1 Timoteo 4
4
May je̱'e̱ ja'ay u̶xmadzaangu̶xy je̱'e̱ Dios y'ayuuk tyu̶y'ajt
1Peru̶ du'un je̱'e̱ Espíritu oywyinju̶wu̶u̶yñu̶ myu̶na'añ, ko naty je̱'e̱ xu̶u̶ tiempo kyu̶xaan tyu̶goyaanu̶, nije̱' je̱'e̱ ja'ay u̶xmadzaangu̶xnu̶ je̱'e̱ Dios y'ayuuk tyu̶y'ajt, panú̶kxku̶xnu̶ naty je̱'e̱ ja'ay y'ayuuk ajku̶xy je̱'e̱ mu̶dyiibu̶ win'u̶u̶ngu̶xpu̶ñ y je̱'e̱ mu̶dyiibu̶ je̱'e̱ ka'a'óybyu̶ u̶xpu̶jku̶ñ mu̶dajtku̶xpu̶ñ. 2Je̱' y'ayuuk je̱'e̱ myu̶jpu̶da'agaanu̶py ajku̶xy je̱'e̱ ja'ay tzo'oydyu'untúkpu̶ ajku̶xy y je̱'e̱ mu̶dyiibu̶ janch anu̶u̶ju̶ñ ajku̶xy, ka'p je̱'e̱ du'umbu̶ ja'ay nineby y'oknayjyu̶wu̶u̶yu̶gu̶xnu̶ ko y'anu̶u̶'ajttu̶gu̶u̶ygyu̶xy, tu̶ je̱'e̱ wyinma'añ du'un tu'ug'aa tu'ugjoot pu̶daakku̶xy ko du'un y'adu̶'u̶dzaangu̶xy y tu̶ je̱'e̱ jyoot wyinma'añ tyu̶gooygyu̶xnu̶. 3Je̱'e̱ du'umbu̶ ja'ay ajku̶xy du'un je̱'e̱ myu̶na'anaangu̶xy ko je̱'e̱ ja'ay ka'p mu̶baad pyu̶jkku̶xy y'uukku̶xy y ka'p je̱'e̱ kaayu̶ñ uuku̶ñ mu̶baad nije̱' tzu'tzku̶xy jú̶kxku̶xy mu̶dyiibu̶ je̱'e̱ Dios tu̶ yajkojyu̶ñ neby je̱'e̱ mu̶bu̶jkpu̶du̶jk y je̱'e̱ mu̶dyiibu̶ je̱'e̱ tu̶y'ajt mu̶bu̶jkku̶xpu̶ñ mu̶baad tzu'tzku̶xy jú̶kxku̶xyu̶ñ, cham je̱'e̱ Dioskujuuyu̶p ye̱jkku̶xy ma je̱'e̱ Diosu̶ñ. 4Ku̶xyu̶ tijaty je̱'e̱ Dios tu̶ yajkojyu̶ñ oy je̱' y ka'p mu̶baad nmu̶naanu̶m ajku̶xy ko ka'p y'óyu̶ch, y mu̶baad agujk jootkujk ngu'ubu̶jku̶m ajku̶xy; cham je̱'e̱ Dioskujuuyu̶p nye̱jku̶m ajku̶xy ma je̱'e̱ Diosu̶ñ. 5Je̱' ko je̱'e̱ Dios y'ayuuk y ko je̱'e̱ Dios nmu̶bu̶jktzoowu̶mu̶ch, kyunukxypy je̱'e̱ Dios kaayu̶ñ uuku̶ñ du'un.
Tu'ug je̱'e̱ oybyu̶ Jesucristo myu̶duumbu̶
6Pu̶nu̶ myaj'u̶xpu̶jkypy je̱'e̱ mu̶bu̶jkpu̶du̶jk ajku̶xy adayaaba ayuuk tu̶y'ajt y pu̶nu̶ myajkoptu̶gu̶u̶by je̱'e̱ ayuuk mu̶dyiibu̶ je̱'e̱ mu̶bu̶jku̶ñ ye̱jkpu̶ñ y mu̶u̶d je̱'e̱ oybyu̶ u̶xpu̶jku̶ñ mu̶dyiibu̶ mbanu̶kxypyu̶ñ, y je̱'e̱ oybyu̶ Jesucristo myu̶duumbu̶ naty du'un miich myajpaady.
