লূক 6
6
সদাং রাককো য়ুউরো সুসেংসাং পিঃখ্রাং
(মথি ১২:১-৮; মার্ক ২:২৩-২৮)
1তাঃরা তারাকনি যীশুচা খ্রেংগা ফ্রংরো লাঃলিইরি। য়াংসুউ তিবিরোচা খ্রেংগা আঞইং খ্যুওরো, লাকওয়ামা নিরো নিরো চাঃগেলিরি। 2য়াংখা লৈগায়ক ফরীশীরোচা প্রগেলিরি, “তাড়াদঃ অাতৈং, তাঃরা রাকমা যা মুলুঃউরালি, নাংরো য়াংচাগো যাফু লূককেতিলি?”
3যীশু প্রলিইরি, “দায়ুদনা য়াংসুউ মিছুয়িরোচা আঃচা যাখা ম্যুইকেলিরি, য়াংখা দায়ুদ যা লুকলিরিলি, য়াংচাগো কুবাংরো মেফেলি লঃ। 4দায়ুদগা থাওরা ফুরা ক্যংদুঃ ওয়ংরো, ফোগো তাংচা ভংমুংগো চাঃলিরি অর কুও মিছুয়িরোগোলি পিইলিরি। চাঃগা হিকলিরিগা, ফুংগ্রিই আপি অর তয়কলি, ছুয়েংদাংগো চাঃফু থুজৈংমা মিহিক।”
5আছুংমা যীশু য়াং ফরীশীরোগো প্রলিরি, “মনুসাওয়া সাঃদচা, তাঃরারাক ইংস্যাং।”
আলাক আসং লুঃউঃও আকং ফ্রলিইরি
(মথি ১২:৯-১৪; মার্ক ৩:১-৬)
6অর তাখা সাদং রাকমা যীশুচা তাঃরা চেরেমা লাঃরো সুসেংসাং পিলিরি। য়াংদেমা লুঃউ তয়ক হিকলিইরি, যা লুঃউমা ঞাফাক আলাকচা আসং হিকলিইরি। 7কেইং ছারারোনা ফরীশীরোচা যীশুগো আপ্রই খ্যাফু কিজু লেং হ্রাগেলিরি। য়জংকিজু তাঃরারাকমা যীশু লুঃউগো কেইংমাজি লঃ, য়াংচাগো ক্রিফুকিজু, য়াংসুউরো যীশু আঃপমা কংগং আহ্লা ম্যাকচি খ্যাগেলিইরি। 8য়ীশুচাগা য়াংসুউরো ওয়েংথিচাগাগো সিরি। য়াংচা কিজু যাসুমা আলাক আসং হিকলিরি, যীমু য়াং লুঃউগো প্রলিরি, “থাঃরো আলুংসুউ হ্রিইথাকমা লাঃরো রেঃ।” য়জং প্রখা য়াংসুউ থাঃরো রেঃলিরি।
9যীশু কেইংছারারোনা ফরীশীরোগো প্রলিইরি, “ঙা কুবাংরোগো চাঃগা তুখুওয়েং মিংফু, তাঃরা রাকমা আকং অলূককোরা লূকসাংতি লঃ, মুহুকি মকং অলূককোরা লূকসাংতি লঃ? আসাক কিছি সাং লঃ, মুহুককি সেঃসাং লঃ?”
