লূক 7
7
চৈই সুগ্রী ক্যুয়েং ঙ্রিংখ্যাইংসা ফ্রৈখ্রাং
(মথি ৮:৫-১৩)
1যীশুচা লুঃউরোবামা দিঃ চাঃগা ছুংব্রিনক কফরনাহূম ম্রুদুঃ লাঃলিইরি। 2য়াংদেমা তয়ক রোমীয় আয়ক তাড়া আথাক চৈইবুমা ক্যুওয়েং তয়ক কাইংথা আনিং মকং ফ্রইরো, সিইলো ফ্রইরো হিকরি। দিঃ ক্যওয়েংগো চৈইবুওচা কংগং ওয়াসানা হিকরি। 3চৈইবুওচা যীশু আক্রংলিলাগো ক্রারো, যীহুদিরো লৈগায়ক ওয়াগ্রিরো, যীশুবামা আফিঃ থাঃফু কিজু রুওয়াইলৈতি, যাফুলিছুগি যীশু লাঃরো য়াংসুউ ক্যওয়েংগো কেইংমাজিঞ্যং। 4য়াং ওয়াগ্রিরো যীশুবামা লাঃরো কংগং য়ুংক্রিসাফ্রাং আফিঃ থাঃরো প্রলিরি, “কুঃবাং যাসু কিজু দিঃ অলূকো লূকফুলি, য়াংসুউচা কিজু দিঃচা থঃতেংরি। 5আক্রংগা য়াংসুউ ঙারো লুঃউরোগো ওয়াসানা হিরি অর ঙারোমা তাঃরাচেরেকু য়াংসুউরা লূকরো পিলিরি।”
6য়াংখা যীশু য়াংসুউরোনা আতু লাঃলিইরি। যীশু য়াং ইংবামা রকখা, থুউ চৈবুচা য়াংসুউ মিছুয়িরোগো প্ররো রুওয়েলৈচাগা, “আস্যাং ফুরা,অর দুঃওখায়া মেখেংগিফি, আক্রংগা কুঃবাং ঙা ইংমা আখ্রি খ্যাফুবাং থঃমেতেং। 7য়জংকিজু কুবাংবাদুঃ লাঃলৈঞ্যং, থঃমেতেংছুরো, ঙা কুঃখ্যাং কোঃ ম্হেতি। কুঃবাং খুনাংগারা প্রফি, য়জংপ্রগিলি ঙা ক্যুওয়েংচা কেইংমালিফুব্যা। 8ঙা য়াং চাঃগাগো সিরি, আক্রংগা ঙালি লুঃউ চাঃগা আতৈং লূকরারি অর সুরুওয়িরোলি ঙা চাঃগা আতৈং লুকরারি। ঙা তয়ক ‘লালি’ প্রগি, য়াংসুউ লাঃরি। আখ্রা লুঃউগো ‘লাঃ’ প্রগি, য়াংসুউ লাঃরি। অর ঙা ক্যওয়েংগো ‘দিঃচা লূক’ প্রগি, য়াংসুউ য়াংচা লূকতি।”
9দিঃ চাঃগা ক্রারো যীশু কংগং এংঅলিরি অর যা লুঃউরো যীশু নক্কা লাঃগেলিরি, য়াংসুউরোগো প্রেং ক্রিরো যীশু প্রলিরি, “ঙা কুবাংরো প্ররি, ইস্রায়েলীরো আতুওয়ংমা, জং আক্যুংগ্রিইউ লুঃউ, ঙা তাখালি মাম্রাংসি।”
10চৈইবুও যাসুউরোগো রুওয়েলৈতিলি, য়াংসুউরো ইংদুঃ প্রেং লাহাখা, য়াং ক্যওয়েংগো কেইংমালো ম্রাংগেলিরি। ফোরাঃ যীশু মিছোমা সাঃগো আসাক পিইখ্রাং।
আস্যাং যীশু মিইছুমা সাঃগো আসাক হ্লুউলিইরি
11দিঃচা ফ্রপ্রিনক যীশু নায়িন খঃরো রুওয়া লেংদুঃ লাঃলিইরি। যীশু তিবিরো অর লুঃউ ম্যাজা লুঃউরোলি যীশু নক্কা নক্কা লাঃগেলিইরি। 12যাখা যীশু য়াং রুওয়া লেংখাওয়াবামা রকরি, য়াংখা লুঃউরোচা, আসিই তয়ককো রুওকরো প্রাংদুঃ য়ুলাগেতি। যা লুঃউচা সিইলাখালি, য়াংসুউচা আমিইমা নুংখ্যাংসাঃ হিকলিরি অর য়াং মিঃমালি মিছুমা হিকলিরি। রুওয়া লুঃউম্যারোলি য়াং মিছুমানা আতু হিকগেলিইরি। 13য়াং মিছুমাগো আস্যাং যীশু কংগং ওয়াসানা রকরো প্রলিরি, “মুঙুগিফি।”
