লূক 5
5
তিবি খেং
(মথি ৪:১৮-২২; মার্ক ১:১৬-২০)
1তাখা আখিংখা যীশু গিনেষরৎ সুমুদ্রা কাইংনাঃমা রেঃরো হিকলিইরি। লুঃউরোচা থাওরা ফুরা ঈ তাঃরাদঃগো নাথংফু কিজু, যীশু লিফাকলাকচি তয়ককো তয়ক তুগেলিরি। 2য়াং আখিংমা, যীশুচা ম্রমা কাইংনাঃমা লং নৈছু ম্রাংলিরি। পৈসিরোচা, য়াং নৈছুগা ছাংলো কুয়েং ছিইগেতি। 3য়াংখা যীশু শিমোন লংমা তাকলিরি অর শিমোনগো কেইংনাগা তিফি আওয়িদুঃ লংগো য়ুফু কিজু প্রলিরি। য়াংনক যীশু লংমা থৈরো, লুঃউরোগো সুয়েংসাং পিলিরি।
4চাঃগা তুংব্রিনক যীশু শিমোনগো প্রলিইরি, “রিই আনাকমা লাঃরো ঙা থংফু কিজু, নাংরো কুয়েং খ্যাগে।”
5শিমোন প্রলিরি, “ছারা, তিঙিপেলুং কংগং দুখাওয়া খেংলিইরি, তগংলি মিতিনৈলি। য়িগিলি কুঃবাং চাঃগা আতৈং, ঙা কুয়েং খ্যাফু।”
6কুয়েং খ্যাব্রিনক, য়াংদেমা কংগং আম্যা ঙা ক্যালিরি, য়াং ঙানা কুয়েং চুকলো ফ্ররি। 7য়াংখা য়াংসুউরো আকু আঞিং পিইফু কিজু আখ্রা লংমা মিছুয়িইরোগো আলাক প্রারো খঃলিইরি। য়াংসুউরো লাঃরো লং নৈলংমা কংগং আম্যা ঙা তাংগেরি, য়াং আক্রংনা লং তয়ং ন্হফু ফ্রলিরি। 8য়াংচাগো ম্রাংরো শিমোননা পিতরচা যীশু হ্রিঃগা পাব্রা ওয়েরো প্রগেলিরি, “আস্যাং, ঙা আপ্রইস্যাং, ঙা নেংগা লাঃলিই।”
9য়ল্হক ঙাঃ ক্যাচাগো ম্রাংরিখা শিমোন-পিতরনা য়াংসুউমা মিছুয়িরোচা কংগং এংঅগেলিইরি। 10শিমোননা পংলো কুং প্রুককেসাঃ যাকোবনা যোহন নাঃমিনা সিবদিয় সাঃ নৈংয়কলি এংঅগেলিইরি। য়াংখা যীশু শিমোনগো প্রলিইরি, “মক্রককি; আগোক কাবাং নাংচা থাওরা ফোরা আতুওয়ক লুঃউ ফেংফিই।”
11য়াংনক য়াংসুউরো লংরোগো কেংনাদুঃ য়ুউ লাঃগেতি অর হিকচা আলুংগো বৈরো যীশু নক্কা লৈকেরি।
সানাসিঃ নৈয়ক ঙ্রিংখ্যাইংসা ফ্রৈচা
(মথি ৮:১-৪; ৯:১-৮; মার্ক ১:৪-১২)
12যীশু তাখাখা রুওয়া তুওয়াদুঃ লাঃখারি। য়াংদেমা লুঃউ তয়কমা, কাইংথা অলুং খুরুকসং কেইরো হিকলিইরি। যীশুগো ম্রাংরো, য়াংসুউ ওয়েরো আপ্রইেংপ্রেং শ্যিইখুরো প্রলিরি, “আস্যাং ফুরা, কুবাংমা ছেংদা হিকগি, ঙাগো আকং লুকনৈংরি।”
13যীশু আলাক ল্হেংরো, য়াংসুউগো ম্হেংরো প্রলিইরি, “ঙা য়াংচাগো লুরি, নাং সেসেং ফ্রলিফি।” অর খ্যাং খ্যাং য়াংসুউচা আকং ফ্রলিরি।
14যীশু য়াংসুউগো দিঃ আনা পিইলিইরি, “দিঃ চাঃগাগো তয়ককোলি মঃপ্রগি, নাংচা য়েপুরোহিরোবামা লাঃরো কুঃদৈং প্রালি। য়াংনক সেসেং ফ্রফু কিজু, মোশি যা যা আল্হুউ পিরাফুছুরিলি, য়াং আল্হুউগো পিইলিই। য়জংছুগি নাংচা, লুঃউরোবামা তাং প্রানৈমি, নাং কংব্যাচাগো।”
