San Mateo 21

Jesús tyu̶gu̶'u̶y Jerusalén

(Mc 11.1-11; Lc 19.28-40; Jn 12.12-19)

1Ko je̱'e̱ Jerusalén kajpt oy mu̶wingoongu̶xnu̶ y ko oy jya'tku̶xy ma je̱'e̱ Betfagé kajptu̶ñ, ma je̱'e̱ Olivos koptu̶ñ, chi je̱'e̱ Jesús dyiscípulotu̶jk nime̱tzk ke̱jxu̶'ky, 2nu̶maay ajku̶xy:

—Nú̶kxku̶x ma yu̶'u̶ jiibu̶ wingonbu̶ mutzk kajptu̶ñ. Y jim je̱'e̱ buurru̶taj tu'ug mbaadku̶xu̶ch kyuxóchu̶ch naty mu̶u̶d je̱'e̱ y'ung. Mmu̶gue̱ju̶u̶ygyu̶xu̶py y mmu̶miingu̶xu̶py. 3Y pu̶nu̶ jii pu̶n nej xyñu̶maaygyu̶xy, du'un mnu̶maaygyu̶xu̶ch ko je̱'e̱ Windzú̶n jim tzojkp y ko mu̶k'eemby ja'adu'ook yajwimbida'añ.

4Adaa paady adaa du'un tyuunu̶ jyajtu̶ wan du'un yajkuydyúnu̶ch neby je̱'e̱ Dios y'ayuuknajtzkapxu̶u̶ybyu̶ myu̶naañu̶ñ, ko du'un kujaay:

5“Nu̶maaygyu̶x je̱'e̱ ja'ay je̱'e̱ mu̶dyiibu̶ tzu̶naaygyu̶xpu̶ñ ma je̱'e̱

Sión kajptu̶ñ:

‘Ok'ijxku̶x, chi je̱'e̱ mMu̶j'ane̱'e̱mbu̶ miich xyñimiingu̶xy,

yuung naaxypy, y'u̶ña'ay buurru̶kú̶xp,

buurru̶'ungkú̶xp, ju̶yujk tzu̶mychu̶u̶mbu̶ y'ung.’ ”

6Chi je̱'e̱ discípulotu̶jk ñu̶kxy ajku̶xy mu̶dyiibu̶ je̱'e̱ Jesús kye̱jxu̶ñ, y kuydyuuñ du'un ajku̶xy neby je̱'e̱ Jesús najty tu̶ y'ane̱'e̱mu̶gu̶xyu̶ñ. 7Chi je̱'e̱ buurru̶taj wijtzmiiñ ajku̶xy mu̶u̶d je̱'e̱ buurru̶'úng ma je̱'e̱ Jesúsu̶ñ, chi ju̶be'eñ ajku̶xy mu̶u̶d je̱'e̱ wit y chi je̱'e̱ Jesús buurru̶'ungkú̶xp pyejty. 8Janch mayjya'ay najty, nije̱' najty kyu̶'u̶mwít najtzye̱'e̱bu̶u̶ygyu̶xy mu̶j tu'ugujk, y nije̱' najty kepy'aakx tujkku̶xy y pu̶daakku̶xy mu̶j tu'ugujk. 9Y je̱'e̱ mayjya'ay je̱'e̱ mu̶dyiibu̶ najty jayu̶jp nú̶kxku̶xpu̶ñ y je̱'e̱ mu̶dyiibu̶ najty u̶x'aam nú̶kxku̶xpu̶ñ, mu̶kjaty najty je̱'e̱ yaaxku̶xy jyojkku̶xy:

—¡Ku'umáy je̱'e̱ Mu̶j'ane̱'e̱mbu̶ David y'ok'ung y'ok'ana'k! ¡Kapxpaady je̱'e̱ mu̶dyiibu̶ miimb mu̶u̶d je̱'e̱ Windzú̶n Dios kyu̶xpu̶ xyu̶u̶! ¡Jiiby tzajpjooty je̱'e̱ ku'umaayu̶ñ ma je̱'e̱ Diosu̶ñ!

10Ko je̱'e̱ Jesús kyajptu̶gu̶u̶y jim Jerusalén, chi je̱'e̱ mayjya'ay ku̶xyu̶ yaaxtu̶gu̶u̶y jyojktu̶gu̶u̶y ajku̶xy y yajtu̶u̶gu̶xy nimay:

—¿Pu̶n yu̶'u̶ du'un?

