Colosenses 2

1Ndzojkypyu̶ch mnejwu̶u̶ygyu̶xu̶ch ko u̶u̶ch yam mu̶kta'agy nnay'amu̶jaduñyii mu̶u̶d miich kyu̶xpu̶ ajku̶xy, mu̶u̶d je̱'e̱ mu̶bu̶jkpu̶du̶jk mu̶dyiibu̶ jim Laodicea tzu̶naaygyu̶xpu̶ñ y mu̶u̶d ku̶xyu̶ je̱'e̱ mu̶dyiibu̶ u̶u̶ch ka'p wiingú̶xp ju̶jpkú̶xp xy'ixyñu̶ ajku̶xyu̶ñ. 2Nnay'amu̶jaduunu̶bu̶ch neby je̱'e̱ jootkujk'ajtu̶ñ du'un paatku̶xu̶chu̶ñ ma je̱'e̱ y'aa jyoot ajku̶xyu̶ñ, neby mu̶baad tu'ugyu̶ y'ijtku̶xyu̶ñ ñaychojk ñayjyu̶wu̶u̶yu̶gu̶xu̶ch y mu̶'ijtku̶xu̶ch je̱'e̱ ka'pxypyu̶ wij'ajt ke̱j'ajt, je̱'e̱ mu̶dyiibu̶ yajwinju̶wu̶u̶yu̶gu̶xu̶bu̶ñ je̱'e̱ Dios tyu̶y'ajt yu'uchpyu̶, je̱' je̱'e̱ du'un je̱'e̱ Cristo,#2.2 Je̱'e̱ Dios tyu̶y'ajt yu'uchpyu̶, je̱' je̱'e̱ du'un je̱'e̱ Cristo: nije̱' jaaybyu̶du̶jk myu̶naangu̶xy: je̱'e̱ Dios Teedy tyu̶y'ajt yu'uchpyu̶ y je̱'e̱ Cristo. 3ma Crístoju̶ñ jim je̱'e̱ oybyu̶ joot winma'añ ku̶xyu̶ yajpaady y je̱'e̱ mu̶dyiibu̶ je̱'e̱ ja'ay ku̶xyu̶ tii yajnejwu̶u̶ybyu̶ñ. 4Adaa du'un n'awaanu̶py ajku̶xy, ka'pu̶ pu̶n xywyin'u̶u̶ngu̶xu̶ch mu̶u̶d je̱'e̱ ayuuk oymyu̶bu̶jknu̶ba. 5Oy u̶u̶ch jim nga'ayajpaady wiingú̶xp ju̶jpkú̶xp ma miich ajku̶xyu̶ñ, peru̶ jim u̶u̶ch je̱'e̱ njoot nwinma'añ y xondaakp u̶u̶ch du'un ko u̶u̶ch du'un tu̶ nnejwu̶'u̶y ko ku̶xyu̶ oy yajxón myajtu'uyo'oygyu̶xy y ko je̱'e̱ mmu̶bu̶jku̶ñ tu'ug'aa tu'ugjoot mmu̶dajtku̶xy ma je̱'e̱ Crístoju̶ñ.

Je̱'e̱ jembyu̶ jugy'ajtu̶ñ mu̶dyiibu̶ yajpaatp ma je̱'e̱ Crístoju̶ñ

6Paady, du'un neby je̱'e̱ Windzú̶n Jesucristo miich tu̶ mmu̶bu̶jkku̶xyu̶ñ, du'unu̶tz tu'ugyu̶ ijtku̶x ma je̱'e̱ju̶ñ. 7Je̱' amuum nayyajku̶'u̶du̶gu̶u̶yu̶gu̶xu̶ y je̱' mu̶k'ajt'ajtu̶gu̶xu̶ mu̶u̶d je̱'e̱ mu̶bu̶jku̶ñ neby tu̶ m'u̶xpu̶jkku̶xyu̶ñ, du'un neby je̱'e̱ kepy mu̶k'ajt jim paady ma je̱'e̱ tyiktzu̶ñ y cham je̱'e̱ Dioskujuuyu̶p jaboom jaboom mye̱jkku̶xy.