10য়াংনক যীশু লিফাক লাকচি, আলুংসুউগো ক্রিরো, য়াং লুঃউগো প্রলিইরি, “নাক আলাক ছেং।” য়াংসুউ য়াংচা প্রাংরি নক, য়াংসুউ আলাকচা আহ্লাপা আলাকঞ্যং আকং ফ্রলিরি।
11য়াংখা থুউক কেইং গংখ্যুকরোচা কংগং মেং ফ্রককেলিরি অর যীশুগো য়ুউরো, যা প্যাংরাফুলি, য়াংচাগো কুরো কুরো আতুওয়ংমা তৈংবাংগেলিরি।
তিছি নৈয়ক তিবিরোগো তেমেংদ আরাগো পিইলিরি।
(মথি ৪:২৩-২৫; ১০:১-১১; মার্ক ৩:১৩-১৯)
12য়াংনক যীশু ছুতংফু কিজু, তং তদংদুঃ লাঃলিইরি অর ঙিকপ্রে থাওরা ফুরাবামা ছুকতংরো আখিং বৈলিইরি। 13মোঃলাংরিনক যীশু কুও তিবিরোগো কুঃবাদুঃ খঃলিইরি অর য়াংসুউরো আতুওয়ংগা তিছি নৈয়ককো রুইকক য়ুউরো, য়াংসুউরোগো তেমেংদ আরাগো পিলিরি। 14য়াং তিছি নৈয়কচা ফ্রকতি শিমোন, যাসুগো পিতরলি নাঃমি ম্হিকলিইরি, শিমোন ঞিং আন্দ্রিয়, যাকোবনা যোহন; ফিলিপনা বর্থলময়; 15মথিনা থোমা, আলফেয়ে সাঃ যাকোব, শিমোন যাসুউগো কোঃ জেঃ ম্যুওগো খ্যতিলু খঃরি। 16যাকোব সাঃ যিহূদা অর যিহূদা ইস্কারিয়ৎ, যাসুউ যীশুগো রেংসুউরো আলাকমা তিঃই পিইলিইরি।
17যীশুচা য়াংসুউ তিবিরোগো য়ুউরো, তংগা ছাংরো, তুখু আঞিং আঃরামা লাঃরো রেঃলিইরি। য়াংদেমা যীশু তিবি ম্যারোচা চুককেলিইরি। দিঃচাগো আপিলি যিহূদিয়া, যিরূশালেম অর সোরনা সীদোন নামি খঃরো ম্রঃনামা ম্রুঃ ন্হইম্রুঃ নেংবুনেংগালি লুঃউম্যারোলি য়াংদেমা হিকলিরি। 18য়াংসুউরো যীশু চাঃগা নাথংফু কিজু অর সানাসিগা কেইংমাফু কিজুলি য়াংদুঃ লাঃগেতি। যাসুরো মকং নেঃএ কৈরো, দুঃখুওয়া রাঃলিরি য়াংসুউরোলি কংলিরি। 19য়াংখা আলুংসুউ লুঃউচা যীশুগো মেংফু ক্রেংগেলিরি, আক্রংগা যীশুগা গোংধ থুওয়করো, আলুংসুউগো কেইংমাজিলিইরি।
ফোরা যীশু অওয়াদা
(মথি ৫:১-১২,৩৮-৪৮; ৭:১-৬,১৫-২০,২৪-২৯; ১২:৩৩-৩৭)
20নক্কা যীশু তিবিরোদুঃ ক্রিরো প্রলিইরিচা,
“ছাংরিসারো, নাংরোরা কাইংকংরি,
আক্রংগা থাওরা ফুরা ঈ নেংঙেংদচা নাংরো আতুওয়ক।
21যাসুউরোমা আগো আঙে-আমুওয়ে খেংরি,
য়াংসুউরো কাইংকংরি আক্রংগা নাংরো ওয়েংসামি।
যাসুউরো আগো ঙুরি, য়াংসুউরো কাইংকংরি
আক্রংগা নাংরোরা রিঃফু।
22“লুঃউসাঃদ আতুওয়ক লুঃউরো নাংরোগো মুংগি, য়াংসুউরো রুওয়া আথিগা লৈলো থুউককি অর মিক্রিনৈং ফ্রইকি য়ল্হমগে নাংরো নাঃমিগো ক্রাগি তোওয়াইংছি বৈতে ছোগে নাংরোমা মাংগলা হিকরে। 23য়াংখা নাংরো প্যগে অর ওয়েংসারো কাঃগে আক্রংগা সাগ্রাফুংমা নাংরো কিজু আক্যুও হিরি। য়াং লুঃউরোমা আচৈংরোলি, রিসিইরো আঃপমা দিঃ পুয়েং আনৈং প্যাংগেলিরি।
24“ছুগি উচ্চাস্যাংরোচা প্যক লাঃবেচিই!
নাংরোরা আব্রিচুং প্যাংলো আখেইংসামা হিকরি।
25লফা ম্যাসারোচা প্যকচেচিই!