14য়াংনক যীশু লাঃরো, য়াং আসিই তাংরো হিচা খেকু মেংলিরি। য়জংছুখা যাসুরো য়াং আসিইগো রুওয়ক লাঃগেতি, য়াংসুউরো তেংগেলিরি। যীশু প্রলিরি, “অ-অপ্যুও, ঙা নাককো প্ররি, থাঃ।”
15য়জং ছোখা যাসু সিইলিই য়াং লুঃউচা থাঃরো থৈলিরি অর চাঃগা প্রলিরি। যীশুচা আমিংগো য়াং সাঃগো এলিরি। 16য়জং ছোগে লুঃউ আপংরো চিইমা রুসিই তাঃরানা আক্রক রককেলিরি। য়াংসুউরো থাওরা ফুরাগো খিম্যুয়েংরো প্রগেলিরি, “ঙারোবামা আগ্রি আকিঃ রিসিতাবা রকরি। থাওরা ফুরা ওয়াসানা প্রুরো, য়াংসুউ লুঃউরোগো চিই খ্যারি।”
17যীশু অাক্রংলিলা চাঃগাচা যিহূদিয়া প্রিনিনা য়াং নেংবুনেংবা আলুং আঃরামা ক্যঞালিরি।
ফোরা যীশুবামা যোহন তিবিরো
(মথি ১১:২-১৯)
18-19রিঃঙুক মাঙ্গালা পিইসা যোহন তিবিরোচা দিঃ প্রাসানারোগো ক্রারো যোহনগো আসিক পিইগেলিইরি। য়াংখা যোহনচা য়াংসুউ নৈয়ক তিবিগো খঃরো, যীশুবাদুঃ দিঃ চাঃগা মিংফু রুওয়েলৈতি, “যাসুউ লাঃফু চাঃগা হিরিলি, য়াসু কোবাং লঃ, মুহুকি ঙারো অর আখ্রা লুঃউগো চংফু লঃ?”
20য়াং তিবিরোচা যীশুবামা লাঃরো প্রগেলিরি, “রিই খ্যুও পিইসা যোহন, কুবাংবামা ঙুরোগো মিংফু রুওয়েলৈচাগা, ‘ যাসু লাঃফু চাঃগা হিরিলি, য়াংসুউচা কোবাং লঃ? মুহুকি ঙারো অর আখ্রা লুঃউগো চংফুসি লঃ?”
21য়াংখা যীশু লুঃউম্যারোগো রঃগাগা অর কংগং মেখেংনৈং-মুতুয়িনৈং রঃগাগা কেইংমাজিলিরি অর নেঃ মকং কৈরো হিচা লুঃউরোগোলি আকং প্যাংলিরি অর লুঃউম্যা আকেইং রোগোলি, ম্যাকচি ফুওয়ংরো পিলিরি। 22দিঃচারো প্যাংব্রিনক যীশু যোহন তিবিরো আমিংগো আপ্রই পিইলিইরি, “নাংরো যা ম্রাংগেরি অর ক্রাগেরি য়াংচাগো লাঃরো যোহনগো প্রগেলি। য়াংসুউগো আসিক পিইগেলি, আকেইংরো ম্রাংরি, আঃকিরো লাঃনৈরি, আনুন কেঃসারো সেসেং ফ্রইতি, আপাংরো নাঃ ক্রারি, আসিইরো হ্রাং থাঃরি অর ছাংরিসারোমা আকং তাঃরাগো তাঃরা হঃ প্রারি। 23অর য়াংসুউচা কংগং কেইং কংরি, যাসু ঙাগো চিইমা য়ুউরো, তুজুংতুখু মতুওয়ক।”