8Naygyweentu̶'ajtu̶gu̶x: ka'p mnayye̱jku̶gu̶xy ma je̱'e̱ ja'ay pu̶n naty xywyin'u̶u̶naangu̶xpu̶ñ mu̶u̶d je̱'e̱ wiingpu̶ u̶xpu̶jku̶ñ y wiingpu̶ winma'añ je̱'e̱ ka'pu̶ tyu̶y'ajtu̶ch, je̱' ko je̱'e̱ du'umbu̶ ja'ay ka'p je̱'e̱ u̶xpu̶jku̶ñ jim yajtzóngu̶xy ma je̱'e̱ Crístoju̶ñ, je̱'e̱ kostumbre je̱'e̱ yaj'u̶xpu̶jkku̶xypy, je̱'e̱ mu̶dyiibu̶ je̱'e̱ ja'ay ku̶'u̶m tu̶ yajkojku̶xyu̶ñ y je̱'e̱ mu̶k'ajtmu̶u̶dpu̶ ajku̶xy mu̶dyiibu̶ adayaaba naaxwiiñ ane̱'e̱mgu̶xpu̶ñ.

9Ku̶xyu̶ neby je̱'e̱ Dios mu̶k'ajt mu̶u̶du̶chu̶ñ, nandu'un jim ku̶xyu̶ ka'pxy yajpaady ma je̱'e̱ Crístoju̶ñ, 10y miich ajku̶xy mu̶dajttaaygyu̶xypy je̱'e̱ mu̶dyiibu̶ je̱'e̱ Dios myu̶dajtypyu̶ñ, je̱' ko tu'ugyu̶ myajpaatku̶xy ma je̱'e̱ Crístoju̶ñ je̱'e̱ mu̶dyiibu̶ niwindzu̶n'ajttaaybyu̶ñ ku̶xyu̶ je̱'e̱ poj naaxwiiñ pojjootypyu̶ y'ity je̱'e̱ ka'pu̶ kyu̶xu̶'u̶gy je̱'e̱ mu̶dyiibu̶ je̱'e̱ mu̶k'ajt y je̱'e̱ ane̱'e̱mu̶ñ mu̶dajtpu̶ñ. 11Miich ajku̶xy ko je̱'e̱ Cristo tu̶ mmu̶bu̶jkku̶xy, chi tu̶ myajtu̶y'ajtu̶u̶ygyu̶xy, peru̶ ka'p dyu'unu̶ch neby je̱'e̱ ja'ay yajtu̶y'ajtu̶'u̶yu̶ñ ma je̱'e̱ ñi'kx kyopt ajku̶xyu̶ñ, je̱'e̱ tu̶y'ajtu̶'u̶yiibyu̶ je̱' je̱'e̱ mu̶dyiibu̶ yaj'awa'adzpu̶dzu̶u̶mb ma je̱'e̱ naaxwiiñjya'ay pokymyu̶u̶dpu̶ winma'añdyu̶ñ. Adaaju̶tz je̱' je̱'e̱ tu̶y'ajtu̶'u̶yiibyu̶ mu̶dyiibu̶ yajpaatp ma je̱'e̱ Crístoju̶ñ. 12Ko tu̶ mnu̶u̶be̱jtku̶xy ma je̱'e̱ Crístoju̶ñ, du'un je̱'e̱ ni'ipaady neby nu̶wu̶'u̶y kipxy tu̶ mnaaxtu̶gu̶u̶ygyu̶xyu̶ñ mu̶u̶d je̱'e̱ Cristo, y nan kipxy nandu'un tu̶ mjuugypyu̶jkku̶xy mu̶u̶d je̱', je̱' ko je̱'e̱ Dios myu̶k'ajt tu̶ mmu̶bu̶jku̶ ajku̶xy ko je̱' yajjuugypyu̶jk. 13Miich ajku̶xy ko najty je̱'e̱ Dios ka'anu̶ mmu̶bu̶jkku̶xyñu̶, du'un najty myajpaatku̶xy neby o'ogypyu̶ju̶ñ mu̶u̶d je̱'e̱ mbokytunu̶u̶ ajku̶xy y ko najty ka'p mdu̶y'ajtu̶'u̶yu̶ch ajku̶xy; peru̶ jada'achám tu̶ je̱'e̱ Dios je̱'e̱ jugy'ajtu̶ñ xymyooygyu̶xy kipxy mu̶u̶d je̱'e̱ Cristo, je̱'e̱ mu̶dyiibu̶ je̱'e̱ nboky ngu̶dyeey ku̶xyu̶ tu̶ xywyinme̱kxtaayu̶ ajtu̶m ajku̶xy. 14Dios xywyinme̱kxu̶ je̱'e̱ nnukxy ajtu̶m ajku̶xy je̱'e̱ mu̶dyiibu̶ ijty nmu̶dajtypy ajtu̶m ajku̶xyu̶ñ mu̶u̶d je̱', je̱'e̱ mu̶dyiibu̶ ijty mu̶dzibu̶'u̶ jatytimypyaattu̶bu̶ñ neby je̱'e̱ ane̱'e̱mu̶ñ oy tu'uda'agy nguydyuunu̶mu̶chu̶ñ ajku̶xy. Y du'un je̱'e̱ nukxy kubejty ko cruutzkú̶xp yajmu̶jwojpejty. 15Mu̶u̶d je̱'e̱ Cristo kyu̶xpu̶, Dios #2.15 Mu̶u̶d je̱'e̱ Cristo kyu̶xpu̶, Dios: nije̱' wiingpu̶ jaaybyu̶du̶jk myu̶naangu̶xy: ko cruutzkú̶xp y'o'ky, je̱'e̱ Cristo. myu̶madaaktaay je̱'e̱ poj naaxwiiñ pojjootypyu̶ y'ity je̱'e̱ ka'pu̶ kyu̶xu̶'u̶gy, je̱'e̱ mu̶dyiibu̶ je̱'e̱ mu̶k'ajt y je̱'e̱ ane̱'e̱mu̶ñ mu̶dajtpu̶ñ, y yajtzo'oydyuuñ mayjya'ayjyooty ajku̶xy, yajnú̶kxy ajku̶xy neby je̱'e̱ tzumyjya'aydyu̶jk yajtajnajxu̶gu̶xyu̶ñ ko naty tu̶ myu̶mada'agyii ajku̶xy.

