Colosenses 1
1
Je̱'e̱ yajpókxu̶ñ
1U̶u̶ch Pablo, Jesucristo y'apóstol, je̱'e̱ Dios u̶u̶ch du'un tu̶ xyajmu̶dzóky. Kipxy mu̶u̶d je̱'e̱ nmu̶gu'ug Timoteo ajtu̶m 2adaa naky yam nguéxyu̶ch ma je̱'e̱ tu'uda'agypyu̶ nmu̶gu'ug ajtu̶m ajku̶xy je̱'e̱ mu̶dyiibu̶ je̱'e̱ Cristo mmu̶bu̶jkku̶xpu̶ñ je̱'e̱ mu̶dyiibu̶ jim Colosas tzu̶naaygyu̶xpu̶ñ y yajpaatku̶xpu̶ñ ma je̱'e̱ Dios jya'ayu̶ñ. Wan je̱'e̱ Dios u̶u̶ch je̱'e̱ nDeedy ajtu̶m#1.2 Nije̱' jaaybyu̶du̶jk ya myu̶naangu̶xy: y je̱'e̱ Windzú̶n Jesucristo. je̱'e̱ oy'ajt may'ajt tuñ ma miich ajku̶xyu̶ñ y xyajjotkujk'ajtku̶xu̶ch.
Pablo je̱'e̱ Dios mu̶bu̶jktzóy mu̶u̶d je̱'e̱ mu̶bu̶jkpu̶du̶jk kyu̶xpu̶ ajku̶xy
3Jaboom jaboom ko u̶u̶ch je̱'e̱ Dios nmu̶bu̶jktzoogu̶xy mu̶u̶d miich kyu̶xpu̶ ajku̶xy, nyajnajxku̶xypyu̶ch je̱'e̱ Dioskujuuyu̶p ma je̱'e̱ Diosu̶ñ, je̱'e̱ nWindzú̶n Jesucristo tyeedy ajtu̶m ajku̶xy. 4Tu̶ u̶u̶ch je̱'e̱ ayuuk ya du'un xypyaatku̶xy neby je̱'e̱ Cristo Jesús miich mmu̶bu̶jkku̶xyu̶ñ y neby je̱'e̱ mmu̶gu'ugtu̶jk mdzojkku̶xy mju̶wu̶u̶ygyu̶xyu̶ñ je̱'e̱ mu̶dyiibu̶ yajpaatku̶xpu̶ñ ma je̱'e̱ Dios jya'ayu̶ñ. 5Miich mdzojkku̶xypy mju̶wu̶u̶ygyu̶xypy je̱'e̱ mmu̶gu'ugtu̶jk je̱' ko miich mju̶jp'ijxku̶xy myajmo'owaangu̶xy je̱'e̱ mu̶dyiibu̶ jiiby tzajpjooty tu̶ yajni'ixu̶'u̶y mu̶u̶d miich ajku̶xy. Y miich ajku̶xy mju̶jp'ijxku̶xypy adaa, je̱' ko je̱'e̱ jaanchpyu̶ ayuuk tu̶y'ajt tu̶ mmu̶doogu̶xy, je̱'e̱ oybyu̶ ayuuk tu̶y'ajt je̱'e̱ mu̶dyiibu̶ je̱'e̱ aanu̶mu̶ ni'idzooku̶ñ ye̱jkpu̶ñ. 6Adayaaba ayuuk tu̶y'ajt mu̶dyiibu̶ tu̶ yajkapxwa'kxy ma miich ajku̶xyu̶ñ, nan yajkapxwa'kx'adu̶u̶dznu̶ adaa y may je̱'e̱ ja'ay mu̶bu̶jk'adu̶u̶tzku̶xy ma je̱'e̱ naax kajpt xii yaaju̶ñ, du'un neby tu̶ tyuñ tu̶ jyadyii ma miich ajku̶xyu̶ñ ko aga'an mmu̶doogu̶xy ko je̱'e̱ Dios xychojku̶m xyjyu̶wu̶u̶yu̶m ajku̶xy, y ko tu̶ mnejwu̶u̶ygyu̶xy ko jaanch adaa ayuuk tu̶y'ajt ko Dios xychojku̶m xyjyu̶wu̶u̶yu̶m ajku̶xy. 7Adaa tu̶y'ajt je̱'e̱ Epafras tu̶ xyaj'u̶xpu̶jkku̶xy, u̶u̶ch je̱'e̱ nmu̶gu'ug ajku̶xy je̱'e̱ mu̶dyiibu̶ u̶u̶ch oy ndzojkypy nju̶wu̶u̶by ajku̶xyu̶ñ je̱'e̱ mu̶dyiibu̶ u̶u̶ch tu̶ xymyu̶dtuungu̶xyu̶ñ ma je̱'e̱ Dios tyuungu̶ñ, je̱'e̱ mu̶dyiibu̶ je̱'e̱ Cristo tu'uda'agy mu̶duumb ma miich ajku̶xyu̶ñ. 8Je̱' u̶u̶ch je̱'e̱ ya du'un tu̶ xyajmu̶doogu̶xy neby miich myajpaatku̶xyu̶ñ y neby je̱'e̱ tzojku̶ñ ju̶wu̶u̶yu̶ñ mmu̶dajtku̶xyu̶ñ, je̱'e̱ mu̶dyiibu̶ je̱'e̱ Espíritu xyajju̶wu̶u̶ygyu̶xpu̶ñ.
