San Mateo 19

Jesús yaj'u̶xpú̶ky ko je̱'e̱ ja'ay tyo'oxyu̶jk u̶xmach

(Mc 10.1-12; Lc 16.18)

1Ko je̱'e̱ Jesús adayaaba du'un mu̶dyaaktaay, chi jim Galilea choñ y ñu̶kxy jim Judea naaxjooty jim Jordán mu̶jnu̶u̶'awiimb xu̶u̶bu̶dzu̶my'eemby. 2Chi je̱'e̱ mayjya'ay pyanu̶kxu̶, y yajtzook je̱'e̱ pa'amja'aydyu̶jk jim.

3Chi je̱'e̱ fariseotu̶jk nije̱' nimu̶jwa'kku̶xy je̱'e̱ Jesús, y neby mu̶baad joot'ijxku̶xy winma'añ'ijxku̶xyu̶ñ, chi yajtu̶u̶y ajku̶xy:

—¿Nej mu̶baad tu'ug ya'aydyu̶jk u̶xmach je̱'e̱ tyo'oxyu̶jk ko oy tii yajtzibu̶u̶ygyu̶xy?

4Chi je̱'e̱ Jesús y'adzoowu̶ ajku̶xy:

—¿Nej ka'anu̶ jiiby miich mgápxku̶xyñu̶ ma je̱'e̱ Dios ñakyu̶ñ ko je̱'e̱ Dios mu̶dyiibu̶ miich xyajkojku̶xu̶ñ maabu̶ je̱'e̱ naaxwiimbu̶ aga'an yajkojyu̶ñ, ‘ya'aydyu̶jk y to'oxyu̶jk je̱'e̱ yajkojy’? 5Y myu̶naañ: ‘Paady je̱'e̱ ya'aydyu̶jk je̱'e̱ tyaj tyeedy u̶xmádzu̶ch y pudu̶gu̶'u̶wu̶ch je̱'e̱ tyo'oxyu̶jk, y je̱'e̱ nime̱tzkpu̶ du'un naty je̱'e̱ ajku̶xyu̶ñ neby tu'ugpu̶ju̶ñ.’ 6Y ka'p naty du'un y'oknimé̱tzku̶chu̶ñ, tu'ug naty je̱'e̱ du'un je'eyu̶ju̶ñ. Y paady je̱'e̱ ja'ay ka'p mu̶baad yajnay'u̶xmachii je̱'e̱ mu̶dyiibu̶ je̱'e̱ Dios tu̶ wijtzmúkyu̶ñ.

7Chi je̱' Jesús yajtu̶u̶y ajku̶xy:

—¿Y ti je̱'e̱ Moisés ane̱'e̱mu̶ñ ko du'un yejky ko mu̶baad tu'ug ya'aydyu̶jk u̶xmach je̱'e̱ tyo'oxyu̶jk cham je̱'e̱ ñaky mo'oy tii gyu̶xpu̶ ko mu̶dnay'u̶xmachiiju̶ñ, y u̶x'óju̶ch du'un?

8Chi je̱'e̱ Jesús ñu̶maayu̶ ajku̶xy:

—Ko je̱'e̱ mjoot mgu'ubajk miich jyanchxé̱xu̶ch ajku̶xy, paady je̱'e̱ Moisés je̱'e̱ ane̱'e̱mu̶ñ du'un yejky ko je̱'e̱ ya'aydyu̶jk u̶xmádzu̶ch je̱'e̱ tyo'oxyu̶jk; peru̶ ko je̱'e̱ Dios je̱'e̱ naaxwiimbu̶ aga'an yajkojy ka'p najty dyu'unu̶ch. 9Peru̶ u̶u̶ch miich nnu̶maaygyu̶xypy je̱'e̱ ya'aydyu̶jk mu̶dyiibu̶ je̱'e̱ tyo'oxyu̶jk u̶xmajtzpu̶ñ, y pu̶nu̶ ka'p naty je̱'e̱ wiingpu̶ ya'aydyu̶jk tu̶ mu̶dtuundu̶góy, y pyu̶jktu̶gách mu̶u̶d je̱'e̱ wiingpu̶ to'oxyu̶jk, tuundu̶gooby naty je̱'e̱ du'un.#19.9 Nije̱' jaaybyu̶du̶jk myu̶naangu̶xy: y nan pu̶n pu̶jkp mu̶u̶d je̱'e̱ to'oxyu̶jk mu̶dyiibu̶ naty tu̶ yaj'u̶xmáchu̶ñ, nan tuundu̶gooby naty je̱'e̱ nandu'un.

