1 Timoteo 5
5
Neby mu̶baad nja'ay'ajtu̶m mu̶u̶d je̱'e̱ mu̶bu̶jkpu̶du̶jk ajku̶xy
1Ka'p je̱'e̱ amu̶jja'aydyu̶jk mwin'oj mju̶jp'óju̶ch; oy'eemby u̶u̶wijku̶x kapxwijku̶x du'un neby je̱'e̱bu̶ mdeedy'ajtypyu̶ñ, nandu'un je̱'e̱ tzugajy'ana'ktu̶jk ajku̶xy; oy'eemby mu̶gápxku̶x ane̱'e̱mgu̶x du'un neby je̱'e̱bu̶ mbuya'ay'ajtypyu̶ñ. 2Je̱'e̱ amu̶jja'aydyo'oxyu̶jktu̶jk ajku̶xy nan oy'eemby je̱'e̱ nandu'un mu̶gápxku̶x ane̱'e̱mgu̶x du'un neby je̱'e̱bu̶ mdaj'ajtypyu̶ñ, y nandu'un je̱'e̱ to'oxy'ana'ktu̶jk ajku̶xy; oy'eemby mu̶gápxku̶x ane̱'e̱mgu̶x du'un neby je̱'e̱bu̶ mbudo'oxy'ajtypyu̶ñ, y mu̶d'ijtku̶x mu̶u̶d je̱'e̱ tu'uda'agypyu̶ joot winma'añ.
3Pube̱t pudu̶gu̶'u̶ je̱'e̱ ku'o'ogytyo'oxyu̶jktu̶jk ajku̶xy mu̶dyiibu̶ ka'p pyu̶n pu̶n y'a'ix jyu̶p'íxu̶byu̶ñ ajku̶xy. 4Peru̶ pu̶nu̶ jim je̱'e̱ ku'o'ogytyo'oxyu̶jk mu̶dyiibu̶ y'ung y'ana'k o y'ok'ung y'ok'ana'k mu̶u̶du̶ñ, je̱' je̱'e̱ jayu̶jp paattu̶p ajku̶xy neby je̱'e̱ tyaj o je̱'e̱ myaam pube̱jtku̶xu̶chu̶ñ y ju̶jpwa'agu̶u̶ygyu̶xu̶ch neby je̱'e̱ tyaj tyeedy y je̱'e̱ tyaj o je̱'e̱ myaam ijty chojkku̶xu̶, je̱' ko oy adaa du'un y du'un je̱'e̱ Dios ku'umáy. 5Je̱'e̱ jaanchpyu̶ kyu'o'ogytyo'oxyu̶jku̶ch je̱'e̱ mu̶dyiibu̶ naydyu'umbajk tu̶ wyu̶'u̶myu̶ñ, je̱' je̱'e̱ jyu̶jp'ijxypy ko je̱'e̱ Dios pyube̱du̶u̶ju̶ch y Dios mu̶bu̶jktzodu̶u̶b je̱'e̱ jaboom jaboom y xu̶u̶m tzum. 6Peru̶ je̱'e̱ ku'o'ogytyo'oxyu̶jk mu̶dyiibu̶ tzu̶naaby jugy'ajtp mu̶u̶d je̱'e̱ mayñaxpu̶ xondaaku̶ñ, du'un je̱'e̱ Dios yajnaxyii neby o'ogypyu̶ju̶ñ oy naty jya'ajugy'átyñu̶. 7Yajnu̶maaygyu̶x adayaaba ayuuk nandu'un ko wan kuydyuungu̶xy, ka'pu̶ yajmu̶kmu̶gápxku̶xu̶ch. 8Pu̶n je̱'e̱ jyuugy myu̶gu'ug ka'p pubety pudu̶gu̶'u̶yu̶ñ y pu̶nu̶ ka'p je̱'e̱ kyu̶'u̶m'úng kyu̶'u̶mdo'oxyu̶jk oy yajxón ixy kweentu̶'áty, tu̶ je̱'e̱ myu̶bu̶jku̶ñ du'un yajtu̶gooyñu̶ neby ijty mu̶bu̶kyu̶ñ, janch ju̶bu̶k naty je̱'e̱ du'un ni'igyu̶ tu̶ y'adu̶'u̶ch ni'igu̶ ka'p je̱'e̱ mu̶dyiibu̶ je̱'e̱ Dios y'ayuuk tyu̶y'ajt ka'p mu̶bu̶kyñu̶ ajku̶xyu̶ñ.