9Paady u̶u̶ch ajku̶xy, je̱'e̱ xu̶u̶ mu̶naa u̶u̶ch du'un nmu̶doogu̶xyu̶ñ, nmu̶bu̶jktzoodu̶u̶ybyu̶ch je̱'e̱ Dios jaboom jaboom ajku̶xy mu̶u̶d miich kyu̶xpu̶ ajku̶xy y nmu̶yujkwaangu̶xyu̶ch je̱'e̱ Dios ko wan ku̶xyu̶ wa'adzu̶ xyajnejwu̶u̶ygyu̶xy tii je̱'e̱ chojkypyu̶ñ y ko je̱'e̱ joot winma'añ wan ku̶xyu̶ xymyooygyu̶xy y je̱'e̱ wij'ajt ke̱j'ajtu̶ñ, je̱'e̱ mu̶dyiibu̶ je̱'e̱ Espíritu Santo yejkypyu̶ñ. 10Wan oy yajxón mja'ay'ajtku̶xu̶ch neby je̱'e̱ ja'ay jya'ay'átyu̶ñ je̱'e̱ mu̶dyiibu̶ je̱'e̱ Windzú̶n Jesucristo mu̶bu̶jkku̶xpu̶ñ; cham mduungu̶xy je̱'e̱ mu̶dyiibu̶ je̱'e̱ Windzú̶n Jesucristo kyu'umaaybyu̶ñ y mduungu̶xu̶ch ku̶xyu̶ je̱'e̱ oybyu̶ tuung, wan je̱'e̱ m'u̶xpu̶jku̶ñ du'un ni'igyu̶ mjakyajwaatzku̶xu̶ch ma je̱'e̱ Diosu̶ñ. 11Nmu̶yujkwaangu̶xypyu̶ch je̱'e̱ Dios, wan xyajmu̶kkojku̶xu̶ch mu̶u̶d je̱'e̱ mu̶jpu̶ myu̶k'ajt neby je̱'e̱ tzaachpyu̶ ayo'on mu̶baad ku̶xyu̶ mu̶madaakku̶xyu̶ñ mu̶u̶d je̱'e̱ jootkujk'ajtu̶ñ y je̱'e̱ me̱kxtujku̶ñ je̱'e̱ mu̶dyiibu̶ xymyooygyu̶xpu̶ñ. 12Y mye̱jku̶xu̶ch je̱'e̱ Dioskujuuyu̶p xoonu̶p ijtu̶p ma je̱'e̱ Dios Teedyu̶ñ, je̱'e̱ mu̶dyiibu̶ miich tu̶ xyñi'ixu̶u̶ygyu̶xyu̶ñ neby mu̶baad mbaatku̶xyu̶ñ ko je̱'e̱ tu̶y'ajt naty tu̶ mmu̶bu̶jkku̶xy mu̶dyiibu̶ du'un neby je̱'e̱ jajju̶ñ tu̶kxu̶ñ, je̱'e̱ it lugaar mu̶dyiibu̶ je̱'e̱ ye̱ge̱e̱mbyu̶ñ ma je̱'e̱ mu̶dyiibu̶ yajpaatku̶xpu̶ñ ma je̱'e̱ jya'ayu̶ñ. 13Tu̶ je̱'e̱ Dios xyaj'awa'adzpu̶dzu̶u̶mu̶m ajku̶xy agoodztuuby ma je̱'e̱ ju̶bu̶kpu̶ ijty xy'ane̱'e̱mu̶mu̶ñ ajku̶xy y tu̶ xypyu̶daaku̶m ajku̶xy ma je̱'e̱ y'ung y'ane'emyu̶ñ, je̱'e̱ y'ung mu̶dyiibu̶ oy chojkypy jyu̶wu̶u̶ybyu̶ñ, 14je̱'e̱ mu̶dyiibu̶ mu̶u̶d tu̶ xyñiwaan tu̶ xyajtzooku̶mu̶ñ ajku̶xy mu̶u̶d je̱'e̱ ñe'pty je̱'e̱ mu̶dyiibu̶ cruutzkú̶xp tye̱e̱m yojku̶ñ, y tu̶ je̱'e̱ nboky ngu̶dyeey xywyinmé̱kxu̶yu̶ ajtu̶m ajku̶xy.