10Chi je̱'e̱ Jesús dyiscípulotu̶jk ñu̶maayu̶:

—Pu̶nu̶ du'un je̱'e̱ ya'aydyu̶jk'adyiibyu̶ y'íxu̶ju̶ch mu̶dtzu̶na'awu̶ch je̱'e̱ tyo'oxyu̶jk, ni'igu̶ oy ko nga'adimypyu̶jku̶mu̶ch.

11Chi je̱'e̱ Jesús y'adzoowu̶ ajku̶xy:

—Ka'p je̱'e̱ ya'aydyu̶jk adayaaba nigu̶xyu̶ winju̶wu̶u̶ygyu̶xu̶ch, je̱'e̱du̶'ajty je̱'e̱ winju̶wu̶u̶ygyu̶xu̶p mu̶dyiibu̶ je̱'e̱ Dios tu̶ myooyu̶gu̶xyu̶ñ ko winju̶wu̶u̶ygyu̶xu̶ch. 12Jii mayñax tii gyu̶xpu̶ je̱'e̱ ya'aydyu̶jk ko may kya'apu̶jkku̶xyu̶ñ: nije̱' ka'p mu̶baad pyu̶jkku̶xy je̱' ko ka'p ka'pxy tu̶ myiingu̶xy, y nije̱' ka'p mu̶baad pyu̶jkku̶xy je̱' ko tu̶ yajtzujkku̶xy, y nije̱' jaybyu̶ky wyu̶'u̶mgu̶xy je̱' ko je̱'e̱ Dios y'ane̱'e̱mu̶ñ oy wa'adz kuydyunaanu̶ ajku̶xy. Pu̶n du'un me̱kxtugaambu̶ñ, wan du'un me̱kxtuky.

Jesús pi'k'ana'ktu̶jk kunukxy

(Mc 10.13-16; Lc 18.15-17)

13Mu̶'it je̱'e̱ pi'k'ana'ktu̶jk nije̱' yajnú̶kxy ajku̶xy ma je̱'e̱ Jesúsu̶ñ ko wan ku̶'u̶ni'ixajy ajku̶xy y mu̶bu̶jktzówu̶ch je̱'e̱ Dios mu̶u̶d je̱' gyu̶xpu̶ ajku̶xy; peru̶ chi je̱'e̱ discípulotu̶jk je̱'e̱ ja'ay tu̶gu̶'u̶y ojtu̶gu̶u̶ygyu̶xpu̶ je̱'e̱ mu̶dyiibu̶ je̱'e̱ pi'k'ana'ktu̶jk najty mu̶dmiingu̶xpu̶ñ. 14Mu̶'it je̱'e̱ Jesús myu̶naañ:

—U̶xmajtzku̶x, wan u̶u̶ch yu̶'u̶ pi'k'ana'ktu̶jk xyñimiingu̶xy y ka'p m'agapxtujkku̶xy, je̱' ko je̱'e̱ ja'ay jiiby tu̶gu̶'u̶waangu̶xp ma je̱'e̱ Dios y'ane'emyu̶ñ je̱'e̱ mu̶dyiibu̶ du'un yajpaatku̶xpu̶ñ neby yu̶'u̶ pi'k'ana'ktu̶jk ajku̶xyu̶ñ.

15Chi je̱'e̱ Jesús je̱'e̱ pi'k'ana'ktu̶jk ku̶'u̶ni'ixajy ajku̶xy, y chi jim chonnu̶ ma je̱'e̱ jimbu̶ ittu̶ñ.

