Alukasɨ 17
17
A nɨ Lə Ɨtú ɨtsən ngə́ nɨ sě Ntíntɨ́ Ɨbɛn Ntságə́ a mu Ɨbvu ə
(Mat 18:6-7, 21-22; Mar 9:42)
1Yeso a sóŋ a mbó bɨyɛʼ ɨbyi ngə́, “Ɨnu tsa tsɨ tíntɨ́nɨ́ ɨbɛn ntságə́ ngə́ á bɨ ngɨ̌ mɨbvu tsi mɨ fuənə ghe, lá a bɨ́gɨ́ be tɨ́sə́n a mbó ŋwɔn wa a ghɨnə ngə́ á tsɨ fuə ghe! 2A kwɛ be bɔŋ be ngə́ á bɨ lɔgɨ a təkɔʼ bɨ ngɔʼ abán nkorɨ wə ntɔŋ ntɔʼ ɨ maʼ a mu sagɨrə wu ngwi, ntsa ngə́ á tsi ntíntə́ a bə kɨʼnɨ ben á bɨ tsi ngɨ̌ mɨbvu ə. 3Ma lan, nɨ lə atú nɨ ɨdzaŋ ɨnu tsa nɨ ghɨnə ghe!#17:3 Matyo 18:15
Be mɨma ɨgho a ghɨ ɨbvu, ghamtɨ ayi ɛ, a be ngə́ a kwebtɨ ntəm ɨyi, lɨgɨnɨ ɨbvu ɨyi ɛ. 4Be a be ngə́ a ghɨ ɨbvu a nye gho nkfu tsi samba atú njwi, nkfu ɨtsum a kɨ́ ngyén a mbó gho ɨ sóŋə́ ngə́, ‹Ma fə,› o tsi nɨ ndɨgɨnɨ ɨbvu ɨyi ɛ.”
Abeməntəm a Tsi nɨ Adaʼ ə
5Ntóm Yeso sóŋ a mbó Maʼmbyí ngə́, “Ghɨ á abeməntəm azɨgɨ a faŋtə.”
6Maʼmbyí a chwɨ́gɨ́ ngə́, “Be abeməntəm azən a faŋtɨ mbe tso ndzaŋ ɨsa, o chi soŋ a mbó təzɨgɨ atɨ ngə́, ‹Dvuŋ atuəmbəm azo abɔʼnɨ mɨngaŋ ngɛn mbi agho a mu sagɨrə wu ngwi ə!› Atɨ za a mɨ zuʼnɨ agho ə.”
Afaʼ a Ŋwɔn Afaʼ ə
7“Lɔgɨnə ngə́ táʼ ŋwɔn nɨ bən a tsi nɨ ŋwɔn afaʼ wa a líʼnɨ́ ɨshwom ɨyi kə ndə́ŋtɨ́ mbyindzɨ ɨchi ɛ. A kwɛn afɔn lá o soŋ wəmbo ngə́ á waŋnɨ ndzɨ mɨdzɨ ɨmyi le? 8Tsɛʼ nkə, ngáŋ ə! Nɨ baŋnə sóŋə́ wəmbo ngə́, ‹Kyaŋtɨ mɨdzɨ ɨman mə nkwɛfɔ, ngwəgɨ ɨtsɛʼ afaʼ ɨtso ntsagɨnɨ mɨdzɨ ɨman á ma dzɨ nkɨ no; ma mɛtɨ o chi tiʼ ghɛn dzɨə.› 9Ŋwɔn afaʼ ka a ntsiŋə ayi a mɨya mbáʼ a faʼnə anu za a tsinɨ nɨ ɨ faʼə a mbó gho ghe, kə ndé? 10A nɨ ndəŋndəŋ a mbó bɨŋ ə; be a be ngə́ nɨ faʼnə a tsa bɨ soŋnɨ ngə́ á nɨ faʼ, soŋnə ngə́, ‹Bɨgɨ kɨ mbe awɨgɨ tsɛʼ ngaŋ afaʼ ə; bɨgɨ kɨ nyaʼ faʼ lá tsɛʼ ɨfaʼ ɨwɨgɨ ə.›”
Yeso a Tsuʼ Mbáŋnɨ́ tsi Nɨghúm ə
11Mbáʼ Yeso a kɨ́nə́ ngěn a Yerosalɛm, a kə́ ndzɔŋə a təndenə a tɨtərɨ mbuʼ Samaria bo mbuʼ Galili ə. 12A ghɨnə tɨ kón a mu atom zə tse, mbom ɨtɨchwen tsi nɨghúm ə. Tsɨ tɛ́m nəghagɨ 13ntɔ́nkə́ ngə́, “Yeso! Tafaʼ! Ko a mɨlɨŋnɨ ɨwɨgɨ ə!”