24যোহন যাসুউরোগো রুওয়েলৈতিলি, য়াংসুউরো লাঃব্রিনক, যীশু লুঃউরোবামা যোহন আক্রলিলাগো য়ুউরো প্রলিরিচাগা, কুবাংরো যা ক্রিফু লাঃগেলিইলি? লিই থাগি লূকচা, রিই আপাংরোগো লঃ? 25য়াংচা মুহুকি যা ক্রিফু লাঃগেখিরিলি? আহ্লা আওয়ে আচা ওয়েরো লুঃউ তয়ককো? যাসুরো আওয়ে আফুদেং আফুদেং ওয়েতি অর আহ্লানা নিংরি য়াংসুউরোগা মাং নেংমা নিংরি। 26য়জংছুগি যা ক্রিফু লাঃগেখিরিলি? রিসিগো লঃ? হুকতি, ঙা কুবাংরোগো প্ররি, য়াংসুউচা রিসিইরো থাক আগ্রিই। 27যোহনচা য়াং লুঃউ, যাসুউ আক্রংলিলাগো য়ুউরো সেংস্যাংস কেইংমা রুইরো হিরি,
‘ক্রি, ঙা নাক হ্রিইগা,ঙাক তাঃরা প্রসাগো রুওয়েমি।
য়াংসুউ নাং হ্রিইগা লাঃরো, নাক লেংগো থুওয়ংমি।’
28ঙা কুবাংরোগো প্ররি, লুঃউ আতুওয়ংমা যোহন থাক আগ্রিই আকি তয়কলি মিহিক, য়িগিলি থাওরা ফুরা খেংমা যাসুউ আলুংসুউ থাক আঙিলি, য়াংসুউ তয়ং যোহন থাক আম্যা আগ্রিই আকি।
29(লুকরো চাঃসা লুঃউম্যারোনা ফেংদা ককসারোলি যোহান তাঃরাগো নাথংগেতি অর য়াংসুউবামা রিঃঙুক মাঙ্গালাগো লাক খেংরো, থাওরা ফুরাগো, তাঃরাস্যাংছুরো লাক খেং য়ুউগেতি। 30য়িগিলি ফরীশীরোনা কেইং ছারারোচা যোহনবামা রিঃঙুক মাঙ্গালাগো লাক খেং মুয়ুগেলিলো, কোরো কিজু থাওরা ফুরা আতুওয়ক কোগোকোঃ লাক মাখেংগেলিই।)
31যীশু অরলি প্রলিইরি, য়জংছুগি দিঃ খইমা লুঃউরোগো ঙা, যাসুউরোনা ন্হুংফুলি? য়াংসুউরো যা পুয়েংলি? 32য়াংসুউরোচা তুইরিচা ফ্রইতি, যা আস্যিরো জিইমা থৈইরো তয়ককো তয়ক খঃরো প্রগেতি, ‘ঙারো নাংরো কিজু প্রিই মুকতি য়িগিলি নাংরো যাফু মাঃকাগেলি, ঙারো ওয়েংনিখ্রাং ইঃ ছুরি, য়িগিলি নাংরো মুঙুগেলি।’ 33রিঃঙুক মাঙ্গালা পিসা যোহন লাঃরো ভংমুঃ অর চপ্যসিই আরিঃ মসকলিরো, কুবাংরো প্রগেলিরি, ‘য়াংসুউগো নেঃ কৈরো ফ্রমি।’ 34অর মনুসাওয়া সাঃচা লাঃরো, চাঃরি সকরিলো কুবাংরো প্রগেলিইরি, ‘ক্রি, দিঃ লুঃউচা ফুলুঃউ অর আয়ঃফা, ফেংদা ককসারো অর মকং লুঃউঃওরোমা মিছুয়ি।’ 35চুগি পৈঞানা যাসুউরো, লূকচাঃরি য়াংসুউরোগো ম্রাংরারিচাগা, পৈঞাচা আম্রেছুং।
ফারিশ্যে শ্যিমুং ইংমা ফোরাঃ যীশু
36ফরিশী তয়ক যীশুগো য়াংসুউনা থামাং চাঃফু কিজু পাংরিলি। য়াংখা যীশু য়াংসুউ ইংমা চাঃফুচাগো লাক খেংলিইরি। 37য়াং ওয়ামা মকং মিঃমা তয়ক হিকলিরি। য়াং মিঃমাচা ফরিশী ইংমা যীশু থামাং চাঃচাগো সিইরো, য়াংসুউচা পুফুয়ি গ্রুক তুগ্রুকমা, আমুয়িং নেংসা য়ুলাঃলিইরি। 38য়াং মিঃমাচা যীশু নক্কা লাঃরো, আখ্রিরাংমা রেঃলিরি অর ঙুরো ঙুরো ম্যাকরিনা যীশু ফুওয়াগো ছুওয়েলিরি। য়াংনক য়াং মিঃমাচা কো আগং ছেংবাংনা যীশু আখ্রিগো পুওয়েলিরি অর যীশু আখ্রিঃমা নেংরো, য়াং মিঃমাচা আমুয়িং নেংসাগো সুওয়েং খ্যালৈতি। 39যা ফরিশী যীশুগো থামাং চাঃফু খঃলিইরি, য়াংসুউ থুউ মিঃমা অলুককো ম্রাংরো চিইমা চিইমা প্রলিরি, “দিঃ লুঃউরা রিসি ফ্রইতিছুগি সিকলিফুগা, যাসু, যাপুয়েং মিঃমাচা কো আখ্রিগো ম্হেংরিলি, মিঃমাচাগা মকং।”