Tu'ug ye̱e̱g'ana'k kumeeñjya'ay mu̶dmu̶dya'agy je̱'e̱ Jesús

(Mc 10.17-31; Lc 18.18-30)

16Tu'ug je̱'e̱ ye̱e̱g'ana'k je̱'e̱ Jesús oy ixy, y yajtu̶u̶y:

—Miich Windzú̶n,#19.16 Nije̱' jaaybyu̶du̶jk myu̶naangu̶xy: oyjya'aybyu̶. ¿ti oybyu̶ u̶u̶ch mu̶baad nduñ neby u̶u̶ch je̱'e̱ jugy'ajtu̶ñ nbaadu̶chu̶ñ je̱'e̱ mu̶dyiibu̶ ka'p nimu̶naaxu̶u̶ kyu̶xy tyu̶goyu̶ñ?

17Chi je̱'e̱ Jesús y'adzoowu̶:

—¿Ti u̶u̶ch ko oyjya'ay xytyijy? Ni pu̶n kya'a'oyjya'ayu̶ch, je'eyu̶ je̱'e̱ Dios tu'kpajk y'oyjya'ayu̶ch. Peru̶ pu̶nu̶ mdu̶gu̶'u̶waamb jiiby ma je̱'e̱ jugy'ajtu̶ñ ka'p nimu̶naaxu̶u̶ kyu̶xy tyu̶goyu̶ñ, kuydyuunu̶ je̱'e̱ Dios y'ane̱'e̱mu̶ñ.

18Chi je̱'e̱ ye̱e̱g'ana'k yajtu̶u̶y:

—¿Mu̶dyiibu̶?

Y chi je̱'e̱ Jesús ñu̶maayu̶:

—‘Ka'p mja'ayyaj'o'ogu̶ch, ka'p je̱'e̱ wiingpu̶ to'oxyu̶jk mmu̶dtuundu̶góyu̶ch, ka'p mme̱e̱dzu̶ch, ka'p ni pu̶n mni'iwaambé̱du̶ch, 19yajmu̶j'át je̱'e̱ mdaj mdeedy, y tzok ju̶wu̶'u̶ je̱'e̱ mmu̶gu'ug du'un neby miich ku̶'u̶m mnaychogyiiju̶ñ.’

20Chi je̱'e̱ ye̱e̱g'ana'k myu̶naañ:

—Tu̶ u̶u̶ch adaa ku̶xyu̶ nguydyuunda'ay —¿Y ti u̶u̶ch xyjyaktu̶goy'ajtu̶py?

21Chi je̱'e̱ Jesús y'adzoowu̶:

—Pu̶nu̶ mja'ay'adaamb tu̶y tu'uda'agy, nu̶kx tokta'a tijaty mmu̶dajtypyu̶ñ y ni'imo'o je̱'e̱ ayoobu̶du̶jk ajku̶xy. Mu̶'it je̱'e̱ m'oy'ajtu̶ñ jiiby tzajpjooty mbaadu̶ch. Y ko du'un mdúnu̶ch, mu̶'íttu̶tz mínu̶ch ma u̶u̶chu̶ñ y xypyanú̶kxu̶chu̶ch.

22Ko je̱'e̱ ye̱e̱g'ana'k adaa du'un mu̶dooy, chi taj may ñu̶kxnu̶, je̱' ko mu̶j kumeeñ je̱'e̱ najty.

23Mu̶'it je̱'e̱ Jesús dyiscípulotu̶jk nu̶maay:

—Janch tu̶y'ajtu̶ñ du'un nnu̶maaygyu̶xy ko janchtzip je̱'e̱ kumeeñjya'ay tu'ug tyu̶gu̶'u̶wu̶ch ma je̱'e̱ Dios y'ane'emyu̶ñ. 24Cham u̶u̶ch ja'adu'ook nmu̶na'añ ko ni'igu̶ ka'p je̱'e̱ camello tu'ug tzip ñáxu̶ch ma je̱'e̱ xu'uñdy'u̶jx xyútu̶chu̶ñ, jak tzip tyu̶gu̶'u̶wu̶ch tu'ug je̱'e̱ kumeeñjya'ay ma je̱'e̱ Dios y'ane'emyu̶ñ.

