Filipenses 3

1Y jada'achám, mu̶gu'uktu̶jk jootkugu̶u̶ygyu̶x ma je̱'e̱ Windzú̶n Jesucrístoju̶ñ. U̶u̶ch ka'p u̶u̶ch adaa du'un ni tii adzijpu̶ñ nju̶wu̶'u̶y ko u̶u̶ch ja'adu'ook ni'igapxpéty je̱'e̱ mu̶dyiibu̶ tu̶ n'okyajnijayu̶u̶ygyu̶xpu̶ju̶ñ, je̱' ko oy je̱'e̱ du'un mu̶u̶d miich kyu̶xpu̶ ajku̶xy. 2Naygyweentu̶'ajtu̶gu̶x ma je̱'e̱ ja'ay ajku̶xyu̶ñ je̱'e̱ mu̶dyiibu̶ je̱'e̱ myu̶gu'ug ka'p oy'ijxku̶xyu̶ñ,#3.2 Je̱'e̱ mu̶dyiibu̶ je̱'e̱ myu̶gu'ug ka'p oy'ijxku̶xyu̶ñ: nije̱' wiingpu̶ versión myu̶na'añ: ma je̱'e̱ uk ajku̶xyu̶ñ. je̱'e̱ mu̶dyiibu̶ je̱'e̱ ju̶bu̶kpu̶ tuungu̶xpu̶ñ, je̱'e̱ mu̶dyiibu̶ je̱'e̱ ni'kx tzujkku̶xpu̶ñ. 3Je̱' ko je̱'e̱ mu̶dyiibu̶ jaanch tu̶y'ajtu̶'u̶y ajku̶xyu̶ñ, u̶u̶ch je̱'e̱ ajtu̶m ajku̶xy, je̱'e̱ mu̶dyiibu̶ je̱'e̱ Dios mu̶jpu̶daakpu̶ñ mu̶u̶d je̱'e̱ Dios y'Espíritu,#3.3 Je̱'e̱ mu̶dyiibu̶ je̱'e̱ Dios mu̶jpu̶daakpu̶ñ mu̶u̶d je̱'e̱ Dios y'Espíritu: nije̱' wiingpu̶ jaaybyu̶du̶jk myu̶naangu̶xy: je̱'e̱ mu̶dyiibu̶ je̱'e̱ Dios mu̶jpu̶daakpu̶ñ mu̶u̶d je̱'e̱ jyoot wyinma'añ. y xondaakp ajtu̶m ajku̶xy ko nyajpaatu̶m ajku̶xy ma je̱'e̱ Cristo Jesúsu̶ñ y ka'p je̱'e̱ nmu̶bu̶jku̶ñ nbu̶daaku̶m ajku̶xy ma je̱'e̱ ni'kx kopt je̱'e̱ mu̶dyiibu̶ ni'igú̶xp ku'uduuy ku̶xu̶'kpu̶ñ. 4U̶u̶ch nja'amu̶u̶du̶ch je̱'e̱ du'umbu̶ tu̶y'ajt nandu'un ko u̶u̶ch je̱'e̱ du'umbu̶ winma'añ nmu̶bú̶gu̶ch. U̶u̶ch je̱'e̱ tu̶y'ajt ni'igyu̶ nmu̶u̶d ko u̶u̶ch je̱'e̱ du'umbu̶ winma'añ nmu̶bú̶gu̶ch ni'igu̶ ka'p du'un nipú̶nu̶ñu̶ba: 5ko u̶u̶ch nma'axung'ajty, kuduktujk xu̶u̶ u̶u̶ch nyajtu̶y'ajtu̶u̶y, Israel ja'ay u̶u̶ch, je̱'e̱ Benjamín u̶u̶ch nmu̶j'ap'ajtypy nmu̶jteedy'ajtypy, hebreo ja'ay u̶u̶ch y hebreo ja'ay u̶u̶ch ndaj'ajtypy ndeedy'ajtypy. Nan je̱'e̱ fariseotu̶jk u̶u̶ch je̱'e̱ y'u̶xpu̶jku̶ñ nmu̶jpu̶daaku̶, neby je̱'e̱ judío ja'ay je̱'e̱ Moisés y'ane̱'e̱mu̶ñ ni'igue̱jku̶xyu̶ñ. 6Janch mu̶kta'agyu̶ch najty je̱'e̱ du'umbu̶ u̶xpu̶jku̶ñ niwa'añ, u̶xtu̶ n'u̶xwu̶dijtypy nbawu̶dijtypyu̶ch najty je̱'e̱ mu̶dyiibu̶ je̱'e̱ Jesucristo mu̶bu̶jkku̶xpu̶ñ. Y ku̶xyu̶ wa'adzu̶ch je̱'e̱ Moisés y'ane̱'e̱mu̶ñ tu̶ nguydyuundaayu̶, ka'p u̶u̶ch mu̶naa pu̶n tu̶ xypyoky'ixy. 7Peru̶ ku̶xyu̶ adayaaba, je̱'e̱ mu̶dyiibu̶ ijty jékyu̶p tzobaatp mu̶u̶d u̶u̶ch, ka'p je̱'e̱ jada'achám y'oktzobaadnu̶ mu̶u̶d u̶u̶ch, je̱' ko u̶u̶ch je̱'e̱ Cristo tu̶ nmu̶bu̶jknu̶. 8Ka'p du'un ni tii y'oktzobaadnu̶ mu̶u̶d u̶u̶ch ko u̶u̶ch je̱'e̱ du'un n'okjayajmu̶baadu̶ch mu̶u̶d je̱'e̱ jak'oybyu̶ ni'igyu̶ Jesucristo y'ayuuk tyu̶y'ajt, ko u̶u̶ch je̱'e̱ Cristo Jesús tu̶ nmu̶bu̶ky, u̶u̶ch je̱'e̱ nWindzú̶n. Y ko u̶u̶ch je̱'e̱ Cristo tu̶ nmu̶bu̶ky, tu̶ u̶u̶ch ku̶xyu̶ najtz'ixu̶u̶ydya'ay y du'un u̶u̶ch je̱'e̱ cham ku̶xyu̶ n'ijxnu̶ neby pu'uxku̶ñ ko u̶u̶ch je̱'e̱ Cristo nbanu̶kxnu̶, 9y ko u̶u̶ch tu'ugyu̶ nyajpaatnu̶ ma je̱'e̱ju̶ñ. Ka'p u̶u̶ch je̱'e̱ nboky ngu̶dyeey paady tu̶ xyñi'iwa'ach ko u̶u̶ch je̱'e̱ Moisés y'ane̱'e̱mu̶ñ nguydyuunu̶, paady u̶u̶ch je̱'e̱ nboky ngu̶dyeey tu̶ xyñi'iwa'ach ko u̶u̶ch je̱'e̱ Cristo nmu̶bu̶ky; je̱'e̱ u̶u̶ch du'un ndijpy, ko paady u̶u̶ch je̱'e̱ Dios je̱'e̱ nboky ngu̶dyeey tu̶ xyajni'iwa'ach ko u̶u̶ch je̱'e̱ y'ayuuk tyu̶y'ajt tu̶ nmu̶bu̶jku̶. 10Je̱'e̱ mu̶dyiibu̶ u̶u̶ch ndzojkpyu̶ñ je̱' je̱' ko u̶u̶ch je̱'e̱ Cristo y'ayuuk tyu̶y'ajt oy wa'adzu̶ nejwu̶'u̶waanu̶, nju̶wu̶'u̶waanu̶ch je̱'e̱ myu̶k'ajt neby jyuugypyu̶jkyu̶ñ, nmu̶nax ngu'ubu̶ga'añu̶ch je̱'e̱ tzaachpyu̶ du'un neby je̱'e̱ tzaachpyu̶ mu̶najxy ku'ubu̶jkyu̶ñ y n'o'oga'añu̶ch nandu'un neby je̱'e̱ y'o'kyu̶ñ, 11y paady u̶u̶ch nju̶jp'íxy njuugypyú̶gu̶chu̶ch nandu'un ko naty je̱'e̱ o'ogyjya'ay jyuugypyu̶jkku̶xy.

