Filipenses 2

Je̱'e̱ Cristo yuung'ajt ñaaxypy'ajt y je̱'e̱ myu̶k'ajtu̶ñ

1Y du'unu̶tz, pu̶nu̶ je̱'e̱ Cristo xyajjootkugu̶u̶ygyu̶xp, pu̶nu̶ je̱'e̱ chojku̶ñ xyjyootmu̶kmooygyu̶xp, pu̶nu̶ yajpaatp je̱'e̱ Espíritu Santo ma miich ajku̶xyu̶ñ, pu̶nu̶ mnejwu̶u̶ygyu̶xypy je̱'e̱ tzojku̶ñ ju̶wu̶u̶yu̶ñ y je̱'e̱ pa'a''ayoowu̶ñ, 2u̶u̶ch yajjootkugu̶u̶ygyu̶xk cham nigu̶xyu̶ oy yajxón mdzu̶naay mjugy'ajtku̶xy, tu'ugyu̶ je̱'e̱ tzojku̶ñ mmu̶dajtku̶x, tu'ugyu̶ je̱'e̱ joot winma'añ y tu'ugyu̶ ku̶xyu̶ tii nijoot'ajtku̶x. 3Ka'p ni tii mduungu̶xu̶ch mu̶u̶d je̱'e̱ mgu̶'u̶mwinma'añ ajku̶xy o ko amu̶j jootmu̶j mnayjyu̶wu̶u̶yu̶gu̶xy. Je̱' tii du'umbu̶ mduungu̶xu̶ch yuung naaxypy, y mmu̶naangu̶xu̶ch nidu'ug nidu'ug ko je̱'e̱ mmu̶gu'ug ni'igu̶ oy tyuungu̶xy ni'igu̶ ka'p miich ajku̶xyñu̶ba. 4Ka'p je̱'e̱ kyu̶'u̶m'oy'ajt mu̶baad pu̶n ku̶'u̶m u̶xta'ay, wan je̱'e̱ myu̶gu'ugtu̶jk nandu'un mu̶'oy'aty.

5Mmu̶dajtku̶x je̱'e̱ mjoot mwinma'añ du'un nandu'un neby je̱'e̱ Cristo Jesús jyoot wyinma'añ mu̶dajtyu̶ñ,#2.5 Neby je̱'e̱ Cristo Jesús jyoot wyinma'añ mu̶dajtyu̶ñ: nije̱' wiingpu̶ jaaybyu̶du̶jk myu̶naangu̶xy: mu̶dyiibu̶ mu̶baad tuungu̶xyu̶ñ je̱'e̱ mu̶dyiibu̶ tu'ugyu̶ yajpaatku̶xpu̶ñ mu̶u̶d je̱'e̱ Cristo Jesús. 6je̱'e̱ mu̶dyiibu̶:

Oy najty jya'aDiósu̶ch,

peru̶ ka'p myu̶naañ ko je̱'e̱ Dios kuaanu̶ mu̶bada'añ,

7ñajtz'ixu̶u̶y je̱'e̱ myu̶k'ajtu̶ñ je̱'e̱ mu̶dyiibu̶ najty jya'amu̶dajtypyu̶ñ,

y chi ñaybyu̶daaku̶ neby tu'ug tuumbu̶ju̶ñ mya'axung'ajty neby oy mu̶dyiibu̶ ja'ayu̶ñ.

Y ko du'un myiiñ neby oy mu̶dyiibu̶ ja'ayu̶ñ,

8chi ku̶'u̶m yuung naaxypy ñaybyu̶daaku̶,

y ko y'u̶u̶mu̶dooy kyapxymyu̶dooy, paady yaj'o'ku̶,

y jim cruutzkú̶xp je̱'e̱ tzo'oydyu'un o'ku̶ñ paady ijxy.

9Paady je̱'e̱ Dios je̱'e̱ mu̶jku'umaayu̶ñ myooyu̶,

y tu̶ je̱'e̱ xyu̶u̶ ni'igyu̶ ku'umaay pyu̶daakku̶xyu̶,

ka'p je̱'e̱ xyu̶u̶ du'un nipú̶nu̶ñu̶ba,

10wan ko naty je̱'e̱ Jesús xyu̶u̶ kapxpaattu̶ ajku̶xy, ku̶xyu̶

ñayñajtzkojxtu̶na'awu̶u̶yu̶gu̶xu̶ch je̱'e̱ mu̶dyiibu̶ tzajpjooty yajpaatku̶xpu̶ñ,

je̱'e̱ mu̶dyiibu̶ ya naaxwiiñ yajpaatku̶xpu̶ñ y je̱'e̱ mu̶dyiibu̶ yajpaatku̶xpu̶ñ ma je̱'e̱ o'ogyjya'ay yajpaatku̶xyu̶ñ,

11y wan nigu̶xyu̶ ku'ubu̶jkku̶xu̶ch

ko je̱'e̱ Jesucristo je̱' je̱'e̱ Windzú̶n,

wan je̱'e̱ Dios Teedy du'un windzu̶gu̶'u̶y y'ídu̶ch.

