Popular Bible Verses from Filipenses 4

Share

Ka'p ni tii mnidaj mnimaaygyu̶xy, je̱'e̱ Dios je̱'e̱ mjootmáy yajku̶'u̶waanu̶u̶ygyu̶x cham mmu̶bu̶jktzoogu̶xy. Mu̶yujkwaangu̶x y ye̱jkku̶x je̱'e̱ Dioskujuuyu̶p nandu'un ma je̱'e̱ju̶ñ.

Mu̶'it je̱'e̱ Dios jyootkujk'ajtu̶ñ xymyooygyu̶xu̶ch je̱'e̱ jyootkujk'ajtu̶ñ mu̶dyiibu̶ ni'igyu̶ mu̶ju̶ñ je̱'e̱ mu̶dyiibu̶ je̱'e̱ naaxwiiñjya'ay ka'p mu̶baad mu̶winma'añbyaatku̶xyu̶ñ, y adayaaba jootkujk'ajtu̶ñ je̱' je̱'e̱ m'aa mjoot y je̱'e̱ mjoot mwinma'añ xykyweentu̶'ajtu̶p ajku̶xy, je̱' ko tu'ugyu̶ miich myajpaatku̶xy mu̶u̶d je̱'e̱ Cristo Jesús.

Nnu̶maaygyugu̶xu̶u̶ygyu̶xypy mu̶gu'uktu̶jk, winmaaygyu̶x ku̶xyu̶ mu̶dyiibu̶ jaanch tu̶y'ajtu̶ñ, ku̶xyu̶ mu̶dyiibu̶ je̱'e̱ windzu̶gu̶'u̶ñ paattu̶bu̶ñ, ku̶xyu̶ mu̶dyiibu̶ tu'uda'agyu̶ñ, ku̶xyu̶ mu̶dyiibu̶ wa'adzu̶ñ, ku̶xyu̶ mu̶dyiibu̶ oymyu̶jootku̶daaknu̶ju̶ñ, ku̶xyu̶ mu̶dyiibu̶ oy yajnigápxp yajnimu̶dyaakpu̶ñ. Nijoot'ajtku̶x ku̶xyu̶ je̱'e̱ mu̶dyiibu̶ oyu̶ñ y je̱'e̱ mu̶dyiibu̶ oygyu'umaayñu̶ju̶ñ.

Oy tyimytyiiju̶ch, u̶u̶ch nwinguwa'agu̶u̶ybyu̶ch, je̱' ko je̱'e̱ Cristo u̶u̶ch je̱'e̱ mu̶k'ajt xymyooby.

Xondaaktu̶u̶gu̶x ma je̱'e̱ Windzú̶n Jesúsu̶ñ. Cham ja'adu'ook nnu̶maaygyu̶xy: ¡Xondaakku̶x!

Je̱'e̱ Dios mu̶dyiibu̶ u̶u̶ch nmu̶duumbyu̶ñ miich xymyooygyu̶xu̶p ku̶xyu̶ tijaty naty myajmayjyajtku̶xypyu̶ñ, du'un neby naty je̱'e̱ oybyu̶ y'oy'ajtu̶ñ xyajmu̶dzojkku̶xyu̶ñ xymyo'owaangu̶xy je̱'e̱ mu̶dyiibu̶ myu̶u̶d ma je̱'e̱ Cristo Jesúsu̶ñ.

Yajtuungu̶x je̱'e̱ mu̶dyiibu̶ tu̶ nyaj'u̶xpu̶jkku̶xyu̶ñ y je̱'e̱ mu̶dyiibu̶ tu̶ nyajni'ixu̶u̶ygyu̶xyu̶ñ, du'un neby mmu̶doogu̶xyu̶ñ nmu̶naañu̶ch y du'un neby m'ijxku̶xyu̶ñ nduuñu̶ch: du'un nandu'un tuungu̶x y mu̶'it je̱'e̱ Dios je̱'e̱ mu̶dyiibu̶ je̱'e̱ jootkujk'ajt ye̱jkpu̶ñ yajpaadu̶ch ma miich ajku̶xyu̶ñ.

Wan je̱'e̱ ja'ay miich ku̶xyu̶ xy'ijxku̶xy xyñejwu̶u̶ygyu̶xy ko m'oyjya'ay'ajtku̶xy. Wingón mu̶naa je̱'e̱ Windzú̶n Jesucristo myinaanu̶ju̶ñ.

Nejwu̶u̶ybyu̶ch neby je̱'e̱ xoon ayoowu̶ñ yajmu̶náxy yaj'yajnáxyu̶ñ, y nan nejwu̶u̶ybyu̶ch neby tii mu̶j may yajmu̶dátyu̶ñ. Tu̶ u̶u̶ch njaty n'abu̶ky neby u̶u̶ch oy tii nwinguwa'agu̶'u̶wu̶chu̶ñ, du'un oy u̶u̶ch ngay nga'akáy y oy u̶u̶ch tii may'e̱e̱mby nmu̶dáty nga'amu̶dáty.

Ka'p u̶u̶ch yam du'un paady nmu̶na'añ ko u̶u̶ch yam ku̶xyu̶ tijaty nyajmayjyáty, je̱' ko tu̶ u̶u̶ch njaty n'abu̶ky neby u̶u̶ch nmu̶jootkujk'ádu̶chu̶ñ je̱'e̱ mu̶dyiibu̶ u̶u̶ch je'eyu̶ nmu̶dajtypyu̶ñ.