25Ko je̱'e̱ dyiscípulotu̶jk du'un mu̶dooy ajku̶xy, chi ni'igyu̶ mu̶k yajnú̶kxy yajju̶wu̶u̶y ajku̶xy, y ñayñu̶maayu̶gu̶xy:

—¿Y pu̶n da'a mu̶baad y'okni'idzo'ogy?

26Chi je̱'e̱ Jesús wyindu̶kxpe̱jttaayu̶ ajku̶xy y y'adzoowu̶ ajku̶xy:

—Mu̶u̶d je̱'e̱ naaxwiiñjya'ay tzip adayaaba, peru̶ mu̶u̶d je̱'e̱ Dios ka'p je̱'e̱ chípu̶ch.

27Mu̶'it je̱'e̱ Pedro je̱'e̱ Jesús nu̶maay:

—U̶u̶ch tu̶ u̶u̶ch je̱'e̱ nbu̶da'agy ku̶xyu̶ n'u̶xyo'oydyaaygyu̶xy je̱'e̱ mu̶dyiibu̶ u̶u̶ch ijty nmu̶dajtku̶xypyu̶ñ y miich nbanú̶kxku̶xypy. ¿Y ti u̶u̶ch nbadaangu̶xypy?

28Chi je̱'e̱ Jesús y'adzoowu̶ ajku̶xy:

—Janch tu̶y'ajtu̶ñ du'un nnu̶maaygyu̶xy ko naty je̱'e̱ xu̶u̶ tiempo paady mu̶naa ku̶xyu̶ jye̱e̱mdu̶gajtzta'awu̶chu̶ñ, ko naty u̶u̶ch je̱' je̱'e̱ ja'ay mu̶dyiibu̶ tzon tzajpjooty naxweechu̶ch ma u̶u̶ch je̱'e̱ n'ane̱'e̱mdaakt óybyu̶ju̶ñ, y miich ajku̶xy mu̶dyiibu̶ u̶u̶ch naty tu̶ xypyanú̶kxku̶xyu̶ñ nan mnaxwé̱tzku̶xu̶p nandu'un ma je̱'e̱ majmé̱tzkpu̶ ane̱'e̱mdaaktu̶ñ ku̶jtu'ug, neby mdu̶ydyuungu̶xu̶chu̶ñ je̱'e̱ nimajme̱tzkpú̶kypyu̶ Israel ñaax kyajpt ajku̶xy. 29Y ku̶xyu̶ pu̶n naty, mu̶u̶d u̶u̶ch kyu̶xpu̶ tu̶ ku'ugue̱e̱kku̶xyu̶ñ je̱'e̱ tyu̶jk ajku̶xy, o je̱'e̱ pyuya'ay ajku̶xy, o je̱'e̱ pyudo'oxy ajku̶xy, o je̱'e̱ tyaj tyeedy ajku̶xy, o je̱'e̱ y'ung y'ana'k ajku̶xy, o je̱'e̱ ñaax ajku̶xy, pyaattu̶gajtzku̶xu̶py je̱'e̱ mu̶go'px du'uñdyu̶, y nan pyaatku̶xu̶py je̱'e̱ jugy'ajtu̶ñ je̱'e̱ mu̶dyiibu̶ ka'p nimu̶naaxu̶u̶ kyu̶xy tyu̶goyu̶ñ. 30Peru̶ cham; may je̱'e̱ ja'ay jii ajku̶xy je̱'e̱ mu̶dyiibu̶ jayu̶jp'ajtku̶xpu̶ñ, y je̱' u̶x'aam'ádu̶p ajku̶xy; y nan may je̱'e̱ ja'ay jii cham ajku̶xy je̱'e̱ mu̶dyiibu̶ u̶x'aam'ajtku̶xpu̶ñ, y je̱' jayu̶jp'ádu̶p ajku̶xy.

Currently Selected:

San Mateo 19: MIXE

Highlight

Copy