1 Timoteo 3
3
Neby mu̶baad tyuungu̶xyu̶ñ je̱'e̱ mu̶dyiibu̶ je̱'e̱ mu̶bu̶jkpu̶du̶jk nigu'ubajk'ajtku̶xpu̶ñ
1Adaa tu̶y'ajtu̶ñ adaa du'un: pu̶nu̶ jii pu̶n adzoky nigu'ubajk'ada'añ je̱'e̱ mu̶bu̶jkpu̶du̶jk ajku̶xy, je̱'e̱ oybyu̶ tuung naty je̱'e̱ du'un tu'ug y'adzojkypy. 2Paady pu̶n je̱'e̱ mu̶bu̶jkpu̶du̶jk nigu'ubajk'adaamb ajku̶xy, kwaanu̶ je̱'e̱ oy jya'ay'ajtku̶xu̶ch ka'pu̶ yajmu̶kmu̶gápxku̶xu̶ch, mu̶dyiibu̶ to'oxyu̶jk tu'ug mu̶u̶du̶ñ y ka'p mye̱tzk tyu̶gu̶u̶gu̶ch,#3.2 Mu̶dyiibu̶ to'oxyu̶jk tu'ug mu̶u̶du̶ñ y ka'p mye̱tzk tyu̶gu̶u̶gu̶ch: nije̱' wiingpu̶ jaaybyu̶du̶jk myu̶naangu̶xy: mu̶dyiibu̶ je'eyu̶ tu'u'ook pu̶kyu̶ñ y ka'p mye̱jtz'ook tyu̶gu̶u̶g'ooku̶ch. mu̶dyiibu̶ oy tu'uda'agy tzu̶naaby jugy'ajtpu̶ñ, mu̶dyiibu̶ wijy kejy ja'ay'ajtpu̶ñ, mu̶dyiibu̶ je̱'e̱ windzu̶gu̶'u̶ñ yajtuumbu̶ñ, mu̶dyiibu̶ je̱'e̱ ja'ay yajja'ttaakp ma je̱'e̱ jyu̶u̶n tyu̶jku̶ñ y je̱'e̱ mu̶dyiibu̶ jajtp neby je̱'e̱ ja'ay yaj'u̶xpú̶gu̶chu̶ñ. 3Je̱'e̱ mu̶dyiibu̶ ka'p y'u'ugy jyu̶kxyu̶ñ, mu̶dyiibu̶ ka'p chipja'ayu̶chu̶ñ, mu̶dyiibu̶ je̱'e̱ oyjya'ay'ajtu̶ñ mu̶j mu̶u̶du̶ñ, mu̶dyiibu̶ ka'p chipkapxy y'awa'angápxyu̶ñ y mu̶dyiibu̶ je̱'e̱ wit meeñ ka'p adzokyu̶ñ. 4Y je̱'e̱ mu̶dyiibu̶ oy yajxón ane̱'e̱mb ma je̱'e̱ jyu̶u̶n tyu̶jku̶ñ, mu̶dyiibu̶ je̱'e̱ y'ung y'ana'k u̶u̶wijp kapxwijpu̶ñ ko wan u̶u̶mu̶doogu̶xy kapxymyu̶doogu̶xy y je̱'e̱ mu̶dyiibu̶ je̱'e̱ y'ung y'ana'k je̱'e̱ windzu̶gu̶'u̶ñ yajtuungu̶xpu̶ñ. 5Y pu̶nu̶ ka'p jaty neby y'ane̱'e̱mu̶chu̶ñ ma je̱'e̱ kyu̶'u̶mdu̶jku̶ñ, ¿neby je̱'e̱ da'a okkweentu̶'ádu̶ch je̱'e̱ mu̶dyiibu̶ je̱'e̱ Dios mu̶bu̶jkku̶xpu̶ñ? 6Nan ka'p je̱'e̱ mu̶bu̶jkpu̶du̶jk mu̶baad nigu'ubajk'áty mu̶dyiibu̶ chaanu̶ mu̶bu̶kyu̶ñ je̱'e̱ Dios y'ayuuk tyu̶y'ajt, ka'p jékyu̶ch nu̶kxy aamu̶j jootmu̶j ñayjyu̶wu̶u̶ygyoodyii y nu̶kxy kya'amada'agy y nan nu̶kxy du'un jyaty neby je̱'e̱ mu̶jku'u jyajtyu̶ñ, ko ju̶bu̶ktuum ñayyajka'awu̶. 7Nandu'un chojkypy je̱'e̱ ja'ay tu'ug mu̶dyiibu̶ je̱'e̱ tu̶gu̶'u̶ja'ay oy ku'umaayu̶bu̶ñ, je̱'e̱ mu̶dyiibu̶ ka'p Dios mu̶duñu̶ñ, ka'pu̶ tyuundu̶góyu̶ch y ka'pu̶ je̱'e̱ mu̶jku'u yajwinma'añdyu̶goyu̶u̶ju̶ch.