Je̱'e̱ nay'amu̶jadunu̶u̶ neby nja'ttu̶mu̶ch ma pyadyii nja'ttu̶mu̶chu̶ñ

12Ka'p u̶u̶ch yam du'un nmu̶na'añ ko u̶u̶ch tu̶ ku̶xyu̶ n'ijxta'ay nbaatta'ay, nan ka'p u̶u̶ch yam nmu̶na'añ ko u̶u̶ch je̱'e̱ njoot nwinma'añ ku̶xyu̶ tu̶ wyaadznu̶, u̶u̶ch nyajtu'uyo'oy'adu̶u̶chpyu̶ch je̱'e̱ Dios y'ayuuk tyu̶y'ajt y nju̶jp'ijxypyu̶ch nbada'añu̶ch je̱'e̱ oy'ajtu̶ñ, je̱' ko je̱'e̱ Cristo Jesús u̶u̶ch jayu̶jp tu̶ xypyaady. 13“Mu̶gu'uktu̶jk, ka'p u̶u̶ch yam du'un nmu̶na'añ ko u̶u̶ch ku̶'u̶m tu̶ n'ijxta'ay nbaatta'ay; je̱'e̱ mu̶dyiibu̶ u̶u̶ch nduumbyu̶ñ je̱' je̱'e̱ nja'aydyu̶gooydya'ayu̶ch je̱'e̱ aambu̶ jekypyu̶ y nay'amu̶jaduñyiiju̶ch neby u̶u̶ch je̱'e̱ oy'ajtu̶ñ nbaadu̶chu̶ñ je̱'e̱ mu̶dyiibu̶ miimb ku̶daakpu̶ñ, 14neby mu̶baad nja'ttu̶mu̶ñ ajku̶xy ma pyadyii nja'ttu̶mu̶chu̶ñ ajku̶xy y nganar'ajtu̶mu̶ch je̱'e̱ oy'ajtu̶ñ ajku̶xy jiiby tzajpjooty, je̱'e̱ mu̶dyiibu̶ je̱'e̱ Dios tu̶ xyajnibu̶dagu̶u̶yu̶m ajku̶xy xymyo'owaanu̶m ajku̶xy ko je̱'e̱ Cristo Jesús tu̶ nmu̶bu̶jku̶m ajku̶xy.