Mu̶joottu̶gooygyu̶x je̱'e̱ mu̶dyiibu̶ jiiby tzajpjooty tzombu̶ñ

16Ka'p pu̶n mgweentu̶tuungu̶xu̶ch ko pu̶n xyñi'oj xyñiyaaxu̶u̶ygyu̶xu̶ch mu̶u̶d je̱'e̱ mu̶dyiibu̶ mdzu'tzku̶xypyu̶ñ o m'uukku̶xypyu̶ñ, o ko je̱'e̱ xu̶u̶ mu̶baad m'amay'ajtku̶xy, je̱'e̱ jemybyo'o mu̶baad m'amay'ajtku̶xy o je̱'e̱ pokxyxyu̶u̶ mu̶baad m'amay'ajtku̶xy. 17Ku̶xyu̶ adaa mu̶'it najty je̱'e̱ du'un yajtúñ ko najty je̱'e̱ Jesucristo ka'anu̶ myiñ yaa naaxwiiñ, y du'un je̱'e̱ najty neby tii y'awaxku̶'u̶yu̶ñ ko naty tii myina'añ, peru̶ je̱'e̱ tu̶y'ajt je̱' je̱' je̱'e̱ Cristo. 18Ka'p mnayye̱jku̶gu̶xy ko naty je̱'e̱ ja'ay xyaj'u̶xmadzaangu̶xy je̱'e̱ nWindzú̶n ajtu̶m ajku̶xy je̱'e̱ mu̶dyiibu̶ du'un nayyajnajxu̶gu̶xpu̶ñ yuung naaxypy y ko je̱'e̱ ángelestu̶jk windzu̶gu̶u̶ygyu̶xy, je̱'e̱ mu̶dyiibu̶ adzojkku̶xpu̶ñ ko je̱'e̱ Dios wan ku̶xyu̶ tii yajwin'ijxu̶gu̶xyu̶ y je̱'e̱ mu̶dyiibu̶ mu̶j ku̶xp nayjyu̶wu̶u̶yu̶gu̶xpu̶ñ mu̶u̶d je̱'e̱ ñaaxwiiñ winma'añ ajku̶xy. 19Je̱'e̱ du'umbu̶ ja'ay ajku̶xy ka'p je̱'e̱ tu'ugyu̶ yajpaatku̶xy mu̶u̶d je̱'e̱ Cristo, je̱'e̱ mu̶dyiibu̶ je̱'e̱ mu̶bu̶jkpu̶du̶jk ku̶xyu̶ nigu'ubajk'ajtpu̶ñ, du'un neby je̱'e̱ ku'ubajk ja'ay ane'emyu̶ñ ma je̱'e̱ ni'kx kopt kú̶xyu̶ju̶ñ y je̱'e̱ mu̶dyiibu̶ je̱'e̱ mu̶bu̶jkpu̶du̶jk myu̶bu̶jku̶ñ ni'igyu̶ jakmooybyu̶ñ y je̱'e̱ u̶xpu̶jku̶ñ, y yajtu'ugmúky du'un neby je̱'e̱ Dios jékyu̶p niwinmayu̶u̶yu̶ñ.