Neby je̱'e̱ mutztuungmu̶u̶dpu̶du̶jk mu̶baad tyuungu̶xyu̶ñ
8Nandu'un je̱'e̱ mutzk tuungmu̶u̶dpu̶du̶jk mu̶dyiibu̶ yajpaatku̶xpu̶ñ ma je̱'e̱ mu̶bu̶jkpu̶du̶jk ajku̶xyu̶ñ, je̱' je̱'e̱ tzojku̶p tu'ug je̱'e̱ ja'ay mu̶dyiibu̶ je̱'e̱ windzu̶gu̶'u̶ñ yajtuumbu̶ñ, mu̶dyiibu̶ ka'p ñu̶u̶gápxy yujkkápxyu̶ñ, mu̶dyiibu̶ ka'p y'u'ugy jyu̶kxyu̶ñ y mu̶dyiibu̶ ka'p y'ameeñu̶chu̶ñ. 9Wan tu'ug'aa tu'ugjoot yajkoptu̶gu̶u̶ygyu̶xy je̱'e̱ tu̶y'ajt mu̶dyiibu̶ yajnejwu̶u̶ybyu̶ñ je̱'e̱ mu̶dyiibu̶ ijty yu'uchu̶ñ, je̱'e̱ mu̶dyiibu̶ nmu̶bu̶jkypy ajtu̶m ajku̶xyu̶ñ, y mu̶dajtku̶xu̶ch je̱'e̱ oyjyoot oywyinma'añ. 10Pu̶njaty je̱'e̱ mutzk tuung tunaamb, jayu̶jp je̱'e̱ y'ok'yajjoot'íx y'ok'yajwinma'añ'íxu̶ch pu̶nu̶ tu'uda'agy je̱'e̱ wyinma'añ y pu̶nu̶ ka'p maa tyuundu̶góy, mu̶'itnu̶ mu̶baad yajtuungmo'oy. 11Nandu'un je̱'e̱ mutzk tuungmu̶u̶dpu̶du̶jk to'oxyu̶jktu̶jk ajku̶xy, je̱' je̱'e̱ tzojku̶p mu̶dyiibu̶ je̱'e̱ windzu̶gu̶'u̶ñ yajtuumbu̶ñ, mu̶dyiibu̶ je̱'e̱ myu̶gu'ug ka'p ni'oj niyaaxu̶'u̶yu̶ñ, mu̶dyiibu̶ oy tu'uda'agy ja'ay'ajtpu̶ñ y mu̶dyiibu̶ oy ku̶xyu̶ kuydyuundaaybyu̶ñ. 12Je̱'e̱ ya'aydyu̶jk mutzk tuungmu̶u̶dpu̶ je̱' je̱'e̱ tzojku̶p tu'ug je̱'e̱ ja'ay mu̶dyiibu̶ to'oxyu̶jk tu'ug mu̶u̶du̶ñ y ka'p mye̱tzk tyu̶gu̶u̶gu̶ch,#3.12 Ijxku̶x je̱'e̱ nota 3.2. je̱'e̱ mu̶dyiibu̶ y'ung y'ana'k oy yajxón ane̱'e̱mbu̶ñ, y mu̶dyiibu̶ oy yajxón ane̱'e̱mb ma je̱'e̱ kyu̶'u̶mju̶u̶n kyu̶'u̶mdu̶jku̶ñ. 13Je̱'e̱ mutzk tuungmu̶u̶dpu̶du̶jk ajku̶xy mu̶dyiibu̶ je̱'e̱ tyuung oy yajxón tuungu̶xpu̶ñ, ku'umaybyu̶dzu̶u̶mgu̶xp je̱'e̱ du'un ma je̱'e̱ mu̶bu̶jkpu̶du̶jku̶ñ, y jootkujk je̱'e̱ myu̶bu̶jku̶ñ mu̶baad nigapx nimu̶dyaakku̶xnu̶ mu̶dyiibu̶ myu̶dajtku̶xypyu̶ñ ma je̱'e̱ Cristo Jesúsu̶ñ.
