Filipenses 4
4
Xondaaktu̶u̶gu̶x ma je̱'e̱ Windzú̶n
1Paady miich mu̶gu'uktu̶jk ajku̶xy, je̱'e̱ mu̶dyiibu̶ u̶u̶ch oy ndzojkypy nju̶wu̶u̶ybyu̶ñ, je̱'e̱ mu̶dyiibu̶ u̶u̶ch nja'a'ixe̱e̱mbyu̶ñ, mu̶u̶d miich kyu̶xpu̶ ajku̶xy u̶u̶ch nxonda'agy y nbada'añu̶ch je̱'e̱ n'oy'ajtu̶ñ, yajtu'uyo'oy'adu̶u̶tzku̶x je̱'e̱ Windzú̶n Jesucristo y'ayuuk tyu̶y'ajt tu'ug'aa tu'ugjoot y ka'p m'u̶xtu̶gu̶'u̶wa'kku̶xu̶ch.
2Nmu̶nukxtaakypyu̶ch je̱'e̱ Evodia y nandu'un je̱'e̱ Síntique ko je̱'e̱ tzip ma'ad wan yajku̶jx yajnajxku̶xy, y wan du'un tu'ugjoot tu'ugwinma'añ ijtku̶xnu̶ neby je̱'e̱ to'oxyu̶jktu̶jk je̱'e̱ mu̶dyiibu̶ yajpaatku̶xpu̶ñ ma je̱'e̱ Windzú̶n Jesucrístoju̶ñ. 3Y miich mu̶gu'ug mu̶dyiibu̶ tu'ugyu̶ tu̶ nduunu̶m je̱'e̱ Windzú̶n tyuung, cham nmu̶nukxta'agy ko adaa nime̱tzkpu̶ mu̶bu̶jkpu̶du̶jk to'oxyu̶jk mbubé̱du̶ch, je̱' ko yu̶'u̶ u̶u̶ch je̱'e̱ ayuuk tu̶y'ajt oy xymyu̶dkapxwa'kxku̶xy je̱'e̱ mu̶dyiibu̶ je̱'e̱ aanu̶mu̶ ni'idzooku̶ñ ye̱jkpu̶ñ kipxy mu̶u̶d je̱'e̱ Clemente y je̱'e̱ jaknimaybyu̶ ajku̶xy, je̱'e̱ mu̶dyiibu̶ u̶u̶ch xymyu̶dtuungu̶xu̶ñ. Kujayu̶'u̶y xyu̶u̶ je̱'e̱ jiiby ajku̶xyu̶ñ ma je̱'e̱ Dios ñakyu̶ñ, ma je̱'e̱ Dios kuja'ay mu̶u̶du̶chu̶ñ mu̶dyiibu̶ je̱'e̱ jugy'ajtu̶ñ wiinu̶u̶xu̶u̶bu̶ padaangu̶xpu̶ñ.
4Xondaaktu̶u̶gu̶x ma je̱'e̱ Windzú̶n Jesúsu̶ñ. Cham ja'adu'ook nnu̶maaygyu̶xy: ¡Xondaakku̶x! 5Wan je̱'e̱ ja'ay miich ku̶xyu̶ xy'ijxku̶xy xyñejwu̶u̶ygyu̶xy ko m'oyjya'ay'ajtku̶xy. Wingón mu̶naa je̱'e̱ Windzú̶n Jesucristo myinaanu̶ju̶ñ.
6Ka'p ni tii mnidaj mnimaaygyu̶xy, je̱'e̱ Dios je̱'e̱ mjootmáy yajku̶'u̶waanu̶u̶ygyu̶x cham mmu̶bu̶jktzoogu̶xy. Mu̶yujkwaangu̶x y ye̱jkku̶x je̱'e̱ Dioskujuuyu̶p nandu'un ma je̱'e̱ju̶ñ. 7Mu̶'it je̱'e̱ Dios jyootkujk'ajtu̶ñ xymyooygyu̶xu̶ch je̱'e̱ jyootkujk'ajtu̶ñ mu̶dyiibu̶ ni'igyu̶ mu̶ju̶ñ je̱'e̱ mu̶dyiibu̶ je̱'e̱ naaxwiiñjya'ay ka'p mu̶baad mu̶winma'añbyaatku̶xyu̶ñ, y adayaaba jootkujk'ajtu̶ñ je̱' je̱'e̱ m'aa mjoot y je̱'e̱ mjoot mwinma'añ xykyweentu̶'ajtu̶p ajku̶xy, je̱' ko tu'ugyu̶ miich myajpaatku̶xy mu̶u̶d je̱'e̱ Cristo Jesús.
