Colosenses 3

1Miich ajku̶xy je̱' ko tu̶ miich je̱'e̱ Cristo mmu̶bu̶jkku̶xy, du'un je̱'e̱ ni'ipaady neby nu̶wu̶'u̶y kipxy tu̶ mjuugypyu̶jkku̶xyu̶ñ mu̶u̶d je̱'e̱ Cristo, y mmu̶joottu̶gooygyu̶x je̱'e̱ mu̶dyiibu̶ jiiby tzajpjooty tzombu̶ñ ma je̱'e̱ Cristo y'u̶ña'ayu̶ñ Dios ñamu̶jk a'oy'eemby. 2Winmaaygyu̶x je̱'e̱ mu̶dyiibu̶ jiiby tzajpjooty yajpaatpu̶ñ y ka'p jye̱'e̱yu̶ch je̱'e̱ mu̶dyiibu̶ ya naaxwiiñ yajpaatpu̶ñ. 3Miich ajku̶xy tu̶ miich je̱'e̱ Cristo mmu̶bu̶jkku̶xy, du'un je̱'e̱ ni'ipaady neby nu̶wu̶'u̶y tu̶ m'o'kku̶xyu̶ñ mu̶u̶d je̱', y jada'achám jim je̱'e̱ mjugy'ajtu̶ñ mbadaangu̶xy mu̶u̶d je̱'e̱ Cristo ma je̱'e̱ Diosu̶ñ. 4Je̱'e̱ Cristo je̱' miich mjugy'ajtu̶ñ'ajtypy ajku̶xy. Y ko naty je̱'e̱ ya naaxwiiñ ja'adu'ook kyu̶daaktu̶gách, mu̶'it miich nandu'un mnaybyaattu̶gu̶xu̶ch mu̶u̶d je̱', y myajpaatku̶xu̶ch nandu'un ma je̱'e̱ y'oy'ajtu̶ñ jiibyu̶ñ.

Je̱'e̱ jeky jugy'ajtu̶ñ y je̱'e̱ jemybyu̶ jugy'ajtu̶ñ

5Paady, u̶xmajtzku̶xnu̶ je̱'e̱ ju̶bu̶kpu̶, je̱'e̱ mu̶dyiibu̶ ya naaxwiiñ yajpaatpu̶ñ: ka'p je̱'e̱ wiingpu̶ to'oxyu̶jk mmu̶dtuundu̶gooygyu̶xu̶ch, ka'p je̱'e̱ ju̶bu̶kpu̶ axu̶u̶gpu̶ mduungu̶xu̶ch, ka'p je̱'e̱ mni'kx mgopt chojku̶ñ mnimu̶doowu̶ch ajku̶xy y je̱'e̱ ju̶bu̶k adzojku̶ñ, nan ka'p je̱'e̱ kumeeñ'adu̶u̶ m'adzojkku̶xu̶ch (je̱' ko du'undu̶gu̶u̶by je̱'e̱ paady neby je̱'e̱ tzaadzéch kepychech du'umbu̶ m'o'owu̶dajtku̶xyu̶ñ). 6Ko je̱'e̱ ja'ay du'un y'adu̶u̶tzku̶xy, paady je̱'e̱ Dios je̱'e̱ mu̶jpu̶ tzaachpyu̶ ke̱xa'añ ma je̱'e̱ ja'ay ajku̶xy je̱'e̱ mu̶dyiibu̶ ka'p kyapxymyu̶doogu̶xyu̶ñ, 7y miich ajku̶xy nandu'un najty jékyu̶p m'adu̶u̶tzku̶xy ko je̱'e̱ Cristo najty ka'p mmu̶bu̶jkku̶xyñu̶. 8Peru̶ jada'achám u̶xmajtzku̶xnu̶ je̱'e̱ du'umbu̶ ku̶xyu̶: je̱'e̱ winjootma'ad'adu̶u̶, je̱'e̱ ni'kx kopt y'adzojku̶ñ, je̱'e̱ ju̶bu̶kwinma'añ, je̱'e̱ nay'oj nayya'axu̶u̶ y je̱'e̱ ju̶bu̶kkapxy je̱'e̱ ju̶bu̶k'ayuuk. 9Ka'p amíñ u̶xyu̶py mnaywin'u̶u̶nu̶gu̶xyu̶, je̱' ko tu̶ miich m'awa'adzpu̶dzu̶u̶mgu̶xy ma je̱'e̱ naaxwiiñjya'ay pokymyu̶u̶dpu̶ winma'añdyu̶ñ y ma je̱'e̱ mu̶dyiibu̶ ijty jeky'ajty mduungu̶xypyu̶ñ. 10Y tu̶ mwinje̱e̱mgu̶xy y je̱'e̱ jemybyu̶ joot je̱'e̱ jembyu̶ winma'añ cham mmu̶dajtku̶xnu̶py: je̱'e̱ mu̶dyiibu̶ je̱'e̱ jemybyu̶ja'ay myu̶dajtku̶xypyu̶ñ, je̱'e̱ mu̶dyiibu̶ je̱'e̱ jyoot wyinma'añ du'un je̱e̱m'adu̶u̶tzku̶xpu̶ñ neby je̱'e̱ Diosu̶ñ, je̱'e̱ mu̶dyiibu̶ tu̶ yajkoju̶gu̶xyu̶ñ, wan du'un ku̶xyu̶ wa'adzu̶ nejwu̶u̶ygyu̶xu̶ch neby je̱'e̱ Dios tzokyu̶ñ. 11Ka'p je̱'e̱ y'oktzobaadnu̶ pu̶nu̶ griego ja'ay o pu̶nu̶ ka'p griego ja'ayu̶ch ajku̶xy, pu̶nu̶ tu̶y'ajtu̶'u̶y o pu̶nu̶ ka'p tyu̶y'ajtu̶'u̶yu̶ch ajku̶xy, pu̶nu̶ jaybyokxjya'ay ajku̶xy pu̶nu̶ ka'p tu'ugyu̶ yajpaatku̶xy mu̶u̶d je̱'e̱ Dios, pu̶nu̶ tzuja'ay ajku̶xy, pu̶nu̶ tuumbu̶du̶jk ni'idoogypyu̶ ajku̶xy o pu̶nu̶ ka'pu̶ tuumbu̶du̶jk ñi'idoogyu̶ch ajku̶xy. Je̱' tzobaatnu̶py ko je̱'e̱ Cristo ku̶xyu̶ niwindzu̶n'ajtta'ay y je̱' yajpaatp ma u̶u̶ch nigu̶xyu̶ ajtu̶m ajku̶xyu̶ñ.