9Je̱'e̱ ku'o'ogytyo'oxyu̶jktu̶jk mu̶dyiibu̶ je̱'e̱ jyumu̶jt tu̶gu̶'px, je̱' je̱'e̱ xyu̶u̶ mu̶baad mgujayu̶u̶yu̶ ma je̱'e̱ lista mu̶dyiibu̶ mbube̱de̱e̱mbyu̶ñ ajku̶xy, mu̶dyiibu̶ je'eyu̶ tu'ug tu̶ ya'aydyu̶jk mu̶dtzu̶na'ayu̶ñ, 10mu̶dyiibu̶ oy yajxón yajnigápxp yajnimu̶dyaakp mu̶u̶d je̱'e̱ mu̶dyiibu̶ tu̶ tuñu̶ñ, mu̶dyiibu̶ je̱'e̱ y'ung y'ana'k oy yajxón tu̶ yaj'yeegyu̶ñ, mu̶dyiibu̶ je̱'e̱ jaybyokxtyu̶jk xi'ig xon tu̶ yajja'tta'agy ma je̱'e̱ jyu̶u̶n tyu̶jku̶ñ, mu̶dyiibu̶ je̱'e̱ mu̶bu̶jkpu̶du̶jk tyeky tu̶ púju̶ju̶ñ, mu̶dyiibu̶ tu̶ pubety tu̶ pudu̶gu̶'u̶y je̱'e̱ mu̶dyiibu̶ ayoogu̶xpu̶ñ y je̱'e̱ mu̶dyiibu̶ je̱'e̱ oybyu̶ tuung ku̶xyu̶ tu̶ tuñu̶ñ.
11Peru̶ ka'p je̱'e̱ jaktzaambu̶ ku'o'ogytyo'oxyu̶jktu̶jk xyu̶u̶ mgujayu̶u̶yu̶ch ma je̱'e̱ lista mu̶dyiibu̶ mbube̱de̱e̱mbyu̶ñ ajku̶xy, oy je̱'e̱ y'okja'amu̶na'añ ajku̶xy ko je̱'e̱ Cristo tyuung tunaanu̶ ajku̶xy, peru̶ we̱e̱nu̶ y'ijtnu̶, chi je̱'e̱ ja'adu'ook nijoot'ajtku̶xnu̶ba pyu̶jktu̶gatzaangu̶xnu̶bu̶, 12y du'un ñayyajpokykya'awu̶gu̶xy ko je̱'e̱ tuung u̶xmajtzku̶xy mu̶dyiibu̶ naty nigoo tu̶ u̶xtunu̶u̶ygyu̶xyu̶ñ. 13Ja'adu'knáx ka'p je̱'e̱ tyuung ok'yajkoptu̶gu̶u̶ygyu̶xnu̶, wyu̶dijttu̶gu̶u̶ygyu̶xnu̶ tu̶jk tu̶jk, y jyajtku̶xnu̶ janchnuux. Nan ka'p je'eyu̶ ñuuxu̶u̶ygyu̶xnu̶ nan janch agapx wyimbijtku̶xnu̶, yaj'adzowu̶u̶ygyu̶xy ku̶xyu̶ tijaty y kapxnu̶ mu̶dyaakku̶xnu̶ mu̶dyiibu̶ ka'p kyapxnu̶ myu̶dyaaknu̶chu̶ñ. 14Paady u̶u̶ch ndzoky ko je̱'e̱ tzaan ku'o'ogytyo'oxyu̶jktu̶jk wan pu̶jkku̶xy, wan ung'ixy ana'k'íxy ajku̶xy, wan je̱'e̱ jyu̶u̶n tyu̶jk oy yajxón kweentu̶'ajtku̶xy y ka'p je̱'e̱ ja'ay yajkápxku̶xu̶ch je̱'e̱ mu̶dyiibu̶ je̱'e̱ Dios y'ayuuk tyu̶y'ajt ka'p ixaan mu̶dowaangu̶xyu̶ñ. 15Nije̱' je̱'e̱ ku'o'ogytyo'oxyu̶jktu̶jk tu̶ u̶xmajtzku̶xnu̶ je̱'e̱ Dios y'ayuuk tyu̶y'ajt y tu̶ padu̶gu̶u̶ygyu̶xnu̶ je̱'e̱ mu̶jku'u wyinma'añ.