নাংরোগা আচাঃ ম্যুয়েকেমি।
যাসুউরো রিঃগেতি য়াংসুউরো প্যকপেচিই।
নাংরোচা দুঃখাওয়া খেংরো ঙুগেমি।
26নাংরো প্যকপেচিই, আলুং লুঃউরোচা যাখা
নাংরোগো খিম্যুয়েংগেতি।
য়াং লুঃউরোমা আচৈংরোচা
ক্রংসুউদ রিসিইরোলি খিম্যুয়েংগেতি।”
27“নাংরো যাসুউরো নাথংগেতি য়াংসুউরোগো প্ররি, নাংরো কুঃমা রেইংসুউগো ওয়াসানা হিকগে। যাসুউরো নাংরোগো মিক্রিনৈং য়াংসুউরোগো মাঙ্গালা পিইগে। 28যাসুউরো নাংরোগো মকং তুওয়কতিলি-য়াংসুউরোগো নাংরো আকং তুওয়ককে। যাসুউরো নাংরোনা মকং আক্যাং আওয়ে প্যাংগেতি-য়াংসুউরো আতুওয়ক ছুউক তংগে। 29যাসুউ নাককো পাআ তাব্রাক্কা সেঃতি-য়াংসুউগো অর তাব্রাক্কালি সেঃফু পিইলৈই। যাসুউ নাংরোগা কুঃরুংগো য়ুউ লাঃরি-য়াংসুউগো আংঙ্গিগোলি পিইলৈই। 30যাসুউরো নাংরোগা তংরি-য়াংসুউরোগো পিইগে। খ্যাংসুউমুছু নাংরোগা তুখুকমাসা য়ুউ লাঃগি-য়াংচাগো অর প্রেং মুতংগিফিই। 31লুঃউরোগা নাংরো যাপুয়েং রুসিই রাঃখ্যাংলি-য়াংপুয়েং নাংরো লুঃউরোগো রুসিইগে।” 32“যাসুউরো নাংরোগো খ্যতিলি, নাংরোলি য়াংসুউরোগোরা খ্যতিছুগি-য়াংদেমা ম্যাকন্হা খেংফু যা হিকরিলিঃ? মকং লুঃউরোলি দিঃপুয়েং খ্যকেতি। 33যাসুউরো নাংরোগো মাঙ্গালা প্রুকতি, নাংরোচা য়াংসুউরোগোরা মাঙ্গালা প্রুকতিছুগি-য়াংদেমা ম্যাকন্হা খেংফু যা হিকরিলিঃ? মকং লুঃউরোলিগা দিঃপুয়েং অলুক লুকতি। 34যাসুউরোগা প্রেং রাঃফু আতুওয়ক, নাংরোরা টেংগা আঃখিই পিইরিছুগি-য়াংদেমা ম্যাকন্হা খেংফুচা যা হিকরিলিঃ? রাঃফু কিজুরা মকং লুঃউরোচা-মকং লুঃউরোগো অাঃখিই পিইরি। 35ছুগি নাংরোচা কুঃমা রেংসুউগো ওয়াসানা হিকগে অর য়াংসুউরোগো মাঙ্গালা প্যাংগে। তুখুউলি প্রেং রাঃফু মেম্হেপ্রি টেংগা আঃখিই পিইগে। য়াংপুয়েং লুককি নাংরো আতুওয়ক কংগং আগ্রিইকি ছুউক হিকরি অর নাংরোচা ফোরামা সাঃ ফ্রইমি আক্রংগা ফোরাচা কিজু মিহিকরি লুঃউনা মকং লুঃউরোগোলি মিত্তা থাঃরি। 36নাংরো ফাখাং যা পুয়েং সানাঃখ্রাং হিকরিলিঃ নাংরোমালিঃ য়াংপুয়েং সনাঃখ্রাংগো চিইমা থাঃগায়।”
37“লুঃউরোমা আপ্রইকো প্র মেপেকেকি, য়াংখা নাংরো আপ্রইকোলি প্রগেফুব্যায়ি। লুঃউরোগো ডেং রাঃরাফুছুলো মুতুওয়ককেকি, য়াংখা নাংরোলি ডেং রাঃথতিছুলো লুঃউরোচা তুওয়ককেফুব্যা। লুঃউরোগো খুওয়ং পিইগে-য়াংখা নাংরোলি খুওয়ং রাঃমি। 38লুঃউগো হ্লুউগি নাংরোলি প্রেং রাঃমি; আম্যাগ্রিই প্যাংলো, ছংলো ছংলো, রুওয়েংলো চিইঞ্যং প্যাংলো নাংরো তংমা থিঃ পিইমি আক্রংগা যাপুয়েং নাংরো খ্রাং পিইরিলি-য়াংপুয়েং নাংরোগোলি খ্রাং পিইফু।”