12Je̱'e̱ Dios miich xychojkku̶xp xyjyu̶wu̶u̶ygyu̶xp y je̱' tu̶ xywyin'ijxku̶xy ko myajpaatku̶xu̶ch ma je̱'e̱ jya'ayu̶ñ. Paadyu̶tz, tzu̶naaygyu̶x jugy'ajtku̶x mu̶u̶d je̱'e̱ jemybyu̶ joot je̱'e̱ jemybyu̶ winma'añ, je̱'e̱ mu̶dyiibu̶ je̱'e̱ pa'a''ayo'on mu̶dajtpu̶ñ, je̱'e̱ oyjya'ay'ajtu̶ñ, je̱'e̱ yuung'ajt naaxypy'ajtu̶ñ, je̱'e̱ niky xeembyu̶ y je̱'e̱ me̱kxtujku̶ñ. 13Naymyu̶me̱kxtujku̶gu̶x amíñ u̶xyu̶py, y naywyinmé̱kxu̶gu̶x amíñ u̶xyu̶py pu̶nu̶ jii je̱'e̱ myu̶gu'ug pu̶n mu̶duundu̶góy. Du'un neby je̱'e̱ windzú̶n Jesucristo je̱'e̱ mboky tu̶ xywyinmé̱kxu̶yu̶ ajku̶xyu̶ñ, nandu'un je̱'e̱ mmu̶gu'ugtu̶jk mwinmé̱kxku̶xu̶ch. 14Yajwinje̱e̱mgu̶x je̱'e̱ mjoot mwinma'añ mu̶u̶d je̱'e̱ tzojku̶ñ ju̶wu̶u̶yu̶ñ, je̱'e̱ mu̶dyiibu̶ tii yajtu'ugyu̶ju̶u̶byu̶ñ, du'un neby je̱'e̱ xaach mu̶dyiibu̶ tijaty xojtzmujkpu̶ñ. 15Y wan je̱'e̱ Cristo jyootkuj'ajtu̶ñ je̱'e̱ mjoot mwinma'añ xy'ane̱'e̱mu̶ ajku̶xy, paady je̱'e̱ Dios tu̶ xywyin'ijxku̶xy neby mu̶baad tu'ugyu̶ m'ijtku̶xyu̶ñ mu̶u̶d je̱'e̱ Cristo. Y jatytimyyajmu̶jju̶wu̶u̶ygyu̶x je̱'e̱ du'un.