Nijoot'ajtku̶x ku̶xyu̶ je̱'e̱ mu̶dyiibu̶ oyu̶ñ
8Nnu̶maaygyugu̶xu̶u̶ygyu̶xypy mu̶gu'uktu̶jk, winmaaygyu̶x ku̶xyu̶ mu̶dyiibu̶ jaanch tu̶y'ajtu̶ñ, ku̶xyu̶ mu̶dyiibu̶ je̱'e̱ windzu̶gu̶'u̶ñ paattu̶bu̶ñ, ku̶xyu̶ mu̶dyiibu̶ tu'uda'agyu̶ñ, ku̶xyu̶ mu̶dyiibu̶ wa'adzu̶ñ, ku̶xyu̶ mu̶dyiibu̶ oymyu̶jootku̶daaknu̶ju̶ñ, ku̶xyu̶ mu̶dyiibu̶ oy yajnigápxp yajnimu̶dyaakpu̶ñ. Nijoot'ajtku̶x ku̶xyu̶ je̱'e̱ mu̶dyiibu̶ oyu̶ñ y je̱'e̱ mu̶dyiibu̶ oygyu'umaayñu̶ju̶ñ.
9Yajtuungu̶x je̱'e̱ mu̶dyiibu̶ tu̶ nyaj'u̶xpu̶jkku̶xyu̶ñ y je̱'e̱ mu̶dyiibu̶ tu̶ nyajni'ixu̶u̶ygyu̶xyu̶ñ, du'un neby mmu̶doogu̶xyu̶ñ nmu̶naañu̶ch y du'un neby m'ijxku̶xyu̶ñ nduuñu̶ch: du'un nandu'un tuungu̶x y mu̶'it je̱'e̱ Dios je̱'e̱ mu̶dyiibu̶ je̱'e̱ jootkujk'ajt ye̱jkpu̶ñ yajpaadu̶ch ma miich ajku̶xyu̶ñ.
Filipos ja'ay lyimoosnu̶ ajku̶xy mu̶dyiibu̶ je̱'e̱ Pablo myooygyu̶xu̶ñ
10Xondaakpu̶ch mu̶k ma je̱'e̱ Windzú̶n Jesucrístoju̶ñ ko u̶u̶ch miich ja'adu'ook tu̶ xyjya'aymye̱jtzpaatku̶xnu̶ba. Ka'p u̶u̶ch yam du'un nmu̶na'añ ko u̶u̶ch ijty tu̶ xyjya'aydyu̶gooygyu̶xnu̶, je̱' ko najty xykya'anibadu̶u̶yu̶ ajku̶xy mu̶naa u̶u̶ch xypyube̱jtku̶xu̶chu̶ñ. 11Ka'p u̶u̶ch yam du'un paady nmu̶na'añ ko u̶u̶ch yam ku̶xyu̶ tijaty nyajmayjyáty, je̱' ko tu̶ u̶u̶ch njaty n'abu̶ky neby u̶u̶ch nmu̶jootkujk'ádu̶chu̶ñ je̱'e̱ mu̶dyiibu̶ u̶u̶ch je'eyu̶ nmu̶dajtypyu̶ñ. 12Nejwu̶u̶ybyu̶ch neby je̱'e̱ xoon ayoowu̶ñ yajmu̶náxy yaj'yajnáxyu̶ñ, y nan nejwu̶u̶ybyu̶ch neby tii mu̶j may yajmu̶dátyu̶ñ. Tu̶ u̶u̶ch njaty n'abu̶ky neby u̶u̶ch oy tii nwinguwa'agu̶'u̶wu̶chu̶ñ, du'un oy u̶u̶ch ngay nga'akáy y oy u̶u̶ch tii may'e̱e̱mby nmu̶dáty nga'amu̶dáty. 13Oy tyimytyiiju̶ch, u̶u̶ch nwinguwa'agu̶u̶ybyu̶ch, je̱' ko je̱'e̱ Cristo u̶u̶ch je̱'e̱ mu̶k'ajt xymyooby. 14Pues oy u̶u̶ch xypyubejty ajku̶xy ma u̶u̶ch najty je̱'e̱ ayo'on jootmáy nmu̶naxy nyajnáxyu̶ñ.