11Y je̱'e̱ ja'ay du'un najty je̱'e̱ y'adzoogu̶xy:

—Je̱'e̱ Dios y'ayuuknajtzkapxu̶u̶ybyu̶ Jesús yu̶'u̶, je̱'e̱ mu̶dyiibu̶ Nazaret tzombu̶ñ Galilea naaxjooty.

Jesús ke̱jxpu̶dzu̶u̶mda'ay je̱'e̱ ajuubyu̶ adokpu̶ ajku̶xy ma je̱'e̱ mu̶jtzajptu̶jku̶ñ

(Mc 11.15-19; Lc 19.45-48; Jn 2.13-22)

12Mu̶'it je̱'e̱ Jesús tyu̶gu̶u̶y ma je̱'e̱ mu̶jtzajptu̶jku̶ñ y yajpu̶dzu̶u̶mdu̶gu̶u̶y je̱'e̱ ja'ay jiiby ku̶xyu̶ mu̶dyiibu̶ najty jiiby ajuuby adokpu̶ñ ajku̶xy. Tyijwimbijttaayu̶ je̱'e̱ meeñygyuwijtzpu̶du̶jk myeesu̶ ajku̶xy ma najty myeeñygyuwijtzku̶xyu̶ñ, je̱'e̱ meeñ mu̶dyiibu̶ wiing naax wiing kajpt tzombu̶ñ, y nan tyijwimbijttaayu̶ je̱'e̱ muuxytyokpu̶du̶jk tyokpe̱jt ajku̶xy; 13y nu̶maay ajku̶xy:

—Du'un myu̶na'añ ma je̱'e̱ Dios ñaky kyuja'ayu̶chu̶ñ: ‘U̶u̶ch je̱'e̱ ndu̶jk Dios o'owu̶dajtaakt je̱'’, peru̶ miich ajku̶xy je̱' miich yu̶'u̶ mwaangu̶xy me̱e̱tzpu̶ tu̶jk.

14Chi je̱'e̱ Jesús ñimiinu̶ je̱'e̱ wiindzja'ay ajku̶xy y je̱'e̱ tekymya'atja'ay ajku̶xy ma je̱'e̱ mu̶jtzajptu̶jku̶ñ, y je̱' yajtzooktaay je̱'e̱ ajku̶xy. 15Peru̶ ko je̱'e̱ teedy windzu̶ndu̶jk y je̱'e̱ Dios y'ane̱'e̱mu̶ñ windzu̶ndu̶jk je̱'e̱ mu̶jwinma'añ du'un ijxy ajku̶xy je̱'e̱ mu̶dyiibu̶ je̱'e̱ Jesús najty tyuumbyu̶ñ, y ko mu̶dooy ajku̶xy ko je̱'e̱ pi'k'ana'ktu̶jk yaaxku̶xy jyojkku̶xy ma je̱'e̱ mu̶jtzajptu̶jku̶ñ: “¡Ku'umáy je̱'e̱ mu̶j'ane̱'e̱mbu̶ David y'ok'ung y'ok'ana'k!”, chi jyoot'ambu̶jky ajku̶xy, 16y nu̶maay je̱'e̱ Jesús ajku̶xy:

—¿Mmu̶dooby neby yu̶'u̶ pi'k'ana'ktu̶jk myu̶naangu̶xyu̶ñu̶?

Chi je̱'e̱ Jesús y'adzoowu̶ ajku̶xy:

—Du'un, nmu̶dooybyu̶ch. Peru̶ ¿nej ka'anu̶ miich mgápxku̶xyñu̶ je̱'e̱ Dios ñaky mu̶dyiibu̶ adayaaba du'un nigapxpu̶ñ? Ma du'un myu̶na'añu̶ñ:

‘Tu̶ je̱'e̱ pi'k'ana'ktu̶jk y je̱'e̱ ma'axungtu̶jk u̶u̶wu̶ñ yaaxu̶ñ mmooygyu̶xy,

ko xywyin'u̶u̶gu̶xu̶ch xywyinyaaxku̶xu̶ch.’