16Wan je̱'e̱ Cristo y'ayuuk tyu̶y'ajt jiiby ijtu̶y ma je̱'e̱ mjoot mwinma'añ ajku̶xyu̶ñ. Nayyaj'u̶xpu̶jkku̶gu̶x y nayjyootmu̶kmooyu̶gu̶x amíñ u̶xyu̶py mu̶u̶d je̱'e̱ wij'ajt ke̱j'ajtu̶ñ ku̶xyu̶. Y yajmu̶ju̶wu̶u̶ygyu̶x je̱'e̱ Dios cham mwin'u̶u̶gu̶xy mwinyaaxku̶xy mu̶u̶d je̱'e̱ Salmo'ú̶y, mu̶u̶d je̱'e̱ u̶y y mu̶u̶d je̱'e̱ Dios y'u̶y. 17Y ku̶xyu̶ tii naty mduungu̶xypyu̶ñ o tii naty mgápxku̶xypyu̶ñ, tuungu̶x kápxku̶x; cham je̱'e̱ Windzú̶n Jesús xyu̶u̶ mgapxpaattu̶ ajku̶xy, y cham je̱'e̱ Dioskujuuyu̶p mye̱jkku̶xy ma je̱'e̱ Dios Teedyu̶ñ mu̶u̶d je̱'e̱ Windzú̶n Jesús kyu̶xpu̶.

Neby je̱'e̱ mu̶bu̶jkpu̶du̶jk mu̶baad chu̶naaygyu̶xyu̶ñ wan ma'eembyu̶ch

18Miich to'oxyu̶jktu̶jk ajku̶xy, u̶u̶mu̶doogu̶x kapxymyu̶doogu̶x je̱'e̱ mniya'aydyu̶jk ajku̶xy, je̱' ko du'un pyadyii mduungu̶xu̶ch du'un neby je̱'e̱ mu̶bu̶jkpu̶du̶jk je̱'e̱ mu̶dyiibu̶ yajpaatku̶xpu̶ñ ma je̱'e̱ Windzu̶nu̶ñ. 19Miich ya'aydyu̶jktu̶jk ajku̶xy, tzojkku̶x ju̶wu̶u̶ygyu̶x je̱'e̱ mdo'oxyu̶jk ajku̶xy y ka'p mmu̶'ama'ad mmu̶jootma'adu̶ch ajku̶xy.

20Miich ung ana'k ajku̶xy, u̶u̶mu̶doogu̶x kapxymyu̶doogu̶x je̱'e̱ mdaj mdeedy ajku̶xy ku̶xyu̶ tijaty naty xyajnu̶maaygyu̶xpu̶ñ, je̱' ko du'un je̱'e̱ Windzú̶n Dios ku'umáy. 21Miich ungtaj ungteedy ajku̶xy, ka'p je̱'e̱ m'ung m'ana'k nigoo myaj'ama't myajjootma'tku̶xu̶ch, ka'pu̶ tzaachpyu̶daakku̶xu̶ch.

22Miich tuumbu̶du̶jk ni'idoogypyu̶ ajku̶xy, u̶u̶mu̶doogu̶x kapxymyu̶doogu̶x ku̶xyu̶ je̱'e̱ mu̶dyiibu̶ ya naaxwiiñ mwindzu̶n'ajtku̶xypyu̶ñ, ka'p myu̶'ittu̶'ajtyu̶ch ko naty jim xywyindu̶kxnaaygyu̶xy, neby m'oybyu̶dzu̶u̶mgu̶xu̶chu̶ñ ma je̱' ajku̶xyu̶ñ. Du'un tuungu̶x mu̶u̶d je̱'e̱ oy'aa oyjyoot, je̱' ko je̱'e̱ Windzú̶n Dios mdzu̶gu̶u̶ygyu̶xy. 23Ku̶xyu̶ je̱'e̱ tuung mu̶dyiibu̶ naty mduungu̶xypyu̶ñ, tuungu̶x xi'ig xon y ka'p y'adzip y'ama'adu̶ch, du'un neby it naty je̱'e̱ Windzú̶n Dios du'un mmu̶duungu̶xypyu̶ñ y ka'p dyu'unu̶ch neby je̱'e̱ ja'ay mmu̶duungu̶xypyu̶ñ. 24Tu̶ mnejwu̶u̶ygyu̶xy ko je̱'e̱ Windzú̶n je̱'e̱ oy'ajtu̶ñ xymyo'owaangu̶xy, je̱' ko je̱'e̱ Cristo miich mmu̶duungu̶xypy, je̱'e̱ mu̶dyiibu̶ jaanch mwindzu̶n'ajtpku̶xypyu̶ñ. 25Peru̶ je̱'e̱ mu̶dyiibu̶ je̱'e̱ ju̶bu̶kpu̶ tuumbu̶ñ, yajkumu̶dowu̶u̶ju̶p Dios je̱', du'un neby naty je̱'e̱ ju̶bu̶kpu̶ tu̶ tuñu̶ñ, je̱' ko ka'p je̱'e̱ Dios je̱'e̱ ja'ay win'ixy tzaachtyúñ, y'agu̶tzaachtyuumby je̱' wanpú̶nu̶ch pu̶n naty je̱'e̱ ju̶bu̶kpu̶ tuumbu̶ñ.

Currently Selected:

Colosenses 3: MIXE

Highlight

Copy