San Mateo 20

Je̱'e̱ tuumbu̶du̶jk ijxpe̱jt

1“Je̱'e̱ Dios y'ane̱'e̱mu̶ñ du'un je̱' neby je̱'e̱ kam windzú̶n tu'ug mu̶dyiibu̶ janch jopyñu̶ tzonu̶ñ tuumbu̶ u̶xtaaybyu̶ mu̶dyiibu̶ tuungu̶xu̶bu̶ñ ma je̱'e̱ y'uvakamu̶ñ. 2Chi mu̶dkapxy'ajty ajku̶xy ko je̱'e̱ tu'kxu̶u̶bu̶ mu̶juyaangu̶xy tu'kdenário, y chi tuumbu̶ kejxy ajku̶xy ma je̱'e̱ y'uvakamu̶ñ. 3Petyxyu̶u̶ je̱'e̱ ku''uvakam ja'adu'ook chónnu̶bu̶ tuumbu̶ u̶xtaaybyu̶, y jim je̱'e̱ wiingpu̶ ja'ay ijxy najty nigoo wya'kku̶xy tyu̶naaygyu̶xy ma je̱'e̱ ja'ay jyuuygyu̶xy tyókku̶xyu̶ñ mu̶dyiibu̶ najty ka'p tii tuungu̶xyu̶ñ. 4Chi nu̶maay ajku̶xy: ‘Nu̶kx miich nandu'un tuungu̶x ma u̶u̶ch je̱'e̱ n'uvakamu̶ñ, y mu̶du̶ydyu̶gu̶'u̶ nmu̶juyaangu̶xy.’ Y chi je̱' ñu̶kxy ajku̶xy. 5Kujkyxyu̶u̶ je̱'e̱ ku''uvakam ja'adu'ook chónnu̶ba, y chi ja'adu'ook mu̶nakyxu̶u̶ju̶ñu̶ba oy je̱'e̱ tuumbu̶ u̶xtaayñu̶ba. 6Ja'awe̱e̱n najty je̱'e̱ xu̶u̶ kya'aka'anu̶ ko ja'adu'ook ñú̶kxnu̶ba ma je̱'e̱ ja'ay jyuuygyu̶xy tyókku̶xyu̶ñ, y jim je̱'e̱ wiingpu̶ ja'ay paaty najty nigoo wya'kku̶xy tyu̶naaygyu̶xy mu̶dyiibu̶ najty ka'p tii tuungu̶xyu̶ñ, chi yajtu̶u̶y ajku̶xy: ‘¿Ti miich ko ya nigoo mxu̶u̶najxku̶xy y ka'p ti mduungu̶xy?’ 7Chi je̱' y'adzooy ajku̶xy: ‘Je̱' ko ka'p u̶u̶ch pu̶n tuumbu̶ tu̶ xyñu̶maaygyu̶xy.’ Mu̶'it je̱'e̱ ku''uvakam ñu̶maayu̶ ajku̶xy: ‘Nu̶kx miich nandu'un tuungu̶x ma u̶u̶ch je̱'e̱ n'uvakamu̶ñ.’#20.7 Nije̱' wiingpu̶ versión myu̶na'añ: mu̶du̶ydyu̶gu̶'u̶ nmu̶juyaangu̶xy.