14Yeso a zɛ́n awa ɨ soŋ a mbó bo ngə́, “Ghɛnə á bɨntumshe chɛʼrɨ awɨŋ ə.”#17:14 Levitɨkɔsɨ 14:1-32
Bɨ tɨnə tɨ ghěn ndzɛn ngə́ bo byí shwétɨ́ awa ghe. 15Táʼ ŋwɔn nɨ bo a zɛnə ngə́ zɨə shwetɨ, mbə́ mbən nɨ ndzum ɨ sákə́ mbóntə́ a Ŋwi ə. 16Ngvo ɨ nɔŋ a tɨshe a mɨku Yeso nga a mɨya ɨyi ɛ. A bé ŋwɔn bə Samaria ghe. 17Yeso a bítɨ́ ayi ngə́, “A lo mbé bən nɨghúm mbáʼ nɨ shwetɨnə; bə bi nɨbvuʼə mé le? 18A bə ngyen tsɛʼ ankyenɨ zɛnə a ngá mɨya a mbó Ŋwi lá ngə́ ke le?” 19Yeso a tíʼ sóŋ wəmbo ngə́, “Lo atɨ́ ngɛn agho ə; abeməntəm azo a tsuʼ agho ə.”
Nkfu za Nɨfɔ nɨ Ŋwi Ghɨnɨ Yiŋə
(Mat 24:23-28, 37-41)
20Bə Farisao bítɨ́ a Yeso ngə́ Nɨfɔ nɨ Ŋwi ghɨ yen lá nkfu ake le? A chwɨ́gɨ́ ngə́, “Ka Nɨfɔ nɨ Ŋwi ngyiŋə ayi a nye ndómnji wa bɨ zɛ́nə́ ghe. 21Ŋwɔn tse ghɨ keʼ soŋ ngə́, ‹Ze, nɨ nɛnə!› kə, ‹Nɨ nirɨ!› mbɨ́ʼ ngə́ Nɨfɔ nɨ Ŋwi tsi a mu mɨntəm ɨmɨŋ ə.”
22Yeso a tíʼ sóŋ a mbó bɨyɛʼ ɨbyi ngə́, “Nkfu ghɨ yen za nɨ ghɨnɨ lǒnɨ ndze táʼ njwi Mɔn Ŋwɔn wu mɔʼɔ, lá ɨ keʼ a zɛrə ze. 23Ɨbɛn bə tse ghɨ sóŋ a mbó bən ngə́, ‹A yirɨ!› kə, ‹A wɛnə!› Lá nɨ keʼ zɔŋ awa ghe. 24Adzaŋ za azhwibtɨ a mbəŋ a zhwibtɨnə nkɨə ntsǎ, ndǒ a nye táʼ bagɨ nɨkaŋ ngěn a nye bagɨ wu mɔʼɔ lá, nə nɨ adzaŋ za njwi ngyiŋ Mɔn Ŋwɔn ghɨnɨ be. 25Lá ntsambyi anu a nɨ ngə́, wɛrə a tsi nɨ zagɨ ze ngɨ́ʼ tɨ́sə́n, á ɨbɛn bɨ tɨtsɔŋnɨ ton a wɛrə ghe. 26Tsɛʼ tso mbáʼ a bénɨ́ a nkfu Nua lá, a ghɨ kɨ́ bé tsɛʼ adzaŋ məwa a njwi Mɔn Ŋwɔn ə.#17:26 Jɛnɛsisɨ 6:5-8 27A nkfu Nua, ŋwɔn tsum a kə́ ndzɨ́ə nkə́ nǒ, mbáŋnɨ́ bo bɨ bəngye zɔ́ʼkɨnə, ɨ kɔʼ kuʼ njwi za Nua a ghɛ́nɨ́ nkón a mu abáŋ a nkyi za, nkyi dzɔrɨsɨ ɨdiʼ, nkwəŋ abvuʼ aza bɨtsum, njwitə. 