20Miich ajku̶xy ko je̱'e̱ Cristo tu̶ mmu̶bu̶jkku̶xy, du'un je̱'e̱ ni'ipaady neby nu̶wu̶'u̶y kipxy tu̶ m'o'kku̶xyu̶ñ mu̶u̶d je̱'e̱ Cristo y ka'p je̱'e̱ xy'ok'ane̱'e̱mgu̶xnu̶, je̱'e̱ mu̶dyiibu̶ ane̱'e̱mgu̶xpu̶ñ ma adayaaba naaxwiiñu̶ñ. ¿Y ti ko du'un chambaad mdzu̶naaygyu̶xyñu̶ neby je̱'e̱ naaxwiiñjya'ay chu̶naaygyu̶xyu̶ñ, mjakkuydyuungu̶xy je̱'e̱ ja'ay y'ane̱'e̱mu̶ñ ajku̶xy je̱'e̱ mu̶dyiibu̶ du'un mu̶naambu̶ñ: 21“Ka'p yu̶'u̶ jiibu̶ mni'idóñ, ka'p yu̶'u̶ jimbu̶ mju̶kxy y ka'p yu̶'u̶ jiibu̶ mgonu̶'u̶gy”? 22Ku̶xyu̶ adaa du'umbu̶ ane̱'e̱mu̶ñ je̱' adaa je̱'e̱ mu̶dyiibu̶ ku̶jxp najxpu̶ñ ko tyuunda'ay, y je̱'e̱ ane̱'e̱mu̶ñ y je̱'e̱ u̶xpu̶jku̶ñ je̱' je̱'e̱ mu̶dyiibu̶ je̱'e̱ ja'ay ku̶'u̶m tu̶ yajkojyu̶ñ ajku̶xy. 23Tu̶y'ajt je̱'e̱ du'un ko je̱'e̱ du'umbu̶ ane̱'e̱mu̶ñ du'un je̱'e̱ kyu̶xu̶'u̶gy neby je̱'e̱ jaanchpyu̶ tyu̶y'ajtu̶chu̶ñ, je̱' ko nigapxy ko oy yajxón yajkuydyúnu̶ch mu̶u̶d je̱'e̱ yuung'ajt naaxypy'ajtu̶ñ y ndzaachtyuunu̶mu̶ch je̱'e̱ nni'kx ngopt ajtu̶m ajku̶xy, peru̶ ka'p je̱'e̱ du'umbu̶ ni maa tyuñ neby je̱'e̱ naaxwiiñjya'ay winma'añ mu̶baad xyaj'u̶xmajtzu̶mu̶ñ ajku̶xy.

Currently Selected:

Colosenses 2: MIXE

Highlight

Copy