Ko je̱'e̱ Cristo y'o'ky mu̶u̶d u̶u̶ch kyu̶xpu̶ ajtu̶m ajku̶xy, chi jootkujk n'ijtu̶nu̶ ajku̶xy mu̶u̶d je̱'e̱ Dios
15Ka'p je̱'e̱ Dios pu̶n tu̶ ixy, y du'un je̱'e̱ ñayyaj'ijxu̶ ko je̱'e̱ y'ung ya naaxwiiñ y'ooy, je̱'e̱ jayu̶jpu̶ y'ung je̱'e̱ mu̶dyiibu̶ najty jii je'emy ma najty ka'p tii yajkojyñu̶ju̶ñ. 16Mu̶u̶d je̱' gyu̶xpu̶ je̱'e̱ Dios ku̶xyu̶ tijaty yajkojy je̱'e̱ mu̶dyiibu̶ jiiby tzajpjooty yajpaatpu̶ñ y yaa naaxwiiñ yajpaatpu̶ñ, je̱'e̱ mu̶dyiibu̶ yaj'ijxpu̶ñ y je̱'e̱ mu̶dyiibu̶ ka'p yaj'íxyu̶ñ, ku̶xyu̶ je̱'e̱ poj naaxwiiñ pojjootypyu̶ y'ity je̱'e̱ ka'pu̶ kyu̶xu̶'u̶gy je̱'e̱ mu̶dyiibu̶ je̱'e̱ mu̶daaku̶ñ mu̶dajtpu̶ñ, je̱'e̱ ane̱'e̱mu̶ñ mu̶dajtpu̶ñ y je̱'e̱ mu̶k'ajt mu̶dajtpu̶ñ. Mu̶u̶d je̱' gyu̶xpu̶ je̱'e̱ Dios ku̶xyu̶ tijaty yajkojy y nan je̱' ku̶'u̶m nayyajkoju̶xa. 17Je̱'e̱ Cristo je'emy najty je̱'e̱ jii maa najty ka'p tii ku̶xyu̶ kyojyñu̶ju̶ñ, y je̱' je̱'e̱ ku̶xyu̶ wijtz'ijttaaby neby oy yajxón tyu'uyo'oyu̶chu̶ñ. 18Cristo je̱' je̱'e̱ nigu'ubajk'ajtp, je̱'e̱ mu̶bu̶jkpu̶du̶jk ajku̶xy. Je̱'e̱ mu̶dyiibu̶ jayu̶jp jugy'ajtu̶gu̶u̶yu̶ñ, je̱' jayu̶jp juugypyu̶jk ko najty tu̶ y'o'ogy neby mu̶baad ku̶xyu̶ tii niwindzu̶n'atyu̶ñ. 19Je̱'e̱ Dios du'un tzojk ko je̱'e̱ myu̶k'ajt ku̶xyu̶ ka'pxy yajpaadu̶ch ma je̱'e̱ Crístoju̶ñ, 20y je̱'e̱ Cristo kyu̶xpu̶ je̱'e̱ Dios tzip ma'ad yajku̶jxy yajnajxy ma je̱'e̱ mu̶dyiibu̶ ku̶xyu̶ yajkoju̶ñ, ka'pu̶ du'un ñaymyu̶dzip'ajtu̶gu̶xnu̶ch mu̶u̶d je̱'e̱ mu̶dyiibu̶ ya naaxwiiñ yajpaatku̶xpu̶ñ y mu̶u̶d je̱'e̱ mu̶dyiibu̶ jiiby tzajpjooty yajpaatku̶xpu̶ñ, y du'un je̱'e̱ tzip ma'ad yajku̶jxy yajnajxy ko je̱'e̱ Cristo ñe'pty cruutzkú̶xp teemy yojky.