8“Ko kyoodzu̶u̶yñu̶, chi je̱'e̱ ku''uvakam je̱'e̱ tyuumbu̶ windzú̶n nu̶maay: ‘Mu̶j'yaaxku̶x je̱'e̱ tuumbu̶du̶jk y mu̶juuygyu̶x, je̱' jayu̶jp mu̶juuygyu̶x je̱'e̱ mu̶dyiibu̶ u̶x'aam tu̶ tyuundu̶gu̶u̶ygyu̶xyu̶ñ, y je̱' u̶x'aam mu̶juuygyu̶xu̶py je̱'e̱ mu̶dyiibu̶ jayu̶jp tu̶ tyuundu̶gu̶u̶ygyu̶xyu̶ñ.’ 9Mu̶'it je̱'e̱ tuumbu̶du̶jk myiingu̶xy je̱'e̱ mu̶dyiibu̶ najty u̶x'aam tuumbu̶ tu̶ tyu̶gu̶u̶ygyu̶xy ko najty je̱'e̱ xu̶u̶ ja'awe̱e̱n kya'aka'anu̶, y ka'pxy je̱'e̱ nidu'ug nidu'ug yajmu̶juuygyu̶xy tu'kdenário meeñ tu'kxu̶u̶gudúñ. 10Jak'u̶x'aam myiingu̶xy je̱'e̱ mu̶dyiibu̶ najty jayu̶jp tuumbu̶ tu̶ tyu̶gu̶u̶ygyu̶xy, je̱' du'un najty je̱'e̱ myu̶naangu̶xy naxy ndijy najty je̱'e̱ yajmu̶juyaangu̶xy; peru̶ nandu'un je̱'e̱ nidu'ug nidu'ug yajmu̶juuygyu̶xy tu'kdenário meeñ tu'kxu̶u̶gudúñ. 11Ko du'un kipxyjyaty yajmu̶juuy ajku̶xy, chi je̱'e̱ ku''uvakam mu̶jootma'ty ajku̶xy, 12cham nu̶maaygyu̶xy: ‘Yu̶'u̶ jiibu̶ tuumbu̶du̶jk ajku̶xy u̶x'aam yu̶'u̶ tu̶ jya'tku̶xy y je'eyu̶ yu̶'u̶ tu'k-hooru̶ tu̶ tyuungu̶xy, y miich nandu'un yu̶'u̶ tu̶ mu̶juuygyu̶xy neby u̶u̶ch ajku̶xyu̶ñ, u̶u̶ch tu'kxu̶u̶du̶góyu̶ch tu̶ nduungu̶xy y tu̶ nxu̶u̶du̶u̶dzku̶xyu̶ch tu'kxu̶u̶du̶góy.’ 13Peru̶ chi je̱'e̱ ku''uvakam je̱'e̱ tuumbu̶du̶jk nidu'ugtu̶ adzooy: ‘Mu̶gu'ug, ka'p miich yam we̱e̱nu̶ nmu̶juy. ¿Nej ka'p du'un tu̶ ngapxy'ajtu̶m tu'kdenário meeñ je̱'e̱ tu'kxu̶u̶bu̶? 14Matz yu̶'u̶ mmu̶ju'uñ y nu̶kxnu̶. Pu̶nu̶ u̶u̶ch yu̶'u̶ du'un nmu̶juye̱e̱mby je̱'e̱ mu̶dyiibu̶ u̶x'aam tuumbu̶ tu̶ tyu̶gu̶'u̶yu̶ñ du'un neby miich tu̶ nmu̶juyu̶ñ, 15u̶u̶ch nmu̶u̶du̶ch je̱'e̱ ane̱'e̱mu̶ñ neby u̶u̶ch tii ndúnu̶chu̶ñ neby u̶u̶ch naty je̱'e̱ n'aa njoot timychokyu̶ñ mu̶u̶d u̶u̶ch je̱'e̱ ngu̶'u̶mmeeñ. ¿O nej je̱' u̶u̶ch xykya'ayajmu̶'oy'ijxp ko u̶u̶ch n'oyjya'ayu̶chu̶?’

16“Paady je̱'e̱ mu̶dyiibu̶ cham u̶x'aam'ajtku̶xpu̶ñ, y je̱' jayu̶jp'ádu̶p ajku̶xy; y nan je̱'e̱ mu̶dyiibu̶ cham jayu̶jp'ajtku̶xpu̶ñ, y je̱' u̶x'aam'ádu̶p ajku̶xy.”

Jesús mu̶du̶gu̶u̶g'ook nigapxy ko y'o'oga'añ

(Mc 10.32-34; Lc 18.31-34)

17Tu'u'aam najty je̱'e̱ Jesús ajku̶xyu̶ñ; ñú̶kxku̶xy najty Jerusalén, chi je̱'e̱ nimajmé̱tzkpu̶ dyiscípulotu̶jk abu̶ky woodzóñ y nu̶maay ajku̶xy:

18—Du'un neby m'ijxku̶xy mnejwu̶u̶ygyu̶xyu̶ñ, cham jim Jerusalén nnú̶kxu̶m ajku̶xy, ma u̶u̶ch nyajku̶'u̶yé̱gu̶chu̶ñ ma je̱'e̱ teedy windzu̶ndu̶jk y ma je̱'e̱ Dios y'ane̱'e̱mu̶ñ windzu̶ndu̶jk ajku̶xyu̶ñ, y je̱'e̱ju̶ch xykyu̶'u̶yé̱gu̶p ajku̶xy ko u̶u̶ch wan xyaj'o'kku̶xy, u̶u̶ch je̱' je̱'e̱ ja'ay mu̶dyiibu̶ tzon tzajpjooty, 19y xykyu̶'u̶ye̱jkku̶xu̶bu̶ch ma je̱'e̱ ja'ay mu̶dyiibu̶ ka'p jyudíoja'ayu̶chu̶ñ ajku̶xy wan u̶u̶ch xyñixiik xyajxiikku̶xu̶ch, xywyojpku̶x xykyojxku̶xu̶chu̶ch y xyajcruutzpe̱jtku̶xu̶chu̶ch; peru̶ kudu̶gu̶u̶g xu̶u̶ u̶u̶ch ja'adu'ook njuugypyú̶ku̶ch.