17Mu̶'it je̱'e̱ Jesús wyinyo'oydyuuttu̶ ajku̶xy y ñu̶kxy jim Betania kajpt, y jim myawu̶'u̶my.

Jesús je̱'e̱ higueeru̶ kepy wu̶'u̶y poky, je̱'e̱ mu̶dyiibu̶ najty ka'p tyu̶u̶mmu̶u̶du̶chu̶ñ

(Mc 11.12-14, 20-26)

18Je̱'e̱ mu̶'it jopy, ko najty wyimbijtnu̶ba kajptjooty, chi je̱'e̱ Jesús yuu pyaattu̶. 19Chi je̱'e̱ higueeru̶ kepy tu'ug ijxpaaty timytyu'uba'a y chi ninu̶kxy, peru̶ ka'p je̱'e̱ tyu̶u̶m paattu̶, je'eyu̶ je̱'e̱ najty nigoo jyanchku'aayu̶ch. Mu̶'it je̱'e̱ higueeru̶ kepy nu̶maay:

—¡Nimu̶naaxu̶u̶ miich mga'a'oktu̶u̶mbe̱jtnu̶ch!

Y timymyu̶'ityu̶ je̱'e̱ higueeru̶ kepy tyu̶u̶ch. 20Ko je̱'e̱ discípulotu̶jk du'un ijxy ajku̶xy neby najty tu̶ tyuñ tu̶ jyadyiiju̶ñ, chi mu̶k yajnú̶kxy yajju̶wu̶u̶y ajku̶xy y yajtu̶u̶y je̱'e̱ Jesús ajku̶xy:

—¿Neby yu̶'u̶ higueeru̶ kepy du'un timymyu̶'ityu̶ tu̶ tyu̶'u̶ch?

21Chi je̱'e̱ Jesús y'adzoowu̶ ajku̶xy:

—Janch tu̶y'ajtu̶ñ du'un nnu̶maaygyu̶xy, pu̶nu̶ mmu̶dajtku̶xypy je̱'e̱ mu̶bu̶jk'ajtu̶ñ y pu̶nu̶ ka'p mjootme̱tzku̶u̶ygyu̶xy, ka'p adaadu̶'ajty je'eyu̶ mdúnu̶py ajku̶xy neby u̶u̶ch je̱'e̱ higueeru̶ kepy tu̶ nduñu̶ñ, nan mnu̶maaygyu̶xu̶py adayaaba kopt: ‘Ju̶gue̱'e̱g jim y nu̶kx mejyjyooty ka'aw’, y tuunu̶ jadu̶u̶wu̶p je̱'e̱ du'un. 22Y ku̶xyu̶ tijaty naty miich myujkwaangu̶xypyu̶ñ ko naty je̱'e̱ Dios mmu̶bu̶jktzoogu̶xy, yujkwaangu̶x mu̶u̶d je̱'e̱ mu̶bu̶jku̶ñ tu'ug'aa tu'ugjoot, y myajmooygyu̶xu̶py je̱'.

Jesús y'ane̱'e̱mu̶ñ

(Mc 11.27-33; Lc 20.1-8)

23Ko adaa du'un tyuundaay jyajttaayu̶, chi je̱'e̱ Jesús tyu̶gu̶u̶y ma je̱'e̱ mu̶jtzajptu̶jku̶ñ. Cham najty jiiby yaj'u̶xpú̶ky, ko ñimiinu̶ je̱'e̱ teedy windzu̶ndu̶jk ajku̶xy y je̱'e̱ judío ja'ay y'amu̶jja'aydyu̶jk ajku̶xy, y chi yajtu̶u̶wu̶ ajku̶xy:

—¿Ti ane̱'e̱mu̶ñ adaa du'un mu̶u̶d mduñ ko je̱'e̱ ja'ay yaa myajpu̶dzu̶u̶mda'awu̶ch ma je̱'e̱ mu̶jtzajptu̶jku̶ñ y ko yaa myaj'u̶xpú̶gu̶ch ma je̱'e̱ mu̶jtzajptu̶jku̶ñ? ¿Pu̶n adaa ane̱'e̱mu̶ñ du'un tu̶ xymyo'oy?