21Miich ajku̶xy du'un miich ijty jékyu̶p myajpaatku̶xy neby je̱'e̱ jaybyokxtyu̶jk ajku̶xyu̶ñ, ka'p najty tu'ugyu̶ myajpaatku̶xy mu̶u̶d je̱'e̱ Dios y mmu̶dzip'ajtku̶xypy je̱'e̱ Dios ijty ma je̱'e̱ mjoot mwinma'añ ajku̶xyu̶ñ mu̶u̶d je̱'e̱ ju̶bu̶kpu̶ je̱'e̱ mu̶dyiibu̶ ijty mduungu̶xypyu̶ñ, 22peru̶ jada'achám tu̶ je̱'e̱ Dios je̱'e̱ tzip ma'ad yajkú̶xy yajnáxy ma miich ajku̶xyu̶ñ ko je̱'e̱ Cristo je̱'e̱ o'ku̶ñ mu̶najxy ku'ubu̶jky ma je̱'e̱ ñi'kxu̶ñ, je̱'e̱ du'umbu̶ ñi'kx neby je̱'e̱ nni'kx u̶u̶ch ajtu̶m ajku̶xyu̶ñ. Y paady je̱'e̱ du'un tuuñ neby miich mu̶baad myajpaatku̶xyu̶ñ Dios winduuy oy wa'adz ma je̱'e̱ju̶ñ, ka'p je̱'e̱ ju̶bu̶kpu̶ maa y jaybyokymyu̶u̶d. 23Peru̶ pu̶nu̶ myajpaatku̶xp du'un, pu̶nu̶ mmu̶dajtku̶xypy je̱'e̱ mu̶bu̶jku̶ñ tu'ug'aa tu'ugjoot, pu̶nu̶ ka'p m'u̶xtu̶gu̶'u̶wa'kku̶xy ma je̱'e̱ mu̶dyiibu̶ mju̶jp'ijxku̶xypyu̶ñ ko je̱'e̱ ayuuk tu̶y'ajt tu̶ mmu̶doogu̶xy je̱'e̱ mu̶dyiibu̶ je̱'e̱ aanu̶mu̶ ni'idzooku̶ñ ye̱jkpu̶ñ. Adaaju̶tz je̱' je̱'e̱ ayuuk tu̶y'ajt je̱'e̱ mu̶dyiibu̶ tu̶ yajkapxwa'kxy ma je̱'e̱ naax kajpt kú̶xyu̶ju̶ñ, y u̶u̶ch Pablo ngapxwa'kxypyu̶ch je̱'e̱ ayuuk tu̶y'ajt mu̶u̶d u̶u̶ch je̱'e̱ nmu̶gu'ugtu̶jk nbubétyu̶ch ajku̶xy.