15য়িগিলি যীশু তাঃরাচা অরআম্যা ক্যঞালিইরি। যীশু চাঃগাগো নাথংফু কিজু অর রগাগা কংফু কিজু লুঃউম্যারোচা যীশুবাদুঃ লাঃগেলিরি। 16যীশুচা সাসাক তিদিংচিছি আঃরামা লাঃরো ছুউকতংরি।
17তারাক যীশু যাখা সুয়েংসাং পিইরিলি, য়াংখা ফরিশীরোনা কেইংছারারো য়াংদেমা থৈইরো হিকলিইরি। গালীল প্রিনিমা আম্যুও আম্যুও রুওয়া অর যিহুদীয়া প্রিনি অর যিরুশালেং ম্রুগা য়াংসুউরো লাঃগেতি। সানাসিরোগো কেইংমাজিফু ফুরাস্যাং তেংখু আঃআচা, যীশুবামা হিকলিরি।
18য়াংখা লৈগায়ক লুঃউচা তয়ক কাইংথা কুলাক আসি সানাসি তয়ককো, ওয়িচা কেএমা রুওয়করো য়ুহাগেলিরি। য়াংসুউরো য়াং সাঃনাসিগো আথিদুঃ য়ুউ লাঃরো, যীশু হ্রিইগা থাঃফু ক্রেংগেলিইরি। 19য়িগিলি লুঃউ আম্যা কিজু, আথিদুঃ লাঃফু লেং মাঃরাগেলি। য়াংখা য়াংসুউরো ইংখংদুঃ তাককেলিরি অর ইংখংমা ফুংরো হিচাগো রুইরো, ওয়িরানা আতৈং য়াং সানাসিগো, লুঃউম্যা আলিমা প্যাংরো, যীশু হ্রিইগা খ্যালৈতি। 20যীশু য়াংসুউরো আক্যুংগো ম্রাংরো প্রলিইরি, “মিকছুয়ি, নাং আপ্রইকো খুওয়ং রুওয়েরি।”
21য়জংছুখা কেইংছারোরোনা ফরীশীরোচা চিইমা চিইমা ছাংখ্রাংগেলিইরি, “দিঃ লুঃউচা যাসুউলি, যা লুঃউ থাওরা ফুরাগো সিরিই ফ্যাকতি? থাওরা ফুরাগো আপি, অর যাসুউলি, আপ্রইইকো খুওয়াং রুওয়েনৈরিলি?”
22য়াংসুউরো চিইমা চিইমা যা চেংজাগেতিলি, যীশু য়াংচাগো সিইলো প্রলিরি, “কুবাংরো চিইমা চিইমা যাফু, য়াং চাঃগারোগো চেংজাগেতিলি? 23যা চাঃগাচা আরুয়িলি, ‘নাং আপ্রইকো, খুওয়ং রুওয়েলৈতি,’ য়াংচা মুহুকিলি ‘নাং থাঃরো, লিঃ’? 24ছুগি কুবাংরো সিঅং, দিঃ কাবামা আপ্রইকো খুওয়ং রুওয়েফু ক্ষেমতাচা মনুসাওয়া সাঃমা হিরি”- দিঃ ল্হক প্ররো, যীশুচা য়াং সানাসিগো প্রলিরি, “ঙা নাককো প্ররি, থাঃ, নাক ওয়িইরা অাখাংগো কক য়ুলো ইংদুঃ লাঃলি।”
25খ্যাং খ্যাং য়াং লুঃউচা, আলুংসো হ্রিইথাকমা থারো রেলিইরি, অর যা ওয়িইখাংমা য়াংসুউ ওয়িইলিইরিলি, য়াংচাগো কক য়ুউরো, থাওরা ফুরাগো খিম্যুয়েংরো খিম্যুয়েংরো ইংদুঃ লাঃলিইরি। 26য়জংছুগি আলুংসুউ কংগং এংঅগেলিরি অর রুসিইতারা আক্রক থাঃরো থাওরা ফোরাগো খিম্যুয়েংরো প্রগেলিরি, “গানি ঙারো, যা এংঅফুয়ি অলুক ম্রাংগেরি!”