15Nigu̶xyu̶ u̶u̶ch ajtu̶m ajku̶xy mu̶dyiibu̶ je̱'e̱ myu̶bu̶jku̶ñ tu̶ myu̶jaanu̶ju̶ñ, mu̶baad tu'ugyu̶ nwinmaayu̶m ajku̶xy du'un neby u̶u̶chu̶ñ neby u̶u̶ch je̱'e̱ aambu̶ jekypyu̶ tu̶ najtz'ixu̶'u̶yu̶ñ. Peru̶ pu̶nu̶ jii pu̶n wiing wyinmay, Dios je̱'e̱ tu̶y'ajt yajnejwu̶'u̶wu̶u̶ju̶p ajku̶xy. 16Peru̶ du'unu̶tz tu̶y mu̶baad ndzu̶naay njugy'ajtu̶m du'un neby je̱'e̱ tu̶y'ajt y'ane'emyu̶ñ je̱'e̱ mu̶dyiibu̶ tu̶ n'ijx tu̶ nbaattu̶m ajku̶xy.

17“Mu̶gu'uktu̶jk, u̶u̶ch pa'ijxk ajku̶xy neby u̶u̶ch ndzu̶na'ay njugy'atyu̶ñ, ijxku̶x kweentu̶tuungu̶x nandu'un mu̶dyiibu̶ du'un tzu̶naaygyu̶xp jugy'ajtku̶xpu̶ñ du'un neby tu̶ pa'ijxku̶xyu̶ñ ma u̶u̶chu̶ñ. 18Tu̶ miich ka'anaag'ook nnu̶maaygyu̶xy, y cham ja'adu'ook nnu̶maaygyu̶xnu̶ba ju̶u̶yu̶p yaaxu̶p ko may je̱'e̱ ja'ay jii chu̶naay jyugy'ajtku̶xy, ka'p mu̶j'ijx mu̶jpu̶daakku̶xy ko je̱'e̱ Cristo cruutzkú̶xp y'o'ky, du'un je̱'e̱ ijxku̶xy neby ka'pu̶ chobaadyu̶ñ, 19y tu̶goydyuum je̱'e̱ ñú̶kxku̶xu̶ch. Ka'p je̱'e̱ Dios mu̶jpu̶daakku̶xy, jim je̱'e̱ wyinma'añ je'eyu̶ pu̶daakku̶xy ma je̱'e̱ kaayu̶ñ uuku̶ñ, y je̱' dyios'ajtypy ajku̶xy, y maa jya'apadyii cho'oydyuungu̶xu̶ch neby y'adu̶u̶tzku̶xyu̶ñ ni'igyu̶ je̱'e̱ mu̶j ku̶xp ñayjyu̶wu̶u̶yu̶gu̶xy. Je̱' je̱'e̱ je'eyu̶ y'aa'ajtypy jyoot'ajtypy ajku̶xy je̱'e̱ mu̶dyiibu̶ ya naaxwiiñ yajpaatpu̶ñ. 20Y u̶u̶ch tzajpjootypyu̶ja'ay ajtu̶m ajku̶xy, je̱' je'eyu̶ n'aa'ajtypy njoot'ajtypy ajtu̶m ajku̶xy je̱'e̱ mu̶dyiibu̶ jiiby tzajpjooty yajpaatpu̶ñ, y je̱' nju̶jp'ijxypy ajtu̶m ajku̶xy ko je̱'e̱ niwaambu̶ yajtzookpu̶ jiiby tzajpjooty choonu̶ch y kyu̶da'agu̶ch ya naaxwiiñ, je̱'e̱ Windzú̶n Jesucristo, 21y je̱' je̱'e̱ nni'kx pokymyu̶u̶dpu̶ xyajtu̶gatzaanu̶py ajtu̶m ajku̶xy y yaj'awimbida'añ neby je̱'e̱ kyu̶'u̶mni'kxu̶ñ oy'ajtmu̶u̶d. Y du'un tuna'añ mu̶u̶d je̱'e̱ mu̶k'ajt mu̶dyiibu̶ mu̶u̶d ku̶xyu̶ mu̶madaakta'ayu̶ñ.

Currently Selected:

Filipenses 3: MIXE

Highlight

Copy