Je̱'e̱ mu̶dyiibu̶ je̱'e̱ Santiago y je̱'e̱ Juan tyaj ajku̶xy yujkwaanu̶ñ

(Mc 10.35-45)

20Chi je̱'e̱ Santiago y je̱'e̱ Juan tyaj ajku̶xy, je̱'e̱ Zebedeo y'ung ajku̶xy, kipxy mu̶u̶d je̱' ajku̶xy nimu̶jwa'ky je̱'e̱ Jesús y chi ñayñajtzkojxtu̶na'awu̶u̶yu̶ ma je̱' wyinduuyu̶ñ yujkwa'anaanu̶ may'ajt tu'ug. 21Chi je̱'e̱ Jesús yajtu̶u̶wu̶:

—¿Ti mdzojkypy?

Chi je̱' y'adzooy:

—M'ane̱'e̱mu̶p ko naty je̱'e̱ m'ane̱'e̱mu̶ñ mbaady ko u̶u̶ch je̱'e̱ n'ung mnamu̶jk y'u̶ñaaygyu̶xu̶ch tu'ug a'oy'eemby y ja'adu'ug anajty'eemby.

22Chi je̱'e̱ Jesús y'adzooy:

—Miich ajku̶xy ka'p mnejwu̶u̶ygyu̶xy tii myujkwaangu̶xypyu̶ñ. ¿Nej mmu̶najx myajnajxku̶xu̶py je̱'e̱ tzaachpyu̶ ayo'on je̱'e̱ mu̶dyiibu̶ u̶u̶ch nmu̶nax nyajnaxe̱e̱mbyu̶ñ?#20.22 Nije̱' wiingpu̶ versión myu̶na'añ: y je̱'e̱ o'ku̶ñ je̱'e̱ mu̶dyiibu̶ u̶u̶ch nmu̶nax nyajnaxe̱e̱mbyu̶ñ.

Chi je̱' y'adzooy ajku̶xy:

—Nmu̶nax nyajnáxu̶byu̶ch du'un ajku̶xy.

23Chi je̱'e̱ Jesús y'adzoowu̶ ajku̶xy:

—Miich ajku̶xy mja'amu̶najx mja'ayajnajxku̶xu̶py je̱'e̱ tzaachpyu̶ ayo'on je̱'e̱ mu̶dyiibu̶ u̶u̶ch nmu̶nax nyajnaxe̱e̱mbyu̶ñ,#20.23 Nije̱' wiingpu̶ versión myu̶na'añ: y mja'amu̶najx mja'ayajnajxku̶xu̶py je̱'e̱ oku̶ñ je̱'e̱ mu̶dyiibu̶ u̶u̶ch nmu̶nax nyajnaxe̱e̱mbyu̶ñ. peru̶ u̶u̶ch ka'p u̶u̶ch je̱'e̱ ane̱'e̱mu̶ñ nmu̶u̶du̶ch ko nmooygyu̶xu̶ch m'u̶ñaaygyu̶xu̶ch ma u̶u̶ch je̱'e̱ namu̶jku̶ñ tu'ug a'oy'eemby y ja'adu'ug anajty'eemby, je̱' je̱'e̱ yajmo'owaamb ajku̶xy je̱'e̱ mu̶dyiibu̶ u̶u̶ch je̱'e̱ nDeedy du'un tu̶ nibu̶dagu̶'u̶yu̶ñ.