Pu̶njaty je̱'e̱ Cristo mu̶bu̶jkku̶xpu̶ñ du'un je̱'e̱ ya naaxwiiñ ajku̶xy neby je̱'e̱ tu̶kxu̶ñ jaju̶ñ

12“Mu̶gu'uktu̶jk, je̱'e̱ mu̶dyiibu̶ u̶u̶ch oy ndzojkypy nju̶wu̶u̶ybyu̶ñ, du'un neby u̶u̶ch miich tu̶ xykyapxymyu̶doogu̶xyu̶ñ ko u̶u̶ch tu̶ nyajpaady ma miich ajku̶xyu̶ñ, kapxymyu̶doogu̶ch jada'achám ni'igyu̶ ajku̶xy ma u̶u̶ch yam ju̶gue̱m nyajpaadyu̶ñ. Yajkoptu̶gu̶u̶ygyu̶x je̱'e̱ mni'idzooku̶ñ ajku̶xy mu̶u̶d je̱'e̱ mu̶jpu̶ windzu̶gu̶'u̶ñ. 13Je̱' ko je̱'e̱ Dios je̱'e̱ joot winma'añ xymyooygyu̶xp neby je̱'e̱ oybyu̶ mnijoot'ajtku̶xu̶chu̶ñ y je̱'e̱ mu̶dyiibu̶ xypyube̱jtku̶xpu̶ñ mduungu̶xu̶ch je̱'e̱ oybyu̶ tuung, du'un neby je̱'e̱ tzokyu̶ñ mduungu̶xu̶chu̶ñ.

14Tuungu̶x ku̶xyu̶ tii du'umbu̶ ka'p mnayñi'oju̶u̶yu̶gu̶xu̶ch y ka'p y'adzip y'ama'adu̶ch, 15ka'pu̶ pu̶n xypyoky'ijxku̶xu̶ch y ka'pu̶ pu̶n myu̶na'anu̶ch ko tu̶ mduundu̶gooygyu̶xy. Wan je̱'e̱ Dios xy'ung'ajtku̶xy oy yajxón y ka'p pyokymyu̶u̶d kyu̶dyeeymyu̶u̶du̶ch ju̶bu̶kja'ay'agujk, y ma je̱'e̱ mu̶dyiibu̶ je̱'e̱ Dios ka'p kapxymyu̶doogu̶xyu̶ñ. Y ma adayaaba ja'ay ajku̶xyu̶ñ, du'un miich m'adu̶kx m'ajajku̶xy neby je̱'e̱ maymyu̶dza'a y'adu̶kxy y'ajajyu̶ñ ma kyoodzu̶chu̶ñ. 16Y kapxwa'kx'adu̶u̶tzku̶x je̱'e̱ ayuuk tu̶y'ajt je̱'e̱ mu̶dyiibu̶ je̱'e̱ jugy'ajtu̶ñ wiinu̶u̶xu̶u̶bu̶ ye̱jkpu̶ñ. Y du'un ko naty je̱'e̱ Cristo ja'adu'ook myiñ, mu̶'it u̶u̶ch jootkujk nayjyu̶wu̶'u̶wu̶u̶ju̶ch mu̶u̶d miich kyu̶xpu̶ ajku̶xy, ko u̶u̶ch du'un nejwu̶'u̶wu̶ch ko ka'p u̶u̶ch je̱'e̱ Dios y'ayuuk tyu̶y'ajt nigoo tu̶ niyo'oyu̶u̶yu̶ y ko ka'p u̶u̶ch je̱'e̱ nduung nigoo tu̶ ñi'itu̶góy. 17Y oy u̶u̶ch je̱'e̱ ngu̶'u̶mjugy'ajtu̶ñ nja'adimykyu̶'u̶ye̱jkpu̶ch neby je̱'e̱ windzu̶gu̶'u̶ñdyu̶ñ, neby je̱'e̱ yojxu̶ñ du'un kya'pxu̶chu̶ñ je̱'e̱ mu̶dyiibu̶ miich mmu̶dajtku̶xypyu̶ñ ko je̱'e̱ Dios mmu̶bu̶jkku̶xy. U̶u̶ch xondaakpu̶ch du'un y xondaakpu̶ch mu̶u̶d miich nigu̶xyu̶ ajku̶xy. 18Y nan jootkugu̶u̶ygyu̶x miich nandu'un y jootkugu̶u̶ygyu̶x mu̶u̶d u̶u̶ch.