24Chi je̱'e̱ Jesús y'adzoowu̶ ajku̶xy:

—U̶u̶ch miich nandu'un nyajtu̶waangu̶xypy tu'ug je̱'e̱ ayuuk, y pu̶nu̶ xy'adzoogu̶xpu̶ch, nan n'awaanu̶py nandu'un ajku̶xy tii ane̱'e̱mu̶ñ u̶u̶ch adaa du'un mu̶u̶d nduñu̶ñ. 25¿Pu̶n je̱'e̱ Juan Bautista ke̱jx ja'ay yajnu̶u̶be̱jtpu̶, je̱'e̱ Dios o je̱'e̱ ja'ay ajku̶xy?

Chi ñay'amayu̶ydyu̶gu̶u̶yu̶ ajku̶xy amíñ u̶xyu̶py: “Pu̶nu̶ n'adzoowu̶mby ko je̱'e̱ Dios ke̱jx, du'un yu̶'u̶ yaa xyñu̶maayu̶mu̶ch ajku̶xy: ‘¿Y tiiju̶tz ko mga'amu̶bu̶jku̶ ajku̶xy je̱' y'ayuuk?’ 26Y ka'p mu̶baad n'adzoowu̶m ajku̶xy ko je̱'e̱ ja'ay ke̱jx ajku̶xy, je̱' ko je̱'e̱ kajptja'ay ndzu̶gu̶u̶yu̶m ajku̶xy, je̱' ko nigu̶xyu̶ yu̶'u̶ du'un mu̶bu̶jkku̶xy ko je̱'e̱ Juan ijty jye̱'e̱yu̶ch je̱'e̱ Dios y'ayuuknajtzkapxu̶u̶ybyu̶.” 27Y chi je̱'e̱ Jesús adzooy ajku̶xy:

—Ka'p u̶u̶ch nnejwu̶u̶ygyu̶xy.

Mu̶'it je̱'e̱ Jesús y'adzoowu̶ ajku̶xy:

—Nan ni u̶u̶ch nga'anigapxa'añ tii ane̱'e̱mu̶ñ u̶u̶ch adaa du'un mu̶u̶d nduñu̶ñ.

Je̱'e̱ nime̱tzkpu̶ ung ijxpe̱jt

28Chi je̱'e̱ Jesús yajtu̶u̶wu̶ ajku̶xy:

—¿Nej miich m'okmu̶naangu̶xpu̶ mu̶u̶d adayaaba ijxpe̱jt? Tu'ug je̱'e̱ ya'aydyu̶jk me̱tzk najty y'ung je̱'e̱ mu̶u̶du̶ch, y chi nidu'ugtu̶ nu̶maay: ‘Ung, nu̶kx miich cham tun ma u̶u̶ch je̱'e̱ n'uvakamu̶ñ.’ 29Chi je̱'e̱ ung y'adzooy: ‘¡Ka'p u̶u̶ch nnu̶kxa'añ!’ Peru̶ kujeky wyinmaaydyu̶gajch, y chi ñu̶kxy. 30Chi je̱'e̱ ungteedy je̱'e̱ wiingpu̶ y'ung ninu̶kxy, y nandu'un nu̶maay. Chi je̱' y'adzooy: ‘Oy tety, u̶u̶ch nú̶kxu̶bu̶ch.’ Peru̶ ka'p je̱'e̱ ñu̶kxy. 31¿Mu̶dyiibu̶ je̱'e̱ nime̱tzkpu̶ ung du'un kuydyuun neby je̱'e̱ tyeedy najty tzokyu̶ñ?

—Chi y'adzooy ajku̶xy —je̱'e̱ jayu̶jpu̶.

Y chi je̱'e̱ Jesús ñu̶maayu̶ ajku̶xy:

—Janch tu̶y'ajtu̶ñ du'un nnu̶maaygyu̶xy ko je̱'e̱ yajkugube̱jtpu̶du̶jk mu̶dyiibu̶ je̱'e̱ gobierno romano mu̶duungu̶xpu̶ñ y je̱'e̱ to'oxyu̶jktu̶jk mu̶dyiibu̶ je̱'e̱ wiing ya'aydyu̶jk tu'ug tu'ug mu̶dtuundu̶gooygyu̶xpu̶ñ, ni'igu̶ jayu̶jp je̱'e̱ tyu̶gu̶u̶ygyu̶xu̶ch ma je̱'e̱ Dios y'ane'emyu̶ñ y ni'igu̶ ka'p miich ajku̶xyñu̶ba. 32Je̱' ko ooy je̱'e̱ Juan Bautista oy xyjya'ayaj'u̶xpu̶jkku̶xy neby mu̶baad mdzu̶naay mjugy'ajtku̶xyu̶ñ, y miich ajku̶xy ka'p miich je̱' y'ayuuk mmu̶bu̶jku̶ ajku̶xy; peru̶ yu̶'u̶ yajkugube̱jtpu̶du̶jk mu̶dyiibu̶ je̱'e̱ gobierno romano mu̶duungu̶xpu̶ñ y yu̶'u̶ to'oxyu̶jktu̶jk mu̶dyiibu̶ je̱'e̱ wiingpu̶ ya'aydyu̶jk tu'ug tu'ug mu̶dtuundu̶gooygyu̶xpu̶ñ, myu̶bu̶jku̶ je̱' y'ayuuk ajku̶xy. Peru̶ miich ajku̶xy oy miich adaa du'un ku̶xyu̶ mja'a'ijxy ajku̶xy, ka'p miich je̱'e̱ mwinma'añ m'u̶xmajch ajku̶xy neby mmu̶bu̶jkku̶xu̶chu̶ñ.

Je̱'e̱ ju̶bu̶k tuumbu̶du̶jk ijxpe̱jt

(Mc 12.1-12; Lc 20.9-19)

33“Amdo'ijtku̶x adayaaba ijxpe̱jt ja'adu'ug: Jii ijty ja'ay tu'ug naaxwindzú̶n mu̶dyiibu̶ je̱'e̱ uvakam pu̶daaku̶ñ y chi ku'u'agajy, y yaj'oyu̶u̶y tu'ug uvamu̶kxtaakt y yajpu̶du̶'ky tu'ug poch janch ku̶xp ma je̱'e̱ y'uvakam mu̶baad ku̶xyu̶ yaj'ixu̶'u̶yu̶ñ oy yajxón. Chi je̱'e̱ uvakam piiwa'kxy yejky ma je̱'e̱ tuumbu̶du̶jk nije̱' ajku̶xyu̶ñ y chi choñ. 34Ko je̱'e̱ uva piw'aatz paaty, chi je̱'e̱ tyuumbu̶du̶jk nije̱' kejxy ma je̱'e̱ tuumbu̶du̶jk ajku̶xyu̶ñ ko je̱'e̱ pu̶da'aky wan mo'oyii je̱'e̱ mu̶dyiibu̶ najty paattu̶bu̶ñ. 35Peru̶ je̱'e̱ tuumbu̶du̶jk myajtzku̶x je̱'e̱ kexyo'oybyu̶du̶jk: nije̱' winwojp ju̶jpwojpku̶xy, nije̱' yaj'o'ky ajku̶xy y nije̱' tzaaga'ch ajku̶xy. 36Chi je̱'e̱ kugam je̱'e̱ tyuumbu̶du̶jk ni'igyu̶ may kejxy ka'p jayu̶jp'ajtu̶ñu̶ba, peru̶ je̱'e̱ tuumbu̶du̶jk nandu'un je̱'e̱ y'adu̶u̶tzku̶xy neby najty jayu̶jp'ajt tu̶ y'adu̶u̶tzku̶xyu̶ñ.

37“Mu̶'it je̱'e̱ kyu̶'u̶m'úng kejxy, myu̶naañ: ‘Ka'p jyékyu̶ch ko u̶u̶ch yu̶'u̶ n'ung xy'ijxu̶ch ajku̶xy, yajmu̶j'ádu̶py yu̶'u̶ ajku̶xy.’ 38Peru̶ ko je̱'e̱ windzú̶n y'ung ijxu̶ ajku̶xy, chi je̱'e̱ tuumbu̶du̶jk ñayñu̶maayu̶ ajku̶xy amíñ u̶xyu̶py: ‘Yu̶'u̶ yu̶'u̶ tyeedy pyu̶da'agy mu̶wu̶'u̶maanu̶py; tzu̶ky yaj'o'ku̶m ajku̶xy y wan yu̶'u̶ kam nje̱'e̱'ajtu̶mu̶ch ajku̶xy.’ 39Chi majtzku̶xy, yajpu̶dzu̶u̶mgu̶xy uvakamjooty y yaj'o'ky ajku̶xy.