Je̱'e̱ tu̶y'ajt mu̶dyiibu̶ yajnejwu̶u̶ybyu̶ñ mu̶dyiibu̶ ijty yu'uch ma u̶u̶ch ajtu̶m ajku̶xyu̶ñ
14Adaa naky u̶u̶ch miich nyajniguejxypy ko u̶u̶ch tzojku̶du̶gu̶'u̶ nnu̶kxa'añ jim ma miichu̶ñ. 15Pu̶nu̶ ka'p u̶u̶ch naty ndzojknú̶kxy, nejwu̶'u̶ neby je̱'e̱ tu̶y'ajt yam nyajnijayu̶'u̶y. Adayaaba naky mu̶baad mu̶u̶d mwingapx mju̶jpkapxu̶'u̶y neby je̱'e̱ mu̶bu̶jkpu̶du̶jk mu̶baad jya'ay'ajtku̶xyu̶ñ ma je̱'e̱ Dios jya'ayu̶ñ, mu̶dyiibu̶ je̱'e̱ juugypyu̶ Dios mu̶jpu̶daakku̶xpu̶ñ, je̱'e̱ Dios mu̶dyiibu̶ wijtz'ijttaaybyu̶ñ y mu̶dyiibu̶ je̱'e̱ jaanchpyu̶ tu̶y'ajt niwaambu̶ñ. 16Janch tu̶y'ajt adaa du'un, ko janchmu̶j je̱'e̱ Dios y'ayuuk tyu̶y'ajt mu̶dyiibu̶ xyajnejwu̶u̶yu̶mbyu̶ñ, je̱'e̱ mu̶dyiibu̶ ijty jeky'ajty yu'uchu̶ñ. Je̱'e̱ tu̶y'ajt ko je̱'e̱ y'ung ya naaxwiiñ kejxy.
Cristo du'un je̱'e̱ yaj'ijxy mu̶u̶d je̱'e̱ ñi'kx kyopt ko ya naaxwiiñ y'ooy,
tu̶ je̱'e̱ tzaachpyu̶ mu̶naxy ku'ubú̶ky mu̶u̶d je̱'e̱ wyij'ajt kye̱j'ajtu̶ñ#3.16 Tu̶ je̱'e̱ tzaachpyu̶ mu̶naxy ku'ubú̶ky mu̶u̶d je̱'e̱ wyij'ajt kye̱j'ajtu̶ñ: nije̱' wiingpu̶ jaaybyu̶du̶jk myu̶naangu̶xy: yajni'igu̶xu̶'ku̶ je̱'e̱ Espíritu ko wya'adzja'ayu̶ch.
y tu̶ je̱'e̱ Dios y'ángelestu̶jk y'ixyii ajku̶xy.
Tu̶ je̱'e̱ y'ayuuk tyu̶y'ajt yajnigápxy yajnimu̶dya'agy ma je̱'e̱ naax kajptu̶ñ,#3.16 Nije̱' wiingpu̶ versión myu̶na'añ: ma je̱'e̱ ka'pu̶ jyudíoja'ayu̶chu̶ñ ajku̶xy.
tu̶ je̱'e̱ ja'ay y'ayuuk tyu̶y'ajt ya naaxwiiñ myu̶bu̶jkku̶xyu̶
y tu̶ tzajpjooty kyu'ubu̶gyii ma je̱'e̱ oybyu̶ ijttaaktu̶ñ.
Currently Selected:
1 Timoteo 3: MIXE
Highlight
Share
Copy
Want to have your highlights saved across all your devices? Sign up or sign in
Nuevo Testamento en Mixe de Mazatlán y Tutla, Oaxaca, México © Sociedad Bíblica de México, A.C. 2005