39য়াংনক যীশু তিবিরোগো সুসেংসাং পিইফু আতুওয়ক তুখুক উপমা গো তাংলো প্রালিইরে; “আকাইং তয়ক অর আখ্রাঃ আকাইং তয়ককো লাইং প্রানৈংলি লঃ? য়জংছুগি নৈয়কচুং তুওয়ংমা ক্যাফু মুহুক লঃ? 40তিঃবিচা ছারা থাক মিক্রিনৈং, য়িগিলি আব্রিচুং সুয়েংসাং রাঃলো তয়কমুক্যুয়েং তিঃবিরোচা কুও ছারা পুয়েং ফ্রইতি।
41“নাক ঞিং ম্যাকচিইমা ম্যাকখিইগোরা নাং ম্রাংরিব্যা, ছুগি নাক ম্যাকচিইমা ম্যাকখিই খ্রুউবচাগোগা যাফু মাম্রাংলিঃ? 42নাক ম্যাকচিইমা ম্যাকখিই খ্রুউচাগো যাখা নাং মাম্রাংলিঃ য়াংখা নাং যাপুয়েং প্যাংলো নাক ঞিংগো প্ররিলি, ‘নাক ম্যাকচিইমা যা ম্যাকখ্রুক হিকরি, লাঃ-য়াংচাগো থুওয়েবৈমি?’ ক্রংসুউদ, পাথামা নাং নাকমা ম্যাকখিইগো থুওয়ে বৈউসিই, য়াংখারা নাক ঞিংমা ম্যাকখিই থুওয়ে বৈফুচাগো আহ্লাপা ম্রাংমি।
43“আপাং অাকংমা মকং আসিই মিসিই অর মকং আপাংমালি আকং আসিই মিসিই। 44আসিইগো ম্রাংগি আপাংগো সিইনৈংরিব্যা। লুঃউরোচা চুউ নুুওয়েগা সাফাইসিই মাছুয়ে অর চুউ নুওয়েগা চব্যসিই মাছুওয়ে। 45আকং লুঃউরোচা কুও চিইমা হিকচা আকং চাঃগাগোরা প্ররি অর মকং লুঃউচা কুও চিইমা হিকচা মকং চাঃগাগোরা প্ররি। লুঃউরো চিই নুন্হুংমা যা হিকরিলি-খুনাংচা য়াংচারা প্ররিব্যা মুহুক লঃ।
46“নাংরো যাফু ঙাগো ফোরা, ফোরাছুলো ম্হেকেতিলি ক্রিগিগা ঙামা চাঃগাগো মকৈংগে? 47খ্যাংসুউমুছু ঙাদুঃ লাঃলো ঙা চাঃগাগো নাথংলো, চাঃগা আতৈং অলুক লুকতিছুগি-য়াংসুউচা যাপুয়েং লুঃউলি ঙা নাংরোগো প্র প্রামি। 48য়াংসুউচা দিঃ লুঃউ পুয়েং, যাসুউ ইং লুকফু আতুওয়ক তুওয়ং আনাক তুউলো ক্যক আথাকমা ছিবং তাংলিইরি। নক্কা ডঃ ফ্রইলিইরি অর খ্যংমা রিই লৈংচা য়াং ইংমা ক্যালিইরি য়িগিলি ইংচা তুখুউলি মফ্রলিই অাক্রংগা ইংচা কেগেং প্যাংলো আহ্লাপা লুকলিইরি। 49যাসুউ ঙামা চাঃগাগো নাথংরি অর চাঃগা আলৈই অলুক মুলুক, য়াংসুউচা দিঃ পুয়েং লুঃউ, যাসুউ ইংগো ছিবং আপি লুকলিইরি। নক্কা খ্যং রিইলৈংচা য়াং ইংমা লাঃলো ক্যালিইরি খ্যাং খ্যাং য়াং ইংচা প্রুলো প্যাং লাঃখারি।”
Currently Selected:
লূক 6: BBSRMZ
Highlight
Share
Copy
Want to have your highlights saved across all your devices? Sign up or sign in
