shiʼ wu atú; 42a tiʼ soŋ ngə́, “A lanɨ ngɨ ake á nɨ zhi ɨ sɨŋə anu za a mɨ fu mbɔŋə mbɔnɨ ɨ yen ɨghan a Yerosalɛm ə! Lá tɨtsɔŋnɨ nɨ chi keʼ ze! 43Nkfu ghɨ yen mbáʼ ngaŋ kɨban ɨtsən ghɨ tɛ́m karɨsɨ awən tso bɨ jigɨ nká, ɨ tiʼ jintɨ awən bɨbagɨ bɨbagɨ ə. 44Bɨ ghɨ zɛtɨ awən bɨtsum ɨ kwiʼtɨ a ba bɨ tsinɨ a mu ndá ɨtsən; á tsɛʼ táʼ ngɔʼ a keʼ atú zɨ mɔʼɔ bən nɔŋ, mbɨ́ʼ ngə́ nɨ sé zhi a nyom wa Ŋwi a yénɨ́ a ndoŋ bɨŋ ə!”

Yeso a Ghɛn a mu Ndáŋwi zɨ Ngwi ə

(Mat 21:12-17; Mar 11:15-19; Yoa 2:13-22)

45Yeso a tíʼ nkón ngɛ́n a mu Ndáŋwi zɨ Ngwi ntiʼ mbiʼnɨ nkɨ̌ŋ ngaŋ ntáŋ mɨtan wə mu, 46ɨ soŋ a mbó bo ngə́, “A tsi a mu aŋwaʼnɨ a Ŋwi ngə́ Ŋwi a sóŋ ngə́, ‹Ndá ɨzan ghɨ bé ndá atsaʼtɨ a Ŋwi ə.› Lá nɨ lɔgɨ a zɛrə mbənkɨ a nye adiʼ za mɨzɛrə lyɛmtɨnə ɨwu ə!”

47Njwi ɨtsum, Yeso a kə́ ndiʼə anu a Ŋwi a mu Ndáŋwi zɨ Ngwi ə. Bɨntumshe bə wi, bɨdiʼ bɨ Nyɔngɔŋ abɔʼnɨ bɨsáʼ bɨ alaʼ kə́ ndǒ njwitɨ wɛrə,#19:47 Alukasɨ 21:37 48lá nchi keʼ ndóm zɛn, mbɨ́ʼ ngə́ ŋwɔn tsum a kə́ njwíʼtə́ anu za a kɨ́nə́ sóŋə́, nkeʼ ndǒ samə tsɛʼ táʼ atú a nɨgham ə.

Currently Selected:

Alukasɨ 19: MNT

Highlight

Copy