Timoteo mu̶u̶d je̱'e̱ Epafrodito

19Pu̶nu̶ je̱'e̱ Windzú̶n Jesús du'un tzojkp, nyajnigue̱jxku̶xu̶py je̱'e̱ Timoteo mu̶k'eemby, wan u̶u̶ch nxonda'agu̶ch ko naty je̱'e̱ ayuuk ya mu̶mech neby miich jim myajpaatku̶xyu̶ñ. 20Je̱' ko ka'p u̶u̶ch ya ni pu̶n ja'adu'ug nmu̶u̶du̶ch neby adaa Timoteo pu̶n du'un nandu'un winmaaby neby u̶u̶chu̶ñ, y pu̶n jaanch mu̶joottu̶gooby neby je̱'e̱ m'oy'ajtu̶ñ miich mbaatku̶xu̶chu̶ñ; 21agu̶ kyu̶'u̶mduung je̱'e̱ yajkoptu̶gu̶u̶ygyu̶xypy y ka'p jye̱'e̱yu̶ch je̱'e̱ Jesucristo tyuung. 22Peru̶ miich ajku̶xy tu̶ miich du'un mnejwu̶u̶ygyu̶xy ko je̱'e̱ Timoteo oy yajxón jya'ay'áty, y neby u̶u̶ch tu̶ xymyu̶dtuñu̶ñ ko u̶u̶ch je̱'e̱ ayuuk tu̶y'ajt tu̶ ngapxwa'kxy, tu̶ xypyubétyu̶ch du'un neby je̱'e̱ ungteedy je̱'e̱ y'ung pyubedyiiju̶ñ. 23Du'un u̶u̶ch nwinmay ko je̱'e̱ Timoteo nyajnigue̱xaangu̶xy ko u̶u̶ch naty nejwu̶'u̶y neby u̶u̶ch je̱'e̱ n'ayo'on njootmáy naty jyatyu̶ñ. 24Nmu̶bu̶jkypyu̶ch ma je̱'e̱ Windzú̶n Jesucristo ko nú̶kxu̶bu̶ch u̶u̶ch nandu'un ku̶'u̶m mu̶k'eemby ma miich ajku̶xyu̶ñ.

25Nandu'un u̶u̶ch nwinmay nyajnigue̱xaangu̶xy je̱'e̱ Epafrodito, je̱'e̱ nmu̶gu'ug ajtu̶m ajku̶xy, je̱'e̱ mu̶dyiibu̶ u̶u̶ch nmu̶dtuumbyu̶ñ y je̱'e̱ mu̶dyiibu̶ u̶u̶ch nmu̶dtuumby nmu̶d'ayooybyu̶ñ, je̱'e̱ mu̶dyiibu̶ u̶u̶ch miich ku̶'u̶m xyajnigue̱jxku̶xu̶ñ ko u̶u̶ch ya xypyubé̱du̶ch maa u̶u̶ch ya ku̶xyu̶ wiinu̶ nyajmayjyátyu̶ñ. 26Je̱' janch mu̶naamb je̱'e̱ du'un nu̶kxy miich nigu̶xyu̶ xykyu'ixaangu̶xy, y janchmu̶k tyajy myay je̱' ko du'un tu̶ mnejwu̶u̶ygyu̶xy ko tu̶ pyu̶gyii. 27Y jaanch je̱'e̱ du'un ko tu̶ pyu̶gyii y ja'adimyjya'awe̱e̱n tu̶ kya'a'o'ogy; peru̶ tu̶ je̱'e̱ Dios pya'a''ayoyii, y nan ka'p je̱'e̱du̶'ajty tu̶ pya'a''ayoyii, nan tu̶ u̶u̶ch nandu'un xypya'a''ayóy ka'pu̶ u̶u̶ch ni'igyu̶ ndaju̶ch nmáyu̶ch neby u̶u̶ch ya je'emy nja'atáj nja'amaaybyu̶ju̶ñ. 28Paady yam pojt pu̶du̶'u̶gy nyajnigue̱jxku̶xy, wan miich mjootkugu̶u̶ygyu̶xu̶ch ko naty ja'adu'ook m'ijxku̶xy y ka'pu̶ u̶u̶ch yaa ndaju̶ch nmáyu̶ch. 29Ku'ubu̶jkku̶x oy yajxón xi'ig xon, du'un neby je̱'e̱ mu̶gu'ug mu̶dyiibu̶ yajpaatp ma je̱'e̱ Windzú̶n Jesucrístoju̶ñ, y tzojkku̶x ju̶wu̶u̶ygyu̶x je̱'e̱ mu̶dyiibu̶ du'un tuungu̶xpu̶ñ neby je̱'e̱ju̶ñ. 30Janch ja'adimyjya'awe̱e̱n je̱'e̱ tu̶ kya'a'o'ogy ko je̱'e̱ Cristo mu̶dúñ. Y ayo'onduum je̱'e̱ kyu̶'u̶mjugy'ajtu̶ñ tu̶ pu̶da'agy ko u̶u̶ch tu̶ xypyubety xypyudu̶gu̶'u̶y, tu̶ xykyudu̶naaygyu̶xy miich nigu̶xyu̶ ajku̶xy ma najty miich xyjya'apaatku̶xyu̶ñ xypyube̱jtku̶xu̶chu̶ch.

Currently Selected:

Filipenses 2: MIXE

Highlight

Copy