16Pu̶nu̶ jii je̱'e̱ to'oxyu̶jk mu̶bu̶jkpu̶du̶jk#5.16 Pu̶nu̶ jii je̱'e̱ to'oxyu̶jk mu̶bu̶jkpu̶du̶jk: nije̱' jaaybyu̶du̶jk myu̶naangu̶xy: Pu̶nu̶ jii ya'aydyu̶jk o to'oxyu̶jk mu̶bu̶jkpu̶du̶jk. jyuugy myu̶gu'ug mu̶u̶du̶ch mu̶dyiibu̶ ku'o'ogyu̶ñ ajku̶xy, je̱' je̱'e̱ paattu̶p ajku̶xy íxu̶ch kweentu̶'ádu̶ch je̱'e̱ ku'o'ogytyo'oxyu̶jktu̶jk ajku̶xy, ka'pu̶ je̱'e̱ wiingpu̶ mu̶bu̶jkpu̶du̶jk ijxpé̱du̶ch ajku̶xy. Y du'un je̱'e̱ mu̶bu̶jkpu̶du̶jk mu̶baad pube̱jt pudu̶gu̶u̶ygyu̶xy je̱'e̱ ku'o'ogytyo'oxyu̶jktu̶jk je̱'e̱ ka'pu̶ pyu̶n pu̶n y'a'ix jyu̶jp'íxu̶byu̶ñ ajku̶xy.
17Je̱'e̱ amu̶jja'aydyu̶jk mu̶dyiibu̶ je̱'e̱ mu̶bu̶jkpu̶du̶jk nigu'ubajk'ajtku̶xpu̶ñ, je̱'e̱ mu̶dyiibu̶ oy yajxón tuungu̶xpu̶ñ, windzu̶gu̶'u̶y je̱'e̱ mu̶j y'ijtku̶xu̶ch,#5.17 windzu̶gu̶'u̶y je̱'e̱ mu̶j y'ijtku̶xu̶ch: nije̱' wiingpu̶ jaaybyu̶du̶jk myu̶naangu̶xy: wan je̱'e̱ ni'igyu̶ oy yajmu̶juuygyu̶xy. y je̱' ni'igu̶ mu̶j windzu̶gu̶'u̶y ijtku̶xu̶p je̱'e̱ mu̶dyiibu̶ je̱'e̱ Dios y'ayuuk tyu̶y'ajt kapxwa'kxku̶xpu̶ñ y je̱'e̱ mu̶dyiibu̶ yaj'u̶xpu̶jkku̶xpu̶ñ. 18Du'un kyuja'ayu̶ch ma je̱'e̱ Dios ñakyu̶ñ: “Ka'p je̱'e̱ wajyuubu̶ y'ajé̱n mbu̶daaku̶yu̶ ma naty je̱'e̱ trigo mu̶u̶y te̱nmooda'añu̶ñ ko naty tyrigo yajpajk'ada'añ.” Y nandu'un ja'adu'k'ít myu̶na'añ: “Je̱'e̱ mu̶duumbu̶ paattu̶p myu̶ju'uñ je̱'.”