24Ko je̱'e̱ nimajkpu̶ discípulotu̶jk adaa du'un mu̶dooy ajku̶xy, chi je̱'e̱ nime̱tzkpu̶ myu̶gu'ugtu̶jk mu̶jootma'ty ajku̶xy je̱'e̱ Santiago y je̱'e̱ Juan. 25Chi je̱'e̱ Jesús myu̶j'yaaxu̶ ajku̶xy: y ñu̶maayu̶ ajku̶xy:

—Du'un neby miich mnejwu̶u̶ygyu̶xyu̶ñ, je̱'e̱ naaxwiiñjya'ay windzu̶ndu̶jk ajku̶xy janch mu̶k naax kajpt je̱'e̱ ane̱'e̱mgu̶xy, y je̱'e̱ mu̶jtuungmu̶u̶dpu̶du̶jk ajku̶xy jakmu̶k je̱'e̱ ni'igyu̶ y'ane̱'e̱mgu̶xy ma je̱' ajku̶xyu̶ñ. 26Peru̶ ma miich ajku̶xyu̶ñ ka'p du'un mja'ay'ajtku̶xu̶ch. Je̱' je̱'e̱ tu̶y'ajtu̶ñ ko je̱'e̱ mu̶dyiibu̶ je̱'e̱ mu̶jtuung tzojkp ma miich ajku̶xyu̶ñ, wan je̱'e̱ myu̶gu'ugtu̶jk mu̶dúñ; 27y pu̶n tii nigu'ubajk'adaamb ma miich ajku̶xyu̶ñ, du'un je̱'e̱ wan xymyu̶duungu̶xy neby je̱'e̱ tuumbu̶ ni'idoogypyu̶ju̶ñ. 28Je̱' ko nandu'un u̶u̶ch, u̶u̶ch je̱' je̱'e̱ ja'ay mu̶dyiibu̶ tzon tzajpjooty ka'p u̶u̶ch ya naaxwiiñ tu̶ nmiñ ko u̶u̶ch je̱'e̱ ja'ay xypyube̱jtku̶xu̶ch, tu̶ nmíñu̶ch ya naaxwiiñ neby u̶u̶ch je̱'e̱ ja'ay nbubé̱du̶chu̶ñ, y neby u̶u̶ch je̱'e̱ njugy'ajtu̶ñ nyé̱gu̶chu̶ñ ma je̱'e̱ o'ku̶ñ mu̶u̶d je̱'e̱ mayjya'ay gyu̶xpu̶ ajku̶xy, wan du'un y'awa'adzpu̶dzu̶u̶mgu̶xu̶ch.

Jesús je̱'e̱ wiindzja'ay me̱tzk yajwindu̶kxu̶'u̶gy

(Mc 10.46-52; Lc 18.35-43)

29Ko je̱'e̱ Jesús jim Jericó chóngu̶xnu̶, chi je̱'e̱ mayjya'ay pyadzonnu̶ ajku̶xy. 30Jim najty wiindzja'ay nime̱tzk y'u̶ñaaygyu̶xy tu'uba'a, y ko mu̶dooy ajku̶xy ko je̱'e̱ Jesús najty jim ñaxy, chi yaaxke̱e̱kku̶xy:

—¡Windzú̶n, David y'ok'ung y'ok'ana'k, u̶u̶ch pa'a''ayoog ajku̶xy!

31Je̱'e̱ mayjya'ay y'ojku̶xypy najty je̱'e̱ wiindzja'ay ajku̶xy ko wan amoongu̶xy, peru̶ je̱' ajku̶xy ni'igyu̶ najty je̱'e̱ mu̶k jyak'yaaxke̱e̱kku̶xy.

—¡Windzú̶n, David y'ok'ung y'ok'ana'k, u̶u̶ch pa'a''ayoog ajku̶xy!

32Mu̶'it je̱'e̱ Jesús tyu̶naayxyu̶jpy, chi je̱'e̱ wiindzja'ay mu̶j'yaaxy ajku̶xy y yajtu̶u̶y ajku̶xy:

—¿Ti mdzojkku̶xypy ndúnu̶chu̶ch mu̶u̶d miich kyu̶xpu̶ ajku̶xy?

33Chi je̱' y'adzoowu̶ ajku̶xy:

—Windzú̶n, u̶u̶ch yajwindu̶kxu̶'k ajku̶xy.

34Mu̶'it je̱'e̱ Jesús pya'a''ayoowu̶ ajku̶xy y ñi'idoonu̶xu̶ je̱'e̱ wyiin ajku̶xy. Je̱'e̱ timymyu̶'ityu̶ je̱'e̱ wiindzja'ay wyindu̶kxu̶'ky ajku̶xy, y chi je̱'e̱ Jesús padu'ubu̶jky ajku̶xy.

Currently Selected:

San Mateo 20: MIXE

Highlight

Copy