40“Y ko naty je̱'e̱ uvakam windzú̶n myiñ, ¿nej miich m'okmu̶naangu̶xpu̶ ti je̱'e̱ da'a tyúnu̶py mu̶u̶d je̱'e̱ tuumbu̶du̶jk ajku̶xy?”

41Chi je̱'e̱ Jesús adzooy ajku̶xy:

—Yaj'o'kta'awu̶py je̱'e̱ ju̶bu̶k tuumbu̶du̶jk ajku̶xy y ka'p ni du'uñdyu̶ pa'a''ayoogu̶xu̶ch, y je̱'e̱ wiingpu̶ tuumbu̶du̶jk je̱'e̱ uvakam piiwa'kxy myooygyu̶xu̶py, wan je̱'e̱ pu̶da'aky myo'owu̶u̶ju̶ch je̱'e̱ mu̶dyiibu̶ naty paattu̶bu̶ñ.”

42Mu̶'it je̱'e̱ Jesús ñu̶maayu̶ ajku̶xy:

—¿Nej ka'anu̶ miich nimu̶naa mgápxku̶xyñu̶ je̱'e̱ Dios ñaky? ma du'un myu̶na'añu̶ñ:

‘Je̱'e̱ oybyu̶ tzaa mu̶dyiibu̶ je̱'e̱ pojtzpu̶du̶jk ka'p yajtuuñ ajku̶xyu̶ñ,

je̱' oy tu̶ wyu̶'u̶mnu̶ ma je̱'e̱ poch chonda'agyu̶ñ.

Adaa, je̱'e̱ Windzú̶n Dios adaa du'un tuun,

y nmu̶daj nmu̶maaby adaa du'un ajtu̶m ajku̶xy.’

43Y paady miich du'un nnu̶maaygyu̶xy ko yajpu̶gaangu̶xp miich je̱'e̱ mgu'utujku̶ñ ka'pu̶ jiiby mdu̶gu̶u̶ygyu̶xu̶ch ma je̱'e̱ Dios y'ane̱'e̱mu̶ñ, y je̱' je̱'e̱ yajmo'owaangu̶xp je̱'e̱ mu̶dyiibu̶ je̱'e̱ Dios y'ane̱'e̱mu̶ñ ye̱jktu̶gátzu̶byu̶ñ ma je̱'e̱ mu̶dyiibu̶ je̱'e̱ Dios y'ane̱'e̱mu̶ñ kuydyunaangu̶xpu̶ñ. 44[Pu̶njaty tzaagú̶xp yujkku̶daagu̶xpu̶ñ, tu̶j wi'idz je̱'e̱ jyajtta'awu̶ch ajku̶xy; y pu̶nu̶ je̱'e̱ tzaa ni'igu̶daagóttu̶gu̶xp, jo'ptz jo'ptz je̱'e̱ jyajtta'awu̶ch ajku̶xy.]#21.44 Adayaaba texto korchete mu̶u̶dpu̶, ka'p je̱'e̱ jaaybyu̶du̶jk nije̱' tu̶ paatku̶xy.

45Je̱'e̱ teedy windzu̶ndu̶jk y je̱'e̱ Dios y'ane̱'e̱mu̶ñ windzu̶ndu̶jk ajku̶xy, ko adaa ijxpe̱jt du'un mu̶dooy ajku̶xy je̱'e̱ mu̶dyiibu̶ je̱'e̱ Jesús najty myu̶dyaakypyu̶ñ, chi oy winju̶wu̶u̶ygyu̶xy ko je̱' najty du'un nimu̶dyaaku̶p ajku̶xy. 46Mu̶'it ja'amadzaañ ajku̶xy, peru̶ ka'p majch ajku̶xy, je̱' ko najty chu̶gu̶u̶ygyu̶xy, je̱' ko myu̶bu̶jkku̶xypy najty je̱'e̱ mayjya'ay ko je̱'e̱ Jesús najty jye̱'e̱ju̶ch je̱'e̱ Dios y'ayuuknajtzkapxu̶u̶ybyu̶.

Currently Selected:

San Mateo 21: MIXE

Highlight

Copy