19Ka'p je̱'e̱ amu̶jja'aydyu̶jk xyu̶'u̶wu̶ñ mgu'ubu̶jku̶yu̶, pu̶nu̶ ka'p naty je̱'e̱ nidu̶y'ajt'ajtpu̶ me̱tzk o tu̶gu̶u̶g maa kyu̶xu̶'u̶gy.
20Je̱'e̱ mu̶dyiibu̶ naty tuundu̶gooy'adu̶u̶tzku̶xpu̶ñ, ojku̶x je̱'e̱ mayjya'ayjyooty ma ñaymyujku̶gu̶xyu̶ñ wan je̱'e̱ jakmaybyu̶ mu̶bu̶jkpu̶du̶jk du'un chu̶gu̶u̶ygyu̶xu̶ch.
21Adaa tu̶y'ajt miich nyajni'ipu̶jkypy y'ijxypy ñejwu̶u̶by je̱'e̱ Dios y je̱'e̱ Jesucristo y je̱'e̱ y'ángelestu̶jk mu̶dyiibu̶ tu̶ win'ixyu̶ñ. Ko adaa tu̶y'ajt mbanú̶kxu̶ch ka'p je̱'e̱ mu̶bu̶jkpu̶du̶jk win'ixy mdu̶ydyúnu̶ch mdzaachtyúnu̶ch y nan ka'p win'ixy mbube̱t mbudu̶gu̶'u̶wu̶ch. 22Ka'p je̱'e̱ ja'ay ni tu'ug mgu̶'u̶ni'ixáju̶ch ko naty mduungmo'owa'añ mu̶dyiibu̶ ka'p oy m'ixy'aty neby jya'ay'ajtku̶xyu̶ñ, ka'p jékyu̶ch ko nu̶kxy kya'amadaakku̶xy, chi miich nandu'un mbokykya'awu̶ch mu̶u̶d je̱' gyu̶xpu̶ ajku̶xy. Naygyweentu̶'adu̶u̶ ka'pu̶ mbokykya'awu̶ch.
23Miich Timoteo, ko mxu̶'u̶mu̶jootpu̶jktu̶yii, ka'p je̱'e̱ adu̶yu̶ nu̶u̶ m'ok'uuknu̶ch, ni'igu̶ oy ko je̱'e̱ viino we̱e̱nu̶ m'u'ugu̶ch mdzooy'ádu̶ch.
24Nije̱' je̱'e̱ ja'ay pyoky kyu̶dyeey oy wa'adz ñi'igu̶xu̶'kku̶xy ma naty ka'anu̶ yajtu̶ydyuungu̶xyñu̶ju̶ñ, y nije̱' ka'p je̱'e̱ pyoky kyu̶dyeey chojk ñi'igu̶xu̶'kku̶xy u̶xtu̶ koonu̶ yajtu̶ydyuungu̶xyñu̶. 25Nandu'un je̱'e̱ ja'ay, yajni'igu̶xu̶'kku̶xu̶py je̱'e̱ oy yajxón ko naty je̱'e̱ oybyu̶ tuungu̶xy y mu̶dyiibu̶ naty ka'p yajni'igu̶xu̶'kku̶xyu̶ñ, ka'p je̱'e̱ yu'uch ok'yaj'ijtu̶wu̶ch ajku̶xy.
Currently Selected:
1 Timoteo 5: MIXE
Highlight
Share
Copy
Want to have your highlights saved across all your devices? Sign up or sign in
Nuevo Testamento en Mixe de Mazatlán y Tutla, Oaxaca, México © Sociedad Bíblica de México, A.C. 2005