7Peru̶ ka'p mmu̶jpu̶da'agy je̱'e̱ nigoobu̶ kyapxy'aty y'ayuuk'áty y je̱'e̱ mu̶dyiibu̶ ka'p chobaady ma je̱'e̱ Diosu̶ñ. Naybyu̶da'agu̶u̶ amuumdu'ugjoot ko je̱'e̱ Dios mmu̶dúñ; 8oy je̱'e̱ we̱e̱nu̶ jya'apubéty ko je̱'e̱ nni'kx ngopt nyajyu'kxu̶mu̶ch, peru̶ jak'oy je̱'e̱ ni'igyu̶ ko je̱'e̱ Dios tu'ug'aa tu'ugjoot nigu̶xyu̶ nmu̶duunu̶mu̶ch ajku̶xy, je̱' ko je̱' je̱'e̱ jootkujk'ajtu̶ñ ye̱jkp ma adayaaba jugy'ajtu̶ñ y nan ma je̱'e̱ jugy'ajtu̶ñ wiinu̶u̶xu̶u̶bu̶ mu̶dyiibu̶ miimb ku̶daakpu̶ñ. 9Adaa jaanch adaa du'un, y nigu̶xyu̶ mu̶baad nmu̶bu̶jku̶m ajku̶xy. 10Paady ku̶'u̶m duunu̶m y n'ayoowu̶m ajku̶xy,#4.10 N'ayoowu̶m ajku̶xy: nije̱' jaaybyu̶du̶jk myu̶naangu̶xy: oy pu̶n xywyin'oj xyjyu̶jp'óju̶m ajku̶xy. je̱' ko nju̶jp'ijxu̶m ajku̶xy ko je̱'e̱ Dios oydyuum xypyu̶da'agaanu̶m ajku̶xy, je̱'e̱ Dios mu̶dyiibu̶ wiinu̶u̶xu̶u̶ jugy'ajtpu̶ñ, mu̶dyiibu̶ je̱'e̱ ja'ay ku̶xyu̶ niwaamb yajtzookpu̶ñ, je̱' je̱'e̱ ni'igyu̶ ñiwe̱e̱mby yajtzookypy je̱'e̱ ja'ay mu̶dyiibu̶ je̱'e̱ y'ayuuk tyu̶y'ajt mu̶bu̶jkku̶xu̶bu̶ñ.
11Adayaaba ayuuk je̱'e̱ mu̶bu̶jkpu̶du̶jk yajnu̶ma'a y yaj'u̶xpú̶k ajku̶xy ko wan kuydyuungu̶xy. 12Wan je̱'e̱ ja'ay m'ayuuk xymyu̶jpu̶daaku̶ ajku̶xy; oy miich mja'amutzk'ana'knu̶ju̶ch, ni'igu̶ miich je̱'e̱ ijxpe̱jt myé̱gu̶py ma je̱'e̱ mu̶bu̶jkpu̶du̶jku̶ñ neby mgapxy mu̶dya'agyu̶ñ, neby mja'ay'átyu̶ñ, neby m'oyjya'ay'átyu̶ñ,#4.12 Nije̱' wiingpu̶ versión myu̶na'añ: neby mwinxónu̶chu̶ñ. neby je̱'e̱ mu̶bu̶jku̶ñ mu̶u̶du̶chu̶ñ ko mDiosmu̶dúñ y neby oy wa'adz mdzu̶na'ay mjugy'atyu̶ñ. 13Ma u̶u̶ch naty nga'aja'adyñu̶ ma miichu̶ñ, kapx je̱'e̱ Dios ñaky ma je̱'e̱ naymyujktaaktu̶ñ, yajjootkugu̶'u̶ je̱'e̱ mu̶bu̶jkpu̶du̶jk du'un ajku̶xy y yaj'u̶xpu̶jkku̶x je̱'e̱ tu̶y'ajt. 14Ka'p mnajtz'ixu̶'u̶y je̱'e̱ mu̶dyiijáty je̱'e̱ Dios tu̶ xymyo'oyu̶ñ, je̱'e̱ mu̶naaba je̱'e̱ Dios xyñigapxyu̶ñ, mu̶naaba je̱'e̱ mu̶bu̶jkpu̶du̶jk nigu'ubajk'ajtpu̶ xykyu̶'u̶ni'ixajyu̶ñ ajku̶xy.
15Yajkoptu̶gu̶'u̶ adayaaba ku̶xyu̶ mu̶dyiibu̶ tu̶ nyajnu̶ma'ayu̶ñ, wan du'un ku̶xyu̶ ñi'igu̶xu̶'u̶gu̶ch ma je̱'e̱ mayjya'ayu̶ñ ko je̱'e̱ m'u̶xpu̶jku̶ñ ni'igyu̶ myajwaadz'adu̶'u̶ch. 16Naygyweentu̶'adu̶u̶ miich ku̶'u̶m y nan naygyweentu̶'adu̶u̶ ma je̱'e̱ Diosu̶ñ tii je̱'e̱ wiingpu̶ja'ay du'un myaj'u̶xpu̶jkypyu̶ñ ajku̶xy, y paduun'adu̶'u̶dz du'un ku̶xyu̶ wa'adz ka'p m'u̶xmach. Pu̶nu̶ mduumby je̱'e̱ du'un, mu̶'it ku̶'u̶m mnayyajni'idzo'ogu̶u̶ju̶ch y nan myajni'idzo'ogu̶py nandu'un je̱'e̱ mu̶dyiijáty je̱'e̱ m'ayuuk naty xy'amdo'ijtu̶byu̶ñ ajku̶xy.
Currently Selected:
1 Timoteo 4: MIXE
Highlight
Share
Copy
Want to have your highlights saved across all your devices? Sign up or sign in
Nuevo Testamento en Mixe de Mazatlán y Tutla, Oaxaca, México © Sociedad Bíblica de México, A.C. 2005