ফোরাঃ যীশু লেবিগো খলিইরি
(মথি ৯:৯-১৩; মার্ক ২:১৩-১৭)
27য়াং নক্কা যীশুচা প্রাংদুঃ লাঃলিইরি অর ফেংদা ককচা ইংমা লেবি খঃরো তয়ককো, ফেংদা ককসা তয়ককো থৈইরো নিংচাগো ম্রাংলিরি। যীশু লেবিগো প্রলিরি, “লা, ঙা তিবি ফ্র।” 28য়জংছুখা লেবিচা থাঃলিইরি অর য়াংসুউমা হিকচা আলুংচাগো বৈরো, যীশুনা লাঃলিইরি।
29নক্কা লেবি যীশু কিজু, কো ইংমা আগ্রি আমাংজা তুখু লূকলিইরি। য়াংসুউরোনা আতুউ ফেংদা ককসা লুঃউম্যারোনা অর আখ্রা লুঃউলি চাঃআফু থৈগেলিরি। 30য়াংখা ফরীশীরোনা য়াংসুউরো আফুয়িইমা কেইং ছারারো, মুসোঃমাসা তুইরো, যীশু তিবিরোগো প্রলিরি, “নাংরো ফেংদা ককসারোনা অর মকং লুঃউরোনা যাফু আঃচাঃ-আসক প্রুককেতিলি?”
31যীশু য়াংসুউরোগো প্রলিইরি, “কেইংমারি লুঃউরো কিজু ছিঃই সামাগো মুলু প্রফুছুগি সানাসিরো কিজুরা অলুহিকচা। 32আপ্রইকা চিই হ্লিফু কিজু ঙা সুধগংরোগো খঃফু লাঃচা মুহু প্রফুছুগি আপ্রইস্যাংরোগোরা খঃফু লাঃচা।”
আচাঃ স্যংখ্রাং আক্রংগো সুয়েংসাংপিইখ্রাং
(মথি ৯:১৪-১৭; মার্ক ২:১৮-২২)
33নক্কা য়াং গংখ্যুক কেইংছারারো যীশুগো প্রগেলিরি, “যোহন তিবিরো সাসাক আঃচা স্যংরি অর ছুতংগেতি অর ফরিশি তিবিরোলি য়াং পুয়েং লুক্কেতি ছুগি কুঃবাং তিবিরোগা তাখালি আঃচা আসককো মিপিগে।”
34যীশু য়াংসুউরোগো প্রলিইরি, “মাংগলাছং সামাকলং আতুউ নিংলো য়াং সামাক লংনা আতুউনিংসা লুঃউরোগো আচাঃ স্যংজি নৈংরিলঃ? 35য়জং ছোগে জং আখ্যিং লাইমে য়াংখা মাংগলাছং সামাকলংগো য়সু আফাসাঃরোগো খওয়ালো য়ুমে, য়াং আখ্যিংখা য়সুরো আচাঃ স্যংলিমে।”
36য়াংনক সুয়েংসাং পিইফু আতুওয়ক যীশু য়াংসুউরোবামা দিঃ উপমাগো তাং প্রালিইরি, “আসৈই আওয়েকো ছুকরো তয়কলি আহং আওয়েমা মাঃফা আক্রংগা য়াংচা প্যাংগি য়াংসুউগা আসৈই আওয়েকো ছুকরো বৈতি; অর য়াং আসৈই আওয়ে ফাচালি আহং আওয়েনা মুতুউ। 37আসৈ চাপ্যৈ আরেগো তয়কপাং আহং আরি ওয়িইমা মাথাঃ, থাঃরে ছোগে আসৈ আরেমা আরি ওয়িচা পওয়ংলো লাঃরে। য়জংকিজু আরেলেঃ ক্যালো লাঃরে, ওয়িইরোলি প্যাক লাঃরে। 38আসৈ চব্যই আরিগো আসৈ আরি ওয়িইমা থারারি। 39আহং চব্যই আরি সকপ্রিইগি অর তয়কপাং আসৈ চব্যই আরিগো সুংফো মিক্রিগে, আক্রংগা য়াংসুউচা প্ররি, ‘আহংচারা আকংছুং।’”
Currently Selected:
লূক 5: BBSRMZ
Highlight
Share
Copy
Want to have your highlights saved across all your devices? Sign up or sign in