40যীশু য়াং ফরিশীরোগো প্রলিরি, “শিমোন, ঙা নাককো তুখু চাঃগা প্রফু হিরি।”
শিমোন প্রলিইরি, “ছারা, প্রবা।”
41যীশু প্রলিইরি, “তয়ক কামাস্যাং লুঃউগা, লুঃউ নৈয়কচা তেংগা খিইগেলিরি। তয়ক খিইরিচা ফ্রইতি ম্যুয়িং তেংগা ঙারা খিইরি অর তয়কচা ঙাছিঃ ম্যুইতেংগা খিইলিরি। 42য়াংসুউরো নৈয়কচুংমা মিরিংছেফু ক্ষেমতা মিহিলো, য়াং কামাস্যাংচা, ওয়াসাপ্রুরো নৈয়কচুংগো ম্রিংপিঃফুগা রুওয়েলিরি। য়জংছুগি প্রঃনা ক্রিমি, য়াংসুউরো নৈয়কমা যাসু আম্যা, য়াং কামাস্যাংগো ওয়াসানা হিকফুলি?”
43শিমোন প্রলিইরি, “ঙা চিইমাগা, যাসুমা আম্যা ম্রিংগো রুওয়েলিরি, য়াংসুউ আম্যা ওয়াসানা হিফু।”
যীশু য়াংসুউগো প্রলিইরি, “নাং আম্হেং প্ররি।”
44য়াং নক যীশু থুউ মিঃমাদুঃ, ম্যাক্হ্না প্রুরো শিমোনগো প্রলিরি, “নাং দিঃ মিঃমাগোগা ম্রাংরো হিকরি। ঙা নাক ইংদুঃ লাঃব্রিনক, নাং আখ্রি ছিইফু কিজু ঙাগো রিই মিপিলি, য়িগিলি দিঃ মিঃমা ম্যাকরিনা, ঙা আখ্রিগো ছুয়েরো, য়াংসুউ ছেংবাংনা পুওয়েলিইরি। 45নাং ঙাগো মেনেংলি, য়িগিলি ঙা ইংদুঃ লাঃব্রিনক কাবাং, য়াংসুউ ঙা আখ্রিইমা নেংলিরি। 46নাং ঙা আগংমা ছিই মিথিলি য়িগিলি য়াংসুউ ঙা আখ্রিই আঃপমা আম্যুই নেংসা সুওয়েং খ্যালিরি। 47য়জংকিজু ঙা নাককো প্ররিচাগা, য়াংসুউ আম্যা ওয়াসানা প্রারিলো ম্রাংচাগা, য়াংসুউ অাম্যা আপ্রইস্যাং ছুগিলি, য়াংসুউ আপ্রইকো খুওয়ং রুওয়েলৈপ্যা। যাসুগো আনৈং খুওয়ং রুওয়েলিরিলি, য়াংসুউ আনৈং আখ্য প্রালিইরি।”
48নক্কা যীশু য়াং মিঃমাগো প্রলিইরি, “নাং আপ্রইকো খুওয়ং রুওয়েপ্রিইব্যা।”
49যাসুউরো যীশুনা আতু চাঃফু থৈংগেলিইরি, য়াংসুউরো চিইমা চিইমা তুওয়ককেলিরি, “দিঃ লুঃউ, যাসুলি, যা লুঃউ আপ্রইকোতয়ং খুওয়ং রুওয়েতি?”
50য়াংখা যীশু য়াং মিঃমাগো প্রলিরি, “নাং ক্যুংরিলো, আপ্রইকা ক্যুওয়েব্যা। চিই আখেংসানা লাঃলিইফিই।”
Currently Selected:
লূক 7: BBSRMZ
Highlight
Share
Copy
Want to have your highlights saved across all your devices? Sign up or sign in