15Ko u̶u̶ch jim Macedonia ndzoñ, ko u̶u̶ch nyajtzondaaky ngapxwa'kxtu̶gu̶u̶yu̶ch je̱'e̱ ayuuk tu̶y'ajt je̱'e̱ mu̶dyiibu̶ je̱'e̱ aanu̶mu̶ ni'idzooku̶ñ ye̱jkpu̶ñ, miich xypyube̱jtku̶x Filipos mu̶bu̶jkpu̶du̶jk, miichtyu̶'ajty je̱'e̱ nlimoosnu̶ je'eyu̶ xykye̱jxu̶ ajku̶xy, je̱' ko najty myajmu̶jju̶wu̶u̶ygyu̶xy ko u̶u̶ch je̱'e̱ ayuuk tu̶y'ajt najty jim tu̶ ngapxwa'kxy ma miich ajku̶xyu̶ñ. 16Y ko u̶u̶ch najty jim Tesalónica nyajpaady, me̱jtz'ook tu̶gu̶u̶g'ook u̶u̶ch je̱'e̱ nlimoosnu̶ xykye̱jxu̶ ajku̶xy ko u̶u̶ch najty ku̶xyu̶ wiinu̶ nyajmayjyáty. 17Ka'p u̶u̶ch yam du'un nmu̶na'añ ko u̶u̶ch je̱'e̱ meeñ je'eyu̶ nju̶jp'ijxypy n'axaju̶'u̶wa'añu̶ch; u̶u̶ch je̱' u̶u̶ch ndzojkypy ko je̱'e̱ m'oy'ajt ni'igyu̶ mbaatku̶xu̶ch Dios wiinduuy. 18U̶u̶ch, tu̶ u̶u̶ch je̱'e̱ yaa ku̶xyu̶ n'axaju̶ydya'ay y u̶xtu̶ nadu̶gu̶'u̶bu̶ u̶u̶ch yam nmu̶dajnu̶py. Y je̱'e̱ mu̶dyiibu̶ u̶u̶ch xykye̱jxu̶ ajku̶xyu̶ñ, je̱'e̱ mu̶dyiibu̶ je̱'e̱ Epafrodito myajmu̶gue̱jxku̶xu̶ñ, mu̶du̶y'ajtp je̱'e̱ yam du'un. Y du'un je̱' je̱'e̱ mu̶dyiibu̶ u̶u̶ch xyajnigue̱jx ajku̶xyu̶ñ neby je̱'e̱ poom yojxu̶ñ je̱'e̱ mu̶dyiibu̶ pa'agxúkpu̶ñ, neby je̱'e̱ windzu̶gu̶'u̶ñ je̱'e̱ mu̶dyiibu̶ je̱'e̱ Dios kyu'umaaybyu̶ñ. 19Je̱'e̱ Dios mu̶dyiibu̶ u̶u̶ch nmu̶duumbyu̶ñ miich xymyooygyu̶xu̶p ku̶xyu̶ tijaty naty myajmayjyajtku̶xypyu̶ñ, du'un neby naty je̱'e̱ oybyu̶ y'oy'ajtu̶ñ xyajmu̶dzojkku̶xyu̶ñ xymyo'owaangu̶xy je̱'e̱ mu̶dyiibu̶ myu̶u̶d ma je̱'e̱ Cristo Jesúsu̶ñ. 20¡Ku'umáy wan wiinu̶u̶xu̶u̶ ity je̱'e̱ nDios Teedy ajtu̶m ajku̶xy! Jaanch adaa du'un.
Pablo myu̶gu'ugtu̶jk yajpókxu̶ñ jak'yajniguéxy
21Yajpokxu̶u̶ygyu̶ch jim nigu̶xyu̶ ajku̶xy je̱'e̱ mu̶dyiibu̶ yajpaatku̶xpu̶ñ ma je̱'e̱ Dios jya'ayu̶ñ mu̶u̶d je̱'e̱ Jesucristo kyu̶xpu̶. Je̱'e̱ nmu̶gu'ugtu̶jku̶ch mu̶dyiibu̶ ya yajpaatku̶xpu̶ñ mu̶u̶d u̶u̶ch, nan xyajnigue̱jxku̶xp je̱'e̱ yajpókxu̶ñ nandu'un ajku̶xy. 22Nan xyajnigue̱jxku̶xp je̱'e̱ yajpókxu̶ñ nandu'un nigu̶xyu̶ je̱'e̱ mu̶dyiibu̶ yajpaatku̶xpu̶ñ ma je̱'e̱ Dios jya'ayu̶ñ, y je̱' je̱'e̱ yajpókxu̶ñ nandu'un mu̶kta'agy xyajnigue̱jxku̶xp je̱'e̱ mu̶dyiibu̶ je̱'e̱ mu̶j'ane̱'e̱mbu̶ romano mu̶duungu̶xpu̶ñ.
23Wan je̱'e̱ nWindzú̶n Jesucristo ajtu̶m ajku̶xy oy'ajt may'ajt tuñ ma miich nigu̶xyu̶ ajku̶xyu̶ñ. Jaanch adaa du'un.
Currently Selected:
Filipenses 4: MIXE
Highlight
Share
Copy
Want to have your highlights saved across all your devices? Sign up or sign in
Nuevo Testamento en Mixe de Mazatlán y Tutla, Oaxaca, México © Sociedad Bíblica de México, A.C. 2005