Pablo tuungtzú̶m yajpaady ma je̱'e̱ mu̶bu̶jkpu̶du̶jk ajku̶xyu̶ñ
24Jada'achám xondaakp u̶u̶ch ko u̶u̶ch je̱'e̱ tzaachpyu̶ nmu̶naxy ngu'ubú̶ky mu̶u̶d miich kyu̶xpu̶ ajku̶xy, y du'un u̶u̶ch je̱'e̱ tzaachpyu̶ du'un njakyajka'pxy mu̶u̶d u̶u̶ch je̱'e̱ ngu̶'u̶mni'kx, je̱'e̱ mu̶dyiibu̶ je̱'e̱ Cristo jaktu̶goy'ajtu̶xu̶ju̶ñ mu̶u̶d je̱'e̱ mu̶bu̶jkpu̶du̶jk kyu̶xpu̶ ajku̶xy je̱'e̱ mu̶dyiibu̶ du'unu̶ñ neby je̱'e̱ Cristo ñi'kxu̶ñ. 25Dios u̶u̶ch tu̶ xypyu̶da'agy ko u̶u̶ch ndúnu̶ch ma je̱'e̱ mu̶bu̶jkpu̶du̶jk ajku̶xyu̶ñ, mu̶u̶d je̱'e̱ tuung je̱'e̱ mu̶dyiibu̶ u̶u̶ch tu̶ xyajni'ipú̶kyu̶ñ mu̶u̶d miich kyu̶xpu̶ m'oy'ajtu̶ñ ajku̶xy ko u̶u̶ch je̱'e̱ y'ayuuk tyu̶y'ajt ku̶xyu̶ ka'pxy ngapxwa'kxu̶yu̶ch, 26je̱'e̱ u̶u̶ch du'un ndijpy, je̱'e̱ tyu̶y'ajt je̱'e̱ mu̶dyiibu̶ ijty jékyu̶p y mu̶ga'anaag jumu̶jt yu'uch tu̶ y'ijtnu̶ju̶ñ, peru̶ chamnu̶ je̱'e̱ tu̶ yajni'igu̶xu̶'u̶gy ma je̱'e̱ jya'ayu̶ñ. 27Du'un je̱'e̱ Dios niwinmayu̶u̶y ko yajnejwu̶'u̶wa'añ je̱'e̱ oybyu̶ ayuuk tu̶y'ajt, je̱'e̱ yu'uchpyu̶ tyu̶y'ajt, je̱'e̱ ka'pu̶ jyudíoja'ayu̶ch ajku̶xy. Y je̱'e̱ yu'uchpyu̶ tu̶y'ajt je̱' je̱' je̱'e̱ Cristo, je̱'e̱ mu̶dyiibu̶ yajpaatp ma je̱'e̱ mjoot mwinma'añ miich ajku̶xyu̶ñ,#1.27 Cristo, je̱'e̱ mu̶dyiibu̶ yajpaatp ma je̱'e̱ mjoot mwinma'añ miich ajku̶xyu̶ñ: nije̱' wiingpu̶ jaaybyu̶du̶jk myu̶naangu̶xy: Cristo je̱'e̱ mu̶dyiibu̶ tu̶ yajkapxwa'kxy ma miich ajku̶xyu̶ñ. y je̱' je̱'e̱ oy'ajtu̶ñ je̱'e̱ mu̶dyiibu̶ mju̶jp'ijxku̶xypyu̶ñ mbadaangu̶xy ma je̱'e̱ Diosu̶ñ.
28U̶u̶ch ngapxwa'kxku̶xypyu̶ch je̱'e̱ Cristo y'ayuuk tyu̶y'ajt nwingapx nju̶jpkapxu̶u̶ygyu̶xyu̶ch y nyaj'u̶xpu̶jkku̶xyu̶ch je̱'e̱ ja'ay nigu̶xyu̶ ajku̶xy mu̶u̶d je̱'e̱ wij'ajt ke̱j'ajtu̶ñ, neby u̶u̶ch je̱'e̱ mu̶bu̶jkpu̶du̶jk mu̶baad nidu'ug nidu'ug ngapxku̶xu̶'u̶gy ma je̱'e̱ Crístoju̶ñ, wan ka'pxy je̱'e̱ jyoot wyinma'añ naty ajku̶xyu̶ñ. 29Mu̶u̶d adaa gyu̶xpu̶ u̶u̶ch nduñ y nnay'amu̶jaduñyiiju̶ch mu̶u̶d u̶u̶ch je̱'e̱ nmu̶k nmu̶jaa ku̶xyu̶ y je̱'e̱ mu̶k'ajt mu̶dyiibu̶ u̶u̶ch je̱'e̱ Cristo xymyoobyu̶ñ.
Currently Selected:
Colosenses 1: MIXE
Highlight
Share
Copy
Want to have your highlights saved across all your devices? Sign up or sign in
Nuevo Testamento en Mixe de Mazatlán y Tutla, Oaxaca, México © Sociedad Bíblica de México, A.C. 2005