28A ghɨ bé tsɛʼ tso mbáʼ a bénɨ́ a njwi Lɔtərə ghe. Ŋwɔn tsum a kə́ ndzɨ́ə nkə́ nǒ, ntáŋə́ a mɨtan, mbíə mɨdzɨ nkə́ nkórɨ́ ndá ə.#17:28 Jɛnɛsisɨ 18:20-19:25 29A njwi wa Lɔtərə a nyɛ́ʼtɨ́nɨ́ a Sodom, ɨmugɨ abɔʼnɨ ngɔʼ tsɨ lomnɨ ló tso mbəŋ ndo a fɔməbvurə ɨ shiʼ njwitɨ awa bɨtsum ə. 30Nə nɨ adzaŋ za a ghɨnɨ bé a njwi wa bɨ ghɨnɨ kyɛʼ a Mɔn Ŋwɔn ə.
31A njwi məwa, ŋwɔn wa a tsinɨ atú a ndá zɨ á keʼ shiʼ ngə́ zɨə ghɛn lɔgɨ ɨdzúm ɨchi a mu ndá; ndəŋndəŋ, ŋwɔn wa a tsinɨ afɔn á keʼ bə nkwɛn ngɛn a njwuʼ zɨə.#17:31 Matyo 24:17-18; Marɨkusɨ 13: 15-16 32Waʼtɨ anu za a fúnɨ́ a nye ngwe Lɔtərə ghe!#17:32 Jɛnɛsisɨ 19:26 33Ŋwɔn tsum wa a lɔnɨ ntsuʼ ntsi mbyi ɨzhi, a mɨ kfo; ŋwɔn tsum wa a samnɨ ntsi mbyi ɨzhi a mɨ tsuʼ a zɛrə ghe.#17:33 Matyo 10:39,16:25; Marɨkusɨ 8:35; Alukasɨ 9:24; Yoane 12:25 34Ma sóŋə́ awɨŋ ə, a nkfu məwa, ɨbɛn bi bɨbá ghɨ nɔŋ táʼ ɨkon nɨ ɨtfúʼ: á bɨ yen ntsɔʼ a táʼ ngɛn nɨ wɛrə, á táʼ a ghɔŋ a ndzum ə. 35Bəngye bi bɨbá ghɨ ghɔʼnə abán; á bɨ yen ntsɔʼ a táʼ ngɛn nɨ wɛrə, á táʼ a ghɔŋ a ndzum ə.” 36#17:36 Ɨŋwaʼnɨ Ŋwi tsə mɔʼɔ kwiʼtɨ nkaŋ 36 ɨ soŋ ɨwu ngə́, Mbáŋnɨ́ tsi bá ghɨ faʼnə a ɨshwom á bɨ lɔgɨ a táʼ ɨ nyɛʼ a wu mɔʼɔ ghe.’
37Bɨyɛʼ ɨbyi bítɨ́ ayi ngə́, “A ghɨ bé lá ɨ ghé le, a Maʼmbyí?”
Yeso a chwɨ́gɨ́ ngə́, “Adiʼ atsum za akfú azúm a nɔŋnɨ ɨwu, ɨzám mɨ bomnkɨ ɨwu ə.”
Currently Selected:
Alukasɨ 17: MNT
Highlight
Share
Copy
Want to have your highlights saved across all your devices? Sign up or sign in
